1 ህንተንቱፐ እት ኡራዉ ባረ እሻና ሞቱ ደእያባ ግዶፐ፥ አማንያዋንቱ ቦላ ፕርደታናዋ ባሺደ፥ አማነናዋንቱ ቦላ ፕርደታናዉ ዋን ጻሊደ ቤዳ? 2 አማንያዋንቱ አላምያ ቦላ ፕርዳናዋ ኤርክቴ? ያትና፥ አላምያ ቦላ ህንተ ፕርዳናዋንታ ግዶፐ፥ ኡባባፐ ጉጽያዋ ፕርዳናዉ ዳንዳይክቴ? 3 ሀ ደኡዋባይ አቶ ሽን፥ አማንያዋንቱ ኪታንቻቱዋ ቦላ ፕርዳናዋ ኤርክቴ? 4 ያትና፥ ህንተንታ ሀ አላምያ ደኡዋባዉ ፕርዳ ጎለ ቡሳይ ኮሾፐ፥ አማንያ አሳይ ካꬌዳ አሳን ፕርድሳናዉ አፊቴ? 5 ታን ህንተንታ ዬላያናዉ ሀዋ ጋይ፤ ሀዋ ግዳናዉ በሲ? ህንተንቱ ግዶን እሻቱዋ ስገꬃናዉ ዳንዳይያ ሎኦ ኤራንቻ አሳይ እቱነ ባዌ? 6 ሽን እት እሻይ የኮ እሻ ፕርዳ ጎለን ሞቲደ፥ ሄ የዉዋ አማነና አሳን ፕርድሲ?

7 ስም እቱ እቱዋ ሞትያዌ ህንተ ግዶን ደኦፐ፥ ሄዌ ህንተ ኩንዴዳዋ በሴ። ሄዋፐ ህንተ ናቀትያዌነ ጭመትያዌ ሎኤኔ? 8 ሽን ህንተ ህንተ ሁጰዉ እቱ እቱዋ ሀራይ አቶ፥ ህንተ እሻቱዋካ ናቂታነ ጭሚታ።

9 ዎይ ማካላንቻቱ ጾሳ ካዉተꬃ ላተናዋ ኤርክቴ? ባሎፕተ። ዎሹማናዉ ቆፕያዋንቱ ዎይ ኤቃዉ ጎይንያዋንቱ ዎይ ዎሹምያዋንቱ ዎይ አቱማዋ ግዲደ፥ አቱማዋና ግስያዋንቱ፥ 10 ዎይ ካይሳቱ ዎይ ሚሻዉ ዮራትያዋንቱ ዎይ ማꬆትያዋንቱ ዎይ አሳ ሱንꬃ ባይዝያዋንቱ ዎይ ቦንቂያዋንቱ ጾሳ ካዉተꬃ ላትክኖ። 11 ህንተንቱፐካ እት እት አሳይ ሄዋንቱ ማላ። ሽን ጎዳ የሱስ ክርስቶሳ ሱንꬃንነ ኑ ጾሳ አያናን ህንተ ሜጨቲደ ጌዬድታ፤ ቃይ ጽሌድታ።

12 እት ኡራይ፥ “ታን ኮዬዳባ ኡባ ኦꬃናዉ ዳንዳያይ” ጋና ዳንዳዬ። ሽን ኡባይካ ታና ማደና። ታን ኮዬዳባ ኡባ ኦꬃናዉ ዳንዳያይ። ሽን አዬኔካ ታና ሞደና። 13 ቃይ ሀራይካ፥ “ቁማይ ኡሉዋሳ፤ ኡሉካ ቁማሳ” ጌ። ሽን ጾሳይ ኡሉዋካ ቁማካ ꬋይሳና። አሳ አሳተꬃይ ጎዳ የሱሳሳፐ አትን፥ ዎሹማሳ ግደና። ጎዳ የሱስካ አሳ አሳተꬃሳ። 14 ጾሳይ ጎዳ የሱሳ ሀይቁዋፐ ደንꬄዳ፤ ቃይ ኑናካ ሀይቁዋፐ ባረ ዎልቃን ደንꬃና።

15 ህንተንቱ አሳተꬃይ ክርስቶሳ አሳተꬃና እቱዋ ግድያዋ ህንተ ኤርክቴ? ያትና፥ ታን ክርስቶሳ አሳተꬃና እቱዋ ግዴዳዋ አፋደ፥ ጫራት አሳተꬃና እቱዋ ኦꬃናዉ በሲ? በሰና! 16 ዎይ ጫራትና እትፐተꬃ መꬍያ ኡራይ እዝና እት አሳተꬃ ግድያዋ ኤርክቴ? አያዉ ጎፐ፥ ጾሳ ማጻፋይ፥ “ኡንቱንቱ ላአቱ እት አሾ ግዳና” ያጌ። ዶመꬃ 2:24 17 ሽን ጎዳና እትፐተꬃ መꬍያ ኡራይ አያናን አናና እቱዋ ግዴ።

18 ዎሹማፐ ሃክተ። እት ኡራይ ኦꬅያ ሀራ ናጋራ ኡባይ አ አሳተꬃፐ ካረና ደኤ፤ ሽን ዎሹምያዌ ባረ ቦላን ናጋራ ኦꬄ። 19 ዎይ ህንተ ቦላይ ጾሳይ ህንተንቶ እሜዳ ህንተንቱን ደእያ ጌሻ አያናይ አቅያ ጌሻ ጎልያ ግድያዋ ኤርክቴ? ቃይ ህንተ ህንተ ሁጲያሳ ግድክታ። 20 አያዉ ጎፐ፥ ጾሳይ ህንተንታ ጋትያን ሻሜዳ። ሄዋ ድራዉ፥ ህንተ አሳተꬃን አ ቦንችተ።