1 ህንተንቱ ግዶን ፖኮ ዎሹማ ኦሱ ደእያዌ ዝግረቴ፤ ሄዋ ማላ ፖኮ ዎሹማ ኦሱ ሀራይ አቶ፥ ጾሳ አማነና አሳ ግዶንነ ባዋ። አያዉ ጎፐ፥ ባረ አዉዋ ማቻቶ አኬዳ አሳይ ደኤ። ዛረ. 22:30 2 ህንተንቱካ ኦቶረቴድታ። ሄዋፐ ህንተ ካዮታናዉ በሰኔ? ሄዋ ማላ ፖኮ ኦሱዋ ኦꬄዳ ብታኒ ህንተ ግዶፐ ክቻናዉ በሴ።

3-4 አያ ግድናካ ታን ታ አሳተꬃን ህንተንቱና ደኤናን ꬋዮፐካ፥ አያናን ህንተንቱና ደአይ። ሀእ ህንተንቱና ደእያዋዳን ሀናደ፥ ሄዋ ማላ ኦሱዋ ኦꬄዳ ብታንያ ቦላ ኑ ጎዳ የሱስ ክርስቶሳ ሱንꬃን ፕርዳድጋድ። ህንተንቱነ ታ አያናይ ኑ ጎዳ የሱስ ክርስቶሳ ዎልቃና እትፐ ሺቂደ፥ 5 ሄ ብታንያ አያናይ ጎዳ የሱስ ፕርዳዉ ይያ ጋላሳን አታና ማላ፥ ናጋራን ኩሜዳ አ ቦላ ኮላናዳን ሴጻናዉ ህንተ እማናዳን፥ ታን ፕርዳድ።

6 ህንተንቱ ጬቁ ሎአ ግደና። ጉꬃ እርሹ ሙናቃ ኡባ ደንꬅያዋ ኤርክቴ? 7 ህንተንቱ ኦራꬃ ግዳና ማላ፥ ናጋራ እርሹ ጫሌዳዋ ከስተ። ህንተንቱ እርሹ ባይና ሙናቃ ማላ። አያዉ ጎፐ፥ ኑ ፓስጋ ዶርሳይ፥ ክርስቶስ ያርሸቴዳ። ከሳ 12:5 8 ሄዋ ድራዉ፥ ኑን ኡክꬃ ባላ ሱረተꬃንነ ቱማተꬃን ቦንቻናፐ አትን፥ ጫላ እርሹዋን፥ ኢታተꬃ እርሹዋንነ ጌላተꬃ እርሹዋን ቦንቾኮ። ከሳ 13:7፤ ዛረ. 16:3

9 ዎሹማናዉ ቆፕያዋንቱና ህንተ እትፐ ጋይተና ማላ፥ ህንተንቶ ዳብዳቢያ ጻፋድ። *ዳብዳቢያ ጻፋድ፦ ሀዋ ጻፋናፐ ካሰና ጳዉሎስ ቆሮንቶሳ አሳዉ ጻፌዳ ሀራ ቆንጭያን ኤረትቤና ዳብዳቢ ደኤ ጉሳ። 10 ታን ግያዌ ሀ አላምያን ደእያ ዎሹማናዉ ቆፕያዋንቱፐ ዎይ ዮራትያዋንቱፐ፥ ካይሶትያዋንቱፐነ ዎይ ኤቃዉ ጎይንያዋንቱፐ ኡባካ ሻከታና ማላ ግደና። ሄዋ ግዶፐ፥ ሀ አላምያፐ ህንተ ሻከት ባናዉ በሴ ጉሳ። 11 ሽን እሻቱዋ ሀእ ጌተትያዋንቱፐ እቱነ ዎሹማናዉ ቆፕያዋንቱ ዎይ ሚሻዉ ዮራትያዋንቱ ዎይ ኤቃዉ ጎይንያዋንቱ ዎይ አሳ ሱንꬃ ባይዝያዋንቱ ዎይ ማꬆትያዋንቱ ዎይ ዉእያዋንቱና ህንተንቱ እትፐተꬃ ኦና ማላ፥ ታን ህንተንቶ ጻፋድ። ሄዋንቱ ማላና ሀራይ አቶ፥ ቁማካ እትፐ ሞፕተ።

12 አያዉ ጎፐ፥ ዎሳ ጎለፐ ካረና ደእያዋንቱ ቦላ ፕርዳናዉ ታና አዬ ጋꬂ? ህንተንቱ ግዶን ዎሳ ጎለን ደእያዋንቱ ቦላን ህንተ ፕርድክቴየ? 13 ሽን ካረና ደእያዋንቱ ቦላን ጾሳይ ፕርዳና። ሄ ኢታባ ኦꬅያ ኡራ ህንተ ግዶፐ ከስ ድግተ። ዛረ. 13:5፤ 17:7