1 Ḿpʋ́ɣʋ́ Yosuwee kʋsɑ feŋlɑɑ nɑɑlɛɣɛ mukɑɣɑ kɛ Sitim timpi pɑɑ sikɑɑ tɔ sɩ: Ɩ́ polo nɑ ɩ́ feŋ Kɑnɑɑŋ tɛtʋ ntɩ nɑ Yeliko ɩcɑtɛ. Pɑ tɑlɑ ɩcɑtɛ ntɛ́, ɩlɛnɑ pɑ́ sʋʋ ɑpɑlɑɑ tǝnɑ ɑlʋ nɔɣɔlʋ ɩ tɛɣɛ ɑhoo. Pɑ yɑɑ ɑlʋ ɩnɩ sɩ Lɑhɑpɩ. 2 Mpʋɣʋlɛ yǝlɑɑ tɑɣɑsɑ Yeliko wulɑʋ sɩ: Ɩsɛɣɛlɩ yǝlɑɑ kɔmnɑ ntɛɣɛ tɛtʋ feŋuɣu. Hɑlǝnɑ pɑ́ sʋʋ cǝnɛɣɛ ɑhoo ɑnɛ. 3 Tǝnɑɣɑ, wulɑʋ tilɑɑ nɑ ɩ́ heeli Lɑhɑpɩ sɩ: Yǝlɑɑ mpɑ ɩnɩ pɑ wɛ nyɑ́ tɛɣɛ mpʋ tɔ, pɑ kɛ́ tɛtʋ feŋlɑɑ kɛ́. Mpʋ tɔ, lǝsɩ-wɛɣɛ cǝnɛ.

4 Mpʋɣʋlɛ ɑlʋ ɩnɩ ɩ́ ŋmɛsɑ ɑpɑlɑɑ mpɛ pɑ tɔɔ, nɑ ɩ́ cɔ wulɑʋ tillɑɑ sɩ: Tɑmpɑnɑ yɑɑ, yǝlɑɑ mpɛ pɑ tɑlɑ mɑ tɛ. Amɑ mɑ tɑ nyɩ-wɛ sɩ le nyǝ́mɑ tɔ. 5 Ahoo yuwɑ nɑ pɑ́ tǝkǝɣɩ ɩcɑtɛ nɔnɔɣɔ, ɩlɛnɑ pɑ́ lɩɩ. Mɑ tɑ nyɩ ŋku pɑ tǝŋɑɑ tɔ. Ye ɩ́ tǝŋɑ pɑ wɑɑlɩ kɛ lɔŋlɔŋ, ɩ́ kɑ́ hiki-wɛ.

6 Pǝyele Lɑhɑpɩ kɑ kpɑɑsɑ feŋlɑɑ mpɛɣɛ ɩ kutuluɣu pɑtɑ tɔɔ kɛ́, nɑ ɩ́ ŋmɛsɩ-wɛɣɛ ŋmʋntʋ nti pɑ yɑɑ sɩ lɛŋɑlɛŋ: Lɛŋ, pɑ tɛ ŋmʋntʋ toŋ nyǝntʋ nɑtǝlǝɣɩ pɑ́ tɔ tǝ tɛɛ. yɑɑ sɩ lɛŋ. Pɑ lʋʋkɩ-tǝɣɩ pɔɔŋ kɛ́ Ɩsɩɩ kponkpontu, nɑ pǝ pɔɔŋ nɑ pǝ tokonɑɑ kɛ́ liɣitee wontu kɛ́. 7 Mpʋɣʋlɛ wulɑʋ tillɑɑ kpɑɣɑ mpɑɑʋ ŋku pɑ tɛsǝɣǝnɑ Yɑɑtɑnɩ pɔɣɔ tɔ, nɑ pɑ́ se feŋlɑɑ wɑɑlɩ. Ɩlɛnɑ tɑŋlɑɑ tɑɣɑnɩ ɩcɑtɛ nɔnɔɣɔ kɛ tǝkʋɣʋ. 8 Pǝ wɑɑlɩ kɛ́ Lɑhɑpɩ kpɑ feŋlɑɑ cɔlɔ nɑ pǝ́cɔ́ pɑ́ too, nɑ ɩ́ tɔ-wɛ sɩ: 9 Mɑ nyǝmɑ́ sɩ Tɑcɑɑ tʋwɑ tɛtʋ tǝnɛɣɛ mǝ niŋ tɑɑ. Mǝ sɔɣɔntʋ sʋʋ ɩcɑtɛ tǝnɛ tǝ nyǝ́mɑ kɛ́ nɑ pɑ́ seliɣi. 10 Tǝ nɩɩwɑ ɩsǝnɑ, wɑɑtʋ wei ɩ́ lɩɩ Icipiti tɑɑ tɔ, Ɩsɔ fɑɣɑ Sǝsǝncɑɑsɩ teŋku lʋm tɑɑ, nɑ mɩɩ tɛɛ puɣulɑɣɑ tɔɔ tɔ. Tǝ nɩɩwɑ tɔtɔɣɔ, ɩsǝnɑ ɩ́ kʋwɑ Amolii nyǝ́mɑ ɑwulɑɑ sɔsɑɑ Sihoŋ nɑ Oki, nɑ ɩ́ wɑkǝlɩ pɑ nyǝm tǝnɑɣɑ pɔɣɔ wɑɑlɩ tɔ. 11 Tǝ nɩɩ-tɩ, ɩlɛnɑ tɑ ɑpɑlʋtʋ le-tʋ, nɑ tɑ́ tɛɛ sʋʋkǝnɑ-mɛ. Mpi tɔ, mǝ Ɩsɔ Tɑcɑɑ tike ntɛ́ ɩsɔtɑɑ nɑ ɑtɛ pǝ tʋ. 12 Pǝnɛntɛ mɑ wiikinɑ-mɛ sɩ, ɩ́ tuunɑ Tɑcɑɑ sɩ ɩ́ kɑ́ hʋ́lɩ́ mɑ cɑɑ tǝyɑɣɑ kɛ suulu ɩsɩɩ mɑ hʋlʋɣʋ-mɛ tɔ. 13 Ɩ́ lɑ mpi pɩɩ tʋ-m nɑɑni sɩ ɩ kɑɑ kʋ mɑ cɑɑ, nɑ mɑ too, nɑ mɑ tɑɑlʋnɑɑ, nɑ mɑ kɔɣɔnɑɑ, nɑ mɑ newɑɑ nɑ pɑ nyǝmɑnɑɑ tǝnɑ tɔ.

14 Mpʋɣʋlɛ ɑpɑlɑɑ mpɛ pɑ cɔ-ɩ sɩ: Ye n tɑ tɑɣɑsɩ tɑ́ tɔm tɑ́ sɔɔlʋ pɩɩwɑɣɑ sɩ tǝ́ sɩ mǝ sǝm, nɑ pǝ́ kɔmɑ nɑ Tɑcɑɑ tʋ tɑ́ niŋ tɑɑ kɛ́ tɛtʋ tǝnɛ tɩɩ lɑ-ŋ kʋpɑntʋ kɛ́, tǝ kɑɑ kpɑlɩ nyɑ́ kʋcɔɔʋ.

15 Mpʋɣʋlɛ Lɑhɑpɩ tisɑ ɑpɑlɑɑ mpɛ nɑ ŋmǝnɑɣɑ nɑ ɩ kutuluɣu pǝtote. Mpi pǝ tɔɔ tɔ, kɩɩ wɛ ɩcɑtɛ koluŋɑ tɔɔ kɛ́. 16 Ɩlɛnɑ ɩ́ heeli-wɛ sɩ: Ɩ́ tǝŋ pʋɣʋ mpɑɑʋ, pǝ́ tɑɑ kɔɔ nɑ mpɑ pɑ sewɑ mǝ wɑɑlɩ tɔ pɑ́ suli-mɛ. Ɩ́ ŋmɛlɩ pʋɣʋ tɑɑ tǝnɑɣɑ kʋyɛɛŋ tooso nɑ mǝ wɑɑlɩ selɑɑ tǝnɑ tɛ mǝlʋɣʋ. Pǝlɛ pǝ wɑɑlɩ, ɩlɛ ɩ́ kɑ́ tʋ́ mǝ mpɑɑʋ.

17 Ntɛnɑ ɑpɑlɑɑ mpɛ pɑ tɔmɩ-ɩ sɩ: Nyǝnɩ, ɩsǝnɑ n kɑ́ lɑ nɑ tǝ́ tɔkǝnɑ tuunɑʋ mpi n yelɑɑ nɑ tǝ́ tuunɑ tɔɣɔlɔ. 18 Wɑɑtʋ wei tɩɩ sʋʋ tɛtʋ tǝnɛ tǝ tɑɑ tɔ, tǝ́ mɑɣɑnɑ n tʋwɑ ŋmǝnɑɣɑ kʋsɛɛmɑɣɑ nɑ nyɑ́ pǝtote nte n tisinɑ-tʋ ɩsǝntɔ tɔ. Nɑ ń kotɑ nyɑ́ cɑɑ, nɑ nyɑ́ too, nɑ nyɑ́ tɑɑlʋnɑɑ nɑ nyɑ́ newɑɑ, nɑ nyɑ́ cɑɑ lʋlʋɣʋ nyǝ́mɑ tǝnɑɣɑ nyɑ́ tǝyɑɣɑ tɑɑ. 19 Amɑ ye pǝ cǝpɑ pɑ tɑɑ wei nɑ ɩ́ lɩɩ nyɑ́ tǝyɑɣɑ tɑɑ, pʋntʋ sǝm kɑ́ wɛɛ ɩ nyʋɣʋ tɔm kɛ́, pǝ tɑɣɑ tɑ́ nyǝntʋ. Tɔfɔ, ye mpɛ ɩnɩ pɑ tɑɑ nɔɣɔlʋ nyʋɣʋ holɑ-ɩ, ɩlɛ pǝ kɛ́ tɑ tɔm. 20 Amɑ ye n tɑɣɑsɑ tɑ tɔm, ɩlɛ tɑ kɑɑ tɔkɩ tɑ́ nɔɣɔ sɩɩʋ tɔtɔ. 21 Ɩlɛnɑ ɑlʋ ɩnɩ ɩ cɔ sɩ: Pǝ lɑ ɩsɩɩ ɩ́ yɔɣɔtʋɣʋ tɔ.

Ɩlɛnɑ ɑlʋ yele feŋlɑɑ nɑ pɑ́ tɛɛ. Ḿpʋ́ɣʋ́ ɩ tʋ ŋmǝnɑɣɑ kʋsɛɛmɑɣɑ nɑ ɩ pǝtote. 22 Apɑlɑɑ mpɛ pɑ tɑlɑ pɔɔŋ tɑɑ, ɩlɛnɑ pɑ́ ŋmɛlɩ tǝnɑɣɑ kʋyɛɛŋ tooso. Hɑlǝnɑ mpɑ pɑɑ sewɑ pɑ wɑɑlɩ tɔ, pɑ́ pɛɛkɩ-wɛɣɛ hɔɣɔlʋɣʋ ŋkʋ kʋ tǝnɑ kʋ tɑɑ, pɑ tɑ nɑ-wɛ. Ɩlɛnɑ pɑ́ mǝlɩ kpɛtɛ. 23 Ḿpʋ́ɣʋ́ feŋlɑɑ mpɛ pɑ mǝlɑɑ nɑ pɑ́ tii pʋɣʋ, nɑ pɑ́ tɛsɩ Yɑɑtɑnɩ. Ɩlɛnɑ pɑ́ kpe nɑ pɑ́ kɛɛsɩ Yosuwee kɛ pǝ tǝnɑ mpi pǝ mɑɣɑnɑ-wɛ tɔ. 24 Nɑ pɑ́ yɔɣɔtɩ tɔtɔ sɩ, pɔpɔtʋ fɛɩ leleŋ, Tɑcɑɑ tʋwɑ tɛtʋ tǝnɑɣɑ tɑ niŋ tɑɑ kɛ́. Hɑlǝnɑ tǝ yǝlɑɑ tǝnɑ tɛɛ sʋʋkǝnɑ-tʋɣʋ.