Ɩsɔ Tomɑ tənɑ tʋ Tɑcɑɑ yɑɑkɩ tɛtʋ tənɑɣɑ

pə kpɑɣɑʋ ilim təlɩɩlɛ nɑ pə tətʋlɛ tɔ.

2 Siyɔŋ ɩcɑtɛ nte tə tewɑ təkpɑtɑɑ tɔ

tə tɑɑ kɛ́ Ɩsɔ teeki kɔkɔ.

3 Tɑ Ɩsɔ kɔŋ kɛ́,

ɩlɛ pə tɑɣɑ təpɑmm.

Kɔkɔ wɛ ɩ nɔɣɔ tɔɔ kɛ́ nɑ kɑ́ niisiɣi pə tənɑ.

Heelim ɩsɑɣɑm cɔɔnɑ-ɩ kɛ́.

4 Ɩsɔ hʋʋkənɑ ɩ yəlɑɑ nɑ

ɩ́ yɑɑ ɩsɔtɔnʋɣʋ nɑ tɛtʋ kɛ ɑseetɑ.

5 Ɩsɔ sɩ: Ɩ́ koti mɑ nyə́mɑ mpɑ

mɑ nɑ-wɛ tə pɛɛlɑ nɔɣɔ sɩ

pɑɑ nɩɩnɑ-m nɑ pɑ́ lɑ́ pə kɔtɑɣɑ tɔ.

6 Ɩsɔtɔnʋɣʋ ɩ́ yɔɣɔtɩ sɩ Tɑcɑɑ mɑ́ mɑ siɣisɑɑ kɛ́.

Mpi tɔ, mɑɣɑlɛ hʋʋnlʋ.

7 Ɩsɔ sɩ: Mɑ yəlɑɑ Ɩsɛɣɛlɩ nyə́mɑ ɩ́ ke ŋkpɑŋŋ

nɑ mɑ kɑlənɑ-mɛ, mɑ kɛ́ mə Ɩsɔ kɛ́.

8 Mɑɑ kɑlənɑ-mɛɣɛ,

ɩlɛ pə tɑɣɑ mɑ kɔtɑsɩ tɔɔ,

ɩ́ tɑ́ tɩɩ hɛɛsɩ-m səlɛɣɛ lɑpʋ,

9 mɑ kɑɑ mʋ, mɑɑ cɑɑ mə lɑtəcɛnɑɑ

yɑɑ mə́ kpeeŋ tɛɛ pəŋtʋlʋŋ kpɑʋ.

10 Mpi tɔ, mɑ́ tənnɑ hɔtʋ tɛɛ wontu tənɑ

nɑ pulɑsɩ tɑɑ nyəntʋ tənɑɣɑ iyisi iyisi.

11 Nɑ pə sumɑsɩ tənɑ,

ɑtɛ wontunɑɑ tənɑ kɛ́ mɑ nyəm kɛ́.

12 Pɑɑ nyɔɣɔsɩ wɛ-m, mɑɑ pɔɔsəɣɩ.

Mpi tɔ, ɑntulinyɑ nɑ ɩ nyəm tənɑ mɑ́ tənnɑ.

13 Wulee mɑ tɔɣɔ lɑtəcɛnɑɑ nɑntʋ

nɑ mɑ́ nyɔɔ pəŋtʋlʋŋ cɑləm nɑ?

14 Pə tɑɣɑ tɔɣɔnɑɣɑ kʋhɑʋ kɛ mɑ cɑɑkɩ.

Amɑ sɛɛtʋ kɛ mɑ pɔɔsəɣɩ.

Ɩ́ təŋəɣɩ nɑ ɩ́ lɑkɩ ɩsənɑ

ɩ́ kɑ sɩɩwɑ ɩsɔtɑɑ Ɩsɔ Sɔsɔ mɑɣɑ nɔɔsɩ tɔ.

15 Nɑ ye ɩ́ wɛ lɑŋwɑkəllɛ tɑɑ ɩ́ yɑɑ-m nɑ mɑ́ wɑɑsɩ-mɛ

nɑ ɩ́ tʋ-m teeli.

16 Mɑɑ pɔɔsɩ ɑsɑɣɑɑ sɩ:

Ɩ́ kɑləɣɩ mɑ kiiŋ nɑ mɑ́ nɑ-mɛ tɑ́ nɔɣɔ pɛɛlʋɣʋ tɔm

wɛ mə nɔɔsɩ tɑɑ sɩ pə wɑɑsɩ-mɛɣɛ we?

17 Ɩlɛnɑ mɑ́ sɛɣɛsəɣɩ-mɛ nɑ ɩɩ nɩɩkɩ

nɑ Ɩ́ lɔɔkɩ mɑ tɔm.

18 Ɩ́ tənəɣɩ ŋmɩɩlɑɑ tɔɔ kɛ́,

nɑ ɩ́ sɔɔsəɣɩ wɑsɑŋkɑlənɑɑ tɔɔ.

19 Ɩsɑɣɑtʋ kɛ mə nɔɔsɩ yɔɣɔtəɣɩ

nɑ ɩɩ nyɑŋnɑ kɑloolɑɣɑ.

20 Nɑ ɩ́ cɑkɩ mə tɔɣɔntəlɛnɑɑ ɑcɑɣɑ,

nɑ ɩ́ kpɛŋəɣənɑ mə mɑɣɑmɑɣɑ mə newɑɑ.

21 Mpi ɩ́ lɑpɑ tɔɣɔlɛ,

nɑ ɩ́ hʋʋkɩ sɩ mɑ́ su nɑ?

Yɑɑ ɩ́ mɑɣɑsəɣɩ mə tɑɑ sɩ,

mɑɑ təŋ mə ɩkpɑtɛ.

Mɑɑ kʋlɩ mə tɔɔ kɛ́

nɑ mɑ́ kuli mə ɑcɑɑlətʋ tənɑ tɔɔ nɑ ɩ́ nɑ́.

22 Mə tənɑ mpɑ mɛ ɩ́ sɔɔkɩ mɑ tɔɔ tɔ ɩ́ ke ŋkpɑŋŋ.

Pə tɑɑ kɔɔ nɑ mɑ́ cəlɩ-mɛ nɑ nɔɣɔlʋ kɑɑ wɑɑsɩ-mɛ.

23 Mɑ sɛɛtʋ ntɛ́ wei ɩ kʋsəɣɩ

mɑ nyʋɣʋ kɛ teu tɔ.

Nɑ wei ɩ nɩɩkənɑ-m tɔ,

pʋntʋ kɛ mɑ wɑɑsəɣɩ.