yontunɑɑ tɑɑ tɔɣɔlɔ.

2 Antulinyɑ tɑɑ yəlɑɑ mɛ,

mə tənɑ ɩ́ ke ŋkpɑŋŋ.

3 Sɔsɑɑ, nɑ səkpemɑ,

nɑ liɣitee nyə́mɑ,

nɑ kʋnyɔntʋnɑɑ mɛ,

4 ləmɑɣɑsɛɛ tɔm kɛ mɑ yɔɣɔtəɣɩ,

nɑ mɑ tɑɑ kʋmɑɣɑsətʋ wɛnɑ hʋwɛɛ kɛ sɔsɔm kɛ́.

5 Mɑ welisiɣi teu kɛ ɩtuule tɑɑ kɛ́,

nɑ mɑ́ tɛləsəɣɩ-tɛ nɑ cəmʋɣʋ.

6 Pepe tɔɔ kɛ́ mɑɑ tɑsɑ nyɑm kɛ wɑhɑlɑ wɑɑtʋ

kɛ sɑɑ wei mɑ kolontunɑɑ kɑ́ tɑ-m

nɑ pɑ́ tʋɣʋ-m wɑhɑlɑ tɔ.

7 Pɑ liɣitee tuutuumɑ kɛ pɑ tʋ nɑɑni

nɑ pɑ́ hɔŋ pɑ tɩ nɑ pɑ wɛnɑʋ kɑtɑtəlɑɣɑ.

8 Amɑ pɑ tɑɑ nɔɣɔlʋ fɛɩnɑ toŋ sɩ

ɩ́ yɑ Ɩsɔ cɔlɔɣɔ ɩ tɔɣɔntəlɛ weesuɣu

yɑɑ ɩ mɑɣɑmɑɣɑ ɩ nyəŋkʋ.

9 Yʋlʋ ləsɑɣɑ kəlɑ liɣitee,

pɑɑ pə lɑ́ ɩsənɑ nɔɣɔlʋ kɑɑ pəsɩ kɑ yɑpʋ.

10 Pɑ hʋʋkɩ sɩ pɑɑ fiti pəlɑɑʋ pɑ kɑɑ sɩ?

11 Tɑmpɑnɑ tɔɔ, pɑɑ n kɛ́ nyəntʋ yɑɑ kʋmɛlɛŋ,

n kɑ́ sɩ kɛ́, nɑ ń yelinɑ lɛlɑɑ kɛ nyɑ́ wɛnɑʋ.

12 Pɑɑ pɑ hɑwɑ pɑ tɛtʋ kɛ pɑ həlɑ

pəlɑɑʋ tike kɑ́ tɛnɑ nɑ kʋ pəsɩ

pɑ təcɑɣɑlɛ tɑm tɔɔ nyəntɛ.

13 Yʋlʋ sɔsɔɔntʋ kɑɑ sɔɔsɩ ɩ weesuɣu kɛ tɑɣɑləŋ.

Ɩ wɛ tənɑɣɑ kɛ teitei kɛ́ ɩsɩɩ kpəntɛ.

14 Yəlɑɑ mpɛ pɑ təɣɩ pɑ tʋɣɩ nɑɑni

nɑ pɑ́ nyənəɣɩ pɑ kʋyɔɣɔtʋtʋ tike kɛ tɑmpɑnɑ nyəntʋ.

15 Ɩlɛ mpi pɑ kɔŋ tɛɛsənɑʋ tɔɣɔlɔ.

Pɩɩ keeti-wɛɣɛ ɩsɩɩ heeŋ

nɑ pə́ sʋsɩ ɑtɛtəlɛ tɑɑ

nɑ səm pəsɩ pɑ tiikilu.

Nɑ pə siɣisinɑ-wɛɣɛ pəlɑɑʋ təpəŋpəŋ nɑ pɑ teu sɩ.

Atɛtəlɛ tɑɑ kɛlɛ pɑ təcɑɣɑlɛ.

16 Amɑ Ɩsɔ kɑ́ yɑ-m ɑtɛtəlɛ tɑɑ tənɑ,

nɑ ɩ́ ləsɩ-m.

17 Pɑɑ yʋlʋ wɛnɑʋ tɔŋnɑ hukuɣu nɑ ɩ́ sʋʋkɩ toŋ

nyɑ́ lɑŋlɛ ɩ tɑɑ pɛlɩ.

18 Ɩ kɑɑ kpɛnnɑ pə tɑɑ pʋlʋɣʋ ɩ səm wule

nɑ ɩ́ ponɑ ɑtɛtəlɛ tɑɑ.

19 Pəyele ɩ yɑɑkɑɣɑ ɩ təɣɩ

leleŋ nɩɩlʋ kɛ́ nɑ ɩ́ wɛnɑ ɩ ɩsɛ.

Nɑ ɩ́ sɑŋ ɩ tɩ sɩ pə tɔŋ teu.

20 Pɑɑ nɑ mpʋ, pə wɛɛ kɛ́ sɩ,

ɩ́ polo timpi ɩ cɑɑnɑɑ wɛɛ

nɑ pɑɑ nɑɑkɩ nyɑɑləm tɔ.

21 Yʋlʋ pəsəɣɩ nɑ ɩ́ wɛɛnɑ sɔsɔɔntʋ,

ye ɩ fɛɩnɑ ləmɑɣɑsɛɛ ɩ wɛɛkɩ tənɑɣɑ kɛ

teitei kɛ́ ɩsɩɩ kpəntɛ.