Hɑɩ, Ɩsɔ, hɑ wulɑʋ kɛ nyɑ́ hʋʋlɛ,

nɑ ń hɑ wulɑʋ pəyɑlʋ kɛ nyɑ́ tɑmpɑnɑ təŋʋɣʋ ləmɑɣɑsəlɛ.

2 Ɩlɛnɑ ɩ́ təŋəɣɩ tɑmpɑnɑ nɑ kʋsiɣisim

nɑ ɩ́ hʋʋkənɑ nyɑ́ yəlɑɑ kʋnyɔntʋnɑɑ.

3 Pɔɔŋ nɑ pulɑsɩ ɩ́ kɔnɑ yəlɑɑ kɛ hɛɛsʋɣʋ

nɑ tɑmpɑnɑ təŋʋɣʋ.

4 Wulɑʋ ɩ́ hɑ tɑmpɑnɑ kɛ yəlɑɑ kʋnyɔntʋnɑɑ

nɑ ɩ́ wɑɑsɩ wɑhɑlɑ nyə́mɑ,

nɑ ɩ́ wɑkəlɩ pɑ ŋmɑkəllɑɑ.

5 Ɩlɛ pɑɑ nyɑŋnɑ-ŋ, hɑlənɑ kʋyɑŋku

ilim kɑ́ yele nyɑɣɑʋ nɑ ɩsɔtʋ nɑ́ɑ́ yele nɑʋ tɔ.

6 Wulɑʋ ɩnɩ ɩ kɑ́ wɛɛ kɛ́ ɩsɩɩ tɛʋ ŋku kʋ nɩɩkʋɣʋ

tɑɑlɛ nte tə nyɩɩtʋ pɑ hɑlɑɑ tɔ.

Yɑɑ ɩsɩɩ tɛʋ sɔsɔɔʋ nɩɩkʋɣʋ hɑləm tɔ.

7 Pɩɩ cɑɣɑnɑ siɣisilɑɑ kɛ kʋyɑkʋ ŋkʋ.

Nɑ pɑ́ wɛɛ hɛɛsʋɣʋ sɔsɔɔŋkʋ tɑɑ,

hɑlənɑ kʋyɑŋku ɩsɔtʋ kɑ sɩɩ tənɑɣɑ tɔ.

8 Ɩ kɑ́ tɔɣɔ kɑwulɑɣɑ kɛ pə kpɑɣɑʋ

teŋku nɑ pə́ sɩɩnɑ lɛlʋ tɔ,

nɑ pə́ kpɑɣɑ pɔɣɔ sɔsɑɣɑ hɑlənɑ ɑntulinyɑ tənɑɣɑ tɔ.

9 Ɩ kolontunɑɑ kɑ́ həntɩ-ɩ ɑtɛ

nɑ ɩ pɑtɑnɑɑ mpɛ pɑ́ niisi mʋsʋɣʋ.

10 Tɑɑsisi tɛtʋ nɑ tɛtʋ nti lʋm cɔɔnɑɑ tɔ

pə ɑwulɑɑ kɑ fɛlɩ lɑmpuunɑɑ.

Sepɑ nɑ Sɑpɑ pə nyə́mɑ nɑ́ɑ́ lɑpɩ-ɩ kʋcɔɔŋ.

11 Awulɑɑ tənɑ kɑ́ həntɩ-ɩ ɑtɛ,

nɑ piitimnɑɑ tənɑ nɑ́ɑ́ lɑkɩ-ɩ təmlɛ.

12 Ɩlɛnɑ ɩnɩ ɩ wɑɑsɩ kʋnyɔntʋ wei ɩ wiikinɑ-ɩ tɔ

nɑ wɑhɑlɑ tɔɣɔlʋ wei ɩ fɛɩnɑ sənlʋ tɔ.

13 Wulɑʋ kɑ́ wɛɛnɑ ɩcɑm nɑ kʋnyɔntɔɣɔlʋ

nɑ mpɑ pɑ pɑsəɣɩ pɑ tɩ tɔ pɑ pətɔɔtəlɛ,

nɑ ɩ́ yɑ́ pɑ weesiŋ.

14 Wulɑʋ kɑ́ yɑ pɑ weesiŋ kɛ ŋmɑkəlʋɣʋ nɑ mʋsʋŋ niŋ tɑɑ.

Mpi tɔ, pɑ kɛ́-ɩ pʋlʋ sɔsɔɔm kɛ́.

15 Pɑɑ wɛɛnɑ weesuɣu nɑ pɑ́ hɑ-ɩ Sepɑ nyə́mɑ wʋlɑ.

Pɑɑ sələməɣɩ Ɩsɔ kɛ́ ɩ tɔɔ kɛ́ tɑm kɛ́,

nɑ pɑ́ kooliɣi-ɩ kʋpɑntʋ kɛ pɑɑ kʋyɑkʋ ŋku.

16 Tɔɣɔnɑɣɑ hɑləm kɑ wɑɑsɩ tɛtʋ tɑɑ

nɑ pə́ kpɛnnɑ pulɑsɩ nyɔɔŋ tɑɑ.

Nɑ kɑ pee ciɣitiɣi ɩsɩɩ Lipɑŋ tɩɩŋ sɔsɔɔŋ,

nɑ yəlɑɑ huki ɑcɑlɛɛ tɑɑ ɩsɩɩ nyɩɩtʋ kɛ tɑwɑ tɑɑ.

17 Wulɑʋ hətɛ kɑ́ wɛɛ tɑm tɔɔ kɛ́,

hɑlənɑ kʋyɑŋku ilim kɑ sɩɩ tənɑɣɑ tɔ.

Nɑ pɑ́ kooliɣi təmɑɣɑ kʋpɑntʋ nɑ pɑ́ yɑɑkənɑ ɩ hətɛ,

nɑ piitimnɑɑ yɑɑkɩ-ɩ leleŋ nɩɩlʋ.

18 Tɑcɑɑ Ɩsɔ, wei nyɑ́ n kɛ́ Ɩsɛɣɛlɩ nyə́mɑ Ɩsɔ tɔɣɔlɛ teeli tʋ,

nyɑ́ tike n lɑkənɑ kɔkɔlɔ nyəmnɑɑ.

19 Nyɑ́ hətɛ sɔsɔɔlɛ ntɛ́ teeli nyəntɛ kɛ tɑm tɔɔ.

Nyɑ́ teu ɩ́ wɑɑsɩ tɛtʋ tənɑ tɑɑ.

Ɩsɔ ɩ́ kɔnɑ mpʋ, Ɩsɔ ɩ́ kɔnɑ mpʋ.

20 Sesee pəyɑlʋ Tɑfiiti sələmʋɣʋ tənɑɣɑ ntɔ.