1 ሶሎሞነ መꬍና ጎዳ ጌሻ ጎልያነ ካትያ ጎልያ ኬጺደ ማኬዳዋፐነ ኦꬃናዉ አሞቴዳ አሙዋ ኡባ ፖሌዳዋፐ ጉይያን፥ 2 ጋባኦና ካታማን ካሰ ቆንጬዳዋዳን፥ መꬍና ጎዳይ ላኤንꬁዋ አዉ ቆንጬዳ። 1 ካታ. 3:5፤ 2 ኦዱዋ 1:7 3 መꬍና ጎዳይ አ ሀዋዳን ያጌዳ፤ “ኔን ታ ስንꬃን ዎሴዳ ዎሳነ ዋትዋቴዳ ዋትዋቱዋ ታን ስሳድ። ኔን ኬጼዳ ጌሻ ጎሊ መꬍናዉ ታ ሱንꬃይ አን ጼሰታና ማላ ኡዳደ ታን ጌሻድ፤ ታ አይፊነ ታ ዎዛናይ ኡባ ዎደ ሀ ጌሻ ጎልያን ደአናዋ።

4 “ኔና ግዶፐ፥ ኔን ነ አዉ ዳዊተ ሀመቴዳዋዳን ቦርስያባይ ባይናን ሱረተꬃን ታ ስንꬃን ሀመቶፐ፥ ታን አዛዜዳዋ ኡባ ኦꬆፐነ ታ ዎጋነ ታ ህግያ ናጎፐ፥ 5 ታን ነ አዉዋ ዳዊታዉ፥ ‘እስራኤልያ ካዉተꬃ አራታን ኡትያ አሳ ኔን ኡባካ ꬋያካ’ ጌዳዋዳን፥ ነ ካዉተꬃ አራታ እስራኤልያ ቦላ መꬍናዉ ምንሳደ ኤሳና። 1 ካታ. 2:4

6 “ሽን ኔን ዎይ ነ ናናይ ታና ካልያዋ አጊደ ዎራ ስሞፐ፥ ታን ህንተንታ አዛዜዳ ታ አዛዙዋነ ታ ዎጋ ናገናን ꬋዮፐነ ሀራ ጾሳቶ ኦꬃናዉነ ጎይናናዉ ቦፐ፥ 7 ያቶፐ፥ እስራኤልያ አሳ ታን ካሰ ኡንቱንቶ እሜዳ ቢታፐ ꬎቆላና፤ ታን ታ ሱንꬃዉ ጌሼዳ ሀ ጌሻ ጎልያካ አጋ አጋና። እስራኤላቱ አሳ ኡባ ግዶን ቶሳዉነ ቅሊጮ ግዳናዋንታ። 8 ሀ ጌሻ ጎሊ ኮለቴዳባይ ኬለቴዳ ሳኣ ግዳናዋ፤ ማታና አꬍያ አሳይ ኡባይ ዳጋሚድነ ‘ፖራ!’ ጊደ፥ ‘መꬍና ጎዳይ ሀ ጋድያነ ሀ ጌሻ ጎልያ አያዉ ሀዋዳን ኦꬄዴ?’ ያጋና። 2 ካታ. 25:9፤ 2 ኦዱዋ 36:19 9 አሳይ፥ ኡንቱንቱ ማይዛ አዎቱዋ ግብጼፐ ከሴዳ መꬍና ጎዳ ባረንቱ ጾሳ ኡንቱንቱ አጊደ፥ ሀራ ጾሳቱዋ ካሌዳ ድራስነ ኡንቱንቱዋ ኦꬂደ ጎይኔዳ ድራስ፥ መꬍና ጎዳይ ኡንቱንቱ ቦላ ሀ ኢታባ ኡባ አሄዳ ያጊደ ዛራና” ያጌዳ።

10 ሶሎሞነ ሀ ላኡ ጎልያ፥ መꬍና ጎዳ ጌሻ ጎልያነ ካትያ ጎልያ ኬጼዳ ላታማንꬃ ላይꬃ ዉርሰꬃን፥ 11 ጺሮሳ ካቲ ኪራም እ ኮይያ ጺዳ፥ ዝጋነ ዎርቃ ኡባ እሜዳ ድራዉ፥ ጋሊላን ደእያ ላታሙ ካታማቱዋ ሶሎሞነ አዉ እሜዳ። 12 ሽን ኪራም ጺሮሳ ካታማፐ ከሲደ፥ ሶሎሞነ አዉ እሜዳ ካታማቱዋ በአናዉ ቤዳ ዎደ፥ ካታማቱ አ ናሸችበይክኖ። 13 ያትና፥ ኪራም ሶሎሞና፥ “ታ እሻዉ፥ ሀዋንቱ ኔን ታዉ እሜዳዋንቱ አያ ካታማቴ?” ያጌዳ። ሄዋ ድራዉ፥ እ ሄ ካታማቱዋ፥ “ፓና ቢታ” ያጊደ ሱንꬄዳ። ሄ ሄራይ ሀቼ ጋካናዉካ ሄ ሱንꬃን ጼሰቴ። 14 ኪራም ኦይዱ ሻአ ኪሎ ግራመ ዴጽያ ዎርቃ ካትያ ሶሎሞናዉ የድ ዎꬄዳ።

15 መꬍና ጎዳ ጌሻ ጎልያ፥ ባረ ጎልያ፥ ሚሎ፥ የሩሳላመ ካታማ ግምቢያነ ሀጾራ፥ ማግዶነ ገዜራ ካታማቱዋ ግምባናዉ ካትያ ሶሎሞናዉ ጋባራቱ ደኢኖ። 16 ግብጼ ቢታ ካቲ ካሰ ገዜራ ካታማ ኦይቂደ ካታማ ታማን ጹጌዳ። ካታማን ደእያ ካናነ አሳቱዋካ ዎꬌዳ፤ ያቲደ ሶሎሞነ አኬዳ ባረ ናትዉ ዎይታ ኦꬂደ እሜዳ፤ 17 ሶሎሞነ ገዜራ ካታማ ዎꬅ ኬጼዳ።

ሄዋዳንካ ቃይ፥ ሶሎሞነ ህርክ ቤት-ሆሮና፥ 18 ባእላታ፥ ይሁዳ ዎራን ደእያ ታማራ ካታማ፥ 19 ሚሻ ምንጅያ ካታማቱዋ ኡባ፥ ባረ ፓራቱዋነ ፓራ ጋረቱዋ ዎꬅያ ካታማቱዋነ የሩሳላመን፥ ልባኖሳንነ ባረ ሞድያ ቢታን ኡባን ኬጻናዉ አሞቴዳ ኡባ ኬጼዳ።

20 አሞራቱፐ፥ ሂተቱፐ፥ ፓርዘቱዋፐ፥ ሂዌቱዋፐነ ያቡሳቱዋፐ አቴዳ አሳቱ ኡባይ እስራኤልያ አሳ ግድክኖ፤ 21 ኡንቱንቱ እስራኤልያ አሳቱ ቢታፐ ዉርስ ꬋይሳናዉ ዳንዳየናን አግና፥ ሄ ቢታን አቴዳ አሳቱዋፐ ዘረꬃቱዋ። ሶሎሞነ ኡንቱንታ ጋባረተꬃ ኦስሴዳ፤ ኡንቱንቱ ሀቼ ጋካናዉካ ጋባረተꬃን ኦꬅኖ። 22 ሽን ሶሎሞነ እስራኤልያ አሳቱዋፐ ኦናነ አይለይቤና፤ ኡንቱንቱ አዉ ኦሳንቻቱዋ፥ ኦላንቻቱዋ፥ ኦላንቻቱ ካፓቱዋነ ጋዳዋቱዋ፥ ፓራ ጋረቱዋ ላግያዋንቱ ካፓቱዋነ ፓራ አሳቱዋ ግዲደ ኦꬄድኖ። 23 ሄዋዳንካ ቃይ፥ ኡንቱንቱ ሶሎሞና ኪታ ኪተትያዋንቱ ካፓቱዋ፤ ኡንቱንቱፐ እቼሹ ጼታነ እሻታማቱ ኦሱዋ ኦꬅያ ጎሻንቻቱዋ ጼሊደ ኦስሲኖ።

24 ግብጼ ካትያ ናታ ዳዊታ ካታማፐ ሶሎሞነ እዝዉ ኬጽሴዳ ጎልያ ፑደ ቤዳዋፐ ጉይያን፥ እ ሚሎ ግምቤዳ።

25 ሶሎሞነ መꬍና ጎዳዉ ግምቤዳ ያርሹዋ ሳኣን ጹግያ ያርሹዋነ እትፐተꬃ ያርሹዋ ላይꬃን ሄዙ ገደ ያርሼ፤ መꬍና ጎዳ ስንꬃን እጻናካ ጩዋዬ። ያቲደ ጌሻ ጎልያ ፖሌዳ። ከሳ 23:17፤ 34:23፤ ዛረ. 16:16

26 ሄዋፐ ጉይያን ካቲ ሶሎሞነ ኤዶማ ቢታን ዞኦ አባ ዶናን፥ ኤላታ ጌተትያ ካታማ ማታን ደእያ ኤጽዮን-ጋብራን ማርካባቱዋ መꬌዳ። 27 ካቲ ኪራም ሶሎሞነ አሳቱዋና ኦꬃና ማላ ማርካብያ ላጉዋ ሎሄዳ ባረ አሳቱዋ ኪቴዳ። 28 ኡንቱንቱ ኦፍራ ጋድያ ቤድኖ፤ ያፐ ታማነ ኦይዱ ሻአ ኪሎ ግራምያፐ ዳርያ ዎርቃ ካትያ ሶሎሞናዉ አኪደ ዬድኖ።