1 እስራኤልያ ካፓቱ ኡባይ የሩሳላመን ሺቃናዳን ካቲ ዳዊተ አዛዜዳ፤ ሄዋ ድራዉ፥ ዛራቱዋ ካፖቱ፥ ካትያ ኦሳንቻቱ ካፓቱ፥ ሻአ ካፓቱ፥ ጼቱዋ ካፓቱ፥ ካትያዉ ካትያ ናናዉ ደእያ አቆነ መህያዉ አዎትያዋንቱ፥ ካትያ ጎለን ኦꬅያ ካፓቱ፥ ኤረቴዳ ምኖ አሳቱነ ዎልቃማ አሳቱ ኡባይ የሩሳላመን ሺቄድኖ።

2 ካቲ ዳዊተ ደንድ ኤቂደ፥ ሀዋዳን ያጌዳ፤ “ታ እሻቶ፥ ታ አሳቶ፥ ስስተ! መꬍና ጎዳ ቃላ ጫቁዋ ታቦታ ዎꬅያነ ኑ ጾሳ ገዲ ሸምፕያ ጌሻ ጎልያ ኬጻናዉ ታ ዎዛናን ቆፓድ፤ ኬጻናዉ ኮሽያዋንታካ ጊግሳድ። 2 ሳሜላ 7:1-16፤ 1 ኦዱዋ 17:1-14 3 ሽን ጾሳይ ታና፥ ‘ኔን ኦላንቻነ ሱꬃ ጉሴዳ አሳ ግድያ ድራዉ፥ ታ ሱንꬃዉ ጎልያ ኬጻካ’ ያጌዳ። 4 ታን እስራኤልያ ቦላ መꬍናዉ ካተታናዳን፥ መꬍና ጎዳይ እስራኤልያ ጾሳይ ታ አዉዋ ጎልያ አሳ ኡባፐ ታና ዶሬዳ። ካለꬃናዳን ኮይሮ ይሁዳ ዛርያ ዶሬዳ፤ ይሁዳ ዛርያፐ ታ አዉዋ ሶይ አሳ ዶሬዳ፤ ታ አዉዋ ናና ግዶፐ ታና ዶሪደ፥ እስራኤልያ ኡባ ቦላ ካተያናዉ ናሸቴዳ። 5 መꬍና ጎዳይ ታዉ ጮራ ናና እሜዳ፤ ታ ናና ኡባፐ መꬍና ጎዳ ካዉተꬃ አራታን ኡቲደ፥ እስራኤልያ ቦላ ካተታናዳን ታ ናኣ ሶሎሞና ዶሬዳ።

6 “ጾሳይ ታና፥ ‘ታ ጌሻ ጎልያነ ታ ዳባባ ኬጻናዌ ነ ናኣ ሶሎሞና። አያዉ ጎፐ፥ እ ታዉ ናኣ ግዳናዳን ታን አ ዶራድ፤ ታንካ አዉ አዉዋ ግዳናዋ። 7 እ ሀእ ኦꬅያዋዳን ስንꬃፐካ ታ አዛዙዋነ ታ ህግያ ምኒደ ናጎፐ፥ ታን አ ካዉተꬃ መꬍናዉ ምንꬃና’ ያጌዳ። 8 ሄዋ ድራዉ፥ ሀእካ መꬍና ጎዳ ያአይ፥ እስራኤልያ አሳይ ኡባይ በእሺናነ ኑ ጾሳይ ስስሽን፥ መꬍና ጎዳ ህንተንቱ ጾሳ አዛዙዋ ኡባ ህንተንቱ ምንሲደ ናጋና ማላ፥ ታን ህንተንቶ ኦዳይ። ያቶፐ፥ ህንተንቱ ሀ ሎኦ ቢታ ላታናነ ህንተንቱ ናናካ መꬍናዉ ላትሳናዋ።

9 “ሶሎሞና፥ ታ ናአዉ፥ ነ አዉዋ ጾሳ ኤራ። ነ ኩመንꬃ ዎዛናንነ ነ ኤኖ ግያ ቆፋን አዉ ኪተታ። አያዉ ጎፐ፥ መꬍና ጎዳይ ዎዛና ኡባ ቆሬ፤ ቆፋን ደእያ ሀልቹዋ ኡባካ ኤሬዳ። ኔን አ ኮዮፐ፥ እ ነዉ ቤታና፤ ሽን ኔን አ አጎፐ፥ እ ኔና መꬍናዉ አግ ባሻና። 10 ሀእካ ጌሻ ጎልያ ኬጻናዉ መꬍና ጎዳይ ኔና ዶሬዳዋ ዶጎፓ። ምናደ ኪታ ኪተታ” ያጌዳ።

11 ሄዋፐ ጉይያን፥ ዳዊተ ባረ ናኣ ሶሎሞናዉ ጌሻ ጎልያ ኬጽያ ሀልቹዋ እሜዳ፤ ባራንዳ ሀልቹዋ፥ ሚሻ ምንጅያ ሳኣ ሀልቹዋ፥ ቦላ ክፍልያነ ግዶ ክፍልያ ሀልቹዋነ ናጋራይ አቶ ጌተትያ ሳኣ ቁምእያ ዎꬅያ ክፍልያ ሀልቹዋ እሜዳ። 12 ቃይካ ዳዊተ አዉ መꬍና ጎዳ ጌሻ ጎልያ ዳባባ ኬጻናዉ ባረ ቆፋን ደእያ ሀልቹዋ፥ አ ዩሹዋን ደእያ ኡባ ክፍለቱ ሀልቹዋነ ጾሳ ጌሻ ጎልያ ሚሻ ምንጅያ ሳአቱነ ጾሳዉ ዱማይ ዎꬄዳ እሞታ ምንጅያ ሳአቱ ሀልቹዋ እሜዳ።

13 ሄዋዳንካ ዳዊተ ቄሳቱ ነ ሌዋቱ ጩጎቱ ባረንቱ ኪታ ኦꬃና ማራ፥ መꬍና ጎዳ ጌሻ ጎልያ ኪታ ኦꬃና ማራነ ጌሻ ጎልያ ሚሻቱዋ ናግያ ማራ ኦድያ ሀልቹዋ አዉ እሜዳ።

14 ቃይካ ዳዊተ ሀዋፐ ካሊደ ጻፈቴዳ ዱማ ዱማ ሚሻቱዋ መꬋናዉ ዎይሳ ኬሻ ዴጽያ ዎርቃነ ዎይሳ ኬሻ ዴጽያ ብራ ኮሽንቶ ጻፊደ፥ ሶሎሞናዉ እሜዳ። 15 ሄዋንቱካ፥ ዎርቃ ጾምፐቱዋ ዎꬅያ ባላነ ዎርቃ ጾምፐቱዋ፥ ብራ ጾምፐቱዋ ዎꬅያ ባላነ ብራ ጾምፐቱዋ፥ 16 ጾሳ ስንꬃን ኡክꬃ ዎꬅያ ዎርቃ ጻርጴዛቱዋ፥ ብራ ጻርጴዛቱዋ፥ 17 ዎርቃ ኦይቂያዋ፥ ዎርቃ ከረቱዋ፥ ዎርቃ ዋንጫቱዋ፥ ዎርቃ ኩይጻሮቱዋ፥ ብራ ኩይጻሮቱዋነ 18 እጻና ጩዋይያ ጌሻ ዎርቃ ሳጽንያ። መꬍና ጎዳ ቃላ ጫቁዋ ታቦታ ቦላ ባረንቱ ቀፍያ ምጪደ ካምያ፥ ክሩበላ ዎꬅያ ዎርቃ ጋርያ ጊግስያ ሀልቹዋካ አዉ እሜዳ። 19 ዳዊተ፥ “መꬍና ጎዳይ ባረ ኩሽያ ታ ቦላ ዎꬂደ፥ ሀ ጻፈቴዳ ሀልቹዋ ኡባ ታና ኤርሴዳ” ያጌዳ።

20 ሄዋፐ ጉይያን፥ ዳዊተ ባረ ናኣ ሶሎሞና፥ “አይነ ባዋ፤ ምና! ኦሱዋ ኦꬃ! መꬍና ጎዳይ ጾሳይ፥ ታ ጾሳይ ኔናና ደእያ ድራዉ፥ ያዮፓ፤ ዳጋሞፓ! መꬍና ጎዳ ጌሻ ጎልያ ኪታይ ፖለታና ጋካናዉ፥ ጾሳይ ኔና የገናነ አገና። 21 ጾሳ ጌሻ ጎልያን ደእያ ኦሱዋ ኡባዉ ቄሳቱ ነ ሌዋቱ ሱንት ኡቴድኖ። ኩሽያ ሂላ ኤራይ ደእያ አሳይ ኡባይ ኔና ኦሱዋ ኡባን ማዳና። ካፓቱነ አሳይ ኡባይ ነዉ ኡባባንካ አዛዘታና” ያጌዳ።