1 ሄዋፐ ጉይያን፥ እስራኤልያ አሳይ ኡባይ እትፐ ከብሮናን ደእያ ዳዊታኮ ሺቂደ፥ “ኑን ነ ሱꬃነ ነ አሹዋ። 2 ካሰ ሳኦል ካትያ ግዲደ ደእያ ዎደካ፥ እስራኤልያ አሳ ኦላዉ ካለꬄዳዌ ኔና። መꬍና ጎዳይ ነ ጾሳይ ኔና፥ ‘ታ አሳ እስራኤልያ ኔን ሄማና፤ ኡንቱንቱ ቦላካ ኔን ካተታና’ ያጌዳ” ያጌዳ። 3 ሄዋ ድራዉ፥ እስራኤልያ ጭማቱ ኡባይ ካትያ ዳዊታኮ ከብሮነ ካታማ ዬድኖ፤ እ ኡንቱንቱና ከብሮናን መꬍና ጎዳ ስንꬃን ቃላ ጫቁዋ ጫቀቴዳ። መꬍና ጎዳይ ሳመላ ባጋና ሃሳዬዳ ቃላዳን፥ ዳዊተ እስራኤልያ ቦላ ካተታናዳን ኡንቱንቱ አ ኦኬድኖ።

4 ዳዊተነ እስራኤልያ አሳይ ኡባይ የሩሳላመ ካታማ ቤድኖ። ሄ ዎደ ያቡሳ አሳቱ ሄ ሳኣን ደእያ ድራዉ፥ ሄ ካታማይ ያቡሳ ጌተቴ። ኢያሳ 15:63፤ ዳና. 1:21 5 ያቡሳ አሳቱ ዳዊታ፥ “ኔን ሀ ካታማ ገላናዉ ኡባካ ዳንዳያካ” ያጌድኖ። ግዶፐነ፥ ዳዊተ ጽዮነን ደእያ ኡንቱንቱ ጌሳቱዋ ኦይቄዳ፤ ጽዮነ ዳዊታ ካታማ ጌተቴዳ። 6 ዳዊተ ባረ ኦላንቻቱዋ፥ “ያቡሳ አሳቱ ካሰት ኦልያ ኦንነ ኦላ ጋዳዋ ግዳናዋ” ያጌዳ። ጻሩይ ናአይ ዮኣበ ካሰት ቢደ ኦሌዳ፤ ያቲደ ጋዳዋ ግዴዳ። 7 ዳዊተ ሄ ጌሱዋን ደኤዳ፤ ሄዋ ድራዉ፥ ሄ ካታማይ ዳዊታ ካታማ ጌተቴዳ።

8 ዳዊተ ሚሎፐ ዶሚደ፥ ሄ ካታማ ዛረꬂደ ኬጼዳ፤ አቴዳ ካታማ ቃይ ዮኣበ ዛረꬂደ ኬጼዳ። 9 ኡባፐ ዎልቃማ መꬍና ጎዳይ አናና ደእያ ድራዉ፥ ዳዊተ ምን ምኒደ ቤዳ።

10 ዳዊታ አሳቱ ምኖቱ ሀዋፐ ካሊደ ጻፈቴድኖ። መꬍና ጎዳይ እስራኤልያባ ሃሳዬዳዋዳን፥ ዳዊተ ካተታና ማላ፥ ሀ አሳቱ እስራኤልያ አሳና ግዲደ፥ ሎይꬅ ማዴድኖ። ቃይ አ ካዉተꬃካ ምንሴድኖ።

11 ዳዊታ አሳቱ ምኖቱ ሀዋፐ ካሊደ ጻፈቴዳዋንታ። ኡንቱንቱፐ ሄዛቱ ሎይꬅ ኤረቴዳዋንታ። ሄዛቱዋፐ ኮይሩ ሀክሞናፐ ዬዳ ያሾብኣማ፤ ያሾብኣም እት ገደ ኦላን ሄዙ ጼቱ አሳ ባረ ቶራን ዎꬌዳ። 12 ሄዙ ምኖ አሳቱዋ ግዶን አ ካሊደ ደእያዌ አሆህያ ዶዶ ናኣ ኤልኣዛራ። 13-14 ፕልስጼማ አሳቱ ኦለታናዉ ፓስዳምማ ግያ ሳኣ ሺቄዳ ዎደ፥ ኤልኣዛረ ዳዊታና እትፐ ደኤ። እስራኤልያ ኦላንቻቱ ፕልስጼማ አሳቱዋ ስንꬃፐ ባቃትያ ዎደ፥ ኤልኣዛረ ባንጋ ሾይቃን ደኤ። እነ ዳዊተነ ሾይቃ ግዱዋን ኤቂደ፥ ፕልስጼማ አሳቱዋና ኦለቴድኖ። መꬍና ጎዳይ ዎልቃማ ጾኑዋ እሚደ፥ ኡንቱንቱ አሼዳ።

15 ፕልስጼማ ኦላንቻቱ ራፋይማ ዎምባን ዱንካኔዳ ዎደ፥ ሀታሙ ካፓቱዋፐ ሄዛቱ ዳዊተ ደእያ አዱላማ ጎንጎሉዋን ደእያ ዛላኮ ዬድኖ። 16 ሄ ዎደ ዳዊተ ጌሱዋ ግዶን ደኤ፤ ፕልስጼማ ኦላንቻቱ ጩጉ ቤታልሄመን ደኤ። 17 ዳዊተ ሃꬃ ኡሻናዉ አሞቲደ፥ “ቤተሌመ ካታማ ፐንግያ ምይያን ደእያ ፑልቱዋ ሃꬃፐ ታና ኦን ኡሻንዴሻ!” ያጌዳ። 18 ሄዙ ምኖ አሳቱ ፕልስጼማ አሳቱ ዱንካኔዳ ሳኣ ፕን ቢደ፥ ቤተሌመ ካታማ ፐንግያን ደእያ ፑልቱዋፐ ሃꬃ ዱቂደ፥ ዳዊታዉ አሄድኖ። ሽን ዳዊተ ኡሸናን እጼዳ፤ እ ሄ ሃꬃ መꬍና ጎዳ ስንꬃን ትጌዳ። 19 “ሀዋ ኡሻናዌ ታፐ ሃኮ! ባረንቱ ሸምፑዋ ኦለቲደ ቤዳ ሀ አሳቱዋ ሱꬃ ታን ኡሾ? አያዉ ጎፐ፥ ኡንቱንቱ ባረንቱ ሸምፑዋ አꬅ እሚደ፥ ሃꬃ አሄድኖ” ያጌዳ። ሄዋ ድራዉ፥ ዳዊተ ሄ ሃꬃ ኡሽቤና። ሄ ሄዙ ምኖ አሳቱ ሄዋ ኦꬄድኖ።

20 ዮኣባ እሻይ አብሻይ ሄዛቶ ካፑዋ። እ ባረ ቶራን ሄዙ ጼቱ አሳቱዋ ኦለቲደ ዎꬌዳ። ያቲደ እካ ሀራ ሄዛቱዋዳን ኤረቴዳ። 21 እ ላኤንꬆ ሄዛቱዋፐ አꬍ ቦንቼቴዳ አሳ፤ እ ኡንቱንቶ ካፖ ግዴዳ። ሽን እ ሄ ኮይሮ ሄዛቱዋና ቃራ ግደና።

22 ቃብጽኤላፐ ዬዳ ዮዳሄ ናአይ ባናይ ምኖ አሳ፤ ምኖ ኦሳቱዋ ኦꬄዳ። እ ላኡ ኤረቴዳ ሞኣበ ጋድያ አሳቱ ዎꬌዳ። ቃይ ሻቻይ ዳሬዳ እት ጋላስ ኦላ ግዶ ገሊደ፥ ጋሙዋ ዎꬌዳ። 23 ባናይ ጌሳይ እቼሹ ዋꬋ ጋክያ ግብጼ ጋደ ብታንያ አዱሳ ዎꬌዳ። ግብጼ ብታንያ ኩሽያን ሸማይንያ ዎንዳራሽያ ኬሻ ቶራይ ደኤ፤ ሽን ባናይ ጋትማ ኦይቂደ፥ ብታንያኮ ቤዳ። ሄ ብታንያ ኩሽያፐ ቶራ ወꬂ አኪደ፥ አ ቶራን አ ዎꬌዳ። 24 ዮዳሄ ናአይ ባናይ ሀዋንታ ኦꬄዳ። አ ሱንꬃይካ ሄ ሄዛቱዋዳን ኤረቴዳ። 25 እ ሀታማቱዋ ግዶን ዳሮ ቦንቼቴዳ፤ ሽን እ ሄዛቱዋና ጉጀተና። ዳዊተ አ ባረና ናግያ ኦላንቻቶ ካፑዋ ከሴዳ።

26 ምኖ አሳቱ ዮኣባ እሻ አሳሄላ፥ ቤተሌመፐ ዬዳ ዶዶ ናኣ ኤልሀናና፥ 27 ሀሮዳፐ ዬዳ ሻሞታ፥ ፕሎናፐ ዬዳ ሄሌጻ፥ 28 ታቆአፐ ዬዳ እቄሻ ናኣ እራ፥ አናቶታፐ ዬዳ አብኤዘራ፥ 29 ሁሻፐ ዬዳ ስባካያ፥ አሆህያ እላያ፥ 30 ናጾፋፐ ዬዳ ማህራያ፥ ናጾፋፐ ዬዳ ባኣና ናኣ ሄሌዳ፥ 31 ቢንያማ ጋድያን ደእያ ግብኣ ካታማፐ ዬዳ ርባያ ናኣ እታያ፥ ፕርኣቶናፐ ዬዳ ባናያ፥ 32 ጋኣሻ ዛንጋራ ማታፐ ዬዳ ሁራያ፥ አራባፐ ዬዳ አቢኤላ፥ 33 ባህሩማፐ ዬዳ አዝማዌታ፥ ሻአልቦናፐ ዬዳ ኤልያህባ፥ 34 ጊዞናፐ ዬዳ ሀሼማ፥ ሃራራፐ ዬዳ ሻገ ናኣ ዮናታና፥ 35 ሃራራፐ ዬዳ ሳካራ ናኣ አህኣማ፥ ኡራ ናኣ ኤልፋላ፥ 36 ማኬራፐ ዬዳ ሄፌራ፥ ፕሎናፐ ዬዳ አኪያ፥ 37 ቃርመሎሳፐ ዬዳ ሄጽራ፥ ኤዝባያ ናኣ ናእራያ፥ 38 ናታና እሻ ዩኤላ፥ ሃግራ ናኣ ምብሃራ፥ 39 አሞናፐ ዬዳ ጸለቃ፥ ጻሩይ ናኣ ዮኣባ ኦላ ሚሻ ቶክያ ባኤሮታፐ ዬዳ ናህራያ፥ 40 ያትራ ያራ ግድያ እራ፥ ያትራ ያራ ግድያ ጋሬባ፥ 41 ሂትያ ኡርዮና፥ አህላያ ናኣ ዛባዳነ 42 ሮቤላ ዛርያ ግድያ ሺዛ ናኣ አዲና። እ ሮቤላ ዛራቱዋ ካፑዋ፤ አናና እትፐ ሀታሙ አሳቱ ደኢኖ። 43 ሀራ ምኖ አሳቱ ቃይ ማእካ ናኣ ሀናና፥ ምታናፐ ዬዳ ዮሻፋጻ፥ 44 አሽታራፐ ዬዳ ኦዝያና፥ አሮኤራፐ ዬዳ ሆታማ ናና ሻማአነ ይእኤላ፥ 45 ሺምራ ናኣ ይድኤላነ አ እሻ ቲጻፐ ዬዳ ዮሀ፥ 46 ማሃዋፐ ዬዳ ኤልኤላ፥ ኤልናኣማ ናና ይሪባያነ ዮሻውያ፥ ሞኣበ ጋድያፐ ዬዳ ይትማ፥ 47 ጾባ ካታማፐ ዬዳ ኤልኤላ፥ ዮቤዳነ ያእስኤላ።