1 ሄዋፐ ጉይያን፥ ዳዊተ ፕልስጼማቱዋ ጾኒደ ሞዴዳ፤ ያቲደ ጋተ ጌተትያ ካታማነ አ ሞꬃቱዋ ፕልስጼማ አሳቱዋ ኩሽያፐ ዎꬅ አኬዳ። 2 ቃይ ዳዊተ ሞኣበ ጋድያ አሳቱዋ ጾንና፥ ኡንቱንቱ አዉ ሞደቴድኖ፤ ጊራ ጊሬድኖ።

3 ሀማታ ካታማ ማታን ደእያ ጾባ ቢታ ካቲ ሀዳድኤዘረ፥ ባረ ካዉተꬃ ኤፍራጺሳ ሻፋ ጋካናዉ አሳናዉ ቢሽን፥ ዳዊተ አ ጾኔዳ። 4 ዳዊተ ሀዳድኤዘረፐ እት ሻአ ፓራ ጋረቱዋ፥ ላፑን ሻአ ፓራ አሳቱዋና ላታሙ ሻአ ገድሳ አሳቱዋ ኦሞዴዳ። ዳዊተ ጼቱ ጋረቶ ግዴዳ ፓራቱዋ አሺደ፥ ሀራ ፓራቱዋ ኡባዉ ጋዱዋ ግልዳዬዳ።

5 ዳማስቆ ካታማን ደእያ ሶረቱ ጾባ ቢታ ካትያ ሀዳድኤዘራ ማዳናዉ ዬዳ ዎደ፥ ዳዊተ ኡንቱንቱፐ ላታማነ ላኡ ሻአ አሳ ዎꬌዳ። 6 ሄዋፐ ጉይያን፥ ሶርያ ቢታን ዳማስቆ ካታማን ኦላንቻቱዋ ጌሶቱዋ መꬌዳ። ያትና፥ ሶርያ አሳቱ ዳዊታዉ ሞደቲደ፥ ጊራ ጊሬድኖ። ዳዊተ ቤዳ ሳኣ ኡባን መꬍና ጎዳይ አዉ ጾኑዋ እሜዳ።

7 ካቲ ዳዊተ ሀዳድኤዘራ ኦሳንቻቱ ቶኬዳ ዎርቃ ጎንዳለቱዋ አኪደ፥ የሩሳላመ አፌዳ። 8 ቃይ ዳዊተ ሀዳድኤዘረ ሞድያ ጸባሀነ ኩና ካታማቱዋፐ ናሃስያ ግያ ብራታ ሎይꬅ ዳሩዋ አኬዳ። ሄዋፐ ስሚደ፥ ሶሎሞነ ሄ ናሃስያ ብራታፐ አባ ሳኒያ፥ ቱሳቱዋነ ዱማ ዱማ ሚሻቱዋ መꬌዳ።1 ካታ. 7:40-47፤ 2 ኦዱዋ 4:11-18

9 ዳዊተ ጾባ ቢታ ካትያ ሀዳድኤዘራ ኦላንቻቱዋ ኡባ ጾኔዳዋ ሀማታ ካቲ ቶእ ስሴዳ። 10 ሀዳድኤዘራ ኦለቲደ ጾኔዳ ድራዉ፥ አ ሀሹ ጋናዉነ ሳሮታናዉ ባረ ናኣ ሀዶራማ ካትያ ዳዊታኮ ኪቴዳ። አያዉ ጎፐ፥ ሀዳድኤዘረ ቶኣራ ኦለቲደ ጋምኤዳ። ሀዶራም ዎርቃፐ፥ ብራፐነ ናሃስያፐ መꬌዳ ሚሻቱዋ አኪደ ዬዳ። 11 ካቲ ዳዊተ ኤዶማፐ፥ ሞኣበፐ፥ አሞና አሳቱዋፐ፥ ፕልስጼማቱዋፐነ አማሌቃ አሳቱዋፐ ኦሞድ አኬዳ ብራነ ዎርቃ ሀ ሚሻቱዋና እትፐ ጋꬂደ፥ መꬍና ጎዳዉ ዱማዪደ ዎꬄዳ።

12 ጻሩይ ናአይ አብሻይ ኤዶማ አሳፐ ታማነ ሆስፑን ሻአቱዋ ማጽነ ዎምባን ዎꬌዳ።ማዝ. 60 (ሁጲያ) 13 ሄዋፐ ጉይያን፥ ዳዊተ ኤዶማን ኦላንቻቱዋ ጌሶቱዋ መꬌዳ፤ ያትና፥ ሄ ጋድያ አሳይ ኡባይ ዳዊታዉ ሞደቴዳ። ዳዊተ ቤዳ ሳኣ ኡባን መꬍና ጎዳይ አዉ ጾኑዋ እሜዳ።

14 ሄዋዳን ኦꬂደ፥ ዳዊተ እስራኤልያ ኡባ ቦላ ካተቴዳ፤ ባረ አሳ ኡባ ጽሎተꬃንነ ሱረ ፕርዳን አኬዳ። 15 ጻሩይ ናአይ ዮኣበ ኦላ ጋዳዋ፤ አህሉዳ ናአይ ዮሳፌጸ ሀኔዳባ ጻፍያዋ፤ 16 አህጹባ ናአይ ጻዶቅነ አብያታራ ናአይ አብመሌክ ቄሳቱ ዋ፤ ሻብሻ *ሻብሻ፦ ሀ ብታኒ እብራዌꬁዋን ኦይዱ ዱማ ዱማ ሱንꬃን ጼሰቴ። 2 ሳም። 8:17፤ 20:25 ነ 1 ካት። 4:3 ጼላ። ዋና ጻፍያ፤ 17 ዮዳሄ ናአይ ባናይ ዳዊታ ናግያ ኦላንቻቱዋ ካፑዋ፤ ዳዊታ አቱማዋ ናናይ አ ካዉተꬃን ꬎቃ ሳኣ ኦይቂደ ካፓቱዋ።