1 ጌሻ ጎልያ ፐንግያ ናግያዋንቱ ሀዋፐ ካሊደ ጻፈቴዳዋንታ።

ኮይሩ ቆራሀ ያራፐ አሳፋ ባጋና ቆረ ናኣ ማሸለምያ። 2 ማሸለሜ ላፑን አቱማ ናና የሌዳ፤ ኡንቱንቱ ባረንቱ የለታ ማራን ዛካራሳ፥ ይድኤላ፥ ዛባድያ፥ ያትንኤላ፥ 3 ኤላማ፥ ያሆሀናናነ ኤልያሆኤናያ።

4 ጾሳይ ኦቤድ-ኤዶማካ አንጄዳ ድራዉ፥ እ ሆስፑን አቱማ ናና የሌዳ። ኡንቱንቱ ባረንቱ የለታ ማራን ሻማእያ፥ ይሆዛባዳ፥ ዮኣሀ፥ ሳካራ፥ ናታንኤላ፥ 2 ሳሜላ 6:11፤ 1 ኦዱዋ 13:14 5 አምኤላ፥ ይሳኮራነ ፓኡልታያ። 6 ቃይ ኦቤድ-ኤዶማ ናአይ ሻማኤካ ኡሱፑን አቱማ ናና የሌዳ፤ ኡንቱንቱ ምኖ አሳ ግዴዳ ድራዉ፥ ባረንቱ አዉዋ ጎለን ካፑዋ ግዴድኖ። 7 ሻማእያ ናናይ ኦትና፥ ራፋኤላ፥ ዮቤዳነ ኤልዛባዳ፤ ኡንቱንቱ እሻቱ ኤልሁነ ሳማከ አꬌዳ ምኖ አሳቱዋ። 8 ሀዋንቱ ኡባቱ ኦቤድ-ኤዶማ ዘረꬃ፤ ኡንቱንቱ፥ ኡንቱንቱ ናናይነ ኡንቱንቱ ዳቦቱ ኦሶ ምኖ። ኦቤድ-ኤዶማ ዛራቱ ኡባና ኡሱፑን ታማነ ላኣ።

9 ማሸለምያዉ ምኖ ናናይነ ምኖ ዳቦቱ ደኢኖ፤ ኡንቱንቱ ኡባና ታማነ ሆስፑና።

10 ማራራ ያራፐ ሆሳዮካ ናናይ ደኢኖ። ሺምር ባይራ ናኣ ግደና፤ ሽን አ አዉ አ ካፑዋ ኦꬄዳ። 11 አ እሻቱ ህልቂያ፥ ጻባልያነ ዛካራሳ። ሆሳ ናናይነ አ ዳቦቱ ኡባና ታማነ ሄዛ።

12 ጌሻ ጎልያ ፐንግያ ናግያዋንቱ ባረንቱ ጎልያ አሳ ካፓቱዋና፥ ጩጉዋን ጩጉዋን ሻከቴድኖ። ሀራ ሌዋቱዋዳን ኡንቱንታካ መꬍና ጎዳ ጌሻ ጎልያ ኪታይ ግሹዋን ጋኬዳ። 13 ፐንግያ ኡባ ናጋናዉ ባረንቱ ጎለን ጎለን ጉꬃይ ግታይ ሳማ ከሴድኖ። 14 አዋይ ዶልያ ፐንግያ ግያ ፐንግያ ናግያ ሳማይ ሸሌምያ ጋኬዳ። ሎኦ ዞርያ አ ናኣ ዛካራሳ ሁጲሳ ፐንግያ ጌተትያ ፐንግያ ናግያ ሳማይ ጋኬዳ። 15 ኦቤድ-ኤዶማ ገድሳ ፐንግያ ግያ ፐንግያ ናግያ ሳማይ ጋኬዳ። አ ናና ሚሻ ምንጅያ ጎልያ ናግያ ሳማይ ጋኬዳ። 16 አዋይ ዉልያ ፐንግያነ ቦላ ኦግያ ባጋና ደእያ ሻለኮታ ፐንግያ ጌተትያ ፐንገቱዋ ናግያ ሳማይ ሹፊማነ ሆሳ ጋኬዳ። ናጉ ካላን ካላን ጋኬ።

17 ጋላሳን ጋላሳን አዋይ ዶልያ ባጋና ኡሱፑን ሌዋቱ ናጊኖ። ሁጲሳ ባጋና ኦይዳቱ ናጊኖ። ገድሳ ባጋና ኦይዳቱ ናጊኖ። ቃይ ላኡ ላኡ ሚሻ ምንጅያ ጎልያ ናጊኖ። 18 አዋይ ዉልያ ባጋና ዳባባዉ አፍያ ኦግያ ኦይዳቱ ናጊኖ። ቃይ ዳባባ ግዱዋ ላአቱ ናጊኖ። 19 ስም ቆራሀ ያራቶነ ማራራ ያራቶ እመቴዳ ፐንገ ናጎ ኪታይ ሀዋ።

20 አኪያ ጌተትያ ሌዊ ጾሳ ጌሻ ጎልያን ደእያ ሻሉዋነ ጾሳዉ ዱማይ ዎꬄዳ እሞታ ናጋናዉ ሱንቴዳ። 21 ገርሾና ናኣ ላእዳና ያራፐ ይህኤል ዱማ ዱማ ጎልያ አሳዉ አዎቴ። 22 ይህኤላ ናናይ ዘታማነ አ እሻ ዩኤላ፤ ኡንቱንቱ መꬍና ጎዳ ጌሻ ጎልያን ደእያ ሚሻ ናጋናዉ ሱንቴድኖ።

23 አምራማ ያራቶ፥ ይጽሃራ ያራቶ፥ ከብሮና ያራቶ ኡዝኤላ ያራቶ ኪታይ ሻከት እመቴዳ። 24 ሙሴ ናኣ ገርሾማ ያራ ግድያ ሻቡኤል ጌሻ ጎልያን ደእያ ሚሻ ናግያዋንቱ ካፓቱ ቦላ ሱንቴዳ። 25 እ ገርሾማ እሻ ኤልኤዛራ ባጋና ሻሎሚታዉ ዳቦቴ። ኤልኤዛር ራሃብያ የሌዳ፤ ራሃቢ ይሻእያ የሌዳ፤ ይሻኢ ዮራማ የሌዳ፤ ዮራመ ዚክራ የሌዳ፤ ዚክር ሻሎሚታ የሌዳ። 26 ካቲ ዳዊተ፥ አዎቱዋ ጎልያ አሳ ካፓቱ፥ ሻአ ካፓቱ፥ ጼቱዋ ካፓቱነ ኦላ ጋዳዋቱ ጾሳዉ ዱማይ ዎꬄዳ ሻሉዋ ኡባ ቦላ ሻሎሚትነ አ ዳቦቱ ሱንቴድኖ። 27 ሀ ሻሉዋ መꬍና ጎዳ ጌሻ ጎልያ ኦራꬃናዉ ዱማይ ዎꬄዳ አሳቱ ሀ ሚሻ ካሰ ኦላፐ ኦሞድ ዎꬄድኖ። 28 ቃይ ትምቢትያ ኦድያ ሳመል፥ ቂሳ ናአይ ሳኦል፥ ኔራ ናአይ አባኔርነ ጻሩይ ናአይ ዮኣበ ካሰ ዱማይ ዎꬄዳ እሞታ ኡባ ሻሎሚትነ አ ዳቦቱ ናጊኖ።

29 ይጽሃራ ያራቱዋፐ ካናነነ አ ናናይ ጌሻ ጎልያፐ ካረና ደእያ ኪታን እስራኤልያ አሳ አይሳናዉነ ዳናታናዉ ሱንቴድኖ።

30 ከብሮነ ያራቱዋፐ ሀሻቤነ አ ዳቦቱ፥ እት ሻአነ ላፑን ጼቱ ምኖ አሳቱ፥ መꬍና ጎዳ ኦሱዋ ኡባዉነ ካትያ ኦሱዋ ኡባዉ ዮርዳኖሳ ሻፋፐ ሄፍንꬃን አዋይ ዉልያ ባጋና ደእያ እስራኤልያ አሳ ቦላ ሱንቴድኖ። 31 ከብሮነ ያራቱዋፐ ካፖትያዌ ይሪያ። ዳዊተ ካተቴዳ ኦይታማንꬆ ላይꬃን ኮይና፥ ኡንቱንቱ አሳ ግዶፐ ምኖ አሳቱ ጋላኣደ ቢታን ያእዜራ ጌተትያ ኮሽያን ቤቴድኖ። 32 አዎቱዋ ጎልያ አሳዉ ካፖትያ ይሪያ ዳቦቱ ምኖቱ ላኡ ሻአነ ላፑን ጼታ። ካቲ ዳዊተ ጾሳ ኦሱዋ ኡባዉነ ካትያ ኦሱዋ ኡባዉ ኡንቱንቱ ሮቤላ ዛራቱዋ ቢታ ቦላ፥ ጋደ ዛራቱዋ ቢታ ቦላነ ምናሰ ዛራቱዋፐ ባጋቱ ቢታ ቦላ ሱንꬄዳ።