1 ዳዊተ ጭሜዳ ዎደ፥ ባረ ናኣ ሶሎሞና እስራኤልያ ቦላ ካተዬዳ። 1 ካታ. 1:1-40

2 ዳዊተ እስራኤልያ ካለꬅያዋንታ ኡባቱዋ፥ ቄሳቱ ዋነ ሌዋቱዋ እትፐ ሺሼዳ። 3 ሀታሙ ላይꬃነ ሄዋፐ ቦላና ደእያ ሌዋቱ ፓይደቴድኖ፤ ኡንቱንቱ ኡባና ሀታማነ ሆስፑን ሻአ አቱማ አሳ ግዴድኖ። 4 ሀዋንቱ ግዶፐ መꬍና ጎዳ ጌሻ ጎልያዉ አዎትያ ላታማነ ኦይዱ ሻአቱዋ ካቲ ዎꬄዳ። ቃይ ካፓቱዋነ ፕርዳ የለታቱዋ ኡሱፑን ሻአቱዋ ዎꬄዳ። 5 ፐንግያ ናግያዋንታ ኦይዱ ሻአቱዋ ዎꬄዳ። መꬍና ጎዳ ጋላታናዉ ዳዊተ መꬌዳ የꬃ ሚሻን ጾሳ ጋላትያዋንታ ኦይዱ ሻአቱዋ ዎꬄዳ።

6 ዳዊተ ሌዊ የሌዳ አቱማ ናና ገርሾና፥ ቃሃታነ ማራራ ኡንቱንታ ያራን ያራን ሄዙ ጭታን ሻኬዳ።

7 ገርሾን የሌዳ አቱማ ናናይ ላእዳናነ ሽምአ። 8 ላእዳና አቱማ ናናይ ሄዛ፤ ኡንቱንቱካ ይህኤላ፥ ዘታማነ ዩኤላ። 9 ሽምአ አቱማ ናናይ ሄዛቱ ሻሎሞታ፥ ሀዚኤላነ ሃራና፤ ሀዋንቱ ላእዳና ያራቶ ካፓቱዋ። 10 ሽምአ አቱማ ናናይ ኦይዳቱ፥ ባረንቱ የለታ የለታ ማራን ያሃታ፥ ዚዛ፥ ይኡሻነ ባሪአ። 11 ያሀት ባይራ ዚዝ ቴፋ ሽን ይኡሻዉነ ባሪአስ ናናይ ዳረና፤ ሄዋ ድራዉ፥ ኡንቱንቱ እት ያራዳን ፓይደቴድኖ።

12 ቃሃታ ናናይ ኦይዳቱ አምራማ፥ ይጽሃራ፥ ከብሮናነ ኡዝኤላ። 13 አምራማ አቱማ ናናይ አሮናነ ሙሳ። አሮነነ አ ዘረꬃይ ኡባፐ አꬎ ጌሻ ግዴዳዋ ጾሳዉ ዱማያናዳን ዱማቴድኖ። ኡንቱንቱ መꬍና ጎዳ ስንꬃን እጻና ጩዋያናዉ፥ ጾሳዉ ኦꬃናዉነ ጾሳ ሱንꬃን አሳ አንጃናዉ መꬍናዉ ዱማቴድኖ። ከሳ 28:1 14 ጾሳ አሳ ግድያ ሙሴ ናናይ ሌዊያ ዛራቱዋና ጋꬆ ፓይደቴድኖ። 15 ሙሴ ናናይ ገርሾማነ ኤልኤዛራ። 16 ገርሾማ ናናቱዋ ግዶፐ ካፑ ሻቡኤላ። 17 ኤልኤዛራ ናአይ ራሃብ ካፑዋ። ኤልኤዛራዉ ሀራ ናእ ባዋ፤ ሽን ራሃብያ ናናይ ሎይꬅ ጮራ።

18 ይጽሃራ ናናቱዋ ካፑ ሻሎሚታ። 19 ከብሮነ ናአይ ባይራይ ይሪያ፤ ላኤንꬁ አማርያ፤ ሄዘንꬁ ያሃዝኤላ፤ ኦይደንꬁ ይቃምኣማ። 20 ኡዝኤላ ናአይ ባይራይ ሚክያሳ፤ ላኤንꬁ ይሽያ።

21 ማራራ ናናይ ማህላነ ሙሻ። ማህላ ናናይ ኤልኣዛራነ ቂሻ። 22 ኤልኣዛረ ማጫ ናናቱዋፐ አትና፥ አቱማ ናና የለናን ሀይቄዳ። ሄዋ ድራዉ፥ ኡንቱንቱ እሻቱ ቂሻ ናናይ ኡንቱንታ አኬድኖ። 23 ሙሻ ናናይ ሄዛቱ ማህላ፥ ኤዴራነ ይረሞታ።

24 ሌዊያ የለታን ባረንቱ ዛርያንነ ጎለን ባረንቱ ሱንꬃን ማዝጋበቴዳዋንቱ ሀዋንታ፤ ላታሙ ላይꬃነ ሄዋፐ ቦላና ደእያ ሌዊያ ዛራቱ ኡባይ መꬍና ጎዳ ጌሻ ጎልያን ኦꬄድኖ። 25 ዳዊተ፥ “መꬍና ጎዳይ እስራኤልያ ጾሳይ ባረ አሳ ሸምፕሴዳ። ጾሳይ የሩሳላመን መꬍናዉ ደአና። 26 ሄዋ ድራዉ፥ ዱንካንያነ አ ግዶን ጎኤትያ ሚሻቱዋ ሀዋፐ ስንꬃናዉ ሌዋቱ ቶካናዉ ኮሸና” ያጌዳ። ዛረ. 10:8 27 ዳዊተ ዉርሰꬃን አዛዜዳ አዛዙዋዳንካ ላታሙ ላይꬃነ ሄዋፐ ቦላና ደእያ ሌዋቱ ፓይደቴድኖ። 28 ኡንቱንቱ መꬍና ጎዳ ጌሻ ጎልያን ኦꬅያ አሮና ዘረꬃቱዋ ማድኖ። ጾሳ ጌሻ ጎልያን ላኡ ዳባባቱዋን ኦꬅኖ፤ ምይያን ደእያ ክፍለቱዋን፥ ጌሻ ሚሻ ኡባ ቱነናዳንነ ሀራ ኦሱዋ ኡባ ፖሊኖ። ፓይ. 3:5-9 29 ቃይ ኡንቱንቱ ጾሳ ስንꬃን ዎꬅያ ኦይꬃዉ፥ ካꬃ ያርሾ፥ ሺሽያ ꬊልያዉ፥ እርሹ ገልቤና ኦይꬃዉነ ዛይትያን ሙናቀትያ ꬊልያዉ አዎቲኖ፤ ኡንቱንቱ ማክያባዉነ ልክያባዉ ኡባዉ አዎቲኖ። 30-31 ቃይ ኡንቱንቱ ኡባ ጋላስ ዎንታነ ኦማርስ፥ መꬍና ጎዳዉ ጹግያ ያርሹ ያርሸትያ ሳምባታ ጋላስ፥ አግናይ ጼርያ ዎደነ ህግያን ጻፈቴዳ ሀራ ባላ ጋላሳቱ ጋክያ ዎደ፥ መꬍና ጎዳ ጋላታናዉነ ቦንቻናዉ ሱንቴድኖ። 32 ጋከትያ ዱንካንያነ መꬍና ጎዳ ጌሻ ሳኣ ናጋናዳንነ አሮና ዘረꬃቱዋፐ ጋርሳና ኡንቱንታ ማዳናዳን መꬍና ጎዳ ጌሻ ጎልያ አዎተꬃይ ሌዋቶ እመቴዳ።