1 ሄዋ ድራዉ፥ ዳዊተ፥ “መꬍና ጎዳ ጾሳ ጌሻ ጎልያ ሀዋን ደአናዋ፤ እስራኤልያ አሳይ ጹግያ ያርሹዋ ያርሻና ሳአይ ሀዋ ግዳናዋ” ያጌዳ።

2 ሄዋ ድራዉ፥ ዳዊተ እስራኤልያ ቢታን ደእያ ሀራ ቢታ አሳቱዋ ሺሻናዳን አዛዜዳ። ጾሳ ጌሻ ጎልያ ኬጻናዉ ሹቻ ማስያዋንቱ ሹቻ ማሲደ ሎይꬃናዉ ኡንቱንቱ ግዶፐ ሱንꬄዳ። 3 ዳዊተ ፐንግያ ሳንቃ ኦꬃናዉ ምስማርያዉነ ማጻፍያዉ ሀንያ ጮራ ብራታነ ማዛናናዉ ዳንዳየተና፥ ዛው ባይና ናሃስያ ብራታ ጊግሴዳ። 4 ሲዶና አሳቱነ ጺሮሳ አሳቱ ዳዊታዉ ዝጋ አህያ ድራዉ፥ ዳዊተ ፓይዱ ባይና ዝጋ ጊግሴዳ። 5 ዳዊተ፥ “ታ ናአይ ሶሎሞነ ኦሱዋ ሜዘትቤናነ ያላጋ ናኣ። መꬍና ጎዳዉ ኬጸትያ ጌሻ ጎልያ ቢታ ኡባን ኤረቴዳነ ቦንቼቴዳ፥ ሎኦ ጎልያ ግዳናዉ በሰ። ሄዋ ድራዉ፥ አዉ ኮሽያዋ ታን ጊግሳና” ያጌዳ። ዳዊተ ሀይቃናፐ ካሰቲደ ዳሮባ ጊግስ ዎꬄዳ።

6 ሄዋፐ ጉይያን፥ ዳዊተ ባረ ናኣ ሶሎሞና ጼሲደ፥ መꬍና ጎዳዉ እስራኤልያ ጾሳዉ ጌሻ ጎልያ ኬጻናዳን አዛዜዳ። 7 ዳዊተ ሶሎሞና፥ “ታ ናአዉ፥ ታን መꬍና ጎዳ ታ ጾሳ ሱንꬃዉ ጌሻ ጎልያ ኬጻናዉ ታ ዎዛናን ቆፓድ። 2 ሳሜላ 7:1-16፤ 1 ኦዱዋ 17:1-14 8 ሽን መꬍና ጎዳ ቃላይ ታና፥ ‘ኔን ዳሮ ሱꬃ ጉሳዳ፤ ቃይ ዳሮ ኦላካ ኦለታዳ። ኔን ሀ ሳኣ ቦላን ታ ስንꬃን ዳሮ ሱꬃ ጉሴዳ ድራዉ፥ ታ ሱንꬃዉ ጌሻ ጎልያ ኬጻካ። 9 በአ፤ ነዉ እት ሳሮ ናእ የለታናዋ። አ ዩሹዋን ደእያ ሞርከቱዋ ኡባና ታን አ ሳሮ ኦꬃና። አ ሱንꬃይ ሶሎሞና፤ ታን እ ካተቴዳ ላይꬃን እስራኤልያ አሳዉ ሳሮተꬃነ ዎፓ እማና። 10 እ ታ ሱንꬃዉ ጌሻ ጎልያ ኬጻና። እ ታ ናኣ ግዳናዋ፤ ታንካ አዉ አዉዋ ግዳና። አ ካዉተꬃ አራታ እስራኤላን መꬍናዉ ምንሳ ኤሳና’ ያጌዳ።

11 “ሀእካ ታ ናአዉ፥ መꬍና ጎዳይ ኔናና ግዶ። ጾሳይ ካሰ ነባ ሃሳዬዳዋዳን፥ መꬍና ጎዳ ነ ጾሳይ ጌሻ ጎልያ ኬጻናዋ ኔና ፖልሶ። 12 መꬍና ጎዳይ ኔና እስራኤልያ አሳ ቦላ ካትያ ኦꬅያ ዎደ፥ መꬍና ጎዳ ነ ጾሳ ህግያ ናጋናዳን፥ ጾሳይ ነዉ አꬌዳ ኤራተꬃነ አኬካ እሞ። 13 መꬍና ጎዳይ ሙሴ ባጋና እስራኤልያ አዛዜዳ አዛዙዋነ ዎጋ ናግያዋ ግዶፐ፥ ኡባይ ነዉ ሀናና። አይነ ባዋ ምና! ያዮፓ ዎይ ዳጋሞፓ!ኢያሳ 1:6-9 14 ታን ዳሮ ቱጋን መꬍና ጎዳ ጌሻ ጎልያ ኬጻናዉ ሄዙ ሻአነ ኦይዱ ጼቱ ኪሎ ግራመ ዴጽያ ዎርቃነ ሀታማነ ኦይዱ ሻአ ኪሎ ግራመ ዴጽያ ብራ ሺሻይ፤ ቃይ ዛዋይ ባይና ናሃስያነ ብራታ ሺሻይ፤ ቃይካ ምꬃነ ሹቻ ጊግሳድ። ግዶፐካ፥ ኔን ሄዋ ቦላ ሀራ ጉጃናዉ ኮሼ። 15 ነ ማታን ዳሮ ኦሳንቻቱ ደኢኖ፤ ሹቻ ቆእያዋንቱነ ማስያዋንቱ፥ አናጸቱነ ኡባ ኪታ ኦꬃናዉ ዳንዳይያ ኤራንቻ አሳቱ ደኢኖ። 16 ኡንቱንቱ ኦꬅያ ዎርቃዉ፥ ብራዉ፥ ናሃስያዉነ ብራታዉ ዛዋይ ባዋ። ሀእ ኔን ኪታ ዶማ። መꬍና ጎዳይ ኔናና ግዶ” ያጌዳ።

17 ዳዊተ እስራኤልያ ካለꬅያዋንቱ ኡባይ ባረ ናኣ ሶሎሞና ማዳናዳን ሀዋዳን ያጊደ አዛዜዳ፤ 18 “መꬍና ጎዳይ ህንተንቱ ጾሳይ ህንተናና ደኤኔየ? እ ህንተንታ ኡባ ሳና ሸምፕስቤኔ? ሀ ቢታን ደእያዋንታ እ ታ ኩሽያን አꬅ እሜዳ ድራዉ፥ ሀ ቢታይ መꬍና ጎዳዉነ አ አሳዉ ሞደቴዳ። 19 ሀእካ መꬍና ጎዳ ህንተንቱ ጾሳ ኮያናዉ ህንተንቱ ዎዛናነ ህንተንቱ ሸምፑዋ እምተ። መꬍና ጎዳ ሱንꬃዉ ኬጸቴዳ ጌሻ ጎልያ ግዶን መꬍና ጎዳ ቃላ ጫቁዋ ታቦታነ ጾሳ ጌሻ ሚሻቱዋ አሂደ ዎꬃናዳን፥ ህንተንቱ ደንዲደ፥ መꬍና ጎዳ ጾሳ ጌሻ ጎልያ ኬጽተ” ያጌዳ።