1 ሶሎሞነ ግብጼ ካትያና ዙፐቲደ፥ አ ናቶ ባረዉ ማቼ ኦꬅ አኪደ ባረ ካትያ ጎልያ፥ መꬍና ጎዳ ጌሻ ጎልያነ የሩሳላመ ዩሹዋ ድርሳ ግምቢደ ፖላናዉ፥ እዞ ዳዊታ ካታማ አሄዳ። 2 መꬍና ጎዳ ሱንꬃዉ ጌሻ ጎሊ ብሮ ኬጸትቤና ድራዉ፥ አሳይ ሄ ዎደ ጎይንያ ꬎቃ ግሹዋን ያርሺደ ታኬዳ። 3 ሶሎሞነ መꬍና ጎዳ ሲቅያዋ ባረ አዉዋ ዳዊታ ዎጋን ሀመትያዋዳን ኤርሴዳ፤ ሽን ጎይንያ ꬎቃ ግሹዋን ያርሼዳነ እጻና ጩውሴዳ።

4 ካቲ ያርሹዋ ያርሻናዉ ጋባኦና ቤዳ፤ አያዉ ጎፐ፥ ሄ ሳአይ ሀራ ኡባፐ አꬍ ኮሽያ ጎይንያ ꬎቃ ሳኣ። ሶሎሞነ ሻአ መህያ አሂደ፥ ሄ ያርሽያ ሳኣን ጹግያ ያርሹዋ ያርሼዳ። 5 መꬍና ጎዳይ ሶሎሞናዉ ጋባኦናን ቃማ አኩሙዋን ቆንጬዳ። ጾሳይ አ፥ “ታን ነዉ አያ እማናዳን ኮያይ?” ያጌዳ።

6 ሶሎሞነ፥ “ነ ቆማይ ታ አዉ ዳዊተ ነዉ አማነትያ ጽሉዋነ ሱረ አሳ ግድያ ድራዉ፥ ኔን አገና ሲቁዋን አ ሲቃደ። ኔን ሀ ዎልቃማ ሲቁዋ አገናን ሲቃደ፥ ሀቼ ሀ ጋላስ አ ካዉተꬃ አራታን ኡትያ አቱማ ናኣ አዉ እማዳ።

7 “ሀእካ አቤት መꬍና ጎዳ፥ ታ ጾሳዉ፥ ኔን ታና ነ ቆማ፥ ታ አዉዋ ዳዊታ ሳኣን ካተያዳ። ሽን ታን ጉꬃ ናኣ ግድያ ድራዉ፥ አሳ ዋታ ካለꬃነንቶ ታን ኤርከ። 8 ታን ነ ቆማይ ኔን ዶሬዳ አሳ ግዶን፥ ፓይዱ ባይና አሳ ግዶን ደአይ። 9 ሄዋ ድራዉ፥ ታን ነ አሳ አይሳናዉነ ሎኡዋነ ኢታ ሻካደ ኤራናዉ ታዉ ነ ቆማዉ አኬካ ዎዛና እማ። ሄዌ ꬋዮፐ፥ ሀ ነ ዎልቃማ አሳ ኦን ካለꬃናዉ ዳንዳዪ?” ያጌዳ።

10 ሶሎሞነ ሄዋ ኦቼዳ ድራዉ፥ ጾሳይ ናሸቴዳ። 11 ሄዋ ድራዉ፥ ጾሳይ አ ሀዋዳን ያጌዳ፤ “ኔን ነዉ ላይꬃይ አዱቃናዉ፥ ዎይ ዱረ ግዳናዉ፥ ዎይ ነ ሞርከቱ ሀይቃናዉ ኦቼናን አጋደ፥ ሀዋ አሳ ሱረ ፕርዳን አይስያ አꬌዳ ኤራ ኦቼዳ ድራዉ፥ 12 ኔን ኦቼዳዋ ታን ኦꬃና። በአ፥ ኔፐ ካሰ ነ ማል ባይናዋዳን ኔፐ ዶምና ነ ማል ደንደናዋዳን፥ አꬌዳ ኤራተꬃነ አኬካ ዎዛና ታን ነዉ እማና። 13 ቃይ ኔን ኦቻቤናባካ ታን ነዉ እማና፤ ኔን ደኤዳ ላይꬃ ኡባን ካተቱዋ ግዶን ነ ኬሻ ካቲ ደኤናዳን፥ ዱረታነ ቦንቹዋ ታን ነዉ እማና። 14 ኔን ነ አዉ ዳዊተ ሀመቴዳዋዳን ታ ኦግያን ሀመቶፐ፥ ታ ዎጋዉነ ታ አዛዞ አዛዘቶፐ፥ ታን ነ ላይꬃ አዱሳና” ያጌዳ።

15 ሄዋፐ ጉይያን ሶሎሞነ ቤጎቲደ ሄዌ አኩሙዋ ግድያዋ አኬኬዳ። እ የሩሳላመ ስም ቢደ፥ ጾሳ ቃላ ጫቁዋ ታቦታ ስንꬃን ኤቂደ ጹግያ ያርሹዋነ እትፐተꬃ ያርሹዋ ያርሼዳ። ያቲደ ባረ ኦሳንቻቱ ኡባዉ ባላ ከሴዳ።

16 እት ጋላስ ላኡ ሻርሙጻቱ ካትያ ሶሎሞነኮ ዪደ፥ አ ስንꬃን ኤቄድኖ። 17 ኡንቱቱፐ እትና ሀዋዳን ያጋዱ፤ “ታ ጎዳዉ፥ ታንነ ሀ ምሽራታ እት ጎለን ደኤቶ። ያን እዛ ታናና እትፐ ደእሽን፥ ታን እት ናኣ የላድ። 18 ታ ናአይ የለቴዳ ሄዘንꬆ ጋላስ ሀ ምሽራታካ እት ናኣ የላዱ። ሄ ጎለን ኑ ላኡዋፐ ሀራ አሳይ ኦንነ ባዋ።

19 “እት ጋላስ ቃማ እዛ አ ቦላ ግሴዳ ድራዉ፥ ሀ ምሽራት ናአይ ሀይቄዳ። 20 አ ቃማ ብላሄ ደንዳደ፥ ታን ነ ቆማታ ገምእሻ ደእሽን፥ ታ ናኣ ታ ምይያፐ አካደ አ ባረ ክዉዋን ዎꬃደ፥ ባረ ሀይቄዳ ናኣ ታ ክዉዋን ዎꬃዱ። 21 ጉራን ታን ታ ናኣ ꬋንꬃናዉ ደንዴዳ ዎደ፥ ሀይቂክቼዳ! ሽን ታን ዎንታ ፖኡዋን ትሽ ኡዳደ ጼልያ ዎደ፥ ታን የሌዳ ናኣ ግደና” ያጋዱ።

22 የንኮ ምሽራታ ሀዋዳን ያጋዱ፤ “ቱይት! ደኡዋን ደእያዌ ታ ናኣ፤ ሀይቄዳዌ ነዋ” ያጋዱ።

ሽን ኮይሮ ምሽራታ ዛራደ፥ “ቱይት፥ ሀይቄዳዌ ነ ናኣ፤ ፓጻ ደእያዌ ታ ናኣ” ያጋዱ። ሄዋዳን ጊደ ኡንቱንቱ ካትያ ስንꬃን ፓሉመቴድኖ።

23 ካቲ ሶሎሞነ ሀዋዳን ያጌዳ፤ “ሀ ምሽራታ፥ ‘ፓጻ ደእያ ናአይ ታዋ፤ ሀይቄዳዌ ነዋ’ ያጋዉ፤ የንኮራካ፥ ‘ቱይት! ነ ናአይ ሀይቄዳዋ፤ ታ ናአይ ፓጻ ደእያዋ’ ያጋዉ” ያጌዳ።

24 ካቲ፥ “ታዉ ማሻ አኪደ ዪተ” ያጌዳ፤ ኡንቱንቱ አዉ ማሻ አሄድኖ። 25 ካቲ፥ “ደኡዋን ደእያ ናኣ ላኡ ከሲደ ጳልቂተ፤ እት ባጋ ሀንዉ እምተ፤ እት ባጋ ዬንዉ እምተ” ያጊደ አዛዜዳ።

26 ሀ ፓጻ ደእያ ናአይ ኢዋ ግዴዳ ምሽራታ ባረ ናአዉ ምሸታደ ካትያ፥ “ሀይ ታ ጎዳዉ፥ ፓጻ ደእያ ናኣ እዝዉ እማ! አ ዎꬎፓ!” ያጋዱ።

ሽን የንኮራ፥ “ታዉካ ነዉካ ግዶፖ፤ ላኡ ከሲደ ጳልቀቶ” ያጋዱ።

27 ሄዋፐ ጉይያን ካቲ፥ “ሀ ፓጻ ደእያ ናኣ ሀ ኮይሮ ምሽራትዉ እምተ፤ ናኣ ዎꬎፕተ። ሀና ናኣ ዳዮ!” ያጊደ ፕርዴዳ።

28 እስራኤልያ አሳይ ኡባይ ካቲ ፕርዴዳ ፕርዳ ስሴዳ ዎደ፥ ኡንቱንቱ ካትያ ሎይꬅ ቦንቼድኖ። አያዉ ጎፐ፥ አሳዉ ጽሎተꬃን ፕርዳናዉ አዉ አꬌዳ ኤራተꬃይ ጾሳፐ እመቴዳዋ በኤድኖ።