1 Titus, se̱nge̱ bakse̱ u̱n yan-dor Ye̱so ye̱ nome̱ ye̱ ro̱ u̱t-gwo̱mo à u̱n se̱k-ye̱ ne̱ o-do̱ro̱tte̱. O baksu̱ ye̱ komo, ye̱ ma'as zo̱ngse̱ remen ye̱ nomote̱ o̱r u̱n ye̱ ne̱ rem-se u̱r-bon. 2 Komo taase ye̱ we ne̱t á, amba ye̱ she'et ba u̱t-ween u̱n hun-ne̱ ne̱, ye̱ kutu ye̱ gwu̱gwe̱r-mo̱ u̱r-hi. Komo u̱n she'et-de u̱n ye̱, ye̱ muut hi u̱n de u̱n ye̱ hwaa be-de u̱n hun-ne̱ myet.

3 A ro m-raag ne̱ n-ga, sa o zee hun-ne̱ ye̱ yage̱ m-she̱r be-u̱r Ye̱so m-mo̱ka à. A ro u̱n ko̱o̱b-de o-do̱ro̱tte̱, komo hun-ne̱ ro rakstu̱ na. Sa o zee gu̱w-ne̱ a ro'e̱, ye̱ go̱p-de u̱n no̱m u̱n rem-se u̱n me̱n-u̱t jaas-to̱ garamse̱ à, se ye̱ ro̱ m-ho̱ge̱ re̱re̱m-mo̱ m-no̱m à. N-ga a ro shiishe̱ u̱n me̱n-u̱t jaas-to̱, u̱r-shoob ne̱, ye̱ kututu̱ na u̱t-yage̱, na u̱n cen na, a ro̱ u̱t-yage̱ u̱n ye̱ ne̱. 4 Amba da-o haanu̱ru̱ o̱ Shir Wan-Gwu̱ na kutu̱ na u̱nze wu̱ ro̱ u̱r-'wo̱n ne̱, komo wu̱ waste̱ u̱n ko̱wan ne̱. 5 Wu̱ rurug na be-de u̱n swo̱ u̱r-ko̱o̱b de u̱n ba'as-u̱t na, wu̱ u̱n no̱m kaane̱ ba remen kashi u̱n rii-yo a no̱me̱ á. Amba remen 'wo̱n-de u̱n wu̱. Shir ya'astu̱ na ho̱o̱g-m pu̱-mo̱. Wu̱ sokste̱ ba'as-u̱t na, Wu̱ kutu na bo̱ a he she'et-u̱r pu̱-de à, u̱n be̱e̱b-de u̱n Ku̱kt-o̱ Shir, o̱ wu̱ ya'u̱ na à. 6 Shir to̱mo̱nte̱ Ye̱so Kiristi, Wan-Gwu̱ na, wu̱ ye'et na Ku̱kt-o̱ u̱n wu̱. 7 Remen yar-mo̱ Shir wu̱ ak na kashi u̱n hun-ne̱, komo a wost u̱r-be̱ remen wu̱ e̱ssu̱tu̱ na ho̱o̱g-m ba m-ta. Wu̱ u̱n no̱m yo ka remen na m-mo̱ka yakar-ye̱ u̱n wu̱ ye̱. 8 Ka ma-to̱, ma-to̱ o-nip to̱. U̱m co̱no̱g wo̱ o es eso, se̱ o hyanag hun-ne̱ do̱ru̱te̱ to̱, bo̱n kap wu̱ she̱re̱ be-de Shir à, wu̱a nep u̱nze wu̱a ma'as u̱n no̱m rem-se u̱r-bon. Ka yoos-de ro̱ u̱r-bon ne̱ komo u̱n gwu̱ ne̱ remen ko̱wan.

9 Amba no̱m ja be-de u̱n yan-ma-to̱ o-saa u̱n ma-to̱ u̱n ya-n-ga-ye̱ ne̱, o no̱m ja u̱n su̱ne̱-mo̱ u̱t-ma ne̱, u̱t-ween ne̱ to̱ ma-to̱ u̱n karamsa-o Mosa. Go̱n ka su̱nu̱-mo̱ u̱t-ma mo̱, ma-to̱ o-hwaa to̱, to̱ ro̱ u̱n gu u̱n ne̱t á. 10 U̱rege̱ ne̱t ro̱ ko̱n wu̱ ro̱ u̱n wo̱ngse̱ u̱n yan-dor Ye̱so à, nak wu̱ u̱t-to̱, o ru̱ru̱ wu̱, wu̱ yage̱ m-no̱m kaane̱. Wu̱ yage̱ m-yage̱, o nek wu̱ u̱t-to̱ ayoore̱-o̱. Ka da-de wu̱ yage̱ m-ho̱ge̱, o no̱m ja u̱n ka ne̱t-wu̱ ne̱. 11 Wo̱a nep cas u̱nze ka ne̱t-wu̱ tukute̱ o-nip jim, komo remen wu̱ ba'asu̱te̱, wu̱ u̱n hi u̱n de u̱n wu̱ nepste̱ ba'as-to̱ u̱n wu̱ kapste̱ wu̱.

12 Man to̱mbe̱ Atanas ko̱ Tiko̱ko̱s be u̱n du, wu̱ dek se̱nge̱-m ru. Wu̱ wo̱bu̱sse̱, hakku̱re̱ nom yo o he m-hoks à, o 'wo̱stu̱ me̱ u̱n bo̱-o̱ o-Nikopori. Me̱ o-sakto̱ man kom da-o̱ o-hu̱w káne̱.*3:12 Hyen komo: Se̱ng 20:4; Apis 6:21-22; Koro 4:7-8; 2Tim 4:12. 13 No̱m bo̱ u̱n no̱m-m ru o guut Zenas (Wan-nap-o̱ u̱n piish u̱t-ma) u̱n Apo̱ro̱s ne̱ u̱n hew-de u̱n ye̱. Gu ye̱, taase ye̱ nom ko̱o̱b-de u̱n ko̱ yo ke rii-yo.†3:13 Hyen komo: Se̱ng 18:24; 1Kor 16:12. 14 Yanze wo̱ u̱n ho̱n du o he m-no̱m kaane̱ á, amba ma'as yoose̱ yan-dor Ye̱so ye̱ muut u̱r-hi be-de u̱n no̱m u̱n se̱nge̱-mo̱ u̱r-bon be-de u̱n hun-ne̱ ye̱ ro̱ u̱n hoob-o̱ u̱n gwu̱ à. Da-o̱ yan-dor nome̱ kaane̱ ye̱a yage̱ she'et-de o-hwaa.

15 Myet yan-dor ye̱ ro̱ kàne̱ à, ro̱ wo̱ m-gas. Te̱ wo̱ m-ze̱e̱ o gas o̱r na ne̱ yan-dor káne̱ u̱n o-Kirit, ye̱ wasse̱ u̱n na ne̱ à.

Yar-mo̱ Shir ro̱ u̱n no̱ ne̱ kap!