Mɑ tɔɔsǝɣɩ mǝ ɩfepile wɑɑtʋ tɑɑ,

ɩsǝnɑ ɩ́ kɑ sɔɔlɑ-m,

nɑ mǝ lǝsɑɣɑ sʋʋ-m ɩsɩɩ tɑŋ tɔ.

Wɑɑtʋ ɩnǝɣɩ ɩ tǝŋɑɣɑ-m wʋlɑɣɑ tɛtʋ*fɑ* tɑɑ,

timpi hɑlǝm fɛɩ tɔ. ɑwʋlɑɣɑ tɛtʋ: Tɛtʋ nti tǝ tɑɑ tɛʋ ɩɩ nɩɩkɩ, pʋlʋpʋ ɩɩ nyɔɔkɩ tɔɣɔ pɑ yɑɑ mpʋ. Nɔɣɔlʋ ɩɩ hɑlǝɣɩ pʋlʋɣʋ tǝnɑ. Yǝlɑɑ ɩɩ tɩɩ cɑkɩ.

3 Ɩsɛɣɛlɩ nyǝ́mɑ mɛ ɩ

kɑ kɛ́ mɑ tike mɑ nyǝ́mɑ kɛ́,

nɑ ɩ́ wɛ ɩsɩɩ mɑ hɑlǝm kɑncɑɑlɑɣɑ kʋlʋlʋm.

Mpɑ pɑ tokɑɣɑnɑ-mɛ tɔ,

pɑ sʋʋkɑɣɑ tɔm kɛ́ nɑ ɑsɑlɑʋ tiiki pɑ tɔɔ.

Tɑcɑɑ mɑ́ mɑ yɔɣɔtǝnɑ mpʋ.

4 Yɑkɔpʋ lʋlʋɣʋ nyǝ́mɑ,

Ɩsɛɣɛlɩ kpekɑ nyǝ́mɑ mɛ,

ɩ́ nɩɩ Tɑcɑɑ kʋyɔɣɔtʋtʋ.

5 Ɩsɑɣɑtʋ ntiɣi mǝ́ cɑɑnɑɑ nɑwɑ mɑ kiŋ

nɑ pɑ́ hɑtǝlǝɣǝnɑ-m,

nɑ pɑ́ tǝŋǝɣɩ kpɛtɛ nyǝm,

nɑ mǝ mɑɣɑmɑɣɑ ɩ́ pǝsǝɣɩ kpɛtɛ?

6 Ɩ́ tɑ́ pɔɔsɩ sɩ: Tɑcɑɑ wɛ le?

Mɑ́ lǝsǝnɑ-mɛɣɛ Icipiti tɛtʋ tɑɑ,

nɑ mɑ́ tiiki-mɛɣɛ wʋlɑɣɑ tɛtʋ tɑɑ

timpi tɛʋ fɛɩ tɔ.

Kʋtɑɑlomiŋ nɑ sǝm pǝ wɛnnɑ,

yǝlɑɑ fɛɩ tǝnɑ.

Pǝyele nɔɣɔlʋ ɩɩ tǝŋǝɣɩ mpʋ.

7 Anɩ mɑ́ kɔnnɑ-mɛɣɛ tɛtʋ nti

tǝ wɛ ɩsɩɩ tɩɩŋ tɑɑlɛ

tɔ tǝ tɑɑ sɩ ɩ́ tɔɣɔ tǝ pee

nɑ tǝ kʋlʋlʋm kʋpɑm.

Amɑ ɩ́ kɔmɑ ɩlɛnɑ ɩ́ pilisi

mɑ tɛtʋ nɑ ɩ́ pǝsɩ mɑ nyǝm kɛ ɑcɑɑlǝtʋ pʋlʋpʋ.

8 Kɔtǝlɑɑ nɑ́ tɑ́ pɔɔsɩ sɩ: Tɑcɑɑ wɛ le?

Kiiu sɩɩlɑɑ mpɛ pɑ tɑ nyɩ-m.

Awulɑɑ nɑ́ lɩɩkɩ mɑ wɑɑlɩ.

Tʋɣʋ kʋlɑlɑɑʋ Pɑɑlɩ tɔm kɛ

Ɩsɔ kʋyɔɣɔtʋtʋ tɛlǝsǝlɑɑ

nɑ́ heelɑɣɑ nɑ pɑ́ tǝŋǝɣɩ.

Pǝyele kʋlɛ kɩɩ wɑɑsǝɣɩ pʋlʋ.

9 Pǝ tɔɔ kɛ́ mɑɑ hʋʋnɑ mǝ nɑ mǝ piyɑ tɔtɔ.

Tɑcɑɑ mɑ́ mɑ yɔɣɔtǝnɑ mpʋ.

10 Ɩ́ polo lʋm tɑɑ tɛtʋ nti pɑ yɑɑ sɩ

Kitim tɔ, nɑ ɩ́ nɑ́.

Ɩ́ tili Ketɑɑ tɛtʋ tɑɑ nɑ ɩ́ feŋ teu

nɑ ɩ́ nɑ́ sɩ ɩsǝnɑ pǝ wɛ cǝnɛ tɔ,

nɑ tǝnɑ, pǝ wɛ kʋlʋm yee?

11 Ɩ́ kɑ́ nɑ́ sɩ too tɔ,

piitim nɑpǝlɩ pǝ tɑ lɑɣɑsǝtɑ pǝ tɩɩŋ kʋlɑlɑɑŋ,

pɑɑ nɑ ɩ tɑ kɛ ɩsɔnɑɑ tɔ.

Amɑ mɑ yǝlɑɑ lɑɣɑsɑ mɑ́ nɑ tɩɩŋ kʋlɑlɑɑŋ.

Pǝ́cɔ́ tɩɩŋ ɩnɩ ɩɩ wɑɑsǝɣɩ pʋlʋ.

12 Ɩsɔtɔnʋɣʋ lɑŋlɛ ɩ́ cɛnɑ tɔm ntɩ

nɑ kʋ́ selinɑ sɔɣɔntʋ.

Tɑcɑɑ mɑ́ mɑ yɔɣɔtǝnɑ mpʋ.

13 Pǝ tɑɣɑ pʋlʋ,

mɑ yǝlɑɑ mɛ ɩ́ wɑkǝlɑ tɔm nɑɑlɛɣɛ.

Ɩ́ lɔwɑ mɑ wei mɑ kɛ-mɛɣɛ

weesuɣu lʋm sɛɛlʋ tɔ.

Ɩlɛnɑ ɩ́ huli mǝ tǝɣɩ hilɑ wenɑ ɑ yɑwɑ pɔɣɔlɛɛ

nɑ lʋm ɩɩ cɑkɩ ɑ tɑɑ tɔ.

14 Ḿpʋ́ɣʋ́ Tɑcɑɑ tɔmɑ sɩ:

Ɩsɛɣɛlɩ nyǝ́mɑ mɛ ɩ́ kɛ́ yomɑɑ yɑɑ kɑsɑɣɑmpiyɑ.

Nɑ piitimnɑɑ lɛlɑɑ tɔkɩ mǝ tɔɔ?

15 Nɑ pɑ́ kiisiɣi nɑ pɑ́ nyɩɩsǝɣɩ

mǝ tɔɔ ɩsɩɩ tɔɣɔlɑsɩ piyɑ.

Nɑ pɑ́ kpiisiɣi mǝ tɛtʋ.

Pɑ nyɑɣɑsɑ mǝ ɑcɑlɛɛ kɛ kɔkɔ, nɔɣɔlʋ fɛɩ.

16 Nɑ pǝ́ kpɛŋnɑ Mɑmfi nɑ Tɑpɑnɛɛsɩ

pǝ ɑcɑlɛɛ nyǝ́mɑ nɑ pɑ́ yɔkǝɣɩ mǝ nyɔɔŋ.

17 Ɩ́ lɔwɑ mɑ́ wei mɑ tiikɑɣɑ-mɛɣɛ

mpɑɑʋ kʋpɑŋkʋ tɑɑ tɔ.

Pǝ tɔɔ kɛ́ mpʋ ɩnɩ pǝ mɑɣɑnɑ-mɛ.

18 Ɩlɛ pǝnɛntɛ ɩ́ puki Icipiti sɩ ɩ́ lɑkɩ we?

Nili pɔɣɔ sɔsɑɣɑ lʋm nyɔɔʋ nɑ?

Yɑɑ ɩ́ puki Asilii sɩ ɩ́ lɑkɩ we?

Ɩfǝlɑɑtɩ pɔɣɔ sɔsɑɣɑ lʋm nyɔɔʋ nɑ?

19 Mǝ mɑɣɑmɑɣɑ mǝ ɩsɑɣɑtʋ

nɑ mǝ wɑɑlɩ lɩɩʋ kɑ́ hɔnɑ mǝ ŋkpɑŋʋɣʋ.

Ɩlɛnɑ ɩ́ nɑ́ nɑ ɩ́ cɛkǝnɑ sɩ

ɩsǝnɑ ɩ́ lɔwɑ mǝ Ɩsɔ Tɑcɑɑ mɑ́

nɑ ɩ́ fɛɩnɑ mɑ sɔɣɔntʋ tɔ pǝ kɛ́ ɩsɑɣɑtʋ kɛ́.

Atɛ nɑ ɩsɔtɑɑ pǝ tʋ Tɑcɑɑ mɑ́ mɑ yɔɣɔtǝnɑ mpʋ.

20 Ḿpʋ́ɣʋ́ Tɑcɑɑ tɔmɑ sɩ:

Hɑtoo lɔŋ kɛ Ɩsɛɣɛlɩ nyǝ́mɑ mɛ

ɩ́ fɑɣɑnɑ-m sɩ ɩ́ cɑkɩ mǝ tɩ tɔɔ.

Ɩlɛnɑ ɩ́ kpɑɑkɩ pulɑsɩ tɔɔ,

nɑ tɩɩŋ kʋlɔpǝŋ tɛɛ,

nɑ ɩ́ luŋiɣi tɩɩŋ nɑ ɩ́ lɑkɩ pǝ wɑsɑŋkɑlǝtʋ.