29
ጌሻ ጎልያ ኬጻናዉ እመቴዳ እሞታ
1 ሄዋፐ ጉይያን፥ ካቲ ዳዊተ ሺቄዳ አሳዉ ኡባዉ ሀዋዳን ያጌዳ፤ “ጾሳይ ዶሬዳዌ ታ ናኣ ሶሎሞና፤ እ ያላጋነ ኦሶካ ሜዘትቤና። ሀ ኬጸታና ኬꬃይ አሳ ጎልያ ግደናን መꬍና ጎዳ ጾሳ ጌሻ ጎልያ ግድያ ድራዉ፥ ኪታይ ዎልቃማ። 1 ኦዱዋ 22:5 2 ታን ታዉ ደእያ ዎልቃ ኬሻ ታ ጾሳ ጌሻ ጎልያዉ ዎርቃን ኦሰታናባዉ ዎርቃ፥ ብራን ኦሰታናባዉ ብራ፥ ናሃስያን ኦሰታናባዉ ናሃስያ፥ ብራታን ኦሰታናባዉ ብራታነ ምꬃን ኦሰታናባዉ ምꬃ ጊግሳ ዎꬃድ። ቃይ ማርግድያ፥ እብናባራድያ፥ ዱማ ዱማ ማላና ደእያ አሌቆ ሹቻቱዋ፥ አልኦ ሹቻቱዋነ እንቆቱዋ ጊግሳ ዎꬃድ። 3 ታ ጾሳ ጌሻ ጎልያ ታን ሎይꬃ ሲቅያ ድራዉ፥ ታን ታ ጾሳ ጌሻ ጎልያዉ ጊግሴዳዋፐ ሀራ ታዉ ቡዞ ደእያ ዎርቃፐነ ብራፐ ጌሻ ጌሻ ጎልያዉ እማድ። 4 ጌሻ ጎልያ ጎዳ ማይዛናዉ ጼቱ ሻአ ኪሎ ግራመ ዴጽያ ጌሻ ዎርቃነ ላኡ ጼታነ ኦይታሙ ሻአ ኪሎ ግራመ ዴጽያ ጌሻ ብራ እማድ። 5 ኩሽያ ሂላቱ ኦꬃና ኦሱዋ ኡባዉ፥ ዎርቃን ኦሰታናባዉ ዎርቃ፥ ብራን ኦሰታናባዉ ብራ፥ እማድ። ያትና፥ ህንተፐ ሀቼ ባረ ሸንያን መꬍና ጎዳዉ ኬኪደ እማናዌ ኦኔ?” ያጌዳ።
6 እስራኤልያ ጎልያ አሳቱዋ ካፓቱ፥ ዛራቱዋ ካፓቱ፥ ሻኣ ካፓቱ፥ ጼቱዋ ካፓቱነ ካትያ ኦሳንቻቱ ካፓቱ ባረንቱ ሸንያን ባረንቶ ደእያዋ እሜድኖ። 7 ኡንቱንቱ ጾሳ ጌሻ ጎልያ ኦሶ እት ጼታነ ላፑን ታሙ ሻአ ኪሎ ግራመ ዴጽያ ዎርቃ፥ ሄዙ ጼታነ ኦይታሙ ሻአ ኪሎ ግራመ ዴጽያ ብራ፥ ኡሱፑን ጼታነ ላታሙ ሻአ ኪሎ ግራመ ዴጽያ ናሃስያ ብራታነ ሄዙ ሚልዮነነ ኦይዱ ጼቱ ሻአ ኪሎ ግራመ ዴጽያ ብራታ እሜድኖ። 8 አልኦ ሹቻይ ደእያ አሳይ ኡባይ ሚሻ ናግያ ሌዊያ ገርሾና ያራ ግድያ ይህኤላ ባጋና መꬍና ጎዳ ጌሻ ጎልያ ሚሻ ምንጅያ ጎለዉ እሜዳ። 9 አሳይ ባረ ሸንያን ባረ ኩመንꬃ ዎዛናን መꬍና ጎዳዉ እሜዳ ድራዉ ናሸቴዳ፤ ካቲ ዳዊተካ ሎይꬅ ናሸቴዳ።
ዳዊተ ጾሳ ጋላቴዳ
10 ሄዋ ድራዉ፥ ዳዊተ ሽቁዋ ኡባ ስንꬃን ሀዋዳን ያጊደ፥ መꬍና ጎዳ ጋላቴዳ፤ “አቤት መꬍና ጎዳዉ፥ ኑ አዉዋ እስራኤልያ ጾሳዉ፥ ኔን መꬍናፐ መꬍናዉ ጋላቲታ። 11 አቤት መꬍና ጎዳዉ፥ ሳሉዋንነ ሳኣን ደእያ ኡባባይ ነዋ! ግታተꬃይ፥ ዎልቃይ፥ ቦንቹ፥ ጾኑነ አንጋይ ነዋ! አቤት መꬍና ጎዳዉ፥ ማታይ ነዋ፤ ኔን ኡባፐ ቦላነ ሁጰ። ማቶሳ 6:13 12 ዱረታይነ ቦንቹ ኔፐ ዬ፤ ኔን ኡባባ ሞዳሳ። ዎልቃይነ ምኖታይ ነ ኩሽያና፤ ኔን አሳ ኡባ ꬎቂሳናዉነ ምንሳናዉ ዳንዳያሳ። 13 ሀእካ ኑ ጾሳዉ፥ ኑን ኔና ጋላቴቶ፤ ነ ቦንቾ ሱንꬃካ ሳቤቶ።
14 “ኑን ሀዋ ኬሻባ እማናዉ ታነ ታ አሳይነ ኦኔ? አያዉ ጎፐ፥ ኡባባይ ኔፐ ዬ፤ ኑን ነ ኩሽያፐ አኬዳዋ ነዉ ዛረꬅ እሜዳ። 15 ካሰ ኑ አዎቱዋ ኡባዳን ኑንካ ነ ስንꬃን በተነ እማꬃ። ሀ ሳኣ ቦላን ኑ ደኡዋ ላይꬃይ ኩዋዳን አꬍያዋ፤ ኑን ሀይቆፐ አታናዉ ዳንዳዮኮ። 16 አቤት መꬍና ጎዳዉ፥ ኑ ጾሳዉ፥ ነ ጌሻ ሱንꬃዉ ኑን ጌሻ ጎልያ ኬጻናዉ ሺሼዳ ኡባይ ነ ኩሽያፐ ዬዳዋ፤ ሀዌ ኡባይ ነባ።
17 “ታ ጾሳዉ፥ ኔን ዎዛና ፓጭያዋነ ሱረተꬃ ዶስያዋ ታን ኤራይ። ታን ታ ዎዛና ሱረተꬃን ታ ሸንያን ሀዋ ኡባ እማድ። ሀ ሳኣን ደእያ ነ አሳይካ ነዉ ባረ ሸንያን ናሸቻን እሜዳዌ ታን በኣድ። 18 አቤት መꬍና ጎዳዉ፥ ኑ ማይዛ አዎቱዋ አብራሃማ፥ ይሳቃነ እስራኤልያ ጾሳዉ፥ ነ አሳ ዎዛናን ሀ ዎልቃማ ሲቁዋ መꬍናዉ ናጋ፤ ኡንቱንቱ ዎዛናካ ኔኮ ሺሻ። 19 ነ ዎጋ፥ ነ አዛዙዋነ ነ ህግያ ናጋናዳንነ ታን ሀልቻደ ጊግሳ ዎꬄዳባን ጌሻ ጎልያ እ ኬጻናዳን ታ ናኣ ሶሎሞናዉ ኩመንꬃ ዎዛና እማ” ያጊደ ጋላቴዳ።
20 ሄዋፐ ጉይያን፥ ዳዊተ ያአዉ ኡባዉ፥ “መꬍና ጎዳ ህንተንቱ ጾሳ ጋላትተ” ያጌዳ። ያአይ ኡባይ መꬍና ጎዳ ባረንቱ አዎቱዋ ጾሳ ጋላቴድኖ። መꬍና ጎዳዉ ጉፋኒደ ጎይኔድኖነ ካትያዉካ ኩንዳ ጊደ ጉፋኔድኖ።
ሶሎሞና ካተቱሳ
(29:21-25)
21 ዎንተꬃ ጋላስ አሳይ መꬍና ጎዳዉ ያርሹዋ ያርሼዳ። ቃይ ጹግያ ያርሹዋካ ጾሳዉ ያርሼዳ፤ እት ሻአ ኮሩማቱዋ፥ እት ሻአ ዶርሳ ኦርገቱዋ፥ እት ሻአ ዶርሳ ማራቱዋ፥ ኡሻ ያርሹዋነ ዳሮ ያርሾቱዋ ያርሼዳ። 22 አሳይ ሄ ጋላስ መꬍና ጎዳ ስንꬃን ሎይꬅ ናሸትደ፥ ሜዳነ ኡሼዳነ። ያቲደ አሳይ ካትያ ዳዊታ ናኣ ሶሎሞና ላኤንꬁዋ ዛይትያ ኦኪደ፥ አ ካዉተꬃን ምንሴዳ። ጻዶቃካ ቄሰ ግዳናዳን መꬍና ጎዳ ስንꬃን ኦኬዳ።
23 ሄዋፐ ጉይያን፥ ሶሎሞነ ባረ አዉዋ ዳዊታ ኮሽያን መꬍና ጎዳ ካዉተꬃ አራታን ኡቴዳ። አዉ ኡባባይ ሀኔዳ፤ እስራኤልያ ኡባይካ አዉ አዛዘቴዳ። 1 ካታ. 2:12 24 ካፓቱ ኡባይ፥ ምኖ አሳቱነ ካትያ ዳዊታ ናናይ ካትያ ሶሎሞናዉ አዛዘታናዉ ቃላ ገሌድኖ። 25 መꬍና ጎዳይ ሶሎሞና እስራኤልያ አሳ ኡባ ስንꬃን ꬎቁ ꬎቁ ኦꬄዳ፤ አፐ ካሰ እስራኤልያ ካተቶ እመትቤና ቦንቹዋ ሶሎሞናዉ እሜዳ።
ዳዊታ ሀይቁዋ
(29:26-30)
26 እሰያ ናአይ ዳዊተ እስራኤልያ ኡባ ቦላ ካተቴዳ። 27 ዳዊተ እስራኤልያ ቦላ ኦይታሙ ላይꬃ ካተቴዳ፤ ከብሮናን እ ላፑን ላይꬃ ካተቴዳ፤ የሩሳላመን ሀታማነ ሄዙ ላይꬃ ካተቴዳ። 2 ሳሜላ 5:4-5፤ 1 ኦዱዋ 3:4 28 ዳዊተ ዳሮ ላይꬃ ደኢደ፥ ዱረቲደ፥ ቦንቼቲደ፥ ሎኦ ጭሚደ ሀይቄዳ። አ ኮታን አ ናአይ ሶሎሞነ ካተቴዳ። 29 ዳዊተ ኮይሮፐ ዶሚደ ዉርሰꬃ ጋካናዉ ኦꬄዳባይ፥ ትምቢትያ ኦድያ ሳመላ ታርክያ ማጻፋን፥ ትምቢትያ ኦድያ ናታና ታርክያ ማጻፋንነ ትምቢትያ ኦድያ ጋደ ታርክያ ማጻፋን ጻፈት ኡቴዳ። 30 እ ዎት ሞዴደንቶነ እ ዋኔዳ ዎልቃማ አሳኮ፥ እ ሀኔዳባይ፥ እስራኤልያ አሳይነ ሄራን ደእያ ካዉተꬃቱ ኡባይ ሀኔዳባይ ሄ ማጻፋቱዋን ጻፈት ኡቴዳ።