16
1 ኡንቱንቱ ጾሳ ታቦታ አሂደ፥ ዳዊተ ታቦታ ዎꬃናዉ ꬎጌዳ ዱንካንያ ግዱዋን ዎꬄድኖ። ጹግያ ያርሹዋነ እትፐተꬃ ያርሹዋ መꬍና ጎዳዉ ያርሼድኖ። 2 ዳዊተ ጹግያ ያርሹዋነ እትፐተꬃ ያርሹዋ ያርሺደ ፖሌዳዋፐ ጉይያን፥ መꬍና ጎዳ ሱንꬃን አሳ አንጄዳ። 3 እስራኤልያ አሳዉ ኡባዉ፥ ማጫንዉነ አቱማዎ፥ ሁጲያን ሁጲያን እት እት ኮምፖ ኡክꬃ፥ እት እት ሙጾ አሹዋካ ዎይንያ ቴራ መላፐ እት እት ኡክꬃ ግሼዳ።
4 መꬍና ጎዳ ታቦታ ስንꬃን ኦꬃናዳንነ መꬍና ጎዳ እስራኤልያ ጾሳ ሳባናዳን፥ ጋላታናዳንነ ቦንቻናዳን፥ አማሬዳ ሌዋቱዋ ዳዊተ ሱንꬄዳ። 5 ሌዋቱ ካፑ አሳፋ፤ አሳፋ ካሊደ ላኤንꬆ ካፑ ዛካራሳ። ዛካራሳ ካሊደ ደእያዋንቱ ይእኤላ፥ ሻምራሞታ፥ ይህኤላ፥ ማቲትያ፥ ኤልኣባ፥ ባናያ፥ ኦቤድ-ኤዶማነ የኤላ። ኡንቱንቱ ማስንቁዋነ ዲꬃ ዲጻናዉ ሱንቴድኖ፤ ሽን አሳፈ ዳላ ቃꬃናዉ ሱንቴዳ። 6 ቄስያ ባናይነ ያሃእኤል ጾሳ ቃላ ጫቁዋ ታቦታ ስንꬃን ኡባ ዎደ ጹሩምባ ፑናናዉ ሱንቴድኖ። 7 ሄ ጋላስ ዳዊተ ካሰቲደ፥ አሳፍነ አ ዳቦቱ መꬍና ጎዳ ሳባናዳን ኡንቱንቶ እሜዳ።
ጋላታ ማዝሙርያ
(ማዝ. 105:1-15፤ 96:1-13፤ 106:1፣ 47-48)
8 መꬍና ጎዳ ጋላትተ፤ አ ሱንꬃ ጼስተ።
እ ኦꬄዳዋ ካዉተꬃቱ ግዱዋን ኤርስተ።
9 አ ሳቢተ፤ ጋላታ የꬃ አዉ የጽተ።
አ ማላልስያ ኪታ ኡባ ኦድተ።
10 አ ጌሻ ሱንꬃን ጬቀትተ፤
መꬍና ጎዳ ኮይያዋንቱ ዎዛናቱ ናሸትኖ።
11 መꬍና ጎዳነ አ ዎልቃ ጾሞስተ፤
ኡባደ አ ስንꬃ ኮይተ።
12-13 ህንተንቶ፥ አ ቆማ አብራሃማ ዘረꬃቶ፥
ዶረቴዳ ያቆባ ናቶ፥
እ ኦꬄዳ ማላልስያባ፥
አ ማላታነ እ ፕርዴዳ ፕርዳ ሀሳይተ።
14 እ መꬍና ጎዳ ኑ ጾሳ፤
አ ፕርዳይካ ሳኣ ኡባ ቦላና።
15 እ ባረ ቃላ ጫቁዋ መꬍናዉ፥
ባረ አዛዜዳ ቃላ ሻአ የለታ ጋካናዉ ናጌ።
16 ሄዌነ፥ እ አብራሃመና ጫቀቴዳ ጫቁዋ፥
ይሳቃዉ ጫቄዳ ጫቁዋ። ዶመꬃ 12:7፤ 26:3
17 ያቆባዉ ዎጋ፥
እስራኤልያዉካ መꬍና ጫቁዋ ኦꬂደ ምንꬄዳዋ።ዶመꬃ 28:13
18 እ፥ “ነዉ ካናነ ቢታ እማና፤
እ ነ ዘረꬃቶ ላታ ግዳናዋ” ያጌዳ።
19 ጾሳ አሳቱ ፓይዱዋን ጉꬃነ
ካናነ ቢታን በተ ግዲደ ደእያ ዎደ፥
20 እት አሳፐ ሀራ አሳ፥
እት ካተተꬃፐ ሀራ ካዉተꬃ ዩዬድኖ።
21 ጾሳይ ኡንቱንታ ኦንነ ናቃናዉ እምቤና፤
ኡንቱንቱ ድራዉ ካተቱዋ ሴሪደ፥ ዶመꬃ 20:3-7
22 “ታን ኦኬዳዋ ቦቾፕተ፤
ታ ትምቢትያ ኦድያዋንታ ቆሆፕተ” ያጌዳ።
23 ሳኣን ደእያ አሳዉ፥ ኡባይካ መꬍና ጎዳዉ የጽተ፤
እ አሽያ ምሽራቹዋ ሀቼ ሀቼ ኦድተ።
24 ካዉተꬃቱ ግዱዋን አ ቦንቹዋ፥
አሳ ኡባ ግዶን አ ማላልስያ ኦሱዋባ አዋይተ።
25 መꬍና ጎዳይ ዎልቃማ፤ አꬎ ጋላታይ አዉ በሴ።
ጾሳቱዋ ኡባፐ አꬊደ፥ እ ያየታናዉ በሰ።
26 ሀራ አሳ ጾሳቱ ኡባይ ኤቃቱዋ፤
ሽን መꬍና ጎዳይ ሳሉዋ መꬌዳ ጾሳ።
27 ቦንቹነ አንጋይ አ ዩሹዋን ደኤ፤
ምኖተꬃይነ ናሸቻይ እ ደእያ ሳኣን ደኤ።
28 ህንተንቶ፥ አሳ ዛረቶ ኡባዉ፥ መꬍና ጎዳዋ ኦድተ፤
“ቦንቹነ ዎልቃይ መꬍና ጎዳዋ” ጊደ ኦድተ።
29 “ቦንቹ አ ሱንꬃሳ” ጊደ መꬍና ጎዳዋ ኦድተ።
ያርሹዋ አኪደ፥ አ ስንꬃ ዪተ።
አ ጌሻተꬃ ፑላን መꬍና ጎዳዉ ጎይንተ።
30 ጋድያን ደእያ አሳዉ ኡባዉ፥ አ ስንꬃን ኮኮርተ።
ሳአይ ምን ኤቄዳ፤ ኡባካ ቃጸና።
31 ሳሎቱ ናሸትኖ፤ ሳአይካ ሀሹ ጎ!
ካዉተꬃቱ ግዶን ኡንቱንቱ፥ “መꬍና ጎዳይ ካተቴዳ!” ያግኖ።
32 አባይነ አ ግዶን ኩሜዳባቱ ጉምኖ።
ሾይቃይነ ሾይቃን ደእያባቱ ኡባቱ ናሸትኖ።
33 ሄዋፐ ጉይያን ዎራን ደእያ ምꬃ ኡባይ የጻና፤
ናሸቻን መꬍና ጎዳ ስንꬃን የጻና።
አያዉ ጎፐ፥ እ ሳኣ ቦላን ፕርዳናዉ ዬ።
34 ጾሳይ ሎአ ግድያ ድራዉነ መꬍና ጎዳ ጋላትተ።
አገና አ ሲቁ መꬍናዋ ግድያ ድራዉ፥ ጋላትተ። 2 ኦዱዋ 5:13፤ 7:3፤ እዝራ 3:11፤ ማዝ. 100:5፤ 106:1፤ 107:1፤ 118:1፤ ኤር. 33:11
35 ሄዋፐ ጉይያን ህንተንቱ፥
“አቤት ኑና አሽያ ጾሳዉ፥ ኑና አሻ።
ኑን ነ ጌሻ ሱንꬃ ጋላታናዳንነ
ነ ቦንቹዋን ጬቀታናዳን፥
ካዉተꬃቱ ግዶፐ ሺሻደ አሻ” ያግተ።
36 መꬍና ጎዳዉ፥ እስራኤልያ ጾሳዉ ጋላታይ ግዶ።
መꬍናፐ መꬍና ጋካናዉ ጋላተቶ!
ሄዋፐ ጉይያን አሳይ ኡባይ፥ “አመንእ” ጊደ፥ መꬍና ጎዳ ጋላቴዳ።
የሩሳላመንነ ጋባኦናን ሀኔዳ ጎይኑዋ ማራ
37 መꬍና ጎዳ ቃላ ጫቁዋ ታቦታ ስንꬃን ሀቼ ሀቼ ጎይናዉ ኮሽያዋ ኡባ ዎደ ኡንቱንቱ ኦꬃናዳን፥ ዳዊተ አሳፋነ አ ዳቦቱዋ ዎꬄዳ። 38 እ ቃይ ኦቤድ-ኤዶማነ አ ዳቦቱዋ ኡሱፑን ታማነ ሆስፑንꬃ ኡንቱንቱና ኦꬃናዳን ዎꬄዳ፤ ይዱቱና ናኣ ኦቤድ-ኤዶማነ ሆሳ ፐንግያ ናጋናዳን ዎꬄዳ።
39 ቄሲ ጻዶቅነ አናና ኦꬅያ ቄሳቱ ጋባኦናን ደእያ ꬎቃ ሳኣን፥ መꬍና ጎዳ ዱንካንያ ስንꬃን ኦꬃናዳን ያን አቴድኖ። 40 መꬍና ጎዳይ እስራኤልያዉ እሜዳ ህግያን ጻፈቴዳዋዳን፥ ኡንቱንቱ ዎንታነ ኦማርስ ኡባ ዎደ ጹግያ ያርሹዋ ያርሽያ ሳኣን መꬍና ጎዳዉ ያርሺኖ። 41 አገና አ ሲቁ መꬍናዋ ግድያ ድራዉ፥ መꬍና ጎዳ የꬃን ጋላታናዳን ሄማና፥ ይዱቱናነ ዶረቴዳ ሀራቱዋ ዳዊተ ኡንቱንቱና እትፐ ዎꬄዳ። 42 ሄማንነ ይዱቱን ጹሩምባ ፑኒኖ፥ ዳላ ቃꬂኖነ ጋላታ ማዝሙርያ የጺደ ካእያ ሀራ ሚሻቱዋ ካኢኖ። ይዱቱና አቱማ ናናይ ፐንግያ ናጋናዉ ሱንቴድኖ።
43 ሄዋፐ ጉይያን፥ አሳይ ኡባይ ባረ ሶ ባረ ሶ ቤዳ። ዳዊተካ ባረ ሶይ አሳ አንጃናዉ ስሜዳ። 2 ሳሜላ 6:19-20