1 ካቲ ሶሎሞነ ዳሮ አላጋ ቢታ ማጫዋንታ ሲቄዳ፤ ሄዋንቱነ ግብጼ ካትያ ናት ቦላ ጉጅና ሞኣባቱዋ፥ አሞናቱዋ፥ ኤዶማቱዋ፥ ሲዶናቱዋነ ሂተቱዋ ማጫዋንታ። ዛረ. 17:17 2 ኡንቱንቱ፥ “ህንተንቱ ሀ አሳቱዋና አኩዋን ገሉዋን ዋላከቶፕተ፤ አያዉ ጎፐ፥ ኡንቱንቱ ህንተንቱ ዎዛና ቱሙፐ ባረንቱ ኤቃ ጾሳቱዋኮ ዛራና” ያጊደ መꬍና ጎዳይ እስራኤልያ አሳዉ ኦዴዳ ካዉተꬃቱ ማጫዋንታ፤ ሽን ሶሎሞነ ኡንቱንቱና ሲቁዋን ቃሸቴዳ። ከሳ 34:16፤ ዛረ. 7:3-4 3 ሶሎሞናዉ ካተቱዋ ናና ግድያ ላፑን ጼቱ ማቼቱነ ሄዙ ጼቱ ማችያዳን አዉ ደእያ ማጫዋንቱ ደኢኖ። አ ማቻቱ አ ዎዛና ጾሳፐ ሃሴድኖ። 4 ሶሎሞነ ጭም ጭሚደ ቢሽን፥ አ ማቻቱ አ ዎዛና ሀራ ጾሳቱዋኮ ዛሬድኖ፤ ያትና፥ አ አዉዋ ዳዊተ ኩመንꬃ ዎዛናፐ ሲቄዳዋዳን፥ መꬍና ጎዳ ባረ ጾሳ እ ሲቅቤና። 5 ሶሎሞነ አስታሮታ ጌተትያ ሲዶናቱዋ ጾሳትዉነ ሞሎካ ጌተትያ አሞናቱዋ ጾሳዉ፥ ሸነይያዎ ጎይኔዳ። 6 ያቲደ ሶሎሞነ መꬍና ጎዳ ስንꬃን ኢታባ ኦꬄዳ፤ አ አዉዋ ዳዊተ ካሌዳዋዳን፥ መꬍና ጎዳ ፖሎ ካልቤና።

7 ሄዋፐ ጉይያን ሶሎሞነ ካሞሻ ጌተትያ ቱና ኤቃዉነ አሞናቱ ኤቅያ፥ ሞሎካ *ሞሎካ፦ አሞናቱዋ ኤቃይ፥ ሞሎከ እብራዌꬁዋን ምልካማ ጌተቴ። ጌተትያ ቱና ኤቃዉ የሩሳላመ ካታማፐ አዋይ ዶልያ ባጋን ደእያ ደርያ ሁጲያን ጎይንያ ꬎቃ ሳኣ ኬጼዳ። 8 አላጋ ቢታፐ አኬዳ ባረ ማቻቱዋ ኡባዉካ እ ሄዋዳን ጊግሴዳ፤ ኡንቱንቱ ባረንቱ ጾሳቶ ያን እጻና ጩዋዬድኖነ ያርሹዋ ያርሼድኖ።

9 አዉ ላኡ ገደ ቆንጬዳ መꬍና ጎዳፐ እስራኤልያ ጾሳፐ ሶሎሞነ ዎዛናይ ዎራ ስሜዳ ድራዉ፥ መꬍና ጎዳይ አ ሀንቀቴዳ። 10 ሀራ ጾሳቱዋ ካለናዳን ጾሳይ ሶሎሞና አዛዜዳ፤ ግዶፐነ፥ ሶሎሞነ መꬍና ጎዳ አዛዙዋ ናግቤና። 11 ሄዋ ድራዉ፥ መꬍና ጎዳይ ሶሎሞና ሀዋዳን ያጌዳ፤ “ኔን ሀዋዳን ሀኔዳ ድራዉ፥ ታን ኔና አዛዜዳ ታ ጫቁዋነ ታ ዎጋነ ኔን ናገናን እጼዳ ድራዉ፥ ታን ነ ካዉተꬃ ኔፐ ቦንቃ አካደ፥ ነ ቆማቱዋፐ እቶ እማና። 12 ግዶፐነ፥ ነ አዉዋ ዳዊታ ድራዉ ታን ሀዋ ኔን ፓጻ ደእያ ላይꬃን ቦንቃ አክከ፤ ነ ናኣ ኩሽያፐ ቦንቃ አካና። 13 ሄዋካ ቃይ ካዉተꬃ ኡባ አፐ ዳፋ አክከ፤ ታ ቆማ ዳዊታ ድራዉነ ታን ዶሬዳ ካታማ የሩሳላመ ድራዉ እት ዛርያ አዉ እማና” ያጌዳ።

14 ሄዋፐ ጉይያን መꬍና ጎዳይ ኤዶምያ ሀዳዳ፥ ኤዶማ ቢታ ካተቱዋ ዛርያ ግዴዳዋ ሞርከ ኦꬂደ ሶሎሞና ቦላ ደንꬄዳ። 15 ሀዋፐ ካሰ ባጋን ዳዊተ ኤዶማ አሳቱዋና ኦለቴዳ ዎደ፥ ሀይቄዳዋንታ ሞግሳናዉ ፑደ ቤዳ ኦላ ጋዳዋይ ዮኣበ፥ ኤዶማን ደእያ አቱማ አሳ ኡባ ዎꬍ ዉርሴዳ። 16 ኤዶማን ደእያ አቱማ አሳ ኡባ ꬋይሳና ጋካናዉ ዮኣብነ እስራኤልያ አሳይ ኡባይ ያን ኡሱፑን አግና ኡቴዳ።

17 ሽን ሄ ዎደ ጉꬃ ናኣ ግዴዳ ሀዳድ፥ አ አዎ ኦꬄዳ ኤዶማ ኦሳንቻቱዋፐ አማሬዳዋንቱና ግብጼ ጋድያ ባቃቴዳ። 18 ኡንቱንቱ ምድያማፐ ደንዲደ፥ ፓራና ቤድኖ፤ ፓራናፐ ባረናና አሳ አኪደ ግብጼ ጋድያ፥ ግብጼ ካትያኮ ቤድኖ። ካቲ ሀዳዳዉ እት ጎልያነ ጋድያ እሚደ፥ ቁማ አዉ አዛዜዳ። 19 ሀዳድ ካትያ ሎይꬅ ናሸቼዳ፤ ካቲ ባረ ማቻት፥ ካታት ጻፍኔስ ምቻቶ አዉ ማቻቶ ኦꬂደ እሜዳ። 20 ጻፍኔስ ምቻታ አዉ ጋኑባታ ጌተትያ ናኣ የላዱ። ጻፍኔሳ አ ካትያ ጎለን ድቻዱ፤ ጋኑባት ያን ካትያ ናናቱዋና እትፐ ደኤዳ።

21 ሀዳድ ግብጼን ደኢደ ዳዊተ ሀይቂደ ባረ ማይዛን ጋከቴዳዋነ ኦላ ጋዳዋይ ዮኣብካ ሀይቄዳዋ ስሴዳ፤ ሀዳድ ካትያዉ፥ “ታን ታ ጋድያ ስማና ማላ ታና የዳ” ያጌዳ።

22 ካቲ አ፥ “ነዉ ሀዋን አያይ ፓጭኔ ኔን ነ ጋድያ ባናዉ ኮይያዌ?” ያጊደ ኦቼዳ።

ሀዳድ፥ “ታዉ አያይነ ፓጭቤና፤ ሽን ታን ባና” ያጌዳ።

23 ሄዋዳንካ ቃይ፥ ጾሳይ ኤልያዳአ ናኣ ራዞና ግያዋ ሶሎሞነ ቦላ ሞርክያ ኦꬂደ ደንꬄዳ፤ ራዞን ጾባ ካትያ ሀዳድኤዘረፐ ባቃቴዳ። 24 ዳዊተ ጾባ ቢታ ኦላንቻቱዋ ꬋይሴዳ ዎደ፥ ራዞን ባረዉ አሳ ሺሺደ፥ ፓንጋቱዋ ካፑዋ ግዴዳ፤ ፓንጋቱ ዳማስቆ ቢደ፥ ሄ ካታማ ኦይቂደ፥ ያን ኡቲደ፥ ራዞና ካተዬድኖ። 25 ሀዳድ መꬌዳ መቱዋ ቦላካ ጉጂደ፥ ሶሎሞነ ደኤዳ ኬናን ኡባን ራዞን እስራኤለቶ ሞርክያ ግዴዳ፤ ያቲደ እ ሶርያን ካዉቲደ እስራኤልያ አሳ ሞርኬዳ።

26 ሄዋ ቦላካ ናባጻ ናአይ እዮርባም ሶሎሞና ቦላ ማካሊደ ደንዴዳ፤ እ ሶሎሞና ቆማቱዋፐ እቱዋ። እ ኤፍሬማ ቢታን ጻሬዳፐ የዳ አሳ፤ አ ዳያካ ጽሩኦ ጌተትያ አምአቶ። 27 ካትያ ቦላ እ ማካል ደንዴዳ ታርኪ ሀዋፐ ካሊደ ጻፈቴዳዋዳና። ሶሎሞነ ሚሎ ግምቤዳነ ባረ አዉዋ ዳዊታ ካታማ ዩሹዋ ግምቢያን ደእያ ካሎ ሳኣ ኩንꬄዳ። 28 እዮርባም ምኖ አሳ፤ ሶሎሞነ ሀ ዎዳላይ ባረ ኪታ ዎት ሎይꬅ ኦꬅንቶ በኤዳ፤ ምናሰነ ኤፍሬማ ቢታን ኦꬅያ ጎሻንቻቱ ኡባ ቦላ አ ካፑዋ ኦꬂደ ሱንꬄዳ።

29 እት ጋላስ እዮርባም የሩሳላመ ካታማፐ ከሲደ ቤ፤ ሴሎፐ ዬዳ፥ ትምቢትያ ኦድያ አኪይ አናና ኦግያን ጋከቴዳ። አኪይ ሄ ዎደ ኦራꬃ ማዩዋ ማይ ኡቴዳ። ደምባን ኡንቱንቱ ላኡዋ ጻላላይ ደኢኖ። 30 አኪይ ባረ ማዬዳ ኦራꬃ ማዩዋ ኦይቂደ፥ ታማነ ላኡ ከሲደ ፔꬌዳ። 31 እዮርባማ ሀዋዳን ያጌዳ፤ “ታሙ ፔꬃቱዋ ነዉ አካ። አያዉ ጎፐ፥ መꬍና ጎዳይ እስራኤልያ ጾሳይ ሀዋዳን ያጌ፤ ‘በአ፥ ታን ካዉተꬃ ሶሎሞና ኩሽያፐ ፔꬋደ፥ ታሙ ዘረꬃ ነዉ እማና ሀናይ። 32 ሽን ታ ቆማ ዳዊታ ድራዉነ እስራኤልያ ዛራቱዋ ኡባ ግዶፐ ታን ዶሬዳ የሩሳላመ ካታማ ድራዉ፥ እት ዛርያ አዉ አጋና። 33 ታን ሀዋ ኦꬃና ጋሱ፥ ሶሎሞነ ታና አጊደ ሲዶናቱዋ ጾሳት አስታሮትዉ፥ ሞኣባቱዋ ጾሳ ካሞሻዉነ አሞናቱዋ ጾሳ ሞሎካዉ ጎይኔዳ ድራሳነ ታ ኦግያን ሀመተናን፥ ታ ስንꬃን ሱረባ ሀነናንነ አ አዉ ዳዊተ ናጌዳዋዳን ታ ዎጋቱዋነ ታ ህግያ ናገናን እጼዳ ድራሳ።

34 “ ‘ግዶፐነ፥ ታን ካዉተꬃ ሶሎሞና ኩሽያፐ ዉርሳ አክከ፤ ታን ዶሬዳነ ታ አዛዙዋነ ታ ዎጋ ናጌዳ ታ ቆማ ዳዊታ ድራዉ፥ ሶሎሞነ ፓጻ ደኤዳ ኬሻን ኡባን እ ሞዳናዳን ኦꬃድ። 35 ሄዋፐ ጉይያን ታን ካዉተꬃ አ ናኣ ኩሽያፐ አካደ ታሙ ዘረꬃ ነዉ እማና። 36 ታ ሱንꬃይ አን ጼሰታና ማላ፥ ታን ዶሬዳ የሩሳላመ ካታማን ኡባ ዎደካ ታ ቆማ ዳዊታ ዘረꬃይ ካተታና ማላ፥ ታን እት ዛርያ አ ናአዉ እማና።

37 “ ‘ኔና ግዶፐ፥ ታን ኔና አካና፤ ነ ዎዛናይ አሞቴዳ ኡባ ኔን ሞዳና፤ ኔን እስራኤልያ ቦላ ካተታና። 38 ታን ኔና አዛዝያዋ ኔን ኦꬆፐ፥ ታ ኦግያን ሀመቶፐነ ታ ቆማይ ዳዊተ ናጌዳዋዳን ታ ዎጋቱዋነ ታ አዛዙዋ ናጋደ ታ ስንꬃን ሱረባ ሀኖፐ፥ ታን ኔናና ግዳና፤ ዳዊታዉ ኦꬄዳዋዳንካ ነ ዛራቱ ደእ በአናዳን ኦꬃና፤ እስራኤልያካ ታን ነዉ እማና። 39 ሶሎሞና ናጋራ ድራዉ ዳዊታ ዘረꬃቱዋ ታን ሙራና፤ ሽን መꬍናዉ ግደና’ ያጌ” ያጌዳ።

40 ሶሎሞነ እዮርባማ ዎꬋናዉ ካጄሌዳ፤ ሽን እዮርባም ግብጼ ጋድያ ካትያ ሺሻቃኮ ባቃቲደ ቤዳ፤ ሶሎሞነ ሀይቃና ጋካናዉ ግብጼን ታኬዳ።

41 ሶሎሞነ ሀኔዳ ሀራባይ፥ እ ኦꬄዳባይ ኡባይ፥ አ አꬌዳ ኤራተꬃባይ ሶሎሞና ታርክያ ማጻፋን ጻፈት ኡቴዳ። 42 ሶሎሞነ እስራኤልያ ኡባ ቦላ የሩሳላመን ኦይታሙ ላይꬃ ካተቴዳ። 43 ሄዋፐ ጉይያን ሶሎሞነ ሀይቂደ፥ ባረ ማይዛን ጋከቴዳ፤ ባረ አዉዋ ዳዊታ ካታማን ሞገቴዳ። አ ናአይ ሮብኣመ አ ኮታን ካተቴዳ።