1 አሮና ዛራቱዋ ኦሱ ሀዋፐ ካሊደ ጻፈቴዳዋንታ። አሮና ናናይ ናዳባ፥ አቢሀ፥ ኤልኣዛራነ እታማራ። 2 ሽን ናዳብነ አቢሁ ናኣ የለናን ባረንቱ አዉዋፐ ካሰ ሀይቄድኖ። ሄዋ ድራዉ፥ ኤልኣዛርነ እታማር ቄሳቱዋ ግዴድኖ። ዎጋ 10:1-2 3 ዳዊተ አሮና ዘረꬃ ኡንቱንቱ ኦሱዋዳን ኦሱዋዳን ጭታን ሻኬዳ። ኤልኣዛራ ያራፐ ጻዶቅነ እታማራ ያራፐ አብመሌክ ዳዊታ ማዴድኖ። 4 ኤልኣዛራ ያራቱ 16 ጩጉዋን ሻከትና፥ እታማራ ያራቱ ቃይ ሆስፑን ጩጉዋን ሻከቴድኖ። ኤልኣዛራ ያራቱ ካፓቱ እታማራ ያራቱ ካፓቱዋፐካ ዳር ቤቴዳ ድራዉ፥ ሄዋዳን ሀኔዳ። 5 ኤልኣዛራ ያራቱ ግዶንነ እታማራ ያራቱ ግዶን ጌሻ ጎልያዉ ካፓቱነ ጾሳ ኦሶ ካፓቱ ደእያ ድራዉ፥ ሀዋንቱነ ህንኮቱነ ኪታ ሳማን ሻኬድኖ። 6 ኤልኣዛራ ያራቱነ እታማራ ያራቱ ባረንቱ ካላ ሳማ ከሴድኖ። ሌዊያ ዛርያ ግዴዳ ናታንኤላ ናአይ ጻፊ ሻማኤ ኡንቱንታ ማዝጋቤዳ። ካቲነ አ ካፓቱ፥ ቄስያ ጻዶቅነ አብያታራ ናአይ አብመሌክ፥ ቄሳቱዋ ያራቱ ካፓቱነ ሌዋቱ ያራቱ ካፓቱ ኡባቱ ሀ የዎ ማርካ።

7 ሀ አሳቱ ሳማ ከስና፥ ኮይሮ ሳማይ ይሆያርባ ጋኬዳ። ላኤንꬆ ያዳያ ጋኬዳ። 8 ሄዘንꬁ ሀሪማ ጋኬዳ። ኦይደንꬁ ሳኦርማ ጋኬዳ። 9 እቼሸንꬆ ማልክያ ጋኬዳ። ኡሱፑንꬁ ምያሚና ጋኬዳ። 10 ላፑንꬁ ሀቆጻ ጋኬዳ። ሆስፑንꬁ አቢያ ጋኬዳ። 11 ኡዱፑንꬁ ኢያሳ ጋኬዳ። ታማንꬁ ሻካንያ ጋኬዳ። 12 ታማነ እተንꬁ ኤልያሽባ ጋኬዳ። ታማነ ላኤንꬁ ያቂማ ጋኬዳ። 13 ታማነ ሄዘንꬁ ሁፓ ጋኬዳ። ታማነ ኦይደንꬁ የሸካኣባ ጋኬዳ። 14 ታማነ እቼሸንꬁ ብልጋ ጋኬዳ። ታማነ ኡሱፑንꬁ እሜራ ጋኬዳ። 15 ታማነ ላፑንꬁ ሄዚራ ጋኬዳ። ታማነ ሆስፑንꬁ ሀፕጼጻ ጋኬዳ። 16 ታማነ ኡዱፑንꬁ ፓታህያ ጋኬዳ። ላታማንꬁ ይሄዝቄላ ጋኬዳ። 17 ላታማነ እተንꬁ ያኪና ጋኬዳ። ላታማነ ላኤንꬁ ጋሙላ ጋኬዳ። 18 ላታማነ ሄዘንꬁ ዳላያ ጋኬዳ። ላታማነ ኦይደንꬁ ማኣዝያ ጋኬዳ።

19 መꬍና ጎዳይ እስራኤልያ ጾሳይ ኡንቱንቱ ማይዛ አዉዋ አሮና ባጋና አዛዜዳዋዳን፥ ኡንቱንቱ መꬍና ጎዳ ጌሻ ጎልያ ገሊደ፥ ካላን ካላን ኦꬃናዉ ጻፈቴድኖ።

20 ሌዊያ ዛራቱዋ ካፓቱ ሀራቱ ሀዋፐ ካሊደ ጻፈቴዳዋንታ።

የህዳይ ሻቡኤላ ባጋና አምራማ ዛርያ።

21 ይሸ ራሃብያ ዛሪ ካፑዋ።

22 ያሃት ሻሎሚታ ባጋና ይጽሃራ ዛርያ።

23 ይሪይ፥ አማር፥ ያሃዝኤልነ ይቃምኣም ከብሮነ ዛርያ፤ ኡንቱንቱ ባረንቱ የለታ ማራን ጻፈቴድኖ።

24 ሻሚር ሚክያሳ ባጋና ኡዝኤላ ዛርያ።

25 ዛካራስ ሚክያሳ እሻ ይሽያ ባጋና ኡዝኤላ ዛርያ።

26 ማህል፥ ሙሽነ ያእዘ ማራራ ዘረꬃ። 27 ያእዝያ ናናይ ሄዛቱ ሾሃማ፥ ዛኩራነ ኢብራ። 28 ማህላ ናናይ ላአቱ ኤልኣዛራነ ቂሻ። ኤልኣዛራዉ አቱማ ናእ ባዋ። 29 ቂሻዉ ይራህማኤላ ጌተትያ እት አቱማ ናአይ ደኤ። 30 ሙሻዉ ማህላ፥ ኤዴራነ ይረሞታ ጌተትያ ሄዙ አቱማ ናናይ ደኢኖ።

ሀዋንቱ ሌዊያ ዛራቱዋ ካፓቱዋ።

31 ካሰ ኡንቱንቱ ዳቦቱ፥ አሮና ዛርያ ቄሳቱ ኦꬄዳዋዳን፥ ሌዊያ ዛራቱዋ ካፓቱነ ቴፋትያ እሻቱዋፐ እቱ ሳማ የጌ። እጻይ ከስያ ዎደ ካቲ ዳዊተ፥ ጻዶቀ፥ አብመሌክ፥ ቄሳቱዋ ካፓቱነ ሌዋቱ ካፓቱ ማርካ።