1 ጺሮሳ ካቲ ኪራም ዳዊታዉ አሳቱዋ ኪቴዳ። ኪተቴዳ አሳቱዋና ጎልያ ኬጻናዳን ዝጋ ሙደꬃነ ቃይ ሹቻ ማስያዋንታነ አናጸቱዋ አዉ የዴዳ። 2 መꬍና ጎዳይ እስራኤልያ ቦላ አ ካትያ ኦꬂደ ኤሴዳዋነ ባረ አሳ እስራኤልያ ድራዉ፥ አ ካዉተꬃ ꬎቁ ኦꬂደ ቦንቼዳዋ ዳዊተ ኤሬዳ።

3 ሄዋፐ ጉይያን፥ ዳዊተ የሩሳላመን ሀራ ማጫ አሳ ጉጅ አኪደ፥ አቱማዋ ናናነ ማጫ ናና የሌዳ። 4 ዳዊተ የሩሳላመን የሌዳ አቱማ ናናይ ሻሙአ፥ ሾባባ፥ ናታና፥ ሶሎሞነ፥ 5 ይብሃራ፥ ኤልሹአ፥ ኤልፓሌጻ፥ 6 ኖጋሀ፥ ነፌጋ፥ ያፍአ፥ 7 ኤልሻማአ፥ በኤልያዳነ ኤልፈሌጻ። *ዳዊታዉ የሩሳላመን የለቴዳ አቱማ ናና ሱንꬃይ 2 ሳሜላ 5:14-16፣ 2 ኦዱዋ 3:5-7 ነ 14:4-7 ጻፈቴዳ: ሽን እብራዌꬁዋን እቱዋ እቱዋ ሱንꬃይ ኡባ ሳን እት ማላ ግደና።

8 ዳዊተ እስራኤልያ ኡባ ቦላ ካትያ ግዲደ ኦከቴዳዋ ፕልስጼማ አሳይ ስሴዳ ዎደ፥ ኡንቱንቱ ኡባይ ዳዊታ ኮያናዉ ከሴድኖ። ዳዊተ ኡንቱንቱ ከሴዳዋ ስሲደ፥ ኡንቱንቱና ኦለታናዉ ከሴዳ። 9 ፕልስጼማ አሳይ ራፋይማ ዎምባ ዪደ ቦንቄድኖ። 10 ዳዊተ ጾሳ፥ “ታን ባደ ፕልስጼማቱዋ ኦሎ? ኔን ኡንቱንቱ ታዉ አꬃ እማኒ?” ያጊደ ኦቼዳ።

ሽን መꬍና ጎዳይ አ፥ “ባደ ኦላ። ታን ኡንቱንታ ነዉ አꬃ እማና” ያጌዳ።

11 ዳዊተነ አ አሳይ ባኣል-ፓራጺማ ግያ ሳኣ ቢደ፥ ያን ኡንቱንታ ጾኔድኖ። ዳዊተ፥ “ሃꬃ ድኡ ꬉስ አꬍያዋዳን ጾሳይ ታ ሞርከቱዋ ግዱዋና ታና አꬄዳ” ያጌዳ። ሄዋ ድራዉ፥ ሄ ሳኣ ሱንꬃይ ባኣል-ፓራጺማ ጌተቴዳ። 12 ፕልስጼማቱ ባረንቱ ኤቃቱዋ ሄ ሳኣን የጊደ ቤድኖ። ያትና ዳዊተ አዛዚደ፥ ኡንቱንቱ ኤቃቱዋ ታማን ጹግሴዳ።

13 ፕልስጼማ አሳቱ ላኤንꬁዋ ሀ ዎምባ ስም ዪደ ቦንቄድኖ። 14 ዳዊተ ጾሳ ላኤንꬁዋ ኦቼዳ። ሽን ጾሳይ አ፥ “ኔን ኡንቱንቱ ጌዱዋ ቦፓ። ኡንቱንቱ ጉየና ዩያ አꬋአደ ቦእያ ምꬃፐ ስንꬃ ባጋና ኦላናዉ ጊጋ። 15 ቦእያ ምꬃፐ ሁጲያን ሳልፕያ ኮሻ ኔን ስስያ ዎደ፥ ኦላናዉ ከሳ። አያዉ ጎፐ፥ ሄዌ ፕልስጼማ ኦላንቻቱዋ ሾጫናዉ ጾሳይ ኔፐ ስንꬃዉ አꬌዳ ግያዋ” ያጌዳ። 16 ጾሳይ አዛዜዳዋዳን ዳዊተ ኦꬄዳ። ጋባኦናፐ ቢደ ገዜራ ጋካናዉ፥ እስራኤልያ አሳይ ፕልስጼማ ኦላንቻቱዋ ዎꬌዳ። 17 ሄዋፐ ጉይያን፥ ዳዊታ ዎሪ ቢታ ኡባ ጋኬዳ። ካዉተꬃቱ ኡባይ ዳዊታዉ ያያናዳን መꬍና ጎዳይ ኦꬄዳ።