1 ዳዊተ ሀይቂያ ዎዲ ማትና፥ ባረ ናኣ ሶሎሞና ሀዋዳን ያጊደ አዛዜዳ፤ 2 “ታን ሀይቂያ ዎዲ ማቴዳ። ሄዋ ድራዉ፥ ምና፤ ገንቻ አሳ ግዳ። 3 መꬍና ጎዳይ ነ ጾሳይ አዛዜዳዋ ናጋ፤ አ ኦግያን ሀመታ፤ ሙሴ ህግያን ጻፈቴዳዋዳን አ አዋዩዋ፥ አ አዛዙዋ፥ አ ህግያነ አ ዎጋ ናጋ። ያቶፐ፥ ኔን ኦꬅያባይ ኡባይነ ኔን ብያሳኣ ኡባይ ነዉ እንጀታናዋ። 4 ቃይ መꬍና ጎዳይ ታና፥ ‘ነ ዘረꬃቱ ባረንቱ ደኡዋን ናገቲደ ደኦፐ፥ ኡንቱንቱ ታ ስንꬃን ባረንቱ ኩመንꬃ ዎዛናፐነ ባረንቱ ኩመንꬃ ሸምፑዋፐ አማነቲደ ሀመቶፐ፥ እስራኤልያ ካዉተꬃ አራታን ኡትያ አሳይ ነዉ ኡባካ ꬋየና’ ያጌዳ ህዶታ ቃላ ታዉ ፖላና።

5 “ቃይ ጻሩይ ናአይ ዮኣበ እስራኤልያ ኦላ ጋዳዋቱዋ ላኡዋ፥ ኔራ ናኣ አባኔራነ የተራ ናኣ አማሳ ዎꬊደ፥ እ ታና ኦꬄዳዋ ኔን አኬካሳ። ሄዌነ፥ ኡንቱንቱ ኦላ ዎደ ዎꬌዳዋ ሀሉዋ ኡንቱንታ ስጋ ዎደ ዎꬊደ፥ ሄ ሱꬃን ባረ ጼሳ ሳቂያነ ባረ ገድያ ጫማ አሌቄዳ። 2 ሳሜላ 3:27፤ 20:10 6 ኔን አ ነ አꬌዳ ኤራተꬃዳን ኪተታ፤ ባረዉ ማታ እ ጭሚደ ሳሮ ሀይቃናዳን ኦꬆፓ።

7 “ሽን ጋላኣደ ጌተትያ ቢታን ደእያ ባርዝላያ ናናዉ ሎአ፤ ኡንቱንቱ ነ ማዳን ምያ አሳና ሚኖ። አያዉ ጎፐ፥ ታን ነ እሻ አበሰሎማፐ ባቃትያ ዎደ፥ ኡንቱንቱ ታ ባጋ ግዴድኖ። 2 ሳሜላ 17:27-29

8 “ታን ማህናይማ ካታማ ቤዳ ዎደ፥ ታና ኢታ ሸቃ ሸቄዳ ቢንያማ ጋድያን ባሁሪማ ካታማፐ ዬዳ ጌራ ናኣ ሽምእ ኔናና ደእያዋ ሀሳያ። እ ታናና ጋከታናዉ ዮርዳኖሳ ሻፋ ዱገ ዬዳ ዎደ፥ ‘ታን ኔና ዎꬍከ’ ጋደ መꬍና ጎዳን አዉ ጫቃድ። 2 ሳሜላ 16:5-13፤ 19:16-23 9 ሽን ሀእ ኔን አ ጽሎ አሳዳን ፓይዶፓ። ኔን አꬌዳ ኤራይ ደእያ አሳ፤ ኔን አ ዋታነንቶ ኤራሳ። ኔን ሄ ጭማ ብታንያ ሀይቁዋን ሙራ” ያጌዳ።

10 ሄዋፐ ጉይያን ዳዊተ ሀይቂደ፥ ባረ ማይዛን ጋከቴዳ፤ ያቲደ ዳዊታ ካታማን ሞገቴዳ። 11 ዳዊተ እስራኤልያ ቦላ ኦይታሙ ላይꬃ ካተቴዳ፤ ከብሮናን ላፑን ላይꬃ፥ የሩሳላመን ሀታማነ ሄዙ ላይꬃ ካተቴዳ። 2 ሳሜላ 5:4-5፤ 1 ኦዱዋ 3:4 12 ሶሎሞንነ ባረ አዉዋ ዳዊታ ካዉተꬃ አራታን ኡቴዳ፤ አ ካዉተꬃይካ ሎይꬅ ምኔዳ።

13 ሀጊት ናአይ አዶንያስ፥ ሶሎሞና ዳይ በርሳብኮ ቤዳ፤ በርሳባ፥ “ኔን ታኮ ሳሩዋን ያድ?” ያጋደ አ ኦቻዱ።

እ፥ “ኤ፤ ሳሩዋን ያድ” ያጊደ ዛሬዳ። 14 ሄዋፐ ጉይያን ጉጂደካ፥ “ታን ኔና ኦችያዌ ደኤ” ያጌዳ።

እዛ፥ “ኦቻ” ያጋዱ።

15 እ ሀዋዳን ያጌዳ፤ “ካተታናዉ በስያዌ ታና ግዴዳዋነ እስራኤልያ አሳይ ኡባይ ታና ባረንቱ ካትያዳን ጼሌዳዋ ኔን ነ ሁጲያዉ ኤራሳ። ሽን የዎቱ ላመትና ካዉተꬃይ ታ እሻዉ ዩዬዳ፤ ሄዌነ፥ አዉ መꬍና ጎዳፐ ዬዳ። 16 ሀእ ታን ኔና እትባ ኦቻና። ሀያና ታዉ እጾፓ” ያጌዳ።

እዛ፥ “ኦቻ” ያጋዱ።

17 እ፥ “ካቲ ሶሎሞነ ነዉ እጻድ ጌና፤ ሄዋ ድራዉ፥ ሹኔማ ካታማፐ ዬዳ አብሻጎ ግያ ዎዶራቶ ታን አካናዳን እ እዞ ታዉ እማና ማላ፥ ሀያና አ ታዉ ኦቻርክ” ያጌዳ። 1 ካታ. 1:3-4

18 በርሳባ፥ “ዳሮ ሎአ፤ ታን ሄዋ ነ ድራ ካትያዉ ኦዳና” ያጋዱ።

19 ሄዋ ድራዉ፥ በርሳባ አዶንያ ኪታ ኦዳናዉ ሶሎሞነኮ ገልና፥ ካቲ እዞ ሞካናዉ ደንድ ኤቂደ፥ እዝዉ ጎይን ስሚደ ባረ ካዉተꬃ አራታን ኡቴዳ። ቃይ ባረ አትዉ ሀራ ካዉተꬃ አራታ አህሲደ፥ አን ባረፐ ኡሸቻ ባጋና ኡትሴዳ።

20 ኡቴዳዋፐ ጉይያን፥ “ኔና ታን እት ጉꬃባ ኦችያዌ ደኤ። ሀያና ታዉ እጾፓ” ያጋዱ።

ካቲ ዛሪደ እዞ፥ “ታ ዳዬ፥ ኦቻ። ታን እጽከ” ያጌዳ።

21 አ፥ “ሹኔማ ካታማፐ ዬዳ አብሻጎ ነ እሻይ አዶንያስ አካና ማላ አዉ እማርኪ” ያጋዱ።

22 ካቲ ሶሎሞነ ዛሪደ ባረ ዳዮ፥ “ሹኔማ ካታማፐ ዬዳ አብሻጎ ኔን አዶንያሳዉ አያዉ ኦቻይ? እ ታ ባይራ ግደኔ? ኔን አዉ ካዉተꬃካ ኦቻናዋ ሽን አጋዳ! ኤ፥ ኔን አዉ፥ ቄስያ አብያታራዉነ ጻሩይ ናኣ ዮኣባዉ ካዉተꬃካ ኦቻናዋ አጋዳ!” ያጌዳ።

23 ካቲ ሶሎሞነ ጾሳን ጫቂደ፥ “አዶንያስ ሀዋ ኦቼዳ ድራዉ ታን አ ዎꬋና ꬋዮፐ፥ መꬍና ጎዳይ ታና ዎꬎ! 24 ሀእ ስም ታና ታ አዉዋ ዳዊታ ካዉተꬃ አራታን ኡትሲደ፥ ታ ካዉተꬃ ሎይꬅ ኤሲደ፥ ታ ዛራቱ ደኤናዳን ኦꬄዳ መꬍና ጎዳይ ኤሮ! አዶንያሳ ሀቼ ዎꬋና!” ያጌዳ። 25 ካቲ ሶሎሞነ ዮዳሄ ናኣ ባናያ አዛዝና፥ እ ቢደ አዶንያሳ ሾጪደ ዎꬌዳ።

26 ሄዋፐ ጉይያን፥ ካቲ ሶሎሞነ ቄስያ አብያታራ ሀዋዳን ያጌዳ፤ “ኔን አናቶታን ደእያ ነ ጋደ ጉየ ባ። ኔን ሀይቃናዉ በሳሳ፤ ሽን ኔና ታን ሀእ ዎꬍከ። አያዉ ጎፐ፥ ኔን ታ አዉዋ ዳዊታ ስንꬃን ኡባ ሞድያ መꬍና ጎዳ ታቦታ ቶካደ፤ ቃይ ታ አዉዋ መቱዋ ኡባ አናና መቶታዳ” ያጌዳ። 1 ሳሜላ 22:20-23፤ 2 ሳሜላ 15:24 27 ያቲደ ሶሎሞነ አብያታራ መꬍና ጎዳ ቄሳቱዋ ግድያ ሳኣፐ ድጊደ፥ መꬍና ጎዳይ ሴሎን ኤልያ ጎልያ አሳዋ ኦዴዳዋ ፖሌዳ። 1 ሳሜላ 2:27-36

28 አበሰሎማ ማዳና ꬋይንቶነ አዶንያስ ማዴዳ ዮኣባኮ ሀ ኦዱ ጋኬዳ። መꬍና ጎዳ ዱንካንያዉ እ ባቃት ቢደ፥ ያርሽያ ሳኣ ካጨቱዋ ኦይቄዳ። 29 ዮኣበ መꬍና ጎዳ ዱንካንያዉ ባቃቲደ ቢደ፥ ያርሽያ ሳኣ ምይያን ደእያዋ ካትያ ሶሎሞናዉ ኦዴድኖ። ሶሎሞነ ዮዳሄ ናኣ ባናያ፥ “ባደ አ ዎꬋ!” ጊደ አዛዜዳ።

30 ባናይ መꬍና ጎዳ ዱንካንያ ግዶ ገሊደ ዮኣባ፥ “ካቲ ኔና፥ ‘ሀዋፐ ከሳ’ ያጌ” ያጌዳ።

ሽን እ ዛሪደ፥ “ከስከ! ታን ሀዋን ሀይቃና” ያጌዳ።

ባናይ ካትያዉ፥ “ዮኣበ ታዉ ሀዋ ሀዋ ጊደ ዛሬዳ” ጊደ ኦዴዳ።

31 ካቲ ባናያ፥ “እ ጌዳዋዳን አ ኪተታ፤ አ ዎꬋደ ሞጋ! ያቶፐ፥ ዮኣበ ጽሎ አሳቱዋ ሱꬃ ጉሴዳ ዳባፐ ታናነ ታ አዉዋ ጎልያ አሳ ጌሻሳ። 32 እ ጉሴዳ ሱꬃ አጩዋ መꬍና ጎዳይ አዉ ጭጋና። አያዉ ጎፐ፥ እ ታ አዉ ዳዊተ ኤረናን ደእሽን ላኡ አሳቱዋ ማሻን ዎꬌዳ፤ እስራኤልያ ኦላ ጋዳዋይ ኔራ ናአይ አባኔርነ ይሁዳ ኦላ ጋዳዋይ የተራ ናአይ አማስ፥ ኡንቱንቱ ላአቱካ አፐ ኬካነ ሱርያ ዳሮ አሳ። 33 ዮኣበ ሀ አሳቱዋ ዎꬌዳ ድራዉ፥ ኡንቱንቱ ሱꬃ ዳባይ መꬍናዉ ዮኣባ ሁጲያንነ አ ዘረꬃቱዋ ሁጲያን ዎꬎ። ዳዊታ ቦላነ አ ጎልያ አሳ ቦላ፥ አ ዘረꬃቱዋ ቦላነ አ ካዉተꬃ አራታ ቦላ መꬍናዉ መꬍና ጎዳ ሳሮተꬃይ ግዶ” ያጌዳ።

34 ሄዋ ድራዉ፥ ዮዳሄ ናአይ ባናይ ፑደ ከሲደ፥ ዮኣባ ሾጪደ ዎꬌዳ፤ እ ዎራን ደእያ ባረ ጋደን ሞገቴዳ። 35 ካቲ ዮዳሄ ናኣ ባናያ ዮኣባ ሳኣን ኦላ ጋዳዋ ኦꬂደ ሱንꬄዳ፤ ቃይ አብያታራ ኮታን ቄስያ ሳዶቃ ሱንꬄዳ።

36 ሄዋፐ ጉይያን ካቲ ሶሎሞነ ሽምአዮ ኪቲደ ሀዋዳን ያጌዳ፤ “ነዉ የሩሳላመን ጎልያ ኬጻደ፥ ያን ደአ፤ ሀራሳ ሀቃነ ቦፓ። 37 ኔን ካታማፐ ከሳደ፥ ቀድሮና ዛንጋራ ፕኔዳ ጋላስ ሀይቃናዋ ኤራ። ነ ሱꬃ ጎሚ ኔና ኦይቃና” ያጌዳ።

38 ሽምእ ዛሪደ ካትያ፥ “ኔን ግያዌ ሎአ፤ ታን ነ ቆማይ ኔን ታ ጎዳይ ካቲ ጌዳዋዳን ኦꬃና” ያጌዳ። ሽምእ የሩሳላመን ዳሮ ዎድያ ደኤዳ።

39 ሽን ሄዙ ላይꬃፐ ጉይያን፥ ሽምአ ቆማቱዋፐ ላአቱ በቲደ፥ ማእካ ናኣ፥ ጋተ ካትያ አኪሻኮ ቢና፥ “ነ ቆማቱ ጋተን ደኢኖ” ጊደ ሽምአዉ ኦዴድኖ። 40 እ ባረ ሀርያ ኮሪደ፥ ባረ ቆማቱዋ ኮያናዉ አኪሻኮ ጋተ ቤዳ፤ ጋተፐ ባረ ቆማቱዋ ዛሪደ አሄዳ።

41 ሽምእ የሩሳላመፐ ጋተ ካታማ ቢደ ስሜዳዋ ሶሎሞነ ስሴዳ ዎደ፥ 42 ሽምአ ጼስሲደ ሀዋዳን ያጌዳ፤ “ ‘ኔን ያፐ ደንዳደ ሀራሳ ሀቃነ ቤዳ ጋላስ፥ ሀይቂያዋ ኤራ’ ጋደ ታን ኔና መꬍና ጎዳን ጫቀꬃደ ሴራበይክታ? ሄ ዎደ ኔን ‘ነ ግያዌ ሎአ፤ ኤኖ፥ ታን አዛዘታና’ ጋዳ። 43 ያትና፥ መꬍና ጎዳዉ ጫቄዳ ጫቁዋነ ታ አዛዙዋ አያዉ ናጋበይኪ?” ያጌዳ።

44 ቃይካ ካቲ ሽምአ፥ “ታ አዉዋ ዳዊታ ቦላ ኔን ኦꬄዳ ኢታ ኪታ ኡባ ነ ዎዛናይ ኤሬዳ። ሀእ ስም ነ ኢታ ኪታ መꬍና ጎዳይ ነዉ ዛራና። 45 ሽን ካቲ ሶሎሞነ አንጀታና፤ ዳዊታ ካዉተꬃ አራታይካ መꬍና ጎዳ ስንꬃን መꬍናዉ ሳሮ ደአና” ያጌዳ። 46 ካቲ ዮዳሄ ናኣ ባናያ አዛዜዳ፤ ባናይ ቢደ፥ ሽምአ ሾጪደ ዎꬌዳ።

ያትና፥ ካዉተꬃይ ሶሎሞነ ኩሽያን ምኒደ ኤቄዳ።