ሀኔዳባ ኦድያ ኮይሮ ማጻፋ
ገሉዋ
ሀኔዳባ ኦድያ ማጻፋቱ፥ ሳሜላ ማጻፋቱዋንነ ካተቱዋ ማጻፋቱዋን ጻፈቴዳ ታርከቱዋ ዱማ ኦግያን ኦሞዱዋን ደእያዋንቶ ላኤንꬂደ ኦዲኖ። ሀኔዳባ ኦድያ ማጻፋቱዋን እስራኤልያ ካተቱዋ ካዉተꬃ ታርኪ ላኡ ሁጰ ሁጰ ሻኩዋን ሻከቲደ ኦደቴዳ።
1. እስራኤላነ ይሁዳ ካዉተꬃቱ ባይዙዋን ኩንዴዳዋንታ ግዶፐነ፥ ጾሳይ ባረ አሳዉ ገሌዳ ቃላ ኡባ ናጌዳዋነ ይሁዳን ደእያዋንቱ ባጋና ባረ አሳዉ ባረ ሀልቼዳ ሀልቹዋ ፖሌዳዋ በሳናሳ። ሀዌ ቱማ ግድያዋ ኤርሳናዉ፥ ሀ ማጻፋ ጻፌዳዌ ዳዊተነ ሶሎሞነ ኦꬄዳ ዎልቃማ ዎልቃማ ኦሳቱዋ፥ ዮሳፌጸ፥ ህዝቂያስነ ዮስያሰ አሳ ደኡዋ ኦራጽሴዳ ኦራጽሱዋነ ጾሳዉ ምኒደ አማነቴዳ አሳ ሀኖታ ሎይꬂደ ጼሌዳ።
2. የሩሳላመን ደእያ ጌሻ ጎልያን ጾሳዉ ጎይንያ ጎይናይ ዋኒደ ዶመቴደንቶ ኦዳናሳ። ቃይ ሄ ዎደ ጎይኑዋ ዎጋ ካለꬅያዋንቱ ቄሳቱ ዋ ግድያ ድራዉ፥ ኡንቱንቱ ካለꬅያ ኦሱዋ ኬꬃይ ዋኒደ ዶመቴደንቶነ ቆንጭሳናሳ። ጌሻ ጎልያ ኬጼዳዌ ሶሎሞና ግዶፐነ፥ ጌሻ ጎልያነ ጎይኑዋ ዎጋ ኮይሮ ኤሴዳዌ ዳዊታ ግድያዋ ኦዳናሳ።
ሸምፓቱዋ ኡባቶ እመቴዳ ቃንꬃ ቆፋቱዋ
አዳማፐ ካትያ ሳኦላ ጋካናዉ 1:1—9:44
ሳኦላነ አ ናናቱዋ ሀይቁዋ 10:1-14
ዳዊተ ካተቱሳነ የሩሳላመ ኦይቁሳ 11:1-9
ዋርያና ደእያ ዳዊታ ዎታዳራቱዋ 11:10—12:40
ቃላ ጫቁዋ ታቦታይ የሩሳላመ ቡሳ 13:1—16:43
ጌሻ ጎልያ ኬጽያዌ ሶሎሞና ግዱሳ 17:1-27
ዳዊታ ኦላ ጾኑዋ 18:1—20:8
ዳዊተ አሳ ፓይድና ዬዳ ጾሳ ሀንቁዋ 21:1-30
ጌሻ ጎልያ ኬጻናዉ ሀኔዳ ጊጉዋ 22:1—29:20
ሶሎሞነ ካተቱሳ 29:21-25
ዳዊታ ሀይቁዋ 29:26-30
አዳማፐ ካትያ ሳኦላ ጋካናዉ
1
(1:1—9:44)
አዳማፐ ቢደ አብራሃማ ጋካናዉ ደእያ የለታ
(ዶመꬃ 5:1-32፤ 10:1-32፤ 11:10-26)
1 አዳመ ሴታ የሌዳ፤ ሴተ ሄኖሳ የሌዳ፤ ሄኖስ ቃይናና የሌዳ፤ 2 ቃይናን ማላልኤላ የሌዳ፤ ማላልኤል ያሬዳ የሌዳ፤ 3 ያሬድ ሄኖካ የሌዳ፤ ሄኖክ ማቱሳላ የሌዳ፤ ማቱሳል ላሜካ የሌዳ፤ 4 ላሜክ ኖሀ የሌዳ። ኖሄ ሴማ፥ ካማነ ያፌታ የሌዳ።
5 ያፌታ አቱማ ናናይ ጎመራ፥ ማጎጋ፥ ማዳያ፥ ያዋና፥ ቱባላ፥ መሸካነ ቲራሳ። 6 ጎመራ አቱማ ናናይ አሽካናዛ፥ ሪፋታነ ቶጋርማ። 7 ያዋና አቱማ ናናይ ኤሊሻ፥ ታርሴሳ፥ ክቲማነ ሮዳ።
8 ካማ አቱማ ናናይ ኩሻ፥ ምጽራይማ፥ ፑጻነ ካናና። 9 ኩሻ አቱማ ናናይ ሳባ፥ ሀዊላ፥ ሳብታ፥ ራእማነ ሳብታካ። ራእማ አቱማ ናናይ ሳባነ ዳዳና። 10 ቃይ ኩሽ ናምሩዳ የሌዳ። ናምሩድ ሳኣን ዎልቃማ ኦላንቻ ግዴዳ። 11 ምጽራይም ሉደታ፥ አናመታ፥ ላሃበታ፥ ናፍቱሄታ፥ 12 ፓትሮሳታ፥ ካስሉሄታነ ፕልስጼማ ዘረꬃ የሌዳ ካፍቶረታ የሌዳ። 13 ካናነ ባይራ ናኣ ሲዶናነ አ ቴፋ ሄታ የሌዳ፤ 14 ቃይ ካናነ ያቡሳቱዋ፥ አሞረቱዋ፥ ገርጌሰቱዋ፥ 15 ሂዌቱዋ፥ አርቀታ፥ ሲናታ፥ 16 አርዋደታ፥ ጻማረታነ ሀማታታ የሌዳ።
17 ሴማ አቱማ ናናይ ኤላማ፥ አሶራ፥ አርፋክሳዳ፥ ሉዳ፥ አራማ፥ ኡጻ፥ ሁላ፥ ገቴራነ መሸካ። 18 አርፋክሳድ ሸላሀ የሌዳ፤ ሸላህ ኤቦራ የሌዳ። 19 ኤቦር ላኡ ናና የሌዳ፤ እቱ የለቴዳ ዎደ ሳአይ ሻከቴዳ ድራዉ፥ አ ሱንꬃይ ፔሌጋ ጌተቴዳ፤ አ እሻ ሱንꬃይ ዮቅጻና። 20 ዮቅጻን አልሞዳዳ፥ ሸሌፋ፥ ሀጻርማዌታ፥ የራሀ፥ 21 ሀዶራማ፥ ኡዛላ፥ ዲቅላ፥ 22 ኤባላ፥ አብማኤላ፥ ሳባ፥ 23 ኦፊራ፥ ሀዊላነ ዮባባ የሌዳ። ሀዋንቱ ኡባቱ ዮቅጻና ዘረꬃ።
24 ሴማፐ ቢደ፥ አብራሃማ ጋካናዉ ደእያ የለታይ ሀዋፐ ካሊደ ጻፈቴዳዋ: ሴማ፥ አርፋክሳዳ፥ ሸላሀ፥ 25 ኤቦራ፥ ፔሌጋ፥ ራአ፥ 26 ሳሩጋ፥ ናኮራ፥ ታራነ 27 አብራሃማ ጌተቲደ ጼሰትያ አብራማ።
እስማኤላ የለታ
(ዶመꬃ 25:12-16)
28 አብራሃማ አቱማ ናናይ ይሳቃነ እስማኤላ። 29 ኡንቱንቱ የለታይ ሀዋፐ ካሊደ ጻፈቴዳ።
እስማኤላ ባይራይ ናባዮታ፤ ሄዋፐ ስምና ቄዳረ፥ አድብኤል፥ ምብሳም፥ 30 ምሽማእ፥ ዱም፥ ማስ፥ ሀዳድ፥ ቴም፥ 31 ይጹር፥ ናፊሽነ ቄድም የለቴድኖ። ሀዋንቱ እስማኤላ ናና።
32 አብራሃማ ቆማቱ ቃጹር አቱማ ናናይ ዚምራና፥ ዮቅሻና፥ ማዳና፥ ምድያማ፥ ይሽባቃነ ሹሀ። ዮቅሻና አቱማ ናናይ ሳባነ ዳዳና። 33 ምድያማ አቱማ ናናይ ኤፋ፥ ኤፌራ፥ ሀኖካ፥ አቢዳአነ ኤልዳአ። ሀዋንቱ ኡባቱ ቃጹር ዘረꬃ።
ኤሳ የለታ
(ዶመꬃ 36:1-19)
34 አብራሃመ ይሳቃ የሌዳ። ይሳቃ አቱማ ናናይ ኤሳነ እስራኤልያ። 35 ኤሳ አቱማ ናናይ ኤልፋዛ፥ ራኡኤላ፥ ይኡሻ፥ ያእላማነ ቆራሀ። 36 ኤልፋዛ አቱማ ናናይ ተማና፥ ኦማራ፥ ጻፋ፥ ጋእታማ፥ ቃናዛ፥ ትምናአነ አማሌቃ። 37 ራኡኤላ አቱማ ናናይ ናሃታ፥ ዛራሀ፥ ሻማነ ሚዛ።
ኤዶማን ኮይሮ ደኤዳ አሳቱዋ
(ዶመꬃ 36:20-30)
38 ኤዶማን ኮይሮ ደኤዳ ሰኢራ አቱማ ናናይ ሎጻና፥ ሾባላ፥ ጽባኦና፥ አና፥ ድሾና፥ ኤጼራነ ድሻና። 39 ሎጻና አቱማ ናናይ ሆራነ ሆማማ፤ ሎጻና ምቻታ ትምናኦ። 40 ሾባላ አቱማ ናናይ አልዋና፥ ማናሃታ፥ ኤባላ፥ ሸፋነ ኦናማ። ጽባኦና አቱማ ናናይ አያነ አና። 41 አና ናአይ ድሾና። ድሾና አቱማ ናናይ ሄምዳና፥ ኤሽባና፥ ይትራናነ ካራና። 42 ኤጼራ አቱማ ናናይ ብልሃና፥ ዛእዋናነ አቃና። ድሻና አቱማ ናናይ ኡጻነ አራና።
ኤዶማ ካተቱዋ
(ዶመꬃ 36:31-43)
43 እስራኤላን አያ ካቲ ካዉታናፐ ካሰ ኤዶማ ቢታን ካተቴዳ ካተቱ ሀዋፐ ካሊደ ጻፈቴዳዋንታ።
ባኦራ ናአይ በላእ ካተቴዳ፤ አ ካታማ ሱንꬃይ ድናባ።
44 በላእ ሀይቂና፥ ቦጽራፐ ዬዳ ዛራሀ ናአይ ዮባብ አ ኮታን ካተቴዳ።
45 ዮባብ ሀይቂና፥ ተማና ጋድያፐ ዬዳ ሁሻም አ ኮታን ካተቴዳ።
46 ሁሻም ሀይቂና፥ ሞኣበ ጋድያን ምድያማቱዋ ጾኔዳ ባዳዳ ናኣ ሀዳድ አ ኮታን ካተቴዳ፤ አ ካታማ ሱንꬃይ አዊታ።
47 ሀዳድ ሀይቂና፥ ማስሬቃፐ ዬዳ ሳምል አ ኮታን ካተቴዳ።
48 ሳምል ሀይቂና፥ ሻፋ ማታን ደእያ ራሆቦታፐ ዬዳ ሻኡል አ ኮታን ካተቴዳ።
49 ሻኡል ሀይቂና፥ አክቦራ ናአይ ባኣልሀናን አ ኮታን ካተቴዳ።
50 ባኣልሀናን ሀይቂና፥ ሀዳድ አ ኮታን ካተቴዳ፤ አ ካታማ ሱንꬃይ ፓአ። አ ማቻታ መዛሃባ ናት ማጽሬድ ናቶ ማሄጻብኤሎ።
51 ሄዋፐ ጉይያን፥ ሀዳድ ሀይቄዳ። ኤዶማ ዛራቱዋ ካፓቱ ሀዋንታ: ትምናአ፥ አልዋ፥ የቴታ፥ 52 ኦሆሊባማ፥ ኤልያ፥ ፒኖና፥ 53 ቃናዛ፥ ተማና፥ ምብጻራ፥ 54 ማግድኤላነ እራማ። ሀዋንቱ ኤዶማ ካፓቱዋ።