1 ባረንቱ ጩጉዋን ጩጉዋን ካዉተꬃ አይሴዳ እስራኤልያ ጎልያ አሳቱዋ ካፓቱ፥ ሻኣ ካፓቱነ ጼቱዋ ካፓቱ ሀዋፐ ካሊደ ጻፈቴዳዋንታ። እት እት ጩጉዋን ላታማነ ኦይዱ ሻአ አሳቱ ደኢኖ። እት እት ጩጉ ላይꬃ ግዶን እት እት አግናዉ ካላን ካላን ካዉተꬃ ኪታ ኦꬃናዉ ከሴ።

2 ኮይሮ አግናን ከስያ ጩጉዋ ካለꬅያዌ ዛብድኤላ ናኣ ያሾብኣማ፤ አ ጩጉዋን ላታማነ ኦይዱ ሻአ አሳይ ደኤ። 3 ያሾብኣም ፓሬሳ ዘረꬃ፤ እ ኮይሮ አግናዉ ኦላንቻቱ ካፓቱዋ ጋዳዉዋ።

4 ላኤንꬆ አግናን ከስያ ጩጉዋ ካለꬅያዌ አሆህያ ዶዳያ፤ አ ጩጉዋን ላታማነ ኦይዱ ሻአ አሳይ ደኤ። አፐ ካልያዌ ምቅሎታ።

5 ሄዛንꬆ አግናን ከስያ ጩጉዋ ካለꬅያዌ ቄስያ ዮዳሄ ናኣ ባናያ፤ አ ጩጉዋን ላታማነ ኦይዱ ሻአ አሳይ ደኤ። 6 ባናይ ሀታሙ ኤረቴዳ አሳቱዋ ግዶን ምኖ አሳ ግዲደ፥ ሀታማቶ ካፖቴዳ። አ ሳኣን አ ናአይ አምዛባድ ካፖቴዳ።

7 ኦይደንꬆ አግናን ከስያ ጩጉዋ ካለꬅያዌ ዮኣባ እሻ አሳሄላ፤ አ ጩጉዋን ላታማነ ኦይዱ ሻአ አሳይ ደኤ። አ ኮታን አ ናአይ ዛባደ ካፖቴዳ።

8 እቼሸንꬆ አግናን ከስያ ጩጉዋ ካለꬅያዌ ይጽሃራ ያራፐ ሻምሁታ፤ አ ጩጉዋን ላታማነ ኦይዱ ሻአ አሳይ ደኤ።

9 ኡሱፑንꬃ አግናን ከስያ ጩጉዋ ካለꬅያዌ ታቆአፐ ዬዳ እቄሻ ናኣ እራ፤ አ ጩጉዋን ላታማነ ኦይዱ ሻአ አሳይ ደኤ።

10 ላፑንꬃ አግናን ከስያ ጩጉዋ ካለꬅያዌ ኤፍሬማ ዛርያፐ ፕሎናፐ ዬዳ ሄሌጻ፤ አ ጩጉዋን ላታማነ ኦይዱ ሻአ አሳይ ደኤ።

11 ሆስፑንꬃ አግናን ከስያ ጩጉዋ ካለꬅያዌ ሁሻፐ ዬዳ ስባካያ፤ አ ጩጉዋን ላታማነ ኦይዱ ሻአ አሳይ ደኤ። ስባካይ ይሁዳ ዛረነ ዛራሀ ያራ።

12 ኡዱፑንꬃ አግናን ከስያ ጩጉዋ ካለꬅያዌ ቢንያማ ዛረ ግዴዳ አናቶትያ አብኤዘራ፤ አ ጩጉዋን ላታማነ ኦይዱ ሻአ አሳይ ደኤ።

13 ታማንꬃ አግናን ከስያ ጩጉዋ ካለꬅያዌ ናጾፋፐ ዬዳ፥ ዛራሀ ያራ ግዴዳ ማህራያ፤ አ ጩጉዋን ላታማነ ኦይዱ ሻአ አሳይ ደኤ።

14 ታማነ እተንꬅያ አግናን ከስያ ጩጉዋ ካለꬅያዌ ፕርኣቶናፐ ዬዳ፥ ኤፍሬማ ዛርያ ግዴዳ ባናያ፤ አ ጩጉዋን ላታማነ ኦይዱ ሻአ አሳይ ደኤ።

15 ታማነ ላኤንꬆ አግናን ከስያ ጩጉዋ ካለꬅያዌ ናጾፋፐ ዬዳ፥ ኦትንኤላ ያራ ግዴዳ ሄልዳያ፤ አ ጩጉዋን ላታማነ ኦይዱ ሻአ አሳይ ደኤ።

16 እስራኤልያ ዘረꬃ አይሳናዉ ሱንቴዳዋንቱ ሀዋፐ ካሊደ ጻፈቴዳዋንታ።

ሮቤላ ዛርያ አይስያዌ ዚክራ ናኣ ኤልኤዛራ።

ስሞና ዛርያ አይስያዌ ማእካ ናኣ ሻፋጽያ።

17 ሌዊያ ዛርያ አይስያዌ ቃሙኤላ ናኣ ሀሻብያ።

አሮና ዛርያ አይስያዌ ጻዶቃ።

18 ይሁዳ ዛርያ አይስያዌ ዳዊታ እሻ ኤልሀ።

ይሳኮራ ዛርያ አይስያዌ ምካኤላ ናኣ ኦምራ።

19 ዛብሎና ዛርያ አይስያዌ ኦባድያ ናኣ ይሽማእያ።

ንፍታሌማ ዛርያ አይስያዌ አዝርኤላ ናኣ ያርሞታ።

20 ኤፍሬማ ዛርያ አይስያዌ አዛዝያ ናኣ ሆሼአ።

ዮርዳኖሳ ሻፋፐ አዋይ ዉልያ ባጋን ደእያ ምናሰ ዛራቱዋፐ ባጋ አይስያዌ ፓዳያ ናኣ ዩኤላ።

21 ዮርዳኖሳ ሻፋፐ አዋይ ዶልያ ባጋ ጋላኣደን ደእያ ምናሰ ዛራቱዋፐ ባጋ አይስያዌ ዛካራሳ ናኣ እዳ።

ቢንያማ ዛርያ አይስያዌ አባኔራ ናኣ ያእስኤላ።

22 ዳና ዛርያ አይስያዌ ይሮሃማ ናኣ አዛርኤላ።

ሀዋንቱ እስራኤልያ ዘረꬃ አይስያዋንታ።

23 መꬍና ጎዳይ እስራኤልያ አሳ ሳሉዋ ጾልንትያዳን ጮርሳና ጌዳ ድራዉ፥ ዳዊተ ላታሙ ላይꬃነ ላታሙ ላይꬃፐ ጋርሳና ደእያዋንታ ፓይዱዋን ገልስቤና። ዶመꬃ 15:5፤ 22:17፤ 26:4 24 ጻሩይ ናአይ ዮኣበ አሳ ፓይዱዋ ዶሜዳ፤ ሽን ፓይድ ዉርስቤና። አሳ ፓይዴዳ ጋሱዋን ጾሳይ እስራኤልያ አሳ ቦላ ሀንቀቴዳ። ሄዋ ድራዉ፥ ኡንቱንቱ ፓይዱ ካትያ ዳዊታ ታርክያ ማዝጎባን ጻፈትቤና። 2 ሳሜላ 24:1-15፤ 1 ኦዱዋ 21:1-14

25 ካትያ ሚሻ ምንጅያ ሳአዉ አዎትያዌ አዲኤላ ናኣ አዝማዌታ። ጋጻርያን፥ ካታማቱዋንነ ሞꬃቱዋን፥ ዎችያ ሳ ደእያ ሚሻዉ አዎትያዌ ኦዝያና ናኣ ዮናታና። 26 ቢታ ጎሽያ ጎሻንቻቱዋ ቦላ አዎትያዌ ካሉባ ናኣ ኤዝራ። 27 ዎይንያ ቱራ ሳአቶ አዎትያዌ ራማፐ ዬዳ ሽምአ። ዎይንያ ኤሳ ምንጅያ ሳአዉ አዎትያዌ ሻፋማፐ ዬዳ ዛብዳ።

28 አዋይ ዉልያ ባጋ ገዝያን ደእያ ዎጋራዉነ ኡንቱንቶ አዎትያዌ ገዴራፐ ዬዳ ባኣልሀናና። ዛይትያ ምንጅያ ሳአዉ አዎትያዌ ዮኣሻ። 29 ሳሮና ደምባን ሄመትያ ሚዛዉ አዎትያዌ ሳሮንያ ሺጽራያ። ዎምባን ሄመትያ ሚዛዉ አዎትያዌ አድላያ ናኣ ሻፋጻ። 30 ጋሎቶ አዎትያዌ እስማኤልያ ኦቢላ። ሀረቶ አዎትያዌ መሮኖትያ የህዳያ። 31 ዶርሳቶነ ዴሻቶ አዎትያዌ አጋር ዛርያፐ ያዚዛ። ሀዋንቱ ኡባይ ዳዊታ አቁዋ ቦላ አዎቴዳዋንታ።

32 ዳዊታ አዉዋ እሻይ ዮናታን ጻፊ፥ አኬካንቻ አሳነ ካትያ ዞርያ አሳ። ሀክሞና ናአይ ይህኤል ካትያ ናና ናጌ። 33 አክጾፌል ቃይ ካትያ ዞርያዋ። አርክያ ሁሻይ ካቲ ሲቅያ አሳ። 34 አክጾፌል ሀይቂና፥ አ ኮሽያን ባናያ ናአይ ዮዳሄነ አብያታረ ካትያ ዞርያዋንታ፤ ዮኣበ ካትያ ኦላ ጋዳዋ።