24
1 እዮኣቄማ ዎደ ባብሎነ ቢታ ካትያ ናቡካዳናጾረ ይሁዳ ቦላ ዎራጄዳ። ያትና እዮኣቄም አዉ ሄዙ ላይꬃ ሞደቴዳ። ሄዋፐ ጉይያን ዛሪደ፥ ናቡካዳናጾራ ቦላ ማካሌዳ። ኤር. 25:1-38፤ ዳኔላ 1:1-2 2 መꬍና ጎዳይ ባብሎነ ቢታ ጩጉዋ፥ ሶርያ ቢታ ጩጉዋ፥ ሞኣበ ቢታ ጩጉዋነ አሞና ቢታ ጩጉዋ እዮኣቄማ ቦላ የዴዳ፤ ትምቢትያ ኦድያ ባረ ቆማቱዋ ባጋና መꬍና ጎዳይ ካሰ ሃሳዬዳዋዳን፥ ይሁዳ ቢታ ባይዛናዳን ሀዋንታ የዴዳ። 3-4 ካቲ ምናሰ ኦꬄዳ ናጋራ ኡባ ድራዉ፥ ቃይ ጽሎ አሳ ሱꬃ እ ጉሲደ፥ የሩሳላመን ኩንꬄዳ ድራዉ፥ መꬍና ጎዳይ ይሁዳ አሳ ባረ ስንꬃፐ ድጋናዉ ሀ ባሻ የዴዳ፤ መꬍና ጎዳይ ምናሰዉ ሄ ናጋራ አቶ ጋናዉ ኮይቤና።
5 እዮኣቄም ሀኔዳ ሀራባይነ እ ኦꬄዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ። 6 እዮኣቄም ሀይቂደ፥ ባረ ማይዛን ጋከቴዳ። አ ኮታን አ ናአይ እኮንያነ ካተቴዳ።
7 ግብጼ ቢታ ካቲ ላኤንꬆ ባረ ጋድያፐ ደንዲደ፥ ኦላዉ ይቤና፤ አያዉ ጎፐ፥ ግብጼ ሻፋፐ ዶሚደ፥ ቢደ ኤፍራጺሳ ሻፋ ጋካናዉ፥ ግብጼ ካቲ ሞዴዳ ቢታ ኡባ ባብሎነ ካቲ አክ ድጌዳ።
ይሁዳ ካትያ ዮኣኪና
(2 ኦዱዋ 36:9-10)
8 ዮኣኪነ ካተትያ ዎደ ላይꬃይ አዉ ታማነ ሆስፑና፤ *ታማነ ሆስፑና፦ ላይꬃይ አዉ ታማነ ሆስፑና ዎይ ሆስፑና። 2 ኦድ። 36:9 ጼላ። ዮኣኪነ የሩሳላመን ሄዙ አግና ካተቴዳ። አ ዳይ ሱንꬃይ ነሁሽታ፤ እዛ የሩሳላምያ ኤልናታና ናቶ። 9 ዮኣኪነ ባረ አዉ ኦꬄዳዋዳን፥ መꬍና ጎዳ ስንꬃን ኢታባ ኦꬄዳ።
10 ሄ ዎደ ባብሎነ ካትያ ናቡካዳናጾራ ኦላንቻቱ የሩሳላመ ዪደ፥ ካታማ ዶድ ዎꬄድኖ። 11 ባብሎነ ካቲ ናቡካዳናጾረ ሄ ካታማ ዬዳ። 12 ይሁዳ ካቲ ዮኣኪነ፥ አ ዳያ፥ አ ቆማቱ፥ አ ካፓቱነ ካትያ ጎልያ ኦሳንቻቱ ኡባቱ ባብሎነ ካትያዉ ኩሽያ እሜድኖ።
ዮኣኪነ ካተቴዳ ሆስፑንꬃ ላይꬃን፥ ባብሎነ ካቲ ዮኣኪና ቃቼዳ። ኤር. 22:24-30፤ 24:1-10፤ 29:1-2 13 መꬍና ጎዳ ጌሻ ጎልያንነ ካትያ ጎለን ደእያ ማጹዋ ኡባ ሄ ሳፐ ደንꬂደ አፌዳ። መꬍና ጎዳይ ካሰ ሃሳዬዳዋዳን ካቲ ሶሎሞነ መꬍና ጎዳ ጌሻ ጎልያን ጊግሴዳ ዎርቃ ሚሻቱዋ ኡባ ባብሎነ ካቲ ቃንጸሬꬄዳ። 14 ናቡካዳናጾረ የሩሳላመ አሳ፥ ካፓቱዋ ኡባ፥ ኦላንቻቱዋ ኡባ፥ ኩሽያ ሂላንቻቱዋ ኡባነ ብራታ ቆጽያዋንታ ኡባ፥ ሙለ ታሙ ሻአ አሳ፥ የሩሳላመፐ ኦሞዲደ አፌዳ፤ ቢታን ህዬሳ አሳ ጻላላይ አቴዳ።
15 ናቡካዳናጾረ ዮኣኪና ኦሞዲደ፥ ባብሎነ አፌዳ፤ አናና ካታቶ አ ዳዮ፥ አ ማቻቱዋ፥ አ ኦሳንቻቱዋነ ቢታን ደእያ ዎልቃማ አሳ ኡባ አኪደ ቤዳ። ህዝ. 17:12 16 ሄ አሳፐ ላፑን ሻአቱ ኦላንቻቱዋ፤ እት ሻአ አሳቱ ዱማ ዱማ ኩሽያ ሂላንቻቱዋ፤ ኡንቱንቱ ኡባይካ ምናነ ኦላ ኦለታናዉ ዳንዳይያዋንታ። እ ሄ ኡባቱዋ ባብሎና አፌዳ። 17 ሄዋፐ ጉይያን፥ ባብሎነ ካቲ ዮኣኪና ኮታን አ አዉዋ እሻ ማታንያ ካተዬዳ። አ ሱንꬃ ሰደቅያሳ ያጊደ ላሜዳ። ኤር. 37:1፤ ህዝ. 17:13
ይሁዳ ካትያ ሰደቅያሳ
(2 ኦዱዋ 36:11-12፤ ኤር. 52:1-3)
18 ሰደቂያስ ካተትያ ዎደ፥ ላይꬃይ አዉ ላታማነ እታ፤ የሩሳላመን እ ታማነ እት ላይꬃ ካተቴዳ። አ ዳይ ሱንꬃይ ሀሙጻሎ፤ እዛ ሊብና ካታማን ደእያ ኤርማሳ ናቶ። ኤር. 27:1-22፤ 28:1-17 19 እዮኣቄም ኦꬄዳዋዳን፥ ሰደቅያስካ መꬍና ጎዳ ስንꬃን ኢታባ ኦꬄዳ። 20 መꬍና ጎዳይ ሀንቀቴዳ ድራዉ፥ የሩሳላመ አሳ ቦላነ ይሁዳ አሳ ቦላ ሀዌ ሀኔዳ፤ ዉርሰꬃን ኡንቱንታ እ ባረ ስንꬃፐ ድጌዳ።
ሰደቅያስ ባብሎነ ካትያ ቦላ ማካሌዳ። ህዝ. 17:15