ሻከቴዳ ካዉተꬃቱዋ
12
(12:1—22:53)
ፑደሃ ያራቱዋ ማካላ
(12:1—14:20፤ 2 ኦዱዋ 10:1-19)
1 እስራኤልያ አሳይ ኡባይ ሮብኣማ ካተያናዉ ሰኬማ ካታማ ቤዳ ድራዉ፥ እካ ያ ቤዳ። 2 ናባጻ ናአይ እዮርባም፥ ካትያ ሶሎሞነፐ ባቃቲደ ግብጼን ደእያዌ ሀዋ ስሴዳ ዎደ፥ ግብጼፐ ስሚደ ዬዳ። 3 እስራኤልያ አሳይ እዮርባማዉ ኪቲደ ጼስስና፥ እነ እስራኤልያ ማባራይ ኡባይ ሮብኣማኮ ቢደ፥ 4 “ነ አዉ ኑና ዴጾ ሞርገ ምꬃ ቶሴዳ፤ ሽን ሀእ ኔን እ ኑና ኦስስያ ዎልቃማ ኦሱዋነ ዴጾ ሞርገ ምꬃ ኑዉ ካዉሽሳርኪ። ያቶፐ፥ ኑን ነዉ ሞደታና” ያጌድኖ።
5 ሮብኣመ ኡንቱንቶ፥ “ቢተ፤ ሄዘንꬆ ጋላስ ስሚደ ታኮ ዪተ” ያጌዳ፤ አሳይ ቤዳ።
6 ሄዋፐ ጉይያን ካቲ ሮብኣመ አ አዉ ሶሎሞነ ፓጻ ደእያ ዎደ፥ ሶሎሞና ዞሬዳ ጭማቱዋ ዞረታ በሴዳ። እ ኡንቱንታ፥ “ሀ አሳዉ ዋጋደ ዛራ ጊቴ?” ያጊደ ኦቼዳ።
7 ጭማቱ ሮብኣማ፥ “ሀቼ ኔን አሳዉ ቆማ ግዳደ ኦꬆፐነ ኡንቱንቱ ኦችያዎ ኔን ሎኦ ቃላ ዛሮፐ፥ ኡባ ገደ ኡንቱንቱ ነዉ ቆማ ግዳናዋንታ” ያጌድኖ።
8 ሽን ሮብኣመ ጭማቱ ዞሬዳ ዞርያ አጊደ፥ አናና ድጪደ አዉ ኦꬅያ ያላጋ አሳቱዋ ዞረታ በሴዳ። 9 እ ኡንቱንታ፥ “ህንተንቱ ታና ዞርያዌ አዬ? ‘ነ አዉ ኑና ቶሴዳ ዴጾ ሞርገ ምꬃ ኑዉ ካዉሽሳርኪ’ ያግያ ሀ ደርያዉ ዋጋደ ዛሮ?” ያጊደ ኦቼዳ።
10 ሽን አናና ድጬዳ ያላጋቱ፥ “ ‘ነ አዉ ኑና ዴጾ ሞርገ ምꬃ ቶሴዳ፤ ሽን ኔን ኑዉ ካዉሽሳርኪ’ ያግያ አሳዉ፥ ‘ታ ቄር ብራꬊ ታ አዉዋ ጼሳፐ ኦርዴ። 11 ታ አዉ ህንተንቱ ሞርገ ምꬃ ዴጽሴዳ፤ ሽን ታን ሄዋፐካ አꬃደ ዴጽሳና። ታ አዉ ህንተንታ ልሱዋን ዋꬌዳ፤ ሽን ታን ህንተንታ ማስማሱዋዳን ዱክያ ልሱዋን ዋꬋና’ ያጋደ ዛራ” ያጌድኖ።
12 ሄዋፐ ጉይያን ካቲ ሮብኣመ፥ “ሄዘንꬆ ጋላስ ስሚደ ታኮ ዪተ” ጌዳዋዳንካ፥ እዮርባምነ አሳይ ኡባይ ሄዘንꬆ ጋላስ ስሚደ ዬድኖ። 13 ካቲ ኡንቱንቶ ሀንቆ ዛሩዋ ዛሬዳ። ጭማቱዋ ዞርያ አግ ባሺደ፥ 14 ያላጋቱ ዞሬዳ ዞርያ ካሌዳ። ያቲደ ሀዋዳን ያጌዳ፤ “ታ አዉ ህንተንቱ ሞርገ ምꬃ ዴጽሴዳ፤ ሽን ታን ሄዋፐካ አꬃደ ዴጽሳና። ታ አዉ ህንተንታ ልሱዋን ዋꬌዳ፤ ሽን ታን ህንተንታ ማስማሱዋዳን ዱክያ ልሱዋን ዋꬋና” ያጊደ ዛሬዳ። 15 ካቲ አሳይ ግያዋ ስሰናን እጼዳ፤ አያዉ ጎፐ፥ መꬍና ጎዳይ ሴሎፐ ዬዳ አኪያ ባጋና ካሰ ናባጻ ናኣ እዮርባማዉ ኦዴዳ ቃላይ ፖለታናዳን ሀዌ መꬍና ጎዳፐ ሀኔዳ።
16 እስራኤልያ አሳይ ኡባይ ካቲ ኡንቱንቱ ግያዋ ስሰናን እጼዳዋ በኢደ፥ ካትያ ሀዋዳን ያጌድኖ፤ “ዳዊተዋፐ ኑና ጋክያባይ አዬ? እሰያ ናኣፐ ኑን ላታናዌ ባዋ! እስራኤልያ አሳዉ፥ ህንተንቱ ሶ ህንተንቱ ሶ ስምተ! ሀእ ስም ሮብኣመ ባረዉ ናገቶ!” ያጌድኖ። እስራኤልያ አሳይ ኡባይ ባረንቱ ሶ ባረንቱ ሶ ስሜድኖ። 2 ሳሜላ 20:1 17 ሽን ሮብኣመ ይሁዳ ካታማቱዋን ደእያ እስራኤልያ አሳ ቦላ ካተቴዳ።
18 ሄዋፐ ጉይያን ካቲ ሮብኣመ ባረ ጋባራቱዋ ካፑዋ አዶንራማ እስራኤልያ አሳኮ ኪቴዳ፤ ኡንቱንቱ ሹቻን ጫዲደ ዎꬌድኖ። ያትና፥ ካቲ ሮብኣመ ባረ ፓራ ጋርያን ኤለካ ከስ ኡቲደ፥ የሩሳላመ ባቃቴዳ። 19 ሄዋፐ ዶሚደ ሀቼ ጋካናዉ እስራኤልያ ዛራቱ ታማቱ ዳዊታ ዛርያፐ ካተቴዳ ካተቱዋ ቦላ ማካሌድኖ። 20 እዮርባም ግብጼፐ ስሜዳዋ እስራኤልያ አሳይ ኡባይ ስሴዳ ዎደ፥ አ ባረንቱ ያአዉ ጼስሲደ፥ እስራኤልያ ቦላ ካተዬድኖ፤ ዳዊታ ዛርያፐ ካተቴዳ ካተቶ አማነቲደ አቴዳዌ ይሁዳ ዛርያ ጻላላ።
ሻማእይ ትምቢትያ ኦዴዳ
(2 ኦዱዋ 11:1-4)
21 ሶሎሞና ናአይ ሮብኣመ የሩሳላመ ካታማ ጋኬዳ ዎደ፥ እስራኤልያ ቢታ አሳና ኦለቲደ፥ ካዉተꬃ ባረዉ ዛራና ማላ፥ ይሁዳ ዛርያፐነ ቢንያማ ዛርያፐ ዶረቴዳ እት ጼታነ ሆስፑን ታሙ ሻአ ኦላንቻቱዋ ሺሼዳ። 22 ሽን ጾሳ ቃላይ፥ ጾሳ አሳ ግድያ ሻማእያኮ ዪደ፥ 23 “ሶሎሞና ናኣ፥ ይሁዳ ካትያ ሮብኣማዉ፥ ይሁዳነ ቢንያማ ዛረቶነ አቴዳ አሳ ኡባዉ ሀዋዳን ያጋ፤ 24 ‘መꬍና ጎዳይ ህንተንታ፥ “ህንተንቱ ዳቦቱዋና፥ እስራኤላቱዋና ኦለታናዉ ቦፕተ። ሀዋ ታን ኦꬄዳ ድራዉ፥ ህንተንቱ ኡባይካ ህንተንቱ ሶ ህንተንቱ ሶ ስምተ” ያጌ’ ያጋደ ኦዳ” ያጌዳ። ኡንቱንቱ መꬍና ጎዳ ቃላ ስሲደ፥ ስሚደ ሶ ቤድኖ።
እዮርባም ጾሳፐ ዎራ ስሜዳ
25 ሄዋፐ ጉይያን እዮርባም ኤፍሬማ ገዝያን ደእያ ሰኬማ ጌሶ ኦꬅ ግምቢደ፥ ያን ደኤዳ፤ ሄዋፐ ከስ ቢደ ጲንኤላ ግምቤዳ።
26 እዮርባም ባረ ዎዛናን፥ “ካዉተꬃይ ዳዊታ ዛርያዉ ስማና። 27 ሀ አሳይ መꬍና ጎዳ ጌሻ ጎልያን ያርሹዋ ያርሻናዉ የሩሳላመ ካታማ ብያዋ ግዶፐ፥ ኡንቱንቱ ቃይካ ባረንቱ ጎዳኮ፥ ካትያ ሮብኣማኮ ስማና። ኡንቱንቱ ታና ዎꬊደ፥ ይሁዳ ካትያ ሮብኣማኮ ስማና” ያጊደ ቆፔዳ።
28 ሄዋ ድራዉ፥ ካቲ ዞረቴዳዋፐ ጉይያን ዎርቃፐ ላኡ ማራቱዋ ምስለቱዋ መꬊደ አሳዉ፥ “ህንተንቱ ሀዋፐ የሩሳላመ ቤዳዋ ኬሻይ ግዳናዋ። ህንተንቶ እስራኤልያ አሳቶ፥ ህንተንታ ግብጼፐ ከሴዳ ህንተንቱ ጾሳቱ ሀዋንቱሽ!” ያጌዳ። ከሳ 32:4 29 ኡንቱንቱፐ እቱዋ ቤቴለን፥ እቱዋ ቃይ ዳናን ዎꬄዳ። 30 ሀ የዉ ኡንቱንቶ ናጋራቴዳ፤ አያዉ ጎፐ፥ እት ማራ ምስልያዉ ጎይናናዉ አሳይ ዳና ጋካናዉ ቤዳ። 31 እዮርባም ደርያ ሁጲያን ጎይንያ ꬎቃ ሳኣ ጊግሲደ ሌዊያ ዛርያ ግዳና ꬋዮፐካ፥ ኡባ ቆሞ አሳፐ ቄሳቱዋ ኦꬂደ ሱንꬄዳ።
32 ይሁዳን ቦንችያዋዳን ሆስፑንꬃ አግናን ታማነ እቼሻንꬃ ጋላሳን ባላይ ቦንቼታናዳን፥ እዮርባም ጋላሳ ኬሬዳ፤ ያርሹዋ ያርሼዳ። እ ሀዋዳን ሀኔዳ፤ ቤቴለ ቤዳ፤ ባረ መꬌዳ ማራ ምስልያዉ ያርሹዋ ያርሼዳ። ቃይ ባረ መꬌዳ ጎይንያ ꬎቃ ግሹዋን ቄሳቱ ዋ ቤቴለን ሱንꬂደ ዎꬄዳ።ዎጋ 23:33-34 33 እ ባረ ሁጲያዉ ዶሬዳ ሆስፑንꬃ አግናን፥ ሄ አግናዉ ታማነ እቼሻንꬆ ጋላስ ቤቴለ ቤዳ፤ ሄ ጋላሳይ እስራኤልያ አሳዉ ባላ ግዳናዳን አዋዬዳ። ያቲደ እጻና ጩዋያናዉ ፑደ ያርሽያ ሳኣ ከሴዳ።