1 ሴጻናይ እስራኤልያ ቦላ መቱዋ አሀናዉ ኮዪደ፥ ዳዊተ እስራኤልያ አሳ ፓይዳናዳን ደንꬄዳ። 2 ዳዊተ ዮኣባነ ኦላንቻቱ ካፓቱዋ ሀዋዳን ያጌዳ፤ “ዳናፐ በርሳበሀ ጋካናዉ ቢተ፤ እስራኤልያ አሳ ፓይድተ። ያቲደ አሳ ፓይዱ አፑነንቶ ታና ኤርስተ” ያጌዳ።

3 ሽን ዮኣበ አ፥ “መꬍና ጎዳይ ሀ ደእያ ባረ አሳ ቦላ ጼቱ ኩሽያ ጉጆ! ታ ጎዳዉ፥ ካትያዉ፥ ኡንቱንቱ ኡባይ ታ ጎዳ ቆማቱዋ ግድክኖየ? ታ ጎዳይ ሄዋ ማላ ኦꬃናዉ አያዉ ኮዪ? እስራኤልያ ካዉተꬃ አያዉ ባይዛንቻ ከሲ?” ያጌዳ። 4 ሽን ካትያ ቃላይ ዮኣባ ጾኔዳ። ዮኣበ ከሲደ፥ እስራኤልያ ቢታ ኡባ ዩዬዳ፤ የሩሳላመ ስሜዳ። 5 ዮኣበ ፓይዴኤዳ አሳ ፓይዱዋ ዳዊታዉ እሜዳ። እስራኤልያ ቢታን ኡባን ማሻን ኦለታናዉ ዳንዳይያ እት ሚሎነነ እት ጼቱ ሻአ ምኖ አሳቱ ደኢኖ። ቃይ ይሁዳ ቢታን ማሻን ኦለታናዉ ዳንዳይያ ኦይዱ ጼታነ ላፑን ታሙ ሻአ ምኖ አሳቱ ደኢኖ። 6 ዮኣበ ካትያ አዛዙዋ ሸነቴዳ ድራዉ፥ ሌዋቱዋነ ቢንያማ ዘረꬃ ፓይዱዋን ጉጅቤና።

7 ጾሳይ ሀ የዉዋን ናሸትቤና ድራዉ፥ እስራኤልያ ሙሬዳ። 8 ያትና ዳዊተ ጾሳ፥ “ታን ሀ ኪታን ዎልቃማ ናጋራ ኦꬃድ። ሽን ሀእ ኔና ዎሳይ፤ ታ ባይዙዋ፥ ነ ቆማ ባይዙዋ ቁጫ። ታን ዳሮ ኤያባ ሀናድ” ያጌዳ።

9 መꬍና ጎዳይ ዳዊታዉ ትምቢትያ ኦድያ ጋዳ ሀዋዳን ያጊደ ሃሳይሴዳ፤ 10 “ባደ፤ ዳዊታ፥ ‘መꬍና ጎዳይ ኔና፥ “ታን ኔና ሄዙባፐ ዶሩዋ በሳይ፤ ታን ነ ቦላ ፖላናዉ ታዉ ኡንቱቱፐ እቱዋ ዶራ” ያጌ’ ያጋ” ያጌዳ።

11-12 ጋድ ዳዊታኮ ቢደ አ፥ “መꬍና ጎዳይ ኔና፥ ‘ሀዋንቱፐ እቱዋ ዶራ: ሄዙ ላይꬃ ኮሻ ዶራይ? ዎይ ነ ሞርከቱ ኔና የደርስሽን፥ ሄዙ አግና ኡንቱንቱ ስንꬃፐ ባቃታናዋ ዶራይ? ዎይ መꬍና ጎዳ ማሻይ ነ ጋድያ ሄዙ ጋላሳ ሾጫናዋነ ሄዋናካ ቃይ እስራኤልያ ጋድያ ፕን ከሳናሽን ሀይቁዋ ኢታ ሀርግያን ሾጭያ ኪታንቻ እ ኪትያዋ ዶራይ?’ ያጌ። አነ ሀእ ቃቻደ፥ ታን ታና ኪቴዳዎ ዛርያዋ ኦዳ” ያጌዳ።

13 ዳዊተ ጋዳ፥ “ታን ሎይꬅ ኡንኤታድ። መꬍና ጎዳ ማሮተꬃይ ሎይꬅ ዎልቃማ ግድያ ድራዉ፥ አነ ታን አ ኩሽያን ኩንዳና፤ ታን አሳ ኩሽያን ኩንድከ” ያጌዳ።

14 ሄዋ ድራዉ፥ መꬍና ጎዳይ እስራኤልያ ቦላ ኢታ ሀርግያ የድና፥ ላፑን ታሙ ሻአ እስራኤልያ አሳቱ ሀይቄድኖ። 15 ሄዋፐ ጉይያን፥ መꬍና ጎዳይ የሩሳላመ ባይዛናዉ ኪታንቻ ኪቴዳ። ሽን ኪታንቻይ የሩሳላመ ባይዛናዉ ማታ ኡት ደእሽን፥ መꬍና ጎዳይ ያቲደ ካዮቴዳ። ካዮቲደ ባይዝያ ኪታንቻ፥ “አጋ! ሄዌ ግዳናዋ!” ያጌዳ። ሄ ዎደ ጾሳ ኪታንቻይ ያቡስያ ኦርና ኡዱማ ማታን ኤቄዳ።

16 መꬍና ጎዳ ኪታንቻይ ባረ ማሻ ባረ ኩሽያን ኦይቂደ፥ የሩሳላመ ባይዛናዉ ሳኣፐነ ሳሉዋፐ ግዱዋን ኤቄዳዋ ዳዊተ በኤዳ። ሄዋፐ ጉይያን፥ ዳዊተነ ጭማቱ ዋሩዋ ማዪደ፥ ባረንቱ ዴሙዋን ጉፋኔድኖ። 17 ዳዊተ ጾሳ፥ “አሳይ ፓይደታናዳን ኦꬄዳዌ ታና ግድክታየ? ናቄዳዌነ ኢታባ ኦꬄዳዌ ታና። ሽን ሀ ዶርሳቱ፥ ኡንቱንቱ አያ ኦꬄድኖ? አቤት መꬍና ጎዳ፥ ታ ጾሳዉ፥ ሀያና ነ ኩሺ ታናነ ታ አዉዋ ሶይ አሳ ሙሮ። ነ ኩሺ ነ አሳ ሙሮፖ!” ያጌዳ።

18 ሄዋፐ ጉይያን፥ መꬍና ጎዳ ኪታንቻይ ጋደ ሀዋዳን ያጊደ አዛዜዳ፤ “ዳዊተ ፑደ ያቡስያ ኦርና ኡዱማ ቢደ፥ መꬍና ጎዳዉ ያርሽያ ሳኣ ያን ግምባናዳን ኦዳ” ያጌዳ። 19 መꬍና ጎዳይ ናብያ ጋደ ባጋና ጌዳ ቃላዳን ዳዊተ ቤዳ።

20 ሄ ዎደ ኦርንነ አ ኦይዱ አቱማ ናናይ ኡዱማን ዛርጋ ቡኪኖ። ጉየ ስም ጼሊደ፥ ኪታንቻ በኤድኖ፤ አናና ደእያ ናናይ ቆሰቴድኖ። 21 ዳዊተ ኦርናኮ ዬዳ ዎደ፥ ኦርን አ በኢደ፥ ኡዱማፐ ጋጻ ከሲደ፥ ባረ ዴሙዋ ሳኣ ጋꬂደ፥ ዳዊታዉ ጎይኔዳ።

22 ሄዋፐ ጉይያን፥ ዳዊተ ኦርና፥ “ቦሻይ አሳ ቦላፐ ክቻና ማላ፥ ታን መꬍና ጎዳዉ ያርሽያ ሳኣ ኬጻናዉ ነ ኡዱማ ታዉ ዛልኣርኪ። ታን ነዉ ኩመንꬃ ጋትያ ጭጋና” ያጌዳ።

23 ኦርን ዳዊታ፥ “ነዉ አካ፤ ታ ጎዳይ ካቲ ባረና ናሸችያዋ ኦꬆ። በአ፥ ጹግያ ያርሾ ቦራ፥ ኤꬃናዉ ካꬃ ቡክያ ሚሻነ ካꬃ ያርሾ ዛርጋ ታን እማና። ታን ሀ ኡባካ ነዉ እማና” ያጌዳ።

24 ሽን ካቲ ዳዊተ ኦርና፥ “ቱይት፥ ቺ! ታን ኩመንꬃ ጋትያ ቃንጻደ ሻማና። አያዉ ጎፐ፥ ታን ነባ መꬍና ጎዳዉ አክከ፤ ቃይ ታን ሚሻ ከሳቤናዋ ጹግያ ያርሹዋ ኦꬃደ ያርሽከ” ያጌዳ።

25 ሄዋ ድራዉ፥ ዳዊተ ሄ ኡዱማዉ ኡሱፑን ጼቱ ዎርቃ ሳንትምያ እሜዳ። 26 ሄዋፐ ጉይያን፥ ዳዊተ ሄ ኮሽያን መꬍና ጎዳዉ ያርሹዋ ያርሽያ ሳኣ ኬጼዳ። ያቲደ ጹግያ ያርሹዋነ እትፐተꬃ ያርሹዋ ያርሼዳ፤ መꬍና ጎዳ ዎስና፥ መꬍና ጎዳይ ጹግያ ያርሹዋ ቦላ ሳሉዋፐ ታማ የዲደ፥ አዉ ዛሬዳ።

27 ሄዋፐ ጉይያን፥ መꬍና ጎዳይ ኪታንቻ አዛዝና፥ ኪታንቻይ ባረ ማሻ ሾኮ ዛሬዳ። 28 ዳዊተ መꬍና ጎዳይ አ ዎሳዉ ዛሬዳዋ በኢደ፥ ያቡስያ ኦርና ኡዱማን ላኤንꬁዋ ያርሼዳ። 29 ሙሴ መላ ቢታን ጊግሴዳ መꬍና ጎዳ ዱንካኒነ ጹግያ ያርሹዋ ያርሽያ ሳአይ ሄ ዎደ ጋባኦናን ጎይንያ ꬎቃ ሳኣን ደኤ። 30 ሽን ዳዊተ መꬍና ጎዳ ኪታንቻ ማሻዉ ያዬዳ ድራዉ፥ ጾሳ ኦቻናዉ ሄ ሳኣ ባናዉ ዳንዳይቤና።