1 ዳዊተ ቂሳ ናኣ ሳኦላፐ ባቃት ቢደ፥ ጽቅላጋን ኡቴዳ ዎደ፥ አኮ ዬዳ አሳቱ ሀዋፐ ካሊደ ጻፈቴዳዋንታ። ኡንቱንቱ ካሰ ዳዊታ ኦላን ማዴዳ ምኖ አሳቱዋ ግዶን ደኢኖ። 2 ኡንቱንቱ ዎንዳፍያ አሳቱዋ፤ ቃይ ባረንቱ ኡሸቻ ኩሽያንነ ሀድርሳ ኩሽያን ሹቻ ያምባርሻን ኦላናዉ ዳንዳዪኖ። ኡንቱንቱ ቢንያማ ዛርያ ግድያ ሳኦላ ዳቦቱዋ። 3 ኡንቱንቱ ካፑ አህኤዘራ፤ አህኤዘራፐ ስምና ዮኣሻ፤ ኡንቱንቱ ግብአፐ ዬዳ ሻማአ ናና።

ሀራቱ ቃይ አዝማዌታ ናና ግድያ ይዝኤላነ ፐሌጻ፥ ባራካ፥ አናቶታፐ ዬዳ ዬሀ፥ 4 ሀታማቱዋ ግዶን ዎልቃማ ግዲደ፥ ኡንቱንታ ካለꬅያ ጋባኦናፐ ዬዳ ይሽማእያ፥ ኤርማሳ፥ ያሃዝኤላ፥ ዮሀናና፥ ገዴራፐ ዬዳ ዮዛባዳ፥ 5 ኤልኡዛያ፥ ያርሞታ፥ ባኣልያ፥ ሻማርያ፥ ሀሪፋፐ ዬዳ ሻፋጽያ፥ 6 ቆራሀ ያራቱዋ ግድያ ኤልቃና፥ ይሽያ፥ አዛርኤላ፥ ዮኤዘራነ ያሾብኣማ፥ 7 ጋዶራፐ ዬዳ ይሮሃማ ናና ዮኤላነ ዛባድያ።

8 ዳዊተ መላ ቢታን ደእያ ባቃት አትያ ሳኣን ኡት ደእሽን፥ ጋደ ዛርያፐ አሳቱ አኮ ዬድኖ። ኡንቱንቱ ምኖ አሳቱዋነ ኦላዉ ጊጌዳዋንታ፤ ቃይ ጎንዳልያነ ቶራ ኦይቃናዉ ዳንዳይያዋንታ። ኡንቱንቱ ሶምእ ጋሙዋ ዴሙዋ ማላቴ፤ ኡንቱንቱ ደረቱዋ ሁጲያን ጉፕያ ገንእያዳን ኤሌሊኖ። 9 ኡንቱንቱ ካፑ ኤጼራ፤ ላኤንꬁ ኦባድያ፤ ሄዘንꬁ ኤልኣባ፤ 10 ኦይደንꬁ ምሽማና፤ እቼሸንꬁ ኤርማሳ፤ 11 ኡሱፑንꬁ አታያ፤ ላፑንꬁ ኤልኤላ፤ 12 ሆስፑንꬁ ዮሀናና፤ ኡዱፑንꬁ ኤልዛባዳ፤ 13 ታማንꬁ ኤርማሳ፤ ታማነ እተንꬁ ማክባናያ። 14 ሀዋንቱ ጋደ ዛርያ ኦላንቻቶ ካፓቱዋ። ኡንቱንቱፐ ላፍያዋንቱ ጼቶ ካፓቱዋ፤ ምንያዋንቱ ሻአ ካፓቱዋ። 15 ዮርዳኖሳ ሻፋይ፥ ጋጻፐ ጋጻ ጋካናዉ ኩም ክጼዳ ኮይሮ አግናን ፕኔዳዋንቱ ሀዋንታ። ኡንቱንቱ ዎምባን አዋይ ዶልያ ባጋናነ አዋይ ዉልያ ባጋናነ ኡቴዳ አሳ ኡባ የደርሴድኖ።

16 ቢንያማ ዛራቱዋፐነ ይሁዳ ዛራቱዋፐ አማሬዳ አሳቱ ዳዊታኮ ጌሱዋ ዬድኖ። 17 ዳዊተ ኡንቱንቱና ጋከታናዉ ከሲደ፥ ሀዋዳን ያጌዳ፤ “ህንተንቱ ታና ማዳናዉ ሳሩዋን ታኮ ዬዳዋ ግዶፐ፥ ታ ዎዛናይ ህንተናና እትፐ ግዳናዋ። ሽን ህንተንቱ ታና ታ ሞርከቶ አꬅ እማናዉ ዬዳዋ ግዶፐ፥ ህንተንታ ኤርተ! ታን ኦꬄዳ ኢታባይ ባይና ድራዉ፥ ኑ አዎቱዋ ጾሳይ ሄዋ በኦ፤ እ ህንተንታ ፕርዶ!” ያጌዳ።

18 ሄዋፐ ጉይያን፥ ሀታማቱዋ ካፑዋ አማሳያ ቦላ ጾሳ አያናይ ዎꬍና፥

19 ዳዊተ ፕልስጼማቱዋና እትፐ ግዲደ፥ ሳኦላ ኦላናዉ ቤዳ ዎደ፥ ምናሰ ዛርያፐ አማሬዳ አሳቱ ዳዊታን ጋከቴድኖ። ሽን ፕልስጼማ አሳቱዋ ካፓቱ ዳዊተነ ዳዊታ አሳይ ባረናና ቤናዳን ድጌድኖ። ፕልስጼማ አሳቱ ሎይꬅ ዞረቴዳዋፐ ጉይያን፥ ኡንቱንታ ጉየ የዴድኖ፤ አያዉ ጎፐ፥ ዳዊተነ ዳዊታ አሳይ ኡንቱንቱ ካትያ ሳኦላዉ አꬅ እማነንቶነ ጊደ ያዬድኖ። 20 ዳዊተ ጽቅላጋ ካታማ ስምሽን፥ ምናሰ ዛርያፐ ዳዊታ ማዳናዉ ከሴዳ ሻላቃቱ አድናሀ፥ ዮዛባዳ፥ ይድኤላ፥ ምካኤላ፥ ዮዛባዳ፥ ኤልሀነ ጽልታያ። 21 ኡንቱንቱ ኡባይካ ጻላነ ዎልቃማ አሳ ግድያ ድራዉ፥ ዳዊተ ጩጉዋ ካልያ ዎደ፥ ኡንቱንቱ አ ማዴድኖ። 22 ዳዊታ ኦላንቻቱ ጾሳ ኦላንቻቱዋዳን ጮራና ጋካናዉ፥ አ ማድያ አሳይ ጋላስ ጋላስ ጉጀቴ።

23 መꬍና ጎዳይ ሃሳዬዳዋዳን ሳኦላ ካዉተꬃ ዳዊታዉ ዛራናዉ ኦላዉ ዳንጭ ጊጊደ፥ ከብሮናን ደእያ ዳዊታኮ ዬዳ ኦላንቻቱ ፓይዱ ሀዋፐ ካሊደ ጻፈቴዳዋ። 24 ጎንዳልያነ ቶራ ኦይቂደ፥ ኦላዉ ዳንጭ ጊጌዳ ይሁዳ ዛራቱ ኡሱፑን ሻአነ ሆስፑን ጼታ። 25 ስሞና ዛርያፐ ኦላዉ ጊጌዳ ጻላነ ዎልቃማ ኦላንቻቱ ላፑን ሻአነ እት ጼታ። 26 ሌዊያ ዛርያፐ ኦይዱ ሻአነ ኡሱፑን ጼታ። 27 አሮና ዛራቱዋ ካፑ ዮዳሀ፤ ዮዳሄና እትፐ ሄዙ ሻአነ ላፑን ጼቱ አሳቱ ደኢኖ። 28 ቃይ ጻዶቀ ያላጋ ጻላነ ዎልቃማ አሳ፤ ጻዶቃ አዉዋ ጎልያ አሳፐ ላታማነ ላኡ ካፓቱ አናና እትፐ ደኢኖ። 29 ቢንያማ ዛርያ ግዴዳ ሳኦላ ዳቦቱ ሄዙ ሻአ አሳ። ሽን ቢንያማ ዛርያፐ ዳርያ ባጋ አሳይ ሳኦላ ጎልያ አሳዉ ሄ ዎዲ ጋካናዉ አማነትያዋንታ። 30 ኤፍሬማ ዛርያፐ ባረንቱ አዎቱዋ ጎልያ አሳን ኤረቴዳ ጻላነ ዎልቃማ አሳቱ ላታሙ ሻአነ ሆስፑን ጼታ። 31 ዳዊታ ካተያናዉ ባናዉ ዶረቴዳ ምናሰ ዛርያፐ ባጋቱ ታማነ ሆስፑን ሻአ። 32 ቃይ እስራኤልያ አሳይ አያ ኦꬃናዉ በስንቶ፥ ዎድያባ ሻክ ኤርያ አኬካንቻ አሳቱ፥ ይሳኮራ ዛርያዉ ካፓቱ ላኡ ጼታ፤ ኡንቱንቱ ዳቦቱ ኡባይ ኡንቱንቶ አዛዘቲኖ። 33 ኦላ ሻሉዋ ኡባ ኦይቂደ፥ ባረንቱ ኩመንꬃ ዎዛናን ዳዊታ ማዳናዉ ጊጌዳ ኦላንቻቱዋን ዛብሎና ዛርያ አሳቱ እሻታሙ ሻአ። 34 ንፍታሌማ ዛርያፐ እት ሻአ ካፓቱ ደኢኖ፤ ጎንዳልያነ ቶራ ኦይቂያ ሀታማነ ላፑን ሻአ አሳቱ ኡንቱንቱና እትፐ ደኢኖ። 35 ዳና ዛርያፐ ኦላዉ ጊጌዳ አሳቱ ላታማነ ሆስፑን ሻአነ ኡሱፑን ጼታ። 36 ኦላዉ ከሳናዉ አሴራ ዛርያፐ ጊጌዳዋንቱ ኦይታሙ ሻአ። 37 ዮርዳኖሳ ሻፋፐ ሄፍንꬃ አዋይ ዶልያ ባጋን ደእያ ሮቤላ ዛርያፐ፥ ጋደ ዛርያፐነ ምናሰ ዛርያ ባጋፐ ኦላ ሻሉዋ ኡባ ኦይቂደ ዬዳ አሳቱ እት ጼታነ ላታሙ ሻአ።

38 ሀ ኦላዉ ጊጌዳ ኦላንቻቱ ኡባይ ዳዊታ እስራኤልያ ቦላ ካተያናዉ ባረንቱ ቆፋ ቃቺደ፥ ከብሮነ ካታማ ዬድኖ። ቃይ እስራኤልያፐ አቴዳዋንቱካ ካተያናዉ ዳዊታ ካተዪደ እት ዎዛና ግዴድኖ። 39 ኡንቱንቱ ዳቦቱ ኡንቱንቶ ኮሽያዋ ጊግስ ዎꬄዳ ድራዉ፥ ሚድነ ኡሺደ ዳዊታና ሄዙ ጋላሳ ኡቴድኖ። 40 እስራኤልያ አሳዉ ናሸቻ ግድያ ድራዉ፥ ሁጲሳ ባጋና ደእያ ይሳኮራፐ፥ ዛብሎናፐነ ንፍታሌማፐ አሳቱ ዳሮ ቁማ አሄድኖ። ꬊልያ፥ ባላስያ ኡክꬃ፥ ዎይንያ ቴራ፥ ዎይንያ ኤሳነ ዛይትያ ሀርያን፥ ባቁሉዋን፥ ጋሉዋንነ ቦራን ጫኒደ አሄድኖ፤ ቃይካ ኡንቱንቱ ሚዛነ ዶርሳ ሹኪደ ማናዉ አኪደ ዬድኖ።