1 ሄዋፐ ጉይያን ካቲ ሶሎሞነ መꬍና ጎዳ ታቦታ ዳዊታ ካታማፐ፥ ጽዮነፐ ከሲደ፥ ጌሻ ጎልያ አሀናዳን፥ እስራኤልያ ጭማቱዋ፥ ዛራቱዋ ኡባ ካፓቱዋነ እስራኤልያ ጎልያ አሳቱዋ ካለꬅያዋንታ የሩሳላመ ካታማ ሺሼዳ። 2 ሳሜላ 6:12-16፤ 1 ኦዱዋ 15:25-29 2 ኤታኒማ ጌተትያ ላፑንꬃ አግናን፥ ዳስያ ባላይ ቦንቼትያ ዎደ፥ እስራኤልያ አሳይ ኡባይ ካትያ ሶሎሞነኮ ሺቄዳ። ዎጋ 23:24

3 እስራኤልያ ጭማቱ ኡባይ ጋክና፥ ቄሳቱ ታቦታ ደንꬄድኖ። 4 ሌዋቱነ ቄሳቱ፥ መꬍና ጎዳ ታቦታ፥ ዱንካንያነ ዱንካንያ ግዶን ደእያ ጌሻ ሚሻቱዋ ኡባ ቶኪደ አሄድኖ። 5 ካቲ ሶሎሞንነ አናና ደእያ እስራኤልያ ያአይ ኩመንꬃይ ታቦታ ስንꬃን ሺቂደ፥ ፓይዳናዉ ዳንዳየተና ጮራ ዶርሳነ መህያ ያርሼድኖ።

6 ሄዋፐ ጉይያን ቄሳቱ መꬍና ጎዳ ቃላ ጫቁዋ ታቦታ ጌሻ ጎልያዉ ግዶ ጌሻ ቆልኡዋ፥ ኡባፐ አꬌዳ ጌሻ ሳኣ ግያ ሳኣ አሂደ፥ ክሩበቱዋ ምስለቱ ቀፈቱዋፐ ጋርሳ ባጋና ዎꬄድኖ። 7 ምጨት ኡቴዳ ክሩበቱዋ ቀፈቱ ታቦታነ ታቦታ ቶክያ ካሱዋ ካሜድኖ። 8 ካሶቱ ሎይꬅ አዱሳ ግድያ ድራዉ፥ ኡንቱንቱ ጼራይ ኡባፐ አꬍያ ጌሻ ሳኣ ስንꬃን ደእያ ጌሻ ሳኣን ቤታናዉ ዳንዳዬ፤ ሽን ጌሻ ሳኣፐ ካረና ቤታናዉ ዳንዳየና። ኡንቱንቱ ሀቼ ጋካናዉ ሄ ሳኣን ደኢኖ። 9 እስራኤልያ አሳይ ግብጼ ጋድያፐ ከሴዳ ዎደ፥ መꬍና ጎዳይ ኡንቱንቱና ቃላ ጫቁዋ ጫቀቴዳ ሲና ደርያን ሙሴ ዎꬄዳ ላኡ ማሰቴዳ ሹቻቱዋፐ አትና፥ ታቦታ ግዶን ሀራባይ አያይነ ባዋ። ዛረ. 10:5

10 ቄሳቱ ጌሻ ሳኣፐ ከስና፥ ሻሪ መꬍና ጎዳ ጌሻ ጎልያ ኩሜዳ። ከሳ 40:34-35 11 ሄ ሻርያ ጋሱዋን ቄሳቱ ባረንቱ ኪታ ኦꬃናዉ ዳንዳይበይክኖ፤ አያዉ ጎፐ፥ መꬍና ጎዳ ቦንቹ አ ጌሻ ጎልያ ኩም ኡቴዳ።

12 ሄዋፐ ጉይያን ሶሎሞነ ሀዋዳን ያጌዳ፤ “አቤት መꬍና ጎዳዉ፥ ኔን፥ ‘ታን ꬉማ ሻርያን ደአና’ ያጋ ዎꬃዳ።ማዝ. 18:11፤ 97:2 13 ታን ቱሙፐ ነዉ ሎኦ ጌሻ ጎልያ፥ ኔን አን መꬍናዉ ደአናሳ ኬጻድ” ያጌዳ።

14 እስራኤልያ ያአይ ኩመንꬃይ ኤቂደእሽን፥ ካቲ ኡንቱንቱኮ ስሚደ፥ ሀዋዳን ያጊደ ኡንቱንታ አንጄዳ፤ 15 “መꬍና ጎዳይ እስራኤልያ ጾሳይ ጋላተቶ! ታ አዉዋ ዳዊታዉ ባረ ዶናን ኦዴዳ ህዶታ ባረ ኩሽያን ፖሌዳ። ሄ እ ኦዴዳ ህዶታይ፥ 16 ‘ታን ታ አሳ እስራኤልያ ግብጼፐ ከሳደ አሄዳ ጋላሳፐ ዶምና፥ ታ ሱንꬃይ አን ደአና ማላ፥ ጌሻ ጎልያ ኬጻናዉ እስራኤልያ ዛራቱዋ ግዶን አይ ካታማነ ዶራበይከ፤ ሽን ታ አሳ እስራኤልያ ካለꬃና ማላ፥ ታን ዳዊታ ዶራድ’ ያጌዳ። 2 ሳሜላ 7:4-11፤ 1 ኦዱዋ 17:3-10

17 “ታ አዉ ዳዊተ መꬍና ጎዳ እስራኤልያ ጾሳ ሱንꬃዉ ጌሻ ጎልያ ኬጻናዉ ባረ ዎዛናን ቆፔዳ። 2 ሳሜላ 7:1-3፤ 1 ኦዱዋ 17:1-2 18 ሽን መꬍና ጎዳይ ታ አዉዋ ዳዊታ፥ ‘ኔን ታ ሱንꬃዉ ጌሻ ጎልያ ኬጻናዉ ነ ዎዛናን ቆፔዳ ድራዉ፥ ሎኦባ ኦꬃዳ። 19 ግዶፐነ፥ ጌሻ ጎልያ ኬጻናዌ ኔና ግዳካ፤ ታ ሱንꬃዉ ጌሻ ጎልያ ኬጻናዌ ነ ጉልባታፐ የለታና ነ ናኣ’ ያጌዳ። 2 ሳሜላ 7:12-13፤ 1 ኦዱዋ 17:11-12

20 “ሀእካ መꬍና ጎዳይ ባረ እማና ጌዳ ህዶታ ቃላ ፖሌዳ። መꬍና ጎዳይ ካሰ እሜዳ ህዶታዳንካ ታን ታ አዉዋ ዳዊታ ሳኣን ካተታድነ ሀእ እስራኤልያ ካዉተꬃ አራታን ኡታድ። ቃይ መꬍና ጎዳ እስራኤልያ ጾሳ ሱንꬃዉ ጌሻ ጎልያ ኬጻድ። 21 መꬍና ጎዳይ ኑ አዎቱዋ ግብጼፐ ከሴዳ ዎደ ኡንቱንቱና ጫቀቴዳ ጫቁ ደእያ ታቦታዉካ አ ግዶን ሳኣ እንጀያድ” ያጌዳ።

22 ሄዋፐ ጉይያን ሶሎሞነ መꬍና ጎዳዉ ያርሽያ ሳኣ ስንꬃን፥ እስራኤልያ ያአይ ኩመንꬃይ ደእያ ሳኣን ኤቂደ፥ ባረ ኩሽያ ሳሉዋ ዛር ምጪደ፥ 23 ሀዋዳን ያጊደ ዎሴዳ፤ “አቤት መꬍና ጎዳዉ፥ እስራኤልያ ጾሳዉ፥ ቦላ ሳሉዋን ዎይ ጋርሳ ሳኣን ነ ማላ ጾስ ባዋ። ኔን ነ ቃላ ጫቁዋ ናጋሳ፤ ባረ ኩመንꬃ ዎዛናፐ ነ ስንꬃን ሀመቴዳ ነ ቆማቱዋ አገና ሲቁዋን ሲቃሳ። 24 ነ ቆማዉ፥ ታ አዉዋ ዳዊታዉ ኔን ኦꬃና ጋደ ሃሳዬዳ ቃላ ናጋዳ፤ ኔን ካሰ ነ ዶናን ሃሳዬዳዋ ነ ኩሽያን ሀቼ ፖላዳ።

25 “ሀእካ አቤት መꬍና ጎዳ፥ እስራኤልያ ጾሳዉ፥ ኔን ነ ቆማዉ፥ ታ አዉዋ ዳዊታዉ፥ ‘ኔን ታ ስንꬃን ሀመቴዳዋዳን ነ ናናይካ ታ ስንꬃን ሀመታና ማላ ባረንቱ ኦግያ ናጎፐ፥ ታ ስንꬃን እስራኤልያ ካዉተꬃ አራታን ኡትያ አሳ ኔን ኡባካ ꬋያካ’ ያጌዳ ቃላ ፖላ። 1 ካታ. 2:4 26 አቤት እስራኤልያ ጾሳዉ፥ ኔን ነ ቆማዉ፥ ታ አዉዋ ዳዊታዉ ሃሳዬዳ ነ ቃላ ሀእካ አጎፓ።

27 “ሽን ጾሳይ ቱሙ ሳኣን ደአኔየ? በአ፥ ሳሎቱ፥ ኡባፐ ꬎቃን ደእያ ሳሉካ ነዉ ግዳናዉ ዳንዳየና። ያትና፥ ሀ ታን ኬጼዳ ጌሻ ጎሊ ነዉ አይ ኬሻ ጉጻንዴሻ!2 ኦዱዋ 2:6 28 ግዶፐነ፥ አቤት መꬍና ጎዳዉ፥ ታ ጾሳዉ፥ ታን ነ ቆማይ ሀቼ ዎስያዋነ ዋትዋትያዋ ኔን ሀይዛ። 29 ኔን፥ ‘ታ ሱንꬃይ ሄ ሳኣን ደአና’ ጌዳ ሀ ጌሻ ጎልያ ነ አይፊ ቃማነ ጋላስ ጼሎ። ታን ነ ቆማይ ሀ ሳኣኮ ስማደ፥ ዎስያ ዎሳ ኔን ስሳ። ዛረ. 12:11 30 ታን ነ ቆማይነ ነ አሳይ እስራኤሊ ሀ ጌሻ ጎልያኮ ስሚደ፥ ዋትዋትያ ዋትዋቱዋ ኔን ስሳ። ኔን ደእያ ሳን ሳሉዋን ስሳደ፥ ኑዉ አቶ ያጋ።

31 “እት አሳይ ባረ ሾሩዋ ናቂና፥ አ ጫቀꬃናዉ ሀ ጌሻ ጎልያ አይና፥ አ ግዶን ደእያ ያርሽያ ሳኣ ስንꬃን እ ጫቆፐ፥ 32 ኔን ሳሉዋን ስሳደ፤ ኪተታ። ነ ቆማቱዋ ግዱዋን ፕርዳ። ባይዛንቻቱዋ ቦላ ፕርዳደ፥ እ ኦꬄዳዋ አ ቦላ ዛራ፤ ጽሉዋ ሻትንꬃደ፥ አዉ አ ጽሎተꬃዳን ዛራ።

33 “ነ አሳይ እስራኤሊ ነ ቦላ ናጋራ ኦꬄዳ ጋሱዋን ሞርክያን ጾነቲደ፥ ኡንቱንቱ ኔኮ ስሚደ፥ ነ ሱንꬃ ጼሲደ፥ ሀ ጌሻ ጎልያን ኔና ዎሶፐነ ነዉ ዋትዋቶፐ፥ 34 ኔን ሳሉዋን ስሳ። ነ አሳ እስራኤልያ ናጋራ አቶ ያጋ፤ ያታደ ኔን ካሰ ኡንቱንቱ ማይዛ አዋቶ እሜዳ ቢታዉ ኡንቱንታ ጉየ ዛራ።

35 “ነ አሳይ ነ ቦላ ናጋራ ኦꬄዳ ጋሱዋን ሳሎቱ ጎርደትናነ እራይ ቡከናን እጽና፥ ኡንቱንቱ ሀ ሳኣ ስሚደ፥ ዎሶፐነ ኔን ኡንቱንታ ኡንኤꬄዳ ድራዉ ነ ሱንꬃ ጼሲደ፥ ባረንቱ ናጋራፐ ስሞፐ፥ ኔን ሳሉዋን ስሳ። 36 ነ ቆማቱዋ ናጋራ፥ ነ አሳ እስራኤልያ ናጋራ አቶ ያጋ። ኡንቱንቱ ሀመታናዉ በስያ ሎኦ ኦግያ ኡንቱንታ ታማርሳ፤ ያታደ ኔን ነ አሳ ላትሴዳ ቢታን እራ ቡክሳ።

37 “ቢታ ቦላን ኮሻይ ዎይ ኢታ ሀርጊ ዪና፥ ዎይ ካꬃ ጹግ ꬋይስያ ጫርኩ ዎይ ቦሊ ዎይ ቡምቡረꬃይ ቢታ ቦላን ዪና፥ ዎይ ሞርኪ ኡንቱንቱ ካታማቱዋ ዶድና፥ ዎይ አይ ማላ ባሻይ ዎይ ሀርጊ ዪና፥ 38 ነ አሳ እስራኤልያፐ ኦንነ ኔና ዎሶፐነ ነዉ ዋትዋቶፐ፥ ቃይ አይ አሳይነ ባረ ዎዛናን ኡንኤꬅያዋ ኤሪደ፥ ሀ ጌሻ ጎልያኮ ስሚደ፥ ባረ ኩሽያ ምጮፐ፥ 39 ኔን ደእያ ሳኣን ሳሉዋን ስሳ። ኡንቱንቱ ናጋራ አቶ ያጋ፤ ያታደ ኡንቱንቶ ኪተታ። ኔን አሳ ዎዛና ኤርያዋዳንካ፥ አሳ ኡባዉ አ ኦሱዋዳን ኦሱዋዳን እማ። አያዉ ጎፐ፥ አሳ ኡባ ዎዛና ኤርያዌ ነ ጻላላ። 40 ያቶፐ፥ ኔን ኑ ማይዛ አዋቶ እሜዳ ቢታን ደእያ ዎደ ኡባን፥ ኡንቱንቱ ነዉ ያያና።

41-42 “ሄዋዳንካ፥ ነ አሳ እስራኤልያ ግደና ካረ ቢታ አሳይ ነ ዎልቃማ ሱንꬃዋነ ኔን ነ አሳዉ ኦꬄዳ ማላልስያ ኦሶቱዋባ ስሲደ፥ ሃኮ ጋድያፐ ዪደ፥ ሀ ጌሻ ጎልያኮ ስሚደ፥ ኔና ዎሶፐ፥ 43 ኔን ደእያ ሳኣን ሳሉዋን ስሳ። ነ አሳቱ እስራኤላቱ ኤርያዋዳን፥ ሳኣን ደእያ አሳይ ኡባይ ነ ሱንꬃ ኤራና ማላነ ነዉ ያያና ማላ፥ ቃይ ታን ኬጼዳ ሀ ጌሻ ጎሊ፥ ነዉ ጎይንያ ሳኣ ግዴዳዋ ኡንቱንቱ ኤራና ማላ፥ ሄ ካረ ቢታ አሳይ ኔና ዎስያዋ አዉ ፖላ።

44 “ነ አሳቱ ባረንቱ ሞርከቱዋ ኦላና ማላ ኔን ኪቴዳ ሳኣ ሀቃነ ቢደ፥ ኡንቱንቱ ኔን ዶሬዳ ሀ ካታማኮነ ታን ነ ሱንꬃዉ ኬጼዳ ጌሻ ጎልያኮ ስሚደ፥ ኔና መꬍና ጎዳ ዎሶፐ፥ 45 ኡንቱንቱ ዎሳነ ዋትዋቱዋ ሳሉዋን ኔን ስሳ፤ ኡንቱንቶ ጾኑዋ እማ።

46 “ናጋራ ኦና አሳይ ባይናዋዳንካ፥ ኡንቱንቱ ነ ቦላ ናጋራ ኦꬅና፥ ኔን ኡንቱንቶ ሀንቀታደ ሞርከቶ ኡንቱንታ አꬃደ እምና ሞርከቱካ ኡንቱንታ ኦሞዲደ፥ ሃክና ማትናካ ባረንቱ ጋድያ አኪደ አፍና፥ 47 ኡንቱንቱ ሄ ኦሞደቴዳ ቢታን ደኢደ፥ ባረንቱ ዎዛናን ናጋራፐ ስሞፐ፥ ሄ ኦሞደቴዳ ቢታን ኡንቱንቱ ደኢደ፥ ‘ኑን ናጋራ ኦꬄዶ፤ ኑን ባይዜዶ፤ ኑን ኢታባ ሀኔዶ’ ያጊደ ነዉ ዋትዋቶፐ፥ 48 ባረና ኦሞዲደ አፌዳ ሞርከቱዋ ቢታን ደኢደ፥ ኡንቱንቱ ባረንቱ ኩመንꬃ ዎዛናፐነ ባረንቱ ኩመንꬃ ቆፋፐ ኔኮ ስሞፐ፥ ኔን ኡንቱንቱ ማይዛ አዋቶ እሜዳ ኡንቱንቱ ቢታኮ፥ ኔን ዶሬዳ ካታማኮነ ታን ነ ሱንꬃዉ ኬጼዳ ጌሻ ጎልያኮ ስሚደ፥ ኔና ዎሶፐ፥ ያቶፐ፥ 49 ኡንቱንቱ ዎሳነ ኡንቱንቱ ዋትዋቱዋ ኔን ደእያ ሳኣን ሳሉዋን ስሳ። ኡንቱንቶ ፕርዳ። 50 ነ አሳይ ነ ቦላ ኦꬄዳ ናጋራነ ባይዜዳ ባይዙዋ አቶ ያጋ፤ ኡንቱንቱ ኦሞዲደ አፌዳ አሳቱ ኡንቱንቶ ቃረታናዳን ኦꬃ። 51 አያዉ ጎፐ፥ ኡንቱንቱ ሄ ብራታ ሲልስያ ጮጭያ ማላ ጋድያፐ፥ ግብጼፐ ኔን ከሴዳ ነ አሳቱዋነ ነ ቡዞቱዋ።

52 “ታን ነ ቆማይነ ነ አሳይ እስራኤሊ ዋትዋትያዋ ነ አይፊ ጼሎ፤ ቃይ ኡንቱንቱ ዋስያ ዎደ አዉደነ ኔን ኡንቱንቶ አላ። 53 አያዉ ጎፐ፥ አቤት ኡባ ሞድያ መꬍና ጎዳዉ፥ ኔን ካሰ ኑ አዎቱዋ ግብጼፐ ከስያ ዎደ ነ ቆማ ሙሴ ባጋና ኦዴዳዋዳን፥ ኡንቱንታ ኔን ሳኣን ደእያ ካዉተꬃቱ ኡባ ግዶፐ ነ ቡዞ ኦꬃናዉ ዱማያዳ” ያጊደ ዎሴዳ።

54 ሶሎሞነ መꬍና ጎዳ ዎሳነ ዋትዋቱዋ ፖሌዳዋፐ ጉይያን፥ ባረ ኩሽያ ሳሉዋ ምጪደ መꬍና ጎዳ ያርሹዋ ሳኣ ስንꬃን ጉልባቴዳ ሳኣፐ ደንድ ኤቄዳ። 55 እስራኤልያ ሽቁዋ ኡባ ባረ ቃላ ꬎቂሲደ፥ ሀዋዳን ያጊደ አንጄዳ፤ 56 “እ ካሰ ሃሳዬዳ ባረ ቃላዳን ባረ አሳ እስራኤልያ ሸምፕሴዳ መꬍና ጎዳይ ጋላተቶ፤ እ ባረ ቆማ ሙሴ ባጋና እሜዳ ሎኦ ህዶታይ ኡባይ ፖለቴዳ። ዛረ. 12:10፤ ኢያሳ 21:44-45 57 መꬍና ጎዳይ ኑ ጾሳይ ካሰ ኑ አዎቱዋና ደኤዳዋዳን፥ ኑናናካ ደኦ፤ እ ኑና ኡባካ አጎፖ ዎይ የጎፖ። 58 ኑን አ ኦግያን ኡባን ሀመታና ማላነ እ ኑ አዋቶ እሜዳ አዛዙዋ፥ ዎጋቱዋነ ህግያ ናጋና ማላ፥ ኑ ዎዛና ባረኮ ዛሮ። 59 ሀቼ ሀቼ ደኦ ኮሽያዋዳን፥ ጾሳይ ታና ባረ ቆማነ ባረ አሳ እስራኤልያ ማዳና ማላ፥ ታን መꬍና ጎዳ ስንꬃን ዎሳደ ጌዳ ሀ ቃላቱ ቃማነ ጋላስ መꬍና ጎዳኮ፥ ኑ ጾሳኮ፥ ሺቅኖ። 60 ሄዌነ፥ ሳኣን ደእያ አሳይ ኡባይ መꬍና ጎዳይ ጾሳ ግድያዋነ አፐ አትና ሀራ ጾስ ባይናዋ ኤራናዳና። 61 ሀቼዋዳንካ ህንተንቱ አ ዎጋዳን ሀመታናዉነ አዉ አዛዘታናዉ መꬍና ጎዳዉ፥ ኑ ጾሳዉ፥ ህንተንቱ ዎዛናይ አማነትያዋ ግዶ” ያጊደ አንጄዳ።

62 ሄዋፐ ጉይያን ካቲነ እስራኤልያ አሳይ ኡባይ እትፐ መꬍና ጎዳ ስንꬃን ያርሹዋ ያርሼድኖ። 63 ሶሎሞነ መꬍና ጎዳዉ እትፐተꬃ ያርሹዋ ያርሻናዉ ላታማነ ላኡ ሻአ ቦራቱዋነ ጼታነ ላታሙ ሻአ ዶርሳቱዋ ሺሼዳ። ሄዋዳን ኦꬂደ ካቲነ እስራኤልያ አሳይ ኡባይ መꬍና ጎዳ ጌሻ ጎልያ አንጅሴድኖ። 64 ካቲ ሶሎሞነ ጌሻ ጎልያዉ ስንꬃ ባዙዋን ደእያ ግዶ ዳባባ ሄ ጋላስ ዱማዬዳ። ሄ ሳኣን ጹግያ ያርሹዋ፥ ካꬃ ያርሹዋነ እትፐተꬃ ያርሹዋፐ ሞꬉዋ ያርሼዳ። እ ሄዋ ኦꬄዳዌ መꬍና ጎዳ ስንꬃን ደእያ፥ ናሃስያ ግያ ብራታፐ ኦሰቴዳ ያርሽያ ሳአይ ጹግያ ያርሹዋ፥ ካꬃ ያርሹዋነ እትፐተꬃ ያርሹዋፐ ሞꬉዋ ያርሻናዉ ጉጼዳ ድራሳ።

65 ሄ ዎደ ሶሎሞንነ እስራኤልያ አሳይ ኡባይ ላፑን ጋላሳዉ ዳስያ ባላ ቦንቼዳ፤ እስራኤልያ ዛዋን ሀማታ ፕኑዋፐ ቢደ ግብጼ ሻፋ ጋካናዉ ደእያ ጮራ አሳይ መꬍና ጎዳ ስንꬃን ባላ ቦንቻናዉ ሺቄዳ። 66 ዎንተꬃ ጋላስ ካቲ አሳ ሞይዜዳ፤ አሳይ ካትያ አንጂደ፥ መꬍና ጎዳይ ባረ ቆማ ዳዊተዉነ ባረ አሳ እስራኤልያዉ ኦꬄዳ ኬካተꬃን ናሸቲደነ ዎዛናፐ ፓሽኪደ፥ ባረ ሶ ባረ ሶ ቤዳ።