25
የሩሳላም ኩንደꬃ
(25:1-30፤ 2 ኦዱዋ 36:13-21፤ ኤር. 52:3-11)
1 ሰደቅያስ ካተቴዳ ኡዱፑንꬃ ላይꬅ፥ ታማንꬃ አግናን፥ ታማንꬃ ጋላስ፥ ባብሎነ ካቲ ናቡካዳናጾረ ባረ ኦላንቻቱዋ ኡባ አኪደ ዪደ፥ የሩሳላመ ዶዴዳ። አ ዩሹዋንካ ቢታ ኬላ ድረዳ። ኤር. 21:1-10፤ 34:1-5፤ ህዝ. 24:2 2 ሰደቅያስ ካተቴዳ ታማነ እተንꬅያ ላይꬃ ጋካናዉ፥ ካታማይ ዶደቲደ ጋምኤዳ።
3 ሄዋ ጋሱዋን ቢታን ኮሻይ ሱልና፥ ሄ ላይꬅ ኦይደንꬆ አግናን፥ ኡዱፑንꬃ ጋላሳን ሄ ጋድያ አሳዉ ምያባይ ꬋዬዳ። 4 ያን ደእሽን ካታማ ዩሹዋ ግምቢ እት ባጋና ኮለቴዳ። ባብሎነ አሳይ ካታማ ዩይ አꬊደ ናጎፐካ፥ ይሁዳ ካትያ ኦላንቻቱ ሙለ ኡባይ ቃማ ካትያ አታክልትያ ሳኣ አፍያ ኦግያ ኦይቂደ፥ ላኡ ድርሳ ግምበቱዋ እትፐ ጋꬅያ ፐንግያና ከሲደ ባቃቴድኖ። ኡንቱንቱ አራባ ድልባኮ ስሚደ ቤድኖ፤ ህዝ. 33:21 5 ሽን ባብሎነ ኦላንቻቱ ካትያ የደርሲደ፥ ያርኮ ደምባ ጋꬂደ ኦይቄድኖ። አ ኦላንቻቱ ኡባይ አፐ ሻከቲደ ላለቴድኖ። 6 ሄዋፐ ጉይያን፥ ኡንቱንቱ አ ርብላ ካታማን ደእያ ናቡካዳናጾራኮ አፌድኖ። ባብሎነ ካቲ ያን ሰደቅያሳ ቦላ ፕርዴዳ። 7 ሰደቅያሳ ናና ሰደቅያስ ጼልሽን ዎꬌድኖ። ሄዋፐ ጉይያን፥ አ አይፈቱዋ ዎጭ ከሲደ፥ ሳንሳላታን አ ቃቼድኖ፤ ያቲደ ባብሎነ ጋድያ አኪደ አፌድኖ። ህዝ. 12:13
ጌሻ ጎሊ ኮለቴዳ
(ኤር. 52:12-33)
8 ናቡካዳናጾረ ባብሎነን ካተቴዳ ታማነ ኡዱፑንꬃ ላይꬅ፥ እቼሻንꬃ አግናን፥ ላፑንꬃ ጋላስ ካትያ ኦሳንቻቱዋፐ እቱ፥ ካትያ ናግያዋንቱ ካፑ ናቡዛራዳን የሩሳላመ ገሌዳ። 9 መꬍና ጎዳ ጌሻ ጎልያ፥ ካትያ ጎልያነ የሩሳላመን ደእያ ጎልያ ኡባ ጹጌዳ፤ ዎልቃማ ጎልያ ግያ ጎልያ ኡባ ኤꬅ ዉርሴዳ። 10 ባብሎነ ኦላንቻቱ ኡባይ ካትያ ናግያዋንቱ ካፑዋ አዛዙዋን የሩሳላመ ካታማ ዩሹዋን ደእያ ድርሳ ግምቢያ ኡባ ኮሌድኖ። 11 ናቡዛራዳን ካታማን አቴዳ አሳቱዋነ ይሁዳን አቴዳ አሳቱዋ፥ ካዲደ ባብሎነ ኦላንቻቱዋን ጋከቴዳ አሳቱዋናካ ኡባ ኦይቂደ፥ ኦሞዶ አፌዳ። 12 ሽን ናቡዛራዳን ዉርሰꬃ ህዬሳቱዋፐ አማሬዳዋንታ ዎይንያ ቱራ ቶካናዳንነ ጋድያ ጎሻናዳን ይሁዳን አሼዳ።
13 ባብሎነ አሳቱ መꬍና ጎዳ ጌሻ ጎልያን ደእያ ናሃስያፐ መꬌዳ ቱሳቱዋ፥ ሚሻቱዋ ዎꬅያ ጋረቱዋነ አባ ሳኒያ መንሬꬄድኖ፤ ናሃስያ ኡባ ባብሎነ አፌድኖ። 1 ካታ. 7:15-26፤ 2 ኦዱዋ 3:15-17 14 ሄዋዳንካ ቃይ ከረቱዋ፥ አካፋቱዋ፥ ጾምፕያ ሻሉዋ ጼራ ፕትያባቱዋ፥ ጭልፓቱዋነ ያርሽያ ዎደ ጎኤትያ ናሃስያ ሚሻቱዋ ኡባ አኪደ አፌድኖ። 1 ካታ. 7:45፤ 2 ኦዱዋ 4:16 15 ካትያ ናግያዋንቱ ካፑ ናቡዛራዳን ሙሩታ ብራፐነ ሙሩታ ዎርቃፐ መቴዳ ታማ ካሽያ ሻታቱዋካ ኩይጻሮቱዋካ ኡባ አኪደ አፌዳ። 16 ካቲ ሶሎሞነ መꬍና ጎዳ ጌሻ ጎልያን ኦሰትያባቶ መꬌዳ ላኡ ቱሳቱ፥ አባ ሳኒነ ጋረቱ መቴዳ ናሃስያ ብራታይ ሚዛናን ልካናዉ ዳንዳየተናዋ ኬሻ ዳራ። 17 ላኡ ቱሳቱ እት ማላ ግዲደ፥ እቱዋ እቱዋ ጌሳይ ታማነ ሆስፑን ዋꬋ፤ ቃይ እት እት ቱሳ ሁጲያን ደእያ ጉምቦቱ ሄዙ ዋꬋ አዱሳ። ሄ ጉምቦቱዋ ዩሹ ናሃስያ ቃጽቃሎቱዋንነ ናሃስያፐ መꬌዳ ሮማነ ጌተትያ ቴራ ምስለቱዋን አሌቀት ኡቴዳ።
ይሁዳ አሳይ ኦሞደቲደ ባብሎነ ቤዳ
(ኤር. 52:24-27)
18 ካትያ ናግያዋንቱ ካፑ ናቡዛራዳን ቄሳቱዋ ኡባቱዋ ካፑ ሳራያ፥ አፐ ካልያ ቄስያ ጻፋንያነ ፐንግያ ናግያ ሀራ ሄዙ አሳቱዋ ኦይቄዳ። 19 ቃይ ሄ ዎደ ጋካናዉ፥ ካታማን ደእያ አሳፐ ይሁዳ ኦላ ጋዳዋ፥ ካትያ ዞርያዋንቱፐ እቼሹ አሳቱዋ፥ ኦላ ጋዳዋ ጻፍያ፥ ሄዌነ ኦላንቻቱዋ አሳ ግዶፐ ቆሪደ ከስያዋነ ሀራ ኡሱፑን ታሙ ዎልቃማ አሳቱዋ አፌዳ። 20 ካፑ ናቡዛራዳን ኡንቱንቱ ኡባ አኪደ፥ ባብሎነ ካትያኮ ርብላ ካታማ አፌዳ። 21 ያን ርብላ ካታማን፥ ሀማታ ጋድያን ባብሎነ ካቲ ኡንቱንታ ኡባ ዎꬍሴዳ። ሄዋዳን ሀኒደ፥ ይሁዳ አሳይ ባረ ጋድያፐ ኦሞደት ደንዲደ ቤዳ።
ገዳሊ ይሁዳ ሞዴዳ
(ኤር. 40:7-9፤ 41:1-3)
22 ሄዋፐ ጉይያን፥ ካቲ ናቡካዳናጾረ ሳፋና ናኣ ናኣ፥ አህቃማ ናኣ ገዳልያ፥ ባብሎነ ቤናን ይሁዳን አቴዳ አሳ ሞድያ ካፑዋ ኦꬂደ ሱንꬄዳ። 23 ኩሽያ እምቤና ይሁዳ ኦላ ጋዳዋቱነ ኦላንቻቱ ሄዋ ስሲደ፥ ምስጳን ደእያ ገዳልያን ቢደ ጋከቴድኖ። ሄ ጋዳዋቱ ናታንያ ናኣ እስማኤላ፥ ቃሬሀ ናኣ ዮሀናና፥ ናጾፋ ካታማፐ ዬዳ ታንሁሜታ ናኣ ሳራያነ ማእካፐ ዬዳ እት ብታንያ ናኣ ያዛንያ። 24 ገዳሊ ኡንቱንቶነ ኡንቱንቱ ኦላንቻቶ ጫቂደ፥ ሀዋዳን ያጌዳ፤ “ሀዋንቶ ባብሎነ ካፓቶ ያዮፕተ። ሀ ጋድያን ደእተ፤ ያቲደ ባብሎነ ካትያዉ ሞደትተ። ያቶፐ ሙለ ኡባባይ ህንተዉ ሎአ ግዳናዋ” ያጌዳ።
25 ሽን ላፑንꬃ አግናን ካትያ ዛርያ ግዴዳ ኤልሻማአ ናኣ ናታንያ ናአይ እስማኤለ ታሙ አሳና ምጽጳ ቢደ፥ ገዳልያነ አናና ደእያ ይሁዳ አሳነ ባብሎነ አሳ ኡባ ዎꬌዳ። 26 ሄዋፐ ጉይያን፥ ባብሎነ አሳዉ ያዪደ፥ ይሁዳ አሳይ፥ ቄራይ ዎጋይ አተናን፥ ኦላ ጋዳዋቱዋናካ ኡባይ ግብጼ ጋድያ ባቃቴድኖ። ኤር. 43:5-7
እኮንያነ ቃሹዋፐ ብለቴዳ
(ኤር. 52:31-34)
27 ኤዊል-ማሮዳክ ካተቴዳ ላይꬅ ይሁዳ ካትያ እኮንያና ቃሹዋፐ ብሊደ ማሬዳ። ሄዌ ሀኔዳዌ እኮንያነ ኦሞደት ቃሸቲደ ቤዳ ሀታማነ ላፑንꬃ ላይꬅ፥ ታማነ ላኤንꬃ አግናን፥ ላታማነ ላፑንꬃ ጋላሳና። 28 ኤዊል-ማሮዳክ እኮንያናና ማልኦ ቃላ ሃሳዪደ፥ ባብሎነን ኦሞዱዋን ደእያ ሀራ ካተቱዋ ኡባፐ አꬂደ፥ አ ቦንቼዳ። 29 ሄዋ ድራዉ፥ እኮንያነ ቃሾ ጎለን ማዬዳ ማዩዋ ላሜዳ። እ አቴዳ ባረ ደኡዋ ላይꬃ ኡባን ካትያ ማዳፐ ሜዳ። 30 ሀቼ ሀቼ አዉ ኮሽያዋ ኡባ ባብሎነ ካቲ እሜዳ።