1 ታን አሳ ቃላንነ ኪታንቻ ቃላን ሃሳዮፐካ ታዉ ሲቁ ꬋዮፐ፥ ታ ሃሳያይ ጮ ዋስያ ዳዋላ ማላ፤ ዎይ ቆልጫካትያ ጽናጽልያ ማላ። 2 ናበተꬃ እሞታይ ታዉ ደኦፐካ፥ ታን ጌሜዳ የዉዋ ኡባነ ኤራተꬃ ኡባ ኤርንቶካ፥ ቃይ ደርያ ደንꬅ ድግያ አማኑ ታዉ ደኦፐካ፥ ሲቁ ꬋዮፐ፥ ታን አያነ ግድከ። ማቶሳ 17:20፤ 21:21፤ ማር. 11:23 3 ታዉ ደእያዋ ኡባ ህዬሳቱዋ ምዛናዉ እምንቶካ ሀራይ አቶ፥ ታ ቦላ ታማን ጉዳናዉ አꬃ እምንቶካ ሲቁ ꬋዮፐ፥ ታና አይነ ማደና።

4 ሲቁ ዳንዳያንቻ። ሲቁ ኬኬ። ሲቁ ቃናተና። ጬቀተና፤ ቃይ ኦቶረተና። 5 ሲቁ ባረዉ በሰናዋ ኦና፤ ኡዜተና፤ ይሎተና፤ ሲቁ ናቀቴዳዋካ ፓይደና። 6 ሲቁ ቱማተꬃን ናሸትያዋፐ አትን፥ ዎርዱዋን ናሸተና። 7 ሲቁ ኡባባ ዳንዳዬ። ኡባባይካ ሀናናዋ ጊደ፥ ናሸቻን ናጌ። ኡባባን ገንጬ።

8 ሲቁ ሙለካ ꬋየና። ሽን ናበተꬃይካ አታና። ዱማ ዱማ ቃላን ሃሳይያዌካ አታና። ኤራተꬃይካ ꬋያና። 9 አያዉ ጎፐ፥ ኑን ኤራተꬃፐ ፓጫ ኤሬቶ፤ ትምቢትያፐካ ፓጫ ኦዴቶ። 10 ሽን ኩመንꬃ ግዴዳዌ ይያ ዎደ፥ ፓጫይ ꬋያና።

11 ታን ናአተꬃን ደእያ ዎደ፥ ናኣዳን ሃሳያይ። ናኣዳን ቆፓይ። ቃይ ናኣዳንካ አኬካይ። ዎዳላ ግዴዳ ዎደ፥ ናአተꬃ ሀኑዋ አጋድ። 12 ኑን ሀእ በእያዌ ማስቶትያን በእያ ለምእ ለምእያ ማላ ማላ፤ ሽን ሄ ዎደ ኑን ኑ አይፍያን ቆንጭያን በአና። ሀእ ታን ኤራተꬃፐ ፓጫ ኤራይ፤ ሽን ጾሳይ ታና ዉርሲደ ኤርያዋዳን፥ ሄ ዎደ ታንካ ዉርሳ ኤራና።

13 ሽን ሄዋ ግዶፐ፥ አማኑ፥ ሀናናዋ ጊደ ናሸቻን ናግያዌነ ሲቁ፥ ሀዋንቱ ሄዛቱ ምኒደ ደኢኖ። ሀዋንቱፐ አꬍያዌ ሲቁዋ።