1 ዳዊተ ባረ ካትያ ጎለን ደኢደ፥ ትምቢትያ ኦድያ ናታና፥ “ታን ዝጋፐ ኬጸቴዳ ጎለን ደአይ፤ ሽን መꬍና ጎዳ ቃላ ጫቁዋ ታቦታይ ዱንካንያ ጋርሳና” ያጌዳ።

2 ናታን ዳዊታ፥ “ኦꬃናዉ ነ ዎዛናይ ቆፔዳዋ ኡባ ኪተታ፤ ጾሳይ ኔናና ደኤ” ያጌዳ።

3 ሽን ሄ ጋላሳ ቃማ ጾሳ ቃላይ ናታናኮ ዪደ፥ 4 “ባ፤ ታ ቆማ ዳዊታ ሀዋዳን ያጋ፤ ‘መꬍና ጎዳይ ሀዋዳን ያጌ፤ ታን ደአና ጎልያ ኬጻናዌ ኔና ግዳካ። 5 አያዉ ጎፐ፥ ታን እስራኤላቱዋ ግብጼፐ ከሴዳ ጋላሳፐ ዶማደ ሀቼ ጋካናዉ፥ ጎለን ደአበይከ፤ ታን ዱንካንያፐ ዱንካንያዉ፥ ቃይ እት ሳፐ ሀራ ሳአዉ ዩያደ ደኣድ። 6 ታን እስራኤልያ አሳ ኡባና ዩዬዳ ሳኣ ኡባን፥ ታ አሳ ሄማናዉ ታን አዛዜዳ እስራኤልያ ዳናቱዋፐ ኦስነ፥ ታዉ ዝጋ ጎልያ አያዉ ኬጻበይኪ? ጋደ ኦቻበይከ’ ያጌ” ያጋ።

7 “ሄዋ ድራዉ፥ ሀእካ ታ ቆማ ዳዊታ፥ ‘ኡባፐ ዎልቃማ መꬍና ጎዳይ ኔና ሀዋዳን ያጌ፤ “ታን ኔና ሄንꬃ ጋደፐ፥ ዶርሳ ሄምያ ሳፐ ደንꬃደ፥ ታ አሳ እስራኤልያ ካለꬃናዳን አካድ። 8 ኔን ቤዳ ሳኣ ኡባን ታን ኔናና እትፐ ግዳድ፤ ነ ሞርከቱዋ ኡባ ነ ስንꬃፐ ድጋድ። ሀእ ስም ታን ሀ ሳኣን ኤረቴዳ ዎልቃማ አሳቱዋፐ ሱንꬃዳን ነ ሱንꬃ ግታያና። 9-10 ቃይ ታን ታ አሳዉ፥ እስራኤልያዉ ሳኣ እማደ፥ ኡንቱንታ ሄ ሳኣን ቶካና። ሄዋ ድራዉ፥ ኡንቱንቱ ባረንቱ ሳኣን ደአናዋንታ፤ ኡንቱንቱ ላኤንꬆ ሻባረትክኖ። ካሰ ታን ታ አሳ እስራኤልያ ቦላ የለታቱዋ ሱንꬄዳ ዎድያፐ ዶምና ናቄዳዋዳን፥ ላኤንꬆ ኢታ አሳቱ ኡንቱንታ ናቂክኖ። ታን ነ ሞርከቱዋ ኡባ ነዉ ሞድሳና።

“ ‘ “ሄዋ ቦላንካ መꬍና ጎዳይ ባረ ሁጲያዉ ነ ዛራቱ ደአናዳን ኦꬃናዋ ነዉ ኦዴዳ። 11 ነ ላይꬃይ ዉርና፥ ሀይቃዳ ነ ማይዛ አዎቱዋን ጋከትያ ዎደ፥ ታን ኔፐ ጉይያን ነ ዛርያ፥ ነ ናናቱዋፐ እቱዋ ደንꬃደ፥ አ ካዉተꬃ ምንሳና። 12 ታዉ ጎልያ ኬጻናዌ አ፤ ታን አ ካዉተꬃ አራታ መꬍናዉ ምንሳ ኤሳና። 13 ታን አዉ አዉዋ ግዳና፤ እካ ታዉ ናኣ ግዳና። ኔፐ ካሰ ካተቴዳ ሳኦላፐ ታን ታ ሲቁዋ አካ ድጌዳዋዳን፥ ታን አፐ ኡባካ አክከ። 2 ኦዱዋ 6:18፤ እብራ. 1:5 14 ታን አ ታ አሳ ቦላነ ታ ካዉተꬃ ቦላ መꬍናዉ ሱንꬃና፤ አ ካዉተꬃ አራታይካ መꬍናዉ ምን ኤቃና” ያጌ’ ያጋ” ያጌዳ።

15 ናታን ጾሳይ አዉ ሳጻን ቆንጭሴዳ ቃላ ኡባ ሀዋዳን ዳዊታዉ ኦዴዳ።

16 ሄዋፐ ጉይያን፥ ካቲ ዳዊተ ዱንካንያ ገሊደ፥ መꬍና ጎዳ ስንꬃን ኡቴዳ። ሀዋዳን ያጊደ ዎሴዳ፤ “አቤት መꬍና ጎዳዉ፥ ጾሳዉ፥ ኔን ሀዋ ኡባ ታዉ ኦꬃናዉ ታን ኦኔ? ታ ሶይ አሳይካ አዬ? 17 አቤት መꬍና ጎዳዉ፥ ሀዌ ነ አይፍያ ስንꬃን ጉꬃ ማላትና፥ ነ ቆማ ዛራቱ ስንꬃፐ ያናዋ ላይꬃቱዋን ትምቢትያ ኦዳዳ። ታና ቃይ ዎልቃማ አሳ ከሳዳ። 18 ኔን ታና ነ ቆማ ቦንቼዳ ድራዉ፥ ታን ዳዊተ ስም አያ ጋናዉ ዳንዳያይታ? ኔን ታና ነ ቆማ ኤራሳ። 19 አቤት መꬍና ጎዳዉ፥ ነ ቆማ ድራዉ፥ ነ ዎዛና ቆፋዳን ሀ ግታባ ኡባ ኦꬃደ፥ ሀ ግታተꬃ ኡባ ታና ኤርሳዳ።

20 “አቤት መꬍና ጎዳዉ፥ ነ ማል እቱነ ባዋ። ኑን ኑ ሀይꬃን ስሴዳዋዳን፥ ኔፐ አትና፥ ሀራ ጾስ ባዋ። 21 ኔን ነ አሳ ኦꬃናዉ ዎዜዳ ነ አሳ እስራኤልያ ማላትያ ሀራ ካዉተꬅ ሳኣ ቦላን ባዋ። ኔን ኦꬄዳ ግታነ ማላልስያ ኦሶቱ ጋሱዋን ነ ሱንꬃይ ቢታን ሳኣን ኤረቴዳ። ኔን ግብጼፐ ዎዜዳ ነ አሳ ስንꬃፐ ካዉተꬃቱዋ ላጋዳ። 22 ኔን ነ አሳ እስራኤልያ መꬍናዉ ነባ ኦꬃዳ። አቤት መꬍና ጎዳዉ፥ ኔንካ ኡንቱንቱ ጾሳ ግዳዳ።

23 “አቤት መꬍና ጎዳዉ፥ ኔን ነ ቆማባነ አ ዘረꬃባ ሃሳዬዳዌ መꬍናዉ ምን ኤቆ፤ ኔን ኦꬃና ጌዳዋዳንካ ኪተታ። 24 ‘ኡባፐ ዎልቃማ መꬍና ጎዳዉ፥ እስራኤልያ ጾሳይ ቱሙዋፐ እስራኤልያዉ ጾሳ’ ጌተታናዳን ነ ሱንꬃይ መꬍናዉ ምን ኤቃናነ ግታታና። ነ ቆማ ዳዊታ ዛራቱ ነ ስንꬃን ምን ኤቃና።

25 “አቤት ታ ጾሳዉ፥ ‘ታን ነዉ ጎልያ ኬጻና ጋደ’ ኔን ታዉ ነ ቆማዉ ቆንጫዳ። ሄዋ ድራዉ፥ ታን ነ ቆማይ ሀ ዎሳ ኔና ዎሳናዉ ጻላድ። 26 አቤት መꬍና ጎዳዉ፥ ኔን ጾሳቴ! ኔን ሀ ሎኦ ቃላ ታዉ ነ ቆማዉ ኦꬃና ጋዳ። 27 ነ ስንꬃን ያ መꬍናዉ ጋምአናዳን፥ ነ ቆማ ዛርያ አንጃናዉ ናሸታ። አቤት መꬍና ጎዳዉ፥ ኔን አንጄዳዌ መꬍናዉ አንጀተዳዋ ግዳና” ያጊደ ዎሴዳ።