1 ሲቁዋ ካልተ። አያና እሞታካ ሎይꬅ ኮይተ። ሽን ኡባፐ አꬂደ፥ ናበተꬃ ኮይተ። 2 አያዉ ጎፐ፥ ዱማ ዱማ ቃላን ሃሳይያ ኡራይ ጾሳዉ ሃሳዬፐ አትን፥ አሳዉ ሃሳየና። አያዉ ጎፐ፥ እ ሃሳይያዋ ኦንነ አኬከና። ሽን አሳዉ ቆንጭቤና የዉዋ አያና ዎልቃን ሃሳዬ። 3 ሽን ናቢ አሳ ማዳናዉ፥ ዞራናዉነ ምንሳናዉ አሳዉ ሃሳዬ። 4 ዱማ ዱማ ቃላን ሃሳይያ ኡራይ ባረና ማዴ። ሽን ናቢ ዎሳ ጎልያ ማዴ።

5 ህንተንቱ ኡባይ ዱማ ዱማ ቃላን ሀሳያናዋ ታን ዶሳይ። ሽን ናበተꬃ ሄዋፐ አꬃደ ዶሳይ። አያዉ ጎፐ፥ ዱማ ዱማ ቃላን ሃሳይያዌ ሄ ሃሳዬዳዋ ዎሳ ጎልያ ማዳናዉ ብልያ አሳይ ꬋዮፐ፥ ዱማ ዱማ ቃላን ሃሳይያዋፐ ናበተꬃይ አꬌ።

6 ሽን ታናዳን አማንያዋንቶ፥ ሀእ ታን ህንተንቱኮ ባደ፥ ዱማ ዱማ ቃላን ሃሳያደ፥ ሳጻን ዎይ ኤራተꬃን ዎይ ናበተꬃን ዎይ ታማርስያዋን ህንተንቶ ኦዳና ꬋዮፐ፥ ታን ህንተንታ አያ ማዳይታ? 7 ሀራይ አቶ፥ ሸምፑ ባይናባይ ሱሱልያ ግድና ዎይ ዲꬃ ግድና ካኢደ፥ ባረ ካሳ ዱማተꬃ ኤርሳና ꬋዮፐ፥ ሱሱልያ ፑኖፐነ፥ ዎይ ዲꬃ ዲጾፐ፥ አሳይ ዎቲደ ኤራኔ? 8 ቃይ ጹሩምባ ዋሱ ሎይꬅ ኤረታና ꬋዮፐ፥ ኦላዉ ኦኔ ጊገታናዌ? 9 ሀዋዳንካ፥ ቃይ ዱማ ዱማ ቃላን ህንተ ሃሳይያዌ ቆንጨ ግደናን ꬋዮፐ፥ ህንተ ሃሳይያዋ አሳይ ዎት አኬካኔ? አያዉ ጎፐ፥ ጫርኮ ህንተ ሃሳዪታ።

10 ሀ አላምያን ጮራ ቃላይ ደኤ፤ ሽን ብለꬃይ ባይና ቃላይ እቱነ ባዋ። 11 ሽን እት አሳይ ሃሳይያ ቃላ ታን ኤራና ꬋዮፐ፥ ሄ ሃሳይያዌ ታዉ እማꬃ ግዴ፤ ታንካ አዉ እማꬃ ግዳይ። 12 ሀዋዳንካ፥ ቃይ ጌሻ አያና እሞታ ህንተ አካናዉ ሎይꬅ ኮይያዋንታ ግድያ ድራዉ፥ ዎሳ ጎልያ ድቻናዉ ማዳዋ ኡባባፐ አꬂደ ኮይተ።

13 ሄዋ ድራዉ፥ ዱማ ዱማ ቃላን ሃሳይያዌ ባረ ሃሳዬዳዋ ብላናዉ ዳንዳያና ማላ፥ ጾሳ ዎሶ። 14 አያዉ ጎፐ፥ ታን ዱማ ዱማ ቃላን ጾሳ ዎሶፐ፥ ታ አያናይካ ዎሴ፤ ሽን ታ ጋርሳ ቆፋይ አይነ ጎኤተና። 15 ያትና፥ ታን ዎቶ? ታን ታ አያናን ጾሳ ዎሳና፤ ቃይ ታ ቆፋንካ ጾሳ ዎሳና። ታ አያናን የጻና፤ ቃይ ታ ቆፋንካ የጻና። 16 ሄዋ ግዳና ꬋዮፐ፥ ኔን ነ አያና ጻላላን ጾሳ ጋላትያዋ ግዶፐ፥ ሄ ሳኣን ኔን ግያዋ ኤረና አሳይ ኔን ጾሳ ጋላትያዋ ኤረናን፥ ኔን ጋላቴዳዋን ዎቲደ፥ “አመንእ” ጋኔ? 17 ኔን ጾሳ ጋላትያዌ ሎአ፤ ሽን ሄዌ የኮ ብታንያ ማደና።

18 ታን ዱማ ዱማ ቃላን ህንተ ኡባፐ አꬃደ ሃሳይያ ድራዉ፥ ጾሳ ጋላታይ። 19 ሽን ታን ዎሳ ጎለን ሀራቱዋ ታማርሳናዉ ዱማ ዱማ ቃላን ታሙ ሻአ ቃላቱዋ ሃሳይያዋፐ እቼሹ ቃላቱዋ ታ ዎዛና ቆፋን ሃሳያናዉ ዶሳይ።

20 ታናዳን አማንያዋንቶ፥ ህንተ ኢታ የዉዋን ጉꬃ ናና ማላ ግዳናፐ አትን፥ ቆፋን ጉꬃ ናና ማላ ግዶፕተ፤ ህንተ ጋርሳ ቆፋን ዎዛናማቱዋ ግድተ። 21 ጾሳ ማጻፋን፥

22 ስም ዱማ ዱማ ቃላን ሃሳይያዌ አማነናዋንቶ ማላታ ግድያዋፐ አትን፥ አማንያዋንቶ ማላታ ግደና። ቃይ ናባቱዋፐ ሃሳየትያዌ አማንያዋንቶ ማላታ ግድያዋፐ አትን፥ አማነናዋንቶ ማላታ ግደና።

23 ሄዋ ድራዉ፥ አማንያ አሳይ ኡባይ እትፐ ሺቂደ፥ ቃይ ኡባይካ ዱማ ዱማ ቃላን ሃሳዮፐ፥ ታማርቤና አሳይ ዎይ አማነና አሳይ ገሊደ፥ ህንተንታ ኡባ፥ “ጎዪታ” ጌኔ? 24 ሽን ታማርቤና አሳይ ዎይ አማነና አሳይ ዎሳ ጎለ ገልያ ዎደ፥ አሳይ ኡባይ ትምቢትያ ኦዶፐ፥ እ ባረ ስስያዋን ባረ ናጋራ አኬኬ። ቃይ ሄ ስሴዳባ ኡባንካ እ ፕርደታና። 25 አ ዎዛናን ጌሜዳ ቆፋይካ ቆንጫና። ሀዋዳንካ ቃይ፥ “ጾሳይ ቱሙ ህንተ ግዶን ደኤ” ያጊደ ማርካቲደ፥ ጉፋኒደ ጾሳዉ ጎይናና።

26 ስም ታናዳን አማንያዋንቶ፥ አዬ? ህንተንቱ እትፐ ሺቅያ ዎደ፥ ሁጲያን ሁጲያን፥ እቶ ማዝሙሪ ደኤ፤ እቶ ታማርስያዌ ደኤ፤ እቶ ሳጻይ ደኤ፤ ቃይ እቶ ዱማ ዱማ ቃላን ሃሳይያዌ ደኤ፤ እቶ ብልያዌ ደኤ። ኡባይካ ዎሳ ጎልያ ማድያዋ ግዳናዉ በሴ። 27 ኦንነ ዱማ ዱማ ቃላን ሃሳዮፐ፥ ላኡ ግዲደ፥ ዎይ ዳሮፐ ሄዙ ግዲደ፥ ካላን ካላን ሃሳያናዉ በሴ። ቃይ ሀራ እቱ ኡንቱንቱ ሃሳዬዳዋ ብሎ። 28 ሽን ብልያ አሳይ ꬋዮፐ፥ ዱማ ዱማ ቃላን ሃሳይያዌ ዎሳ ጎልያን ጮኡ ጎ። ባረ ሁጰዉነ ጾሳዉ ሃሳዮ።

29 ናባቱካ ላኡ ግዲደ ዎይ ሄዙ ግዲደ ሃሳይኖ። ቃይ ሀራንቱ ኡንቱንቱ ግያዋ ሻክኖ። 30 ሽን ጾሳይ ሄ ሳኣን ኡቴዳ ሀራዉ እትባ ቆንጭሶፐ፥ ካሰና ሃሳይያዌ ጮኡ ጎ። 31 አያዉ ጎፐ፥ ኡባይ ታማራና ማላነ ኡባይ ምናና ማላ፥ ካላን ካላን ትምቢትያ ኦዳናዉ ዳንዳዪታ። 32 ትምቢትያ ኦድያዋንቱ እሞታይ ኡንቱንቶ አዛዘቴ። 33 አያዉ ጎፐ፥ ጾሳይ ሳሮተꬃ ጾሳፐ አትን፥ ጫቡዋ ጾሳ ግደና።

ጌሻቱ ዎሳ ጎለቱዋ ኡባን፥ 34 ማጫዋንቱ ሺቁዋ ጋርሳን ጮኡ ጊኖ። አያዉ ጎፐ፥ አይሁዳቱዋ ህጊ ግያዋዳንካ ኡንቱንቱ ሞደታናፐ አትን፥ ሺቁዋ ጋርሳን ሃሳያናዉ ኡንቱንቶ ማት ባዋ። 35 ማጫዋንቱ ሺቁዋ ጋርሳን ሃሳይያዌ ፖኮ ግድያ ድራዉ፥ አየንቶ ኤራናዉ ኮዮፐነ ሶይን ባረንቱ አስና ኦችኖ።

36 ጾሳ ቃላይ ኮይሮ ህንተፐ ዬዴ? ዎይ ህንተ ጻላላኮ ዬዴ? 37 ኦንነ ባረና ናብያ ዎይ ጾሳ አያናይ ደእያ አሳ ያጊደ ቆፖፐ፥ ታን ህንተንቶ ጻፍያዌ ጎዳ አዛዙዋ ግድያዋ አኬኮ። 38 ሽን ኦንነ አኬካና ꬋዮፐ፥ አኬኮፖ ባሽ አጎ።

39 ሄዋ ድራዉ፥ ታናዳን አማንያዋንቶ፥ ትምቢትያ ኦዳናዉ ሎይꬅ አሞትተ። ቃይ ዱማ ዱማ ቃላን ሃሳይያዋካ ድጎፕተ። 40 ሽን ኡባባይካ ዎጋንነ ማራን ሀኖ።