10
ሳባ ካታቶ
(2 ኦዱዋ 9:1-12)
1 ሳባ ካታታ መꬍና ጎዳ ሱንꬃን ዋረቴዳ ሶሎሞና ዋርያ ስሳደ፥ ዴጽያ ኦሻቱዋ አካደ፥ አ ፓጫናዉ ደንዳዱ። ማቶሳ 12:42፤ ሉቃሳ 11:31 2 ሳዉዋ፥ ሎይꬅ ዳሮ ዎርቃነ አልኦ ሹቻ ጫነቴዳ ዳሮ ጋሎቱዋ ጩጉዋና ሎይꬅ ዳሮ አጃባና የሩሳላመ ጋካደ፥ ሶሎሞና ስንꬃ አꬋአዱ። ባረ ዎዛናን ደእያዋ ኡባ ሶሎሞናዉ ኦዳዱ። 3 ሶሎሞነ አ ኦቼዳዋ ኡባ ኦዴዳ፤ እዝዉ ብርሸናን አፐ ጌም አቴዳባይ አያይነ ባዋ። 4 ሳባ ካታታ ሶሎሞና አꬌዳ ኤራ፥ እ ኬጼዳ ካትያ ጎልያ፥ 5 አ ማዳን ሺቅያ ቁማ፥ አ ኦሳንቻቱ ኡትያ ኡተꬃ፥ አ ቆማቱ ኦꬅያ ኦሱዋነ ማይያ ማዩዋ፥ አ ኤሳ ትግያዋንታነ መꬍና ጎዳ ጌሻ ጎልያን እ ጹግያ ያርሹዋ በኤዳ ዎደ፥ እዝ ዎዛናይ ጋገቴዳ።
6 ሄዋፐ ጉይያን እዛ ካትያ፥ “ነዋነ ነ አꬌዳ ኤራተꬃባ ታን ታ ጋደን ደኣደ ስሴዳዌ ቱማ። 7 ሽን ታን ያደ፥ ታ አይፍያ ብራናን በአና ጋካናዉ ኡንቱንቱ ታዉ ኦዴዳዋ አማናበይከ። ታዉ አሳይ ኦዴዳዌ ባጋነ ጋከና፤ አꬌዳ ኤራተꬃንካ ዱረተꬃንካ ታን ስሴዳዋፐ ሎይꬅ ዳሬ። 8 ኡባ ዎደ ነ ስንꬃን ኤቂደ፥ ነ አꬌዳ ኤራ ስስያ ነ አሳቱነ ነ ኦሳንቻቱ አያ ናሸቲኖሻ! 9 ኔናን ናሸቲደ፥ ኔና እስራኤልያ ካዉተꬃ አራታን ኡትሴዳ መꬍና ጎዳይ ነ ጾሳይ ጋላተቶ! መꬍና ጎዳይ እስራኤልያ አሳ መꬍናዉ ሲቄዳ ድራዉ፥ ኔን ሱረ ፕርዳነ ጽሎተꬃ ኦꬃና ማላ እ ኔና ካተዬዳ” ያጋዱ።
10 ካታታ ኦይዱ ሻአ ኪሎ ግራመ ዴጽያ ዎርቃ፥ ሎይꬅ ዳሮ ሳዉዋነ አልኦ ሹቻ ካትያዉ እማዱ። ሳባ ካታታ ካትያ ሶሎሞናዉ እሜዳዋ ኬሻ ዳሮ ሳዉዋ ሄዋፐ ስምና ኦንነ አህቤና።
11 (ካትያ ኪራማ ማርካባቱ፥ ኦፍራፐ ዎርቃ አሄዳዋንቱ ያፐካ ሳንዳለ ጌተትያ ሎይꬅ ዳሮ ምꬃነ አልኦ ሹቻ አሄድኖ። 12 ካቲ ሶሎሞነ ሄ ሳንዳልያፐ መꬍና ጎዳ ጌሻ ጎልያነ ካትያ ጎልያ ቱቀቱዋ፥ ማዝሙርያ የጽያዋንቶ ዲꬃነ ማስንቁዋ መꬍሴዳ። ሄዋ ማላ ሳንዳሊ ሄ ጋላሳፐ ሃ ስምና ይነ ኤረና፥ ቤትነ ኤረና።)
13 ካቲ ሶሎሞነ እማናዉ በስያ እሞታፐ ሀራ፥ ሳባ ካታታ አሞታደ አ ኦቼዳዋ ኡባ እዝዉ እሜዳ። ሄዋፐ ጉይያን ሳባ ካታታ ባረ አጃባና ደንዳደ፥ ባረ ጋደ ስማዱ።
ካትያ ሶሎሞነ ዱረታ
(2 ኦዱዋ 9:13-28)
14 ሶሎሞነ ላይꬃን ላይꬃን አክያ ዎርቃይ ላታማነ ሄዙ ሻአ ኪሎ ግራመ ዴጽያዋ። 15 ሄዌ ዛልአንቻቱዋፐ አኬዳ ቃራጻነ አራባ ቢታ ካተቱዋ ኡባፐነ እስራኤልያ ቢታ ሞድያዋንቱፐ አኬዳ ጊራ ቦላ ጉጃ። 16 ሶሎሞነ ላኡ ጼቱ ዎጋ ጎንዳለቱዋ ቆጼዳ ዎርቃፐ መꬍሴዳ፤ እት እት ጎንዳልያን ላፑን ኪሎ ግራመ ግድያ ዎርቃይ ገሌዳ። 17 ቃይካ እ ሄዙ ጼቱ ቄር ጎንዳለቱዋ ቆጼዳ ዎርቃፐ መꬍሴዳ፤ እት እት ቄር ጎንዳልያን ላኡ ኪሎ ግራመ ግድያ ዎርቃይ ገሌዳ። ካቲ ሄ ጎንዳለቱዋ ሊባኖሳ ዎራ ጎልያ ጌተትያ ጎለን ዎꬄዳ።
18 ቃይካ ካቲ እት ዎልቃማ ካዉተꬃ አራታ ዳንጋርሳ ዛልያፐ መꬍሴዳ፥ ሙሩታ ዎርቃን ሼሼዳ። 19 ካዉታ አራታይ ደእያ ሳኣ ፑደ ከሳናዉ የꬍያ ኡሱፑን ደꬃቱ ደኢኖ። ሄ አራታዉ ጉየ ባጋይ ጻꬃ። አራታዉ ላኡ ባጋናካ ቀስያ ዘምፕስያ ሳአቱ ደኢኖ፤ ሄ ላኡ ሳአቱ ላንቂያንካ ኤቄዳ እት እት ጋሙዋ ምስሊ ደኤ። 20 ሄ አራታ ፑደ ከስያ ኡሱፑን ደꬃቱዋን ያ ባጋናነ ሀ ባጋና እት እት ጋሙዋ ምስሊ፥ ኡባና ታማነ ላኡ ምስለቱ ደኢኖ። ሀዋ ማላ ካዉተꬃ አራታይ ሀራ ካዉተꬃን ሀቃንነ ኦሰትቤና።
21 ካቲ ሶሎሞነ ኡሻ ኡሽያ ሚሻ ኡባይ ዎርቃፐ መቴዳ፤ ሊባኖሳ ዎራ ጎለን ደእያ ሚሻ ኡባይካ ሙሩታ ዎርቃፐ መቴዳ። እትባይነ ብራፐ መትቤና፤ አያዉ ጎፐ፥ ሶሎሞነ ዎደ ብራይ ኡባካ ጎእያባዳን ፓይደት ኤረና። 22 ካትያዉ ኪራማ ማርካባቱዋና ዛልእያ ዎልቃማ ማርካባቱ አባን ደኢኖ። ሄ ማርካባቱ ዎርቃነ ብራ፥ ዳንጋርሳ አቻ፥ ገለሾቱዋነ ቃረቱዋ ጫን አኪደ፥ ሄዙ ላይꬃፐ እት ገደ ዪኖ።
23 ካቲ ሶሎሞነ ዱረተꬃንነ አꬌዳ ኤራተꬃን ሳኣን ደእያ ካተቱዋ ኡባፐ ዳሬዳ። 24 ሳኣን ደእያ አሳይ ኡባይ አ ስንꬃ አꬋናዉነ ጾሳይ አ ዎዛናን ዎꬄዳ አꬌዳ ኤራ ስሳናዉ ኮዬ። 25 ላይꬃፐ ላይꬃን ይያ ኡባይ አዉ እማናዉ ዎርቃነ ብራ ሚሻቱዋ፥ ማዮቱዋ፥ ኦላ ሚሻቱዋነ ሳዉዋ፥ ፓራቱዋነ ባቁሎቱዋ አኪደ ዬ።
26 ሶሎሞነ ፓራ ጋረቱዋነ ፓራቱዋ ሺሼዳ፤ አዉ እት ሻአነ ኦይዱ ጼቱ ፓራ ጋረቱነ ታማነ ላኡ ሻአ ፓራቱ ደኢኖ። እ ኡንቱንቱ ፓራ ጋረቱዋ ካታማቱዋንነ ባረናና የሩሳላመን ዎꬄዳ።1 ካታ. 4:26 27 ካቲ የሩሳላመን ብራይ ሹቻዳን ኬለታናዳን፥ ዝጋይካ ጋꬋን ድጭያ ኤꬃዳን ጮራታናዳን ኦꬄዳ። 28 ሶሎሞነ ፓራቱ ግብጼፐነ ቃዌ ጌተትያ ቢታፐ ዬድኖ። ካትያ ዛልአንቻቱ ኡንቱንቱ ቃዌፐ ሻሉዋን ሻሚደ አሂኖ። ዛረ. 17:16 29 ኡንቱንቱ እት እት ፓራ ጋርያ ኡሱፑን ጼቱ ጻጋራ ብራን፥ እት እት ፓራ ጼታነ እሻታሙ ጻጋራ ብራን ግብጼፐ ሻሚደ አሂኖ፤ ኡንቱንቱካ ሂተቱዋ ካተቶ ኡባቶነ ሶርያ ካተቶ ዛልኢኖ።