1 ፕልስጼማ አሳቱ እስራኤልያ አሳቱዋና ኦለቴድኖ። እስራኤልያ አሳቱ ፕልስጼማ አሳቱዋ ስንꬃፐ ባቃቴድኖ። ዳሮ እስራኤላቱ ግልቦአ ደርያን ሀይቄድኖ። 2 ፕልስጼማ አሳቱ ሳኦላነ አ አቱማ ናና የደርስ ጋኪደ፥ ሳኦላ ናና ዮናታና፥ አብናዳባነ ማልክሹአ ዎꬌድኖ። 3 ኦላይ ሳኦላ ዩይ አꬊደ ኡንኤቴዳ፤ ዎንዳፍያ አሳቱ ሳኦላ ደሜዳ ዎደ፥ ዙቢያን አ ጫዲደ ማዱንጽሴድኖ።

4 ሳኦል ባረ ኦላ ሚሻ ቶክያዋ፥ “ሀ ቃጻረትቤና ፕልስጼማቱ ዪደ፥ ታ ቦላ ካኤናዳን፥ ነ ማሻን ጫዳደ፥ ታና ኔን ዎꬋ” ያጌዳ።

ሽን አ ኦላ ሚሻ ቶክያዌ ሎይꬅ ያዬዳ ድራዉ እጼዳ፤ ሳኦል ባረ ማሻ ሳኣን ኤሲደ፥ አ ቦላ ኩንዴዳ። 5 አ ኦላ ሻሉዋ ቶክያዌ ሳኦል ሀይቄዳዋ ብእደ፥ እካ ባረ ማሻ ሳኣን ኤሲደ፥ አ ቦላ ኩንዲደ፥ ሀይቂ አጌዳ። 6 ሀዋዳን ሀኒደ፥ ሳኦል፥ አ ናናይ ሄዙነ አ ሶይ አሳይ ኡባይ ሄ ጋላስ እትፐ ሀይቄድኖ። 7 ዎምባን ደእያ እስራኤልያ አሳቱ ኡባይ ባረንቱ ኦላንቻቱ ባቃቴዳዋነ ሳኦልነ አ ናናይ ሀይቄዳዋ ስሰዳ ዎደ፥ ኡንቱንቱካ ባረንቱ ካታማቱዋ አጊደ ባቃቴድኖ። ባቃትና ፕልስጼማ አሳቱ ዪደ፥ ሄ ካታማቱዋን ደኤድኖ።

8 ዎንተꬃ ጋላስ ፕልስጼማቱ አሃቱዋ ቦላፐ ኦላ ሚሻቱዋ ቃር አካናዉ ዪደ፥ ሳኦልነ አ ናናይ ግልቦአ ደርያን ሀይቂደ፥ ግሴዳዋንታ ደሜድኖ። 9 ኡንቱንቱ ሳኦላ ቆꬍያ ሙጬድኖነ አ ኦላ ሻሉዋ ቃር አኬድኖ። ያቲደ ባረንቱ ኤቃቱዋ ጎለንነ ባረንቱ አሳ ግዱዋን ጾኑዋ አዋያና ማላ፥ ፕልስጼማ ቢታዉ ኡባዉ አሳ ኪታ የዴድኖ። 10 ኡንቱንቱ ሳኦላ ኦላ ሚሻ ባረንቱ ጾሳቱዋ ጎለቱዋፐ እቱዋን ዎꬄድኖ፤ አ ጉግያካ ባረንቱ ጾሳ ዳጎና ኤቃ ጎለን ካቄድኖ።

11 ፕልስጼማ አሳቱ ሳኦላ ኦꬄዳዋ ኡባ ጋላኣደን ደእያ ያቤሻ ካታማ አሳቱ ስሴዳ ዎደ፥ 12 ኡንቱንቱ ምኖ አሳቱ ኡባይ ቢደ፥ ሳኦላ አሃነ አ ናና አሃ አኪደ፥ ያቤሻ ካታማ አሄድኖ። ያቤሻን ደእያ ዎላ ጋርሳን ኡንቱንቱ መቀꬃ ሞጌድኖ፤ ያቲደ ላፑን ጋላሳ ጾሜድኖ።

13-14 ሳኦል መꬍና ጎዳዉ አማነትቤና ድራዉ ሀይቄዳ። መꬍና ጎዳ ቃላ እ ናግቤና፤ መꬍና ጎዳና ዞረትያዋ አጊደ፥ ሞይትልያ ጼስያ አሳና ዞረቴዳ። ሄዋ ድራዉ፥ መꬍና ጎዳይ አ ዎꬊደ፥ አ ካዉተꬃ እሰያ ናኣ ዳዊታዉ አꬂደ እሜዳ። ዎጋ 19:31፤ 20:6፤ 1 ሳሜላ 13:8-14፤ 15:1-24፤ 28:7-8