1 ሂንቴንቱ ጊዶን ፖኮ ዎሹማ ኦሱ ዴዒያዌ ዚጊሬቴ፤ ሄዋ ማላ ፖኮ ዎሹማ ኦሱ ሃራይ ኣቶ፥ ፆሳ ኣማኔና ኣሳ ጊዶኒኔ ባዋ። ኣዪሲ ጎፔ፥ ባሬ ኣዉዋ ማቻቶ ኣኬዳ ኣሳይ ዴዔ። ዛር 22፡30 2 ሂንቴንቱካ ኦቶሬቴዲታ። ሄዋፔ ሂንቴ ካዮታናው ቤሴኔ? ሄዋ ማላ ፖኮ ኦሱዋ ኦꬄዳ ቢታኒ ሂንቴ ጊዶፔ ኪቻናው ቤሴ።

3-4 ኣያ ጊዲናካ ታኒ ታ ኣሳቴꬃን ሂንቴንቱና ዴዔናኒ ꬋዮፔካ፥ ኣያናን ሂንቴንቱና ዴዓይ። ሃዒ ሂንቴንቱና ዴዒያዋዳን ሃናዴ፥ ሄዋ ማላ ኦሱዋ ኦꬄዳ ቢታኒያ ቦላ ኑ ጎዳ ዬሱሲ ኪሪስቶሳ ሱንꬃን ፒርዳዲጋዲ። ሂንቴንቱኔ ታ ኣያናይ ኑ ጎዳ ዬሱሲ ኪሪስቶሳ ዎልቃና ኢቲፔ ሺቂዴ፥ 5 ሄ ቢታኒያ ኣያናይ ጎዳ ዬሱሲ ፒርዳው ዪያ ጋላሳን ኣታና ማላ፥ ናጋራን ኩሜዳ ኣ ቦላ ኮላናዳን ሴፃናሲ ሂንቴ ኢማናዳን፥ ታኒ ፒርዳዲ።

6 ሂንቴንቱ ጬቁ ሎዓ ጊዴና። ጉꬃ ኢርሹ ሙናቃ ኡባ ዴንꬂያዋ ኤሪኪቴ? 7 ሂንቴንቱ ኦራꬃ ጊዳና ማላ፥ ናጋራ ኢርሹ ጫሌዳዋ ኬሲቴ። ሂንቴንቱ ኢርሹ ባይና ሙናቃ ማላ። ኣዪሲ ጎፔ፥ ኑ ፓሲጋ ዶርሳይ፥ ኪሪስቶሲ ያርሼቴዳ። ኬስ 12፡5 8 ሄዋ ዲራው፥ ኑኒ ኡኪꬃ ባላ ሱሬቴꬃኒኔ ቱማቴꬃን ቦንቻናፔ ኣቲን፥ ጫላ ኢርሹዋን፥ ኢታቴꬃ ኢርሹዋኒኔ ጌላቴꬃ ኢርሹዋን ቦንቾኮ። ኬስ 13፡7፤ ዛር 16፡3

9 ዎሹማናው ቆፒያዋንቱና ሂንቴ ኢቲፔ ጋኬቴና ማላ፥ ሂንቴንቱሲ ዳቢዳቢያ ፃፋዲ። *ዳቢዳቢያ ፃፋዲ፡ ሃዋ ፃፋናፔ ካሴና ጳዉሎሲ ቆሮንቶሳ ኣሳሲ ፃፌዳ ሃራ ቆንጪያን ኤሬቲቤና ዳቢዳቢ ዴዔ ጉሳ። 10 ታኒ ጊያዌ ሃ ኣላሚያን ዴዒያ ዎሹማናው ቆፒያዋንቱፔ ዎይ ዮራቲያዋንቱፔ፥ ካዪሶቲያዋንቱፔኔ ዎይ ኤቃው ጎዪኒያዋንቱፔ ኡባካ ሻኬታና ማላ ጊዴና። ሄዋ ጊዶፔ፥ ሃ ኣላሚያፔ ሂንቴ ሻኬቲ ባናው ቤሴ ጉሳ። 11 ሺን ኢሻቱዋ ሃዒ ጌቴቲያዋንቱፔ ኢቱኔ ዎሹማናው ቆፒያዋንቱ ዎይ ሚሻው ዮራቲያዋንቱ ዎይ ኤቃው ጎዪኒያዋንቱ ዎይ ኣሳ ሱንꬃ ባይዚያዋንቱ ዎይ ማꬆቲያዋንቱ ዎይ ዉዒያዋንቱና ሂንቴንቱ ኢቲፔቴꬃ ኦꬄና ማላ፥ ታኒ ሂንቴንቱሲ ፃፋዲ። ሄዋንቱ ማላና ሃራይ ኣቶ፥ ቁማካ ኢቲፔ ሞፒቴ።

12 ኣዪሲ ጎፔ፥ ዎሳ ጎሌፔ ካሬና ዴዒያዋንቱ ቦላ ፒርዳናው ታና ኣዬ ጋꬂ? ሂንቴንቱ ጊዶን ዎሳ ጎሌን ዴዒያዋንቱ ቦላን ሂንቴ ፒርዲኪቴዬ? 13 ሺን ካሬና ዴዒያዋንቱ ቦላን ፆሳይ ፒርዳና። ሄ ኢታባ ኦꬂያ ኡራ ሂንቴ ጊዶፔ ኬሲዲጊቴ። ዛር 13፡5፤ 17፡7