14
አኪይ እዮርባማ ቦላ ትምቢትያ ኦዴዳ
1 ሄ ዎደ እዮርባማ ናአይ አቢ ሀርጌዳ። 2 ያትና፥ እዮርባም ባረ ማቻቶ፥ “ደንዳደ ኔን እዮርባማ ማቻቶ ግድያዋ ኦንነ ኤረና ማላ፥ ነ ማዩዋ ላማ፤ ሴሎ ባ። ታን ሀ አሳ ቦላ ካተታናዋ ታዉ ኦዴዳ ትምቢትያ ኦድያ አኪ ያን ደኤ። 3 ታሙ ኡክꬃ፥ አማሬዳ ኮምፑዋነ እት ኦቱዋ ኤሳ አዉ አካደ አኮ ባ። ሀ ሀርጌዳ ናአይ ሀናናባ እ ነዉ ኦዳና” ያጌዳ።
4 እዮርባማ ማቻታ እ ጌዳዋዳን ኦꬃዱ፤ ደንዳደ አክያ ሶ ሴሎ ባዱ። አኪ ጼላናዉ ዳንዳየና፤ እ ጭሜዳ ድራዉ፥ አ አይፊ ደመና። 5 ሽን መꬍና ጎዳይ አክያ፥ “እዮርባማ ማቻታ ባረ ናኣ ሀርግያዋ ኔና ኦቻናዉ ያዉ። ኔን እዝዉ ሀዋ ሀዋ ያጋደ ኦዳ። አ ያ ጋካደ ሀራ ማጫ አሳ ማላታናኑ” ያጌዳ።
6 ሄዋ ድራዉ፥ አኪ ማቻታ ፐንግያን ድእ ድእያዋ ስሲደ ሀዋዳን ያጌዳ፤ “እዮርባማ ማቻቴ፥ አነ ሃ ገላ። አያዉ ሀዋዳን ሀራ አሳ ማላታድ? ታን ኢታ ዎርያ ነዉ ኦዳናዉ ኪተታድ። 7 ኔን እዮርባመኮ ባደ ሀዋዳን ያጋ፤ ‘መꬍና ጎዳይ እስራኤልያ ጾሳይ ኔና፥ “ታን ኔና አሳ ግዶፐ ꬎቂሳድ፤ ታ አሳ እስራኤልያ ቦላ ኔና ካተያድ። 8 ታን ዳዊታ ዛርያፐ ካዉተꬃ ዎꬃ አካደ፥ ነዉ እማድ። ሽን ኔን ታ ቆማ ዳዊታ ማላ ግዳካ፤ እ ታ አዛዙዋ ናጌዳነ ታ ስንꬃን ሱረባ ጻላላ ኦꬂደ፥ ባረ ኩመንꬃ ዎዛናን ታና ካሌዳ። 9 ኔፐ ካሰ ደኤዳ ኡባቱ ኦꬄዳዋፐ ዳርያ ኢታ ኔን ኦꬃዳ፤ ኔን ነዉ ሀራ ጾሳቱዋ፥ ሴርሴዳ ብራታፐ ኤቃቱዋ መꬋዳ። ያታደ ታና ሀንቀꬃዳ፤ ታና ኔፐ ጉየ አꬃዳ።
10 “ ‘ “ሄዋ ጋሱዋን ታን እዮርባማ ጎልያ አሳዉ ኢታ አሀና። እስራኤልያ ቢታን እዮርባማ ጎልያ አሳፐ አይልያ ግድና ላአ ግዲና፥ እት አቱማ አሳይነ አተናን ꬎቆላና። እት ኡራይ ኦሻይ ዉራና ጋካናዉ ከስያዋዳን፥ እዮርባማ ጎልያ አሳ ታን ዉርሳ ከሳና። 1 ካታ. 15:29 11 እዮርባማ ዛርያ ግዲደ ካታማን ሀይቂያ ኦናነ ካናቱ ማና፤ ጋጻርያን ሀይቂያዋንታ ቃይ ሳሉዋ ካፎቱ ማና። ታን መꬍና ጎዳይ ሀዋ ኦዳድ!” ያጌዳ’ ያጋ።
12 “ኔና ግዶፐ፥ ሀእ ኔን ደንዳደ ነ ሶ ባ። ነ ገዲ ካታማ ገልያ ዎደ፥ ናአይ ሀይቃና። 13 እስራኤልያ ኡባይ ናአዉ ዬኪደ ሞጋና፤ እዮርባማ ጎልያ አሳን መꬍና ጎዳ እስራኤልያ ጾሳ ስንꬃን ሀ ናኣን ሎኦባይ ቤቴዳ ድራዉ፥ እዮርባማ ጎልያ አሳፐ አ ጻላላይ ዱፉዋን ሞገታና።
14 “ሄዋፐ ጉይያን እዮርባማ ጎልያ አሳ ꬎቆል ꬋይስያ ካትያ መꬍና ጎዳይ ባረዉ እስራኤልያ ቦላ ደንꬃና። 15 ሃꬃ ግዶን ዎሹ ቃጽያዋዳን፥ መꬍና ጎዳይ ሄ ዎደ እስራኤላቱዋ ሾጪደ ቃꬃና። አሼሮ ግያ ጾሳትዉ ኡንቱንቱ ምስልያ ኤሲደ፥ መꬍና ጎዳ ሀንቀꬄዳ ድራዉ፥ ኡንቱንታ አዋቶ እ እሜዳ ሎኦ ቢታፐ ኡንቱንታ ድጋና፤ ያቲደ ኡንቱንታ ኤፍራጺሳ ሻፋፐ ሄፍንꬃን ላላና። 16 እዮርባም ኦꬄዳ ናጋራ ድራዉነ እስራኤልያ አሳ እ ኦስሴዳ ናጋራ ድራዉ፥ ጾሳይ እስራኤልያ አግ ባሻና” ያጌዳ።
17 ሄዋፐ ጉይያን እዮርባማ ማቻታ ደንዳደ ባደ ትርጻ ጋካዱ። ጎልያ ፐንገ ጎጭላ የꬊና ናአይ ሀይቂ አጌዳ። 18 ባረ ቆማ ትምቢትያ ኦድያ አክያ ባጋና መꬍና ጎዳይ ኦዴዳዋዳንካ አ ሞጌድኖ፤ እስራኤልያ አሳይ ኡባይ አዉ ዬኬዳ።
እዮርባማ ሀይቁዋ
19 እዮርባም ሀኔዳ ሀራባይ፥ አ ኦላቱነ አ አይሱዋ ማራቱ እስራኤልያ ካተቱ ታርክያ ማጻፋቱዋን ጻፈት ኡቴዳ። 20 እዮርባም ላታማነ ላኡ ላይꬃ ካዉቴዳ። ሄዋፐ ጉይያን ሀይቂደ ባረ ማይዛን ጋከቴዳ። አ ኮታን አ ናአይ ናዳበ ካዉቴዳ።
ይሁዳነ እስራኤልያ ካተቱዋ
(14:21—16:34)
ይሁዳ ካትያ ሮብኣማ
(2 ኦዱዋ 11:5—12:15)
21 ሶሎሞና ናኣ ሮብኣመ ይሁዳን ካዉቴዳ፤ ሮብኣመ ካተትያ ዎደ ላይꬃይ አዉ ኦይታማነ እታ። መꬍና ጎዳይ ባረ ሱንꬃ ዎꬃናዉ እስራኤልያ ዛራቱዋ ካታማቱዋ ኡባ ግዶፐ ዶሬዳ የሩሳላመ ካታማን ሮብኣመ ታማነ ላፑን ላይꬃ ካተቴዳ። አ ዳይ ሱንꬃይ ናእሞ፤ እዛ አሞና ጋደ አሳ። 22 ይሁዳ አሳቱ መꬍና ጎዳ ስንꬃን ኢታባ ኦꬄድኖ፤ ባረንቱ ኦꬄዳ ናጋራን ኡንቱንቱ ባረንቱ አዎቱዋፐ አꬂደ አ ቃናትሴድኖ። 23 ሄዋ ቦላካ ቃይ ኡንቱንቱ ባረንቶ ጎይንያ ꬎቃ ሳኣ፥ ኤቃ ሹቻቱዋነ አሼሮ ጌተትያ ጾሳቱዋ ምስለቱዋ ꬎቃ ደረቱዋ ኡባ ቦላነ እርጻ ምꬃቱዋ ኡባ ጋርሳን ኤሴድኖ። 2 ካታ. 17:9-10 24 ሀራይ አትና ኡንቱንቱ ጎይንያ ግሹዋን ጎይኑዋ ዎጋ ኦꬂደ አቱማ አሳቱ አቱማ አሳቱዋና ሻርሙጽያዋንቱ ደኢኖ። መꬍና ጎዳይ እስራኤላቱ ስንꬃፐ ከሲደ የደርሴዳ ጋደ አሳቱ ሜዘቴዳ፥ ሄ ሸነይያ ኦሶቱዋ ኡባ እስራኤልያ አሳቱ ኦꬄድኖ።ዛረ. 23:17
25 ሮብኣመ ካተቴዳ እቼሻንꬆ ላይꬃን ግብጼ ካቲ ሺሻቅ የሩሳላመ ካታማ ቆሄዳ። 26 መꬍና ጎዳ ጌሻ ጎልያንነ ካትያ ጎለን ደእያ ሚሻ፥ ሶሎሞነ ቆጽሴዳ ዎርቃ ጎንዳለቱዋና ኡባ ቦንቂ አኪደ ቤዳ። 1 ካታ. 10:16-17፤ 2 ካታ. 9:15-16 27 ያትና፥ ካቲ ሮብኣመ ሄ ጎንዳለቱዋ ድራዉ ናሃስያ ብራታፐ ሀራ ጎንዳለቱዋ መꬍሴዳ፤ ኡንቱንቱ ናጊደ ዎꬃና ማላ ካትያ ጎልያ ፐንግያ ናግያዋንቱ ካፓቶ እሜዳ። 28 ካቲ መꬍና ጎዳ ጌሻ ጎልያ ብያ ዎደ ኡባን፥ ናግያዋንቱ ጎንዳለቱዋ ኦይቄድኖ። ሄዋፐ ስሚደ ኡንቱንቱ ዛሪደ፥ ናግያዋንቱ ጎለን ዎꬂኖ።
29 ሮብኣመ ሀኔዳ ሀራባይነ እ ኦꬄዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ። 30 ሮብኣምነ እዮርባም ኡባ ዎደ ኦለቲደ ደኤድኖ። 31 ሮብኣመ ሀይቂደ ባረ ማይዛን ጋከቴዳ፤ እ ዳዊታ ካታማን ደእያ ባረ አዎቱዋ ዱፉዋን ሞገቴዳ። አ ዳይ ሱንꬃይ ናእሞ፤ እዛ አሞና ጋድያ አሳ። ሮብኣማ ኮታን አ ናአይ አቢ ካተቴዳ።