1 ታናዳን አማንያዋንቶ፥ ጌሻ አያና እሞታባ ህንተ ኤራናዉ ኮያይ። 2 ህንተንቱ ጾሳ አማነና ዎደ፥ ኡባ ዎደ ካልያዋዳንካ፥ ሃሳየና ኤቃቱዋኮ ህንተ ቤዳዋ ኤሪታ። 3 ሄዋ ድራዉ፥ ጾሳ አያናይ ካለꬅያ አሳይ ኦንነ፥ “የሱስ ሸቀቶ” ያጊደ ሃሳየናዋነ ቃይ ጌሻ አያናይ ካለꬆፐፐ አትን፥ ሀራይ አቶ እት አሳይነ፥ “የሱስ ጎዳ” ጋናዉ ዳንዳየናዋ ታን ህንተንታ ኤርሳይ።

4 አያና እሞታይ ዱማ ዱማ፤ ሽን እምያ አያናይ እቱዋ። ሮመ 12:6-8 5 ቃይ ኦꬅያ ኦሱ ዱማ ዱማ፤ ሽን ጎዳይ እቱዋ። 6 ኦሱዋ ኦꬃናዉ ዱማ ዱማ ኦጊ ደእሽን፥ ሄ ኦꬅያ ኦግያ ኡባ አሳ ኡባዉ ቆንጭስያ ጾሳይ እቱዋ። 7 ሽን አሳ ኡባ ማዳናዉ፥ ጌሻ አያና ቆንጭስያ ዎልቃይ ኡባዉ ሁጲያን ሁጲያን እመቴዳ።

8 አያዉ ጎፐ፥ ጌሻ አያናይ እቶ አꬎ ኤራተꬃ ሃሳያ እሜዳ፤ ቃይ እቶ ኤራተꬃ ሃሳያ እሜዳ። 9 ሄ ጌሻ አያናይ እቶ አማኑዋ እሚደ፥ የኮ ሀርጋንቻ ፓꬅያ ዎልቃ እሜዳ። 10 ጌሻ አያናይ እቶ ማላታ ኦꬅያ ዎልቃ እሚደ፥ እቶ ትምቢትያ ኦድያ ዎልቃ እሜዳ። እቶ አያናቱዋ ግዱዋን ደእያ ዱማተꬃ ኤርያ ዎልቃ እሚደ፥ እቶ ዱማ ዱማ ቃላን ሃሳይያ ዎልቃ እሜዳ። ቃይ እቶ ዱማ ዱማ ቃላን ሃሳዬዳዋ ብልያ ዎልቃ እሜዳ 11 ሽን ሀ ኡባባ ኦꬅያዌ ሄ እት ጌሻ አያና። አሳ ኡባዉ እ ባረ ኮይያዋዳን፥ ዱማ ዱማ እሞታ ሻክ ሻኪደ እሜዳ።

12 ክርስቶስ ጮራ አሳተꬃቱ ደእያ እት ቦላ ማላ። ቦላይ ጮራ አሳተꬃቱዋፐ መቴዳዋ ግዶፐካ፥ እት ቦላ። ሮመ 12:4-5 13 አያዉ ጎፐ፥ ኑን አይሁዳ አሳ ግዶፐነ ዎይ ግሪከ አሳ ግዶፐ፥ ዎይ አይለ ግዶፐነ ዎይ ዎማኖ ግዶፐ፥ ኡባይ እት ጌሻ አያናን እት ቦላ ግዳናዉ ጻማቀቴዶ። ቃይ ኑን ኡባይ እት ጌሻ አያና ኡሼዶ።

14 አያዉ ጎፐ፥ ቦላዉ አሳተꬃይ ጮራ ግድያዋፐ አትን፥ እቱዋ ግደና። 15 ገዲ፥ “ታን ኩሽያ ግደና ድራዉ፥ ቦላ ቆሞ ግድከ” ጎፐ፥ እ ሄዋ ግያዌ ቦላ ቆሞ ግድያዋ ድጋኔ? 16 ሀይꬃይካ፥ “ታን አይፍያ ግደና ድራዉ፥ ቦላ ቆሞ ግድከ” ጎፐ፥ እ ሄዋ ግያዌ ቦላ ቆሞ ግድያዋ ድጋኔ? 17 ቦላይ ኡባይ አይፍያ ጻላላ ግድንቶ፥ ዎቲደ ስሳናዉ ዳንዳዪ? ቃይ ቦላይ ኡባይ ሀይꬃ ጻላላ ግድንቶ፥ ዎቲደ ስንጋናዉ ዳንዳዪ?

18 ሽን ጾሳይ ባረ ኮዬዳዋዳን፥ ቦላ አሳተꬃቱዋ እቱዋ እቱዋ ቦላን ዎꬄዳ። 19 ኡባይ እት ቆሞ ግድንቶ፥ ቦላይ ሀቃን ደአኔ? 20 ሽን አሳተꬃቱ ጮራ ግዶፐካ፥ ቦላይ እቱዋ።

21 አይፊ ኩሽያ፥ “ኔን ታና ኮሻካ” ጋናዉ ዳንዳየና። ዎይ ቃይ ሁጲ ገዳቱዋ፥ “ህንተንቱ ታና ኮሽክታ” ጋናዉ ዳንዳየና። 22 ሽን ላፋ ማላትያ ቦላ አሳተꬃቱ ሎይꬅ ኮሽያዋንታ። 23 ቦላ አሳተꬃቱዋፐ ቦንቼተናዋንታ ኑዉ ማላትያዋንታ ኑን ሎይꬅ ቦንቼቶ። ቃይ ኑና ዬላይያ ቦላ አሳተꬃቱዋካ ሎይꬅ ቦንቼቶ። 24 ኑ ቦላፐ ቤትያ ባጋዉ ማዩ ኮሸና፤ ሽን ፖክያ ባጋ አሳተꬃቱዋ ሎይꬅ ማይዛናዳን፥ ጾሳይ አሳተꬃ እትፐ ጋꬄዳ። 25 ቦላ አሳተꬃቱ እቱ እቶ እት ማላ ቆፋ ቆፓናፐ አትን፥ ቦላን ዱማተꬃይ ደአናዉ በሰና። 26 ቦላ አሳተꬃቱዋፐ እቱ ሴለቶፐ፥ ቦላ አሳተꬃቱ ኡባይካ አናና ሴለቲኖ፤ ቦላ አሳተꬃቱዋፐ እቱ ቦንቼቶፐ፥ ቦላ አሳተꬃቱ ኡባይ አናና ናሸቲኖ።

27 ህንተንቱ ኡባይ ክርስቶሳ ቦላ፤ ቃይ ሁጲያን ሁጲያን ህንተ ኡባይካ አ ቦላ አሳተꬃቱዋ። 28 ጾሳይ ዎሳ ጎለን እት እት አሳቱዋ፥ ኮይሩዋን የሱስ ኪቴዳዋንታ፥ ላኤንꬁዋን ናባቱዋ፥ ሄዘንꬁዋን ታማርስያዋንታ፥ ሄዋፐ ጉይያን፥ ማላታ ኦꬅያዋንታ፥ ሄዋፐ ጉይያን፥ ፓꬅያ ዎልቃይ ደእያዋንታ፥ ማድያዋንታ፥ ዎሳ ጎልያ አይስያዋንታ ዱማ ዱማ ቃላን ሃሳይያዋንታ ኦꬄዳ።ኤፈ. 4:11 29 ኡባቱ የሱስ ኪቴዳዋንቴ? ኡባቱ ናባቴ? ኡባቱ ታማርስያዋንቴ? ኡባቱ ማላታ ኦꬂኖ? 30 ኡባዉ ፓꬅያ ዎልቃይ ደኢ? ኡባቱ ዱማ ዱማ ቃላን ሃሳዪኖ? ቃይ ዱማ ዱማ ቃላን ሃሳዬዳዋ ኡባቱ ብሊኖ? 31 ሽን ኡባፐ አꬍያ እሞታ ሎይꬅ ኮይተ።

ቃይ ኡባፐ ሎይꬅ አꬍያ ኦግያ ታን ህንተንታ በሳና።