1 ሄዋፐ ጉይያን፥ ዳዊተ ሱንꬃቱዋና፤ ሻላቃቱዋናነ ጼቱዋ ካፓቱዋና ዞረቴዳ። 2 እስራኤልያ አሳ ኡባ፥ “ህንተንቶ ሎአ ማላትያባ ግዶፐነ፥ መꬍና ጎዳ ኑ ጾሳ ሸነ ግዶፐ፥ እስራኤልያ ቢታ ጋጻን ደእያ ኑ ዳቦቱ፥ ቄሳቱ ነ ባረንቱ ካታማን ደእያ ሌዋቱ ኑናና እትፐ ሺቃናዳን አሳ ኪቶይተ። 3 ሳኦል ካተቴዳ ዎደ ሸነኮ ጊና፥ ዶገቲደ አቴዳ ኑ ጾሳ ታቦታ አነ ዛሪደ አሆይተ” ያጌዳ። 4 ዳዊተ ኦዴዳ የዉ ሱረ ግዴዳ ድራዉ፥ አሳይ ኡባይ ማዬዳ።

5 ሄዋ ድራዉ፥ ዳዊተ ጾሳ ታቦታ ቅርያት-ይኣሪማፐ አሀና ማላ፥ ግብጼ ዛዋፐ ሽሆራ ሻፋፐ ዶሚደ፥ ሀማታ ፕኑዋ ጋካናዉ ደእያ እስራኤልያ አሳ ኡባ ሺሼዳ። 1 ሳሜላ 7:1-2 6 ዳዊተነ እስራኤልያ አሳይ ኡባይ ክሩበቱዋፐ ግዱዋን ባረ ካዉተꬃ አራታ ቦላ ኡቴዳ ጾሳ ሱንꬃን ጼሰቴዳ ጾሳ ታቦታ አሀናዉ ይሁዳ ቢታን ደእያ ባኣላ ጌተትያ ቅርያት-ይኣሪማ ካታማ ቤድኖ። ከሳ 25:22 7 ጾሳ መꬍና ጎዳ ታቦታ ቦራይ ጎችያ ኦራꬃ ጋርያን ዎꬂደ፥ አብናዳባ ሶፐ አሄድኖ፤ ኡዝነ አህዮይ ጋርያ ላጊኖ። 8 ዳዊተነ እስራኤልያ አሳይ ኡባይ ዲꬃነ ማስንቁዋ ዲጺደ፥ ካባሩዋ ባቂደ፥ ዳላ ቃꬂደነ ጹሩምባ ፑኒደ፥ ባረንቱ ኩመንꬃ ዎልቃን ጾሳ ስንꬃን ናሸቲደ ቦንቼድኖ።

9 ኡንቱንቱ ኪዶና ግያ ሳን ደእያ ካꬃ ቡክያ ኡዱማ ጋክያ ዎደ፥ ቦራቱ ꬉበትና፥ ኡዝ ታቦታ ኦይቃናዉ ባረ ኩሽያ የዴዳ። 10 አ ኩሺ ታቦታ ቦቼዳ ድራዉ፥ መꬍና ጎዳ ሀንቁ ኡዛ ቦላ ኤጽ ከሴዳ። ሄዋ ድራዉ፥ ጾሳይ አ ሾጭና፥ እ ሄ ሳኣን ጾሳ ስንꬃን ሀይቂ አጌዳ። 11 መꬍና ጎዳይ ሀንቀቲደ ኡዛ ዎꬌዳ ድራዉ፥ ዳዊተ ይሎቴዳ። ሀቼ ጋካናዉ፥ ሄ ሳአይ ፔረዝ ኡዛ ጌተቲደ ጼሰቴዳ። ኡዝ ሾጨቶ ሳኣ ጌተቴ።

12 ሄ ጋላስ ዳዊተ ጾሳዉ ያዬዳ ድራ፥ “ጾሳ ታቦታ ታኮ ዋታ አሀናዉ ዳንዳያይታ?” ያጌዳ። 13 ሄዋ ድራዉ፥ ታቦታ ባረናና ዳዊታ ካታማ አፍቤና። ሽን ጋትያ ኦቤድ-ኤዶማ ጌተትያ ብታንያ ሶ አፌዳ። 14 ጾሳ ታቦታይ ኦቤድ-ኤዶማ ጎለን አ ጎልያ አሳና ሄዙ አግና ጋምኤዳ። መꬍና ጎዳይ አ ጎልያ አሳነ አዉ ደእያ ኡባባ አንጄዳ። 1 ኦዱዋ 26:4-5