1 Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, wei ɩ́ yelɑ heeŋ kɑlǝkʋ nɔnɔɣɔ kɛ sʋʋnɑʋ nɑ ɩ́ ŋmɑɑnɑ tiili tɔɔ nɑ ɩ́ sʋʋ tɔ, pʋntʋ kɛ́ ŋmɩɩlʋ nɑ wɑkǝllʋ kɛ́. 2 Amɑ wei ɩ tǝŋǝɣǝnɑ nɔnɔɣɔ nɑ ɩ́ sʋʋ tɔ, pʋntʋ ntɛ́ tiikulu. 3 Nɔnɔɣɔ tɑŋlʋ tʋlǝɣɩ-ɩ nɑ ɩ́ sʋʋ. Heeŋ nyǝmɑ́ ɩ nɔɣɔ. Ɩ kɑlǝɣɩ ɩ heeŋ hǝlɑ kɛ kʋlʋm kʋlʋm nɑ ɩ́ lɩɩkǝnɑ-ɩ ɑwɑlɩ. 4 Wɑɑtʋ wei ɩ tɛŋ ɩ heeŋ ɩnɩ ɩ tǝnɑɣɑ lɩɩnɑʋ tɔ, ɩlɛnɑ ɩ́ tɛɛ-ɩ nɔɣɔ nɑ heeŋ nɑɑ tʋ ɩ wɑɑlɩ. Pǝ tɑɣɑ pʋlʋ, ɩ nyǝmɑ́ ɩ nɔɣɔ tɔ pǝ tɔɔ. 5 Amɑ ye kpɑɩ tʋ, ɩ kɑɑ tǝŋ ɩ́lɛ́, hɑlɩ ɩ kɑ́ se-ɩ sɔsɔm kɛ́. Mpi tɔ, ɩ tɑ nyɩ kpɑɩ nyǝmɑ́ nɔɔsɩ tɔ se.

6 Yesu kɛɛsɑ-wɛɣɛ tǝnɛ ɩnɩ. Amɑ pɑ tɑ cɛkǝnɑ tǝ hʋwɛɛ.

7 Ḿpʋ́ɣʋ́ Yesu tɑsɑ yɔɣɔtɑɣɑ sɩ: Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ. Mɑɣɑlɛ heeŋ kɑlǝkʋ ŋkʋ kʋ nɔnɔɣɔ. 8 Pɑ tǝnɑ mpɑ pɑ lɑɑlɑ-m kɔntɛ tɔ, pɑɑ kɛ́ ŋmɩɩlɑɑ nɑ wɑkǝllɑɑ kɛ́, heeŋ tɑ tɩɩ nɩɩnɑ-wɛ. 9 Mɑɣɑlɛ nɔnɔɣɔ, wei ɩ́ tǝŋnɑ mɑ tɔɔ nɑ ɩ́ sʋʋ, pɩɩ yɑ ɩ nyʋɣʋ. Ɩ kɑ́ sʋʋkɩ nɑ ɩ́ lɩɩkɩ, nɑ ɩ́ hikiɣi nyɩɩtʋ kʋpɑntʋ. 10 Nmɩɩlʋɣʋ nɑ lɛntʋɣʋ nɑ wɑkǝlʋɣʋ tɔɔ tike kɛ ŋmɩɩlʋ nɑ́ kɔŋ. Amɑ mɑ kɔmɑɣɑ sɩ mɑ heeŋ ɩ́ wɛɛ ɑlɑɑfǝyɑ tɑɑ kɛ́ tɑm tǝpɔkɛɛɛ.