nyʋɣʋ tʋ yontunɑɑ tɑɑ tɔɣɔlɔ.

Ɩsɔ tewɑ Ɩsɛɣɛlɩ nyə́mɑ mpɑ pɑ lotu tɑɑ tewɑ tɔɣɔ.

2 Pɑɑ nɑ mpʋ pəcɔɣɔ pə kɑɑsɑɑ sɩ pə́ co-m yɑɑ pə́ tuu-m.

3 Mpi tɔ, mɑ nɑɑkɩ ɑsɑɣɑɑ hɛɛsəɣɩ, ɩlɛnɑ

mɑ́ lɑkɩ-wɛɣɛ ɩsɛsɛɛmlɛ.

4 Mpi tɔ, pɑɑ nɑɑkɩ wɑhɑlɑ nɔɣɔlʋ hɑlənɑ pɑ səm,

nɑ pɑ́ nɩɩkɩ pɑ nɑntʋ tɑɑ ɑlɑɑfəyɑ.

5 Pɑɑ nɑɑkɩ wɑhɑlɑnɑɑ mpɑ lɛlɑɑ nɑɑkɩ tɔ,

pəyele pɩɩ mɑkənɑ-wɛ ɩsɩɩ yəlɑɑ lɛlɑɑ.

6 Kɑlɑmpɑɑnɩ wɛnnɑ ɩsɩɩ pɑ lɩɩlʋɣʋ,

nɑ mʋsʋŋ nɑ́ɑ́ wɛɛ ɩsɩɩ pɑ kɑcɔkɑ wontuɣu.

7 Pɑ cɑɣɑnɑ pɑ tɩ nɑ pɑ́ toosiɣi yəlɑɑ kɛ ɩsɛ,

nɑ pɑ ləmɑɣɑsɛɛ nɑɑkɩ kpɑkpɑɑ.

8 Ɩsɑɣɑtʋ tɔm kɛ pɑ yɔɣɔtəɣɩ,

nɑ pɑ́ woŋiɣi lɛlɑɑ,

nɑ pɑ́ hɔŋ pɑ tɩ nɑ pɑ́ kɛɛkɩ tɑmpɑnɑ.

9 Pɑ kooki kɛ́ nɑ pə tɑkɩ ɩsɔtɔnʋɣʋ,

nɑ pɑ́ wɑkələɣɩ tɛtʋ nɑ pɑ nsəmlɛ.

10 Pə tɔɔ kɛ́ pɑ tənɑ pɑ kɛɛsənɑ pɑ tɔɔ,

nɑ pɑ́ nyɔɔkɩ pɑ kʋyɔɣɔtʋtʋ kɛ lʋm təlɛ.

11 Nɑ pɑ́ tɔŋ sɩ ɩsənɑɣɑ Ɩsɔ kɑ́ cɛkənɑ-tɩ.

Ɩsənɑɣɑ ɩsɔtɑɑ Ɩsɔ kɑ́ cɛkənɑ-tɩ?

12 Ḿpʋɣʋ ɑsɑɣɑɑ wɛɛ,

pə cɑɣɑnɑ-wɛɣɛ tɑm kɛ́,

nɑ pɑ́ kɑɑkɩ pɑ wɛnɑʋ.

13 Mpʋ tɔ, yem tɔɔ kɛlɛ mɑ tɑɣɑnɑ mɑ lotu tɑɑ,

nɑ mɑ́ sɑŋ mɑ niŋ kɛ ɩsɑɣɑtʋ lɑpʋ tɔm tɑɑ.

14 Pɑɑ kʋyɑkʋ ŋkuɣu pɑ mɑkɩ-m,

nɑ pɑ́ tʋɣʋ-m wɑhɑlɑ kɛ pɑɑ tɑnɑŋ ŋku.

15 Ye mɑɑ tɔmɑ sɩ mɑ yɔɣɔtɩ ɩsɩɩ mpɛ,

hɑlɩ mɑɑ lɩɩwɑ nyɑ́ piyɑ piitim wɑɑlɩ.

16 Mɑ mɑɣɑsɑɑ sɩ mɑ́ hʋʋ pə tɔɔ nɑ mɑ́ cɛkənɑ.

Amɑ pə tənɑɣɑ mpʋ pə kəlɑ kɑtɛ.

17 Hɑlɩ kʋyɑkʋ ŋku mɑ sʋʋ Ɩsɔ təyɑɣɑ tɑɑ

tɔɣɔ mɑ cɛkənɑ mpi pə tɑŋɑ ɑsɑɣɑɑ tɔ.

18 Mpɑɑŋ wei ɩ tɑɑ pɩɩ tuu-wɛ tɔɣɔ n sɩɩkɩ-wɛ

sɩ pɑ́ hoti timpi pɩɩ wɑkəlɩ-wɛ tɔ.

19 Ɩlɛnɑ pə́ wɑkəlɩ-wɛɣɛ tɔm kʋlʋm tɔɔ,

nɑ pə́ kpiisi-wɛ nɑ pɑ tɔm tɛɛsənɑ sɔɣɔntʋ.

20 Tɑcɑɑ, ye n kʋlɑ pɑ tɔɔ ɩlɛ pɑ mʋkɩ

ɩsɩɩ yʋlʋ feŋuɣu nɑ ɩ toosee sɑɑlɩ yem tɔ.

21 Wɑɑtʋ wei mɑ tɑɑ kɑ wɛ nyɑŋ

nɑ mɑ lɑŋlɛ wɑkəlɩ sɔsɔm tɔ.

22 Mɑɑ kɛ́ kʋmɛlɛŋ kɛ́, mɑ tɑɑ cɛkənɑ pʋlʋpʋ.

Mɑɑ wɛ teitei kɛ́ ɩsɩɩ kpəntɛ kɛ nyɑ́ ɩsɛntɑɑ.

23 Pɑɑ nɑ mpʋ mɑ nɑ-ŋ kɛ́ tɑm kɛ́,

n kpɑ-m nyɑ́ niŋ ntɔɣɔŋ tɑɑ.

24 Nyɑ́ lɑɣɑtʋ tɑsʋɣʋ kɛ n kɑ tiikinɑ-m.

Pə wɑɑlɩ n kɑ mʋ-m nyɑ́ teeli tɑɑ.

25 Aweɣe mɑ wɛnɑ ɩsɔtɑɑ, ye pə tɑɣɑ nyɑ́?

Nyɑ́ lɑkənɑ nɑ mɑ́ nɩɩkɩ leleŋ kɛ ɑtɛ.

26 Pɑɑ mɑ nɑntʋ yɑɑ mɑ nyɑmlɛ kpisɑɑ.

Ɩsɔ kɛlɛ mɑ nyəm nɑ mɑ kpʋlʋɣʋ tətʋlɛ kɛ tɑm tɔɔ.

27 Pɑ tənɑ mpɑ pɑ hɑtələnɑ-ŋ tɔ pɑ leki kɛ́,

nɑ ń wɑkələɣɩ pɑ tənɑ mpɑ pɑɑ nɩɩkənɑ-ŋ tɔ.

28 Ye mɑ, Ɩsɔ kpətənɑʋ wɛnnɑ-m teu.

Tɑcɑɑ Ɩsɔ kiŋ kɛ mɑ tʋɣɩ kpʋlʋɣʋ.

Ɩlɛnɑ mɑ́ kɛɛsɩ ɩ təmɑ tənɑ.