1 ሄዋፐ ጉይያን፥ አሞናቱዋ ካቲ ናኦስ ሀይቄዳ፤ አ ናአይ አ ኮታን ካተቴዳ። 2 ዳዊተ፥ “አ አዉ ናኦስ ታዉ ኬኬዳ ድራዉ፥ ታን አ ናኣ ሀኑናዉ ኬካና” ያጌዳ። ሀኑና አዉ ሀይቄዳ ድራዉ፥ ዳዊተ አ ምንꬃናዉ አሳ ኪቴዳ።

ዳዊተ ኪቴዳዋንቱ ሀኑና ምንꬃናዉ አሞና ጋድያ ጋኬዳ ዎደ፥ 3 አሞና አሳ ካፓቱ ሀኑና፥ “ዳዊተ ኔና ምንꬃናዉ ሀ አሳቱዋ ኪቴዳዌ ነ አዉዋ ቦንቹዋ ድራሳ ጋድየ? እ ባረ አሳ ኪቴዳዌ ሀ ካታማ ጼላናሳ፥ ዎቻናሳነ ኦለቲደ ጾናናሳ” ያጌድኖ።

4 ሀኑን ዳዊተ ኪቴዳ አሳቱዋ ኦይቂደ፥ ኡንቱንቱ ቡቻ ሜዴዳ፤ ኡንቱንቱ ማዩዋካ ኡትያ ዱልያ ባጋፐ ቃንጽ አኪደ፥ ኡንቱንታ የዴዳ። 5 ሄዋ ድራዉ፥ አሳቱ ዳሮ ዬላቴድኖ። ዳዊተ ሄዋ ስሲደ፥ እ ኡንቱንቱና ጋከትያ አሳ ኪቴዳ። ሄዋፐ፥ “ህንተንቱ ቡቻይ ድጫናሽን፥ ያርኮ ካታማን ደእሽተ፤ ሄዋፐ ጉይያን ሃ ዪተ” ያጌዳ።

6 አሞናቱ ባረንቱ ኪታን ዳዊተ ኡንቱንታ ሞርካናዳን ኦꬄዳዋ ኤሬዳ ዎደ፥ ሀኑንነ አሞናቱ ማስጰጾምያፐነ ሶርያን ደእያ ማእካነ ጾባ ጌተትያ ካታማቱዋፐ ፓራ ጋረቱዋነ ፓራ አሳቱዋ ቃጻራናዉ ሀታማነ ኦይዱ ሻአ ኪሎ ግራመ ዴጽያ ጻጋራ ብራ የዴድኖ። 7 ሀታማነ ላኡ ሻአ ፓራ ጋረቱዋ፥ ፓራ አሳቱዋ፥ ማእካ ካትያነ አ ኦላንቻቱዋ ቃጻሬድኖ፤ ቃጻርና ዪደ፥ መዳባን ዱንካኔድኖ። ቃይ አሞናቱ ባረንቱ ካታማፐ ሺቂደ፥ ኦላዉ ጊጌድኖ።

8 ዳዊተ ሄዋ ስሴዳ ዎደ፥ ዮኣባነ ኦላንቻቱዋ ኡባ የዴዳ። 9 አሞናቱ ከሲደ፥ ካታማ ፐንግያን ኦላዉ ሳልፔድኖ። ኡንቱንታ ማዳናዉ ዬዳ ካተቱካ ባረንቱ ሳኣ ኦይቂደ፥ ደምባን ሺቄድኖ።

10 ዮኣበ ባረና ኦላይ ስንꬃናነ ጉየና ዶዴዳዋ በኤዳ ዎደ፥ እስራኤላቱ ግዶፐ ኡባፐ ምንያ ኦላንቻቱዋ ዶር አኪደ፥ ሶርያ አሳቱዋ ስንꬃን ሳልፕሴዳ። 11 አቴዳ አሳቱዋፐ ባረ እሻይ አብሻይ አዛዛና ማላ ኦꬂደ፥ አሞና አሳቱዋ ስንꬃን ሳልፔድኖ። 12 ዮኣበ ባረ እሻ አብሻያ፥ “ሶርያ አሳቱ ታዉ ዎልቃሞፐ፥ ኔን ያደ ታና ማዳ። ቃይ አሞና አሳቱ ነዉ ዎልቃሞፐ፥ ታን ያደ ኔና ማዳና። 13 ስም ምና! ኑ አሳ ድራዉነ ኑ ጾሳ ካታማቱዋ ድራዉ፥ አነ ምን ኦለቶይተ። መꬍና ጎዳይ ባረና ሎእያዋ ኦꬆ” ያጌዳ።

14 ሄዋፐ ጉይያን፥ ዮኣብነ አናና ደእያ አሳይ ሶርያ አሳቱዋና ኦለታናዉ ላዉሁ ጌድኖ። ያትና፥ ሶርያ አሳቱ አ ስንꬃፐ ባቃቴድኖ። 15 ሶርያ አሳቱ ባቃቴዳዋ አሞና አሳቱ በኤዳ ዎደ፥ ኡንቱንቱካ አ እሻ አብሻያ ስንꬃፐ ባቃቲደ፥ ካታማ ገሌድኖ። ሄዋፐ ጉይያን፥ ዮኣበ የሩሳላመ ስሜዳ።

16 ሶርያ አሳቱ እስራኤልያ አሳቱ ኡንቱንታ ጾኔዳዋ ኤሬዳ ዎደ፥ አሳ ኪቲደ ኤፍራጺሳ ሻፋፐ ሄፍንꬃና ደእያ ሶርያ አሳቱዋ አህሴድኖ። ሀዳድኤዘራ ኦላ ጋዳዉ ሾባክ ኡንቱንታ ካለꬄ።

17 ዳዊተ ሄዋ ስሴዳ ዎደ፥ እስራኤልያ ኦላንቻቱዋ ሺሺደ፥ ዮርዳኖሳ ሻፋ ፕኔዳ፤ ሶርያ አሳቱዋና ኦለታናዉ ኡንቱንቱ ስንꬃን ሳልፔድኖ። ዳዊተ ኡንቱንቱና ኦለታናዉ ሳልፕና፥ ኡንቱንቱካ አናና ኦለቴድኖ። 18 ሶርያ አሳቱ እስራኤላቱ ስንꬃፐ ባቃቴድኖ፤ ዳዊተ ሶርያ አሳቱዋፐ ፓራ ጋርያ ላግያ ላፑን ሻአ አሳቱዋነ ኦይታሙ ሻአ ገድያ አሳቱዋ ዎꬌዳ፤ ኡንቱንቱ ኦላ ጋዳዋ ሾባካካ ዎꬌዳ። 19 ሀዳድኤዘራ ኦላንቻቱ እስራኤላቱዋን ጾነቴዳዋ ኤሬዳ ዎደ፥ ዳዊታና ስገቲደ፥ አዉ ሞደቴድኖ። ሄዋፐ ስምና፥ ሶርያ አሳይ አሞና አሳ ማዳናዉ ዶስቤና።