1 ኦፍንꬃን፥ ካተቱ ኦላዉ ከስያ ዎደ፥ ዮኣበ ኦላንቻቱዋ ካለꬂደ፥ አሞና ጋድያ ዎራጄዳ፤ ማዪደ ራባ ካታማ ዶዴዳ። ሽን ዳዊተ የሩሳላመን ታኬዳ፤ ዮኣበ ራባ ካታማ ኦለቲደ ባይዜዳ። 2 ሳሜላ 11:1 2 ሄዋፐ ጉይያን ዳዊተ ዪደ፥ ኡንቱንቱ ካትያ ዎርቃ ካላቻ አ ሁጲያፐ አኬዳ። ካላቻይ ማዛንያ ዎደ ሀታማነ ኦይዱ ኪሎ ግራመ ግዴዳ፤ አ ግዱዋን እንቁዋ ጌተትያ አልኦ ሹቻይ ደኤ። ሄ ካላቻ አክደ፥ ዳዊታ ሁጲያን ዎꬄዳ። ቃይ ዳዊተ ሄ ካታማፐ ሎይꬅ ዳሮ ኦሞዱዋ አኬዳ። 3 ያቲደ ካታማን ደእያ አሳ ከሲደ፥ ማጋዝያን፥ ጎማንነ ካልታን ኦስሴዳ። አሞና ካታማቱዋን ደእያ አሳ ኡባካ ሄዋዳን ኦስሴዳ። ሄዋፐ ጉይያን፥ ዳዊተነ አ አሳይ ኡባይ የሩሳላመ ስሜዳ።

4 ሄዋፐ ስሚደ፥ ፕልስጼማ አሳቱዋና ገዜራን ኦላይ ደንዴዳ፤ ሁሻፐ ዬዳ ስባካይ አዱሳ ምኖ አሳቱዋ ያራፐ ግዴዳ ስፓያ ዎꬌዳ። ያትና፥ ፕልስጼማቱ ጾነቴድኖ።

5 ሄዋፐ ዶምና ፕልስጼማ አሳቱዋና ሀራ ኦላይ ደንዴዳ፤ ያኢራ ናአይ ኤልሀናን ቶራ ቶማይ ሸማይንያ ዋንዳራሻ ኬሻቶ፥ ጋተ ካታማፐ ዬዳ ጎልያዳ እሻ ላህማ ዎꬌዳ።1 ሳሜላ 17:4-7

6 ቃይካ ሀራ ኦላይ ጋተ ካታማን ደንዴዳ። ሄ ሳኣን እት ዎጋ አዱሳ ብታኒ ደኤ። ሄ ብታንያዉ እት እት ኩሽያን ኡሱፑን ብራቱ፥ እት እት ገድያንካ ኡሱፑን ብራቱ፥ ኡባና ላታማነ ኦይዱ ብራቱ ደኢኖ። ሄ ብታኒ አዱሳ ምኖ አሳቱዋ ያራፐ ግዴዳ አሳ። 7 ሄ ብታኒ እስራኤላቱዋ ናሴዳ ዎደ፥ ዳዊታ እሻ ሻማ ናአይ ዮናታን አ ዎꬌዳ። 8 ሀዋንቱ ጋተ ካታማን ደእያ አዱሳ ምኖ አሳቱዋ ያራቱዋ፤ ኡንቱንቱ ኡባይ ዳዊታ ኩሽያንነ አ አሳ ኩሽያን ሀይቄድኖ።