15
ታቦታ አሀናዉ ሀኔዳ ጊጉዋ
1 ዳዊተ ባረ ካታማን ባረዉ ጎልያ ኬጼዳ፤ ጾሳ ታቦታዉካ ሳኣ ጊግሲደ፥ ዱንካንያ ኤሴዳ። 2 ሄዋፐ ጉይያን ዳዊተ፥ “ጾሳ ታቦታ ቶካናዳንነ መꬍ መꬍናዉ መꬍና ጎዳዉ ኦꬃናዉ መꬍና ጎዳይ ዶሬዳ ሌዋቱዋፐ አትና፥ ኦንነ ጾሳ ታቦታ ቶካናዉ በሰና” ያጌዳ። ዛረ. 10:8 3 ዳዊተ መꬍና ጎዳ ታቦታዉ ጊግሴዳ ሳኣ ታቦታ አሀናዳን፥ እስራኤልያ አሳ ኡባ የሩሳላመን ሺሼዳ።
4 ቃይ ዳዊተ አሮና ዛራቱዋነ ሌዋቱዋ ጼሲደ ሺሼዳ። 5 ቃሃታ ያራቱዋፐ ካፑ ኡርኤልነ እት ጼታነ ላታሙ አ ዳቦቱ ዬድኖ። 6 ማራራ ያራቱዋፐ ካፑ አሳይነ ላኡ ጼታነ ላታሙ አ ዳቦቱ ዬድኖ። 7 ገርሾና ያራቱዋፐ ካፑ ዩኤልነ ጼታነ ሀታሙ አ ዳቦቱ ዬድኖ። 8 ኤልጻፋና ያራቱዋፐ ካፑ ሻማኤነ ላኡ ጼቱ አ ዳቦቱ ዬድኖ። 9 ከብሮነ ያራቱዋፐ ካፑ ኤልኤልነ ሆስፑን ታሙ አ ዳቦቱ ዬድኖ። 10 ኡዝኤላ ያራቱዋፐ ካፑ አምናዳብነ ጼታነ ታማነ ላኡ አ ዳቦቱ ዬድኖ።
11 ሄዋፐ ጉይያን፥ ዳዊተ ቄሳቱ ዋ ጻዶቃነ አብያታራ፥ ቃይ ሌዋቱዋ ኡርኤላ፥ አሳያ፥ ዩኤላ፥ ሻማእያ፥ ኤልኤላነ አምናዳባ ጼስሴዳ። 12 ኡንቱንታ፥ “ህንተንቱ ሌዋቱ ዛረቶ ካፓቱዋ። ጾሳ እስራኤልያ መꬍና ጎዳ ታቦታ ታን ጊግሳ ዎꬄዳ ሳኣ አሀናዉ ህንተነ ህንተንቱ ዳቦቱ ጌይተ። 13 ህንተንቱ ሌዋቱ ኮይሮ ጾሳ ታቦታ ቶክቤና ድራዉነ ኑን አ ዎጋዳን ዎት አፋነንቶ ጾሳ ኦችቤና ድራዉ፥ መꬍና ጎዳይ ኑ ጾሳይ ኑና ሙሬዳ” ያጌዳ።
14 ሄዋፐ ጉይያን፥ መꬍና ጎዳ እስራኤልያ ጾሳ ታቦታ አሀናዉ ቄሳቱ ነ ሌዋቱ ባረንታ ጌሼድኖ። 15 መꬍና ጎዳይ ሙሴ ባጋና ካሰ አዛዜዳዋዳን፥ ሌዋቱ ጾሳ ታቦታ ካሱዋና ባረንቱ ሀሽያን ቶኬድኖ። ከሳ 25:14
16 ሄዋፐ ጉይያን፥ ዲꬃነ ማስንቁዋ ዲጺደ፥ ዳላ ቃꬂደ፥ ናሸችያ የꬃ የጻና ማላ፥ ሌዋቱዋ ካለꬅያዋንቱ ባረንቱ ዳቦቱዋ ሱንꬃናዳን ዳዊተ አዛዜዳ። 17 ሌዋቱ ዩኤላ ናኣ ሄማና፥ አ ዳባቱዋፐ በረክያ ናኣ አሳፋነ ኡንቱንቱ ዳባቱዋፐ ማራራ ያራ ቁሳያ ናኣ ኤታና ሱንꬄድኖ። 18 ቃይ ላኤንꬆ ካላን ዛካራሳ፥ ያእዝኤላ፥ ሻምራሞታ፥ ይህኤላ፥ ኡና፥ ኤልኣባ፥ ባናያ፥ ማእሴያ፥ ማቲትያ፥ ኤልፋላ፥ ሚቅኔያነ ፐንግያ ናግያዋንታ ኦቤድ-ኤዶማነ ይእኤላ ሱንꬄድኖ።
19 ናሃስያ ዳላ ꬎቁ ኦꬂደ ቃꬃናዳን ሄማን፥ አሳፍነ ኤታን ሱንቴድኖ። 20 ቃይ ዛካራስ፥ ያእዝኤል፥ ሻምራሞት፥ ይህኤል፥ ኡን፥ ኤልኣብ፥ ማእሴይነ ባናይ ዲꬃ ሌኡዋን ዲጺኖ። 21 ማቲተ፥ ኤልፋል፥ ሚቅኔይ፥ ኦቤድ-ኤዶም፥ ይእኤልነ አዛዚ ዲꬃ ኦርድያን ዲጺኖ።
22 ሌዋቱ ካፑ ካናነ ማዝሙርያ ካለꬃናዉ ሱንቴዳ፤ እ ኤራንቻ ግድያ ድራዉ፥ ኡንቱንታ ታማርሴ። 23 በረኬነ ኤልቃን ታቦታ ዱንካንያ ፐንግያ ናጋናዉ ዶረቴድኖ። 24 ቃይ ቄሳቱ ሻባኔ፥ ዮሻፋጽ፥ ናታንኤል፥ አማሳይ፥ ዛካራስ፥ ባናይነ ኤልኤዛር ጾሳ ታቦታ ስንꬃን ጹሩምባ ፑናናዉ ዶረቴድኖ። ኦቤድ-ኤዶምነ የህያ ታቦታ ፐንግያ ናጋናዉ ዶረቴድኖ።
ታቦታ የሩሳላመ አፌድኖ
(2 ሳሜላ 6:12-22)
25 ሄዋፐ ጉይያን ዳዊተ፥ እስራኤልያ ጭማቱነ ሻአ ካፓቱ መꬍና ጎዳ ቃላ ጫቁዋ ታቦታ ኦቤድ-ኤዶማ ሶፐ አሀናዉ ናሸቲደ ቤድኖ። 26 መꬍና ጎዳ ቃላ ጫቁዋ ታቦታ ቶኬዳ ሌዋቱዋ ጾሳይ ማዴዳ ድራዉ፥ ኡንቱንቱ ላፑን ኮሩማቱዋነ ላፑን ዶርሳ ኦርገቱዋ ያርሼድኖ። 27 ዳዊተ፥ ታቦታ ቶኬዳ ሌዋቱ ኡባይ፥ ማዝሙርያ የጽያዋንቱነ ማዝሙርያ የጽያዋንቱ ካፑ ካናነ ሱፍያ ጌተትያ ቃጭናፐ ዳደቴዳ ማዩዋ ማዬድኖ። ዳዊተካ ቃይ ሊኑዋፐ ዳደቴዳ ኤፉድያ ጌተትያ ማዩዋ ማዬዳ። 28 ሀዋዳን ኦꬂደ፥ እስራኤልያ ኡባይ ሆምቦጪደ፥ ጹሩምባነ ማላካታ ፑኒደ፥ ዳላ ቃꬂደነ፥ ዲꬃነ ማስንቁዋ ዲጺደ፥ መꬍና ጎዳ ቃላ ጫቁዋ ታቦታ አሄድኖ።
29 መꬍና ጎዳ ቃላ ጫቁዋ ታቦታይ ዳዊታ ካታማ ገሌዳ ዎደ፥ ሳኦላ ናታ ሚካላ ማስኮትያና ጼላደ፥ ካቲ ዳዊተ ናሸቲደ ዱርሺንነ ካእሽን በኣዱ፤ ዳዊታ ባረ ዎዛናን ካꬋዱ።