15
ይሁዳ ካትያ አብያ
(2 ኦዱዋ 13:1—14:1)
1 ናባጻ ናኣ እዮርባም ካተቴዳ ታማነ ሆስፑንꬃ ላይꬃን አቢይ ይሁዳን ካተቴዳ። 2 አቢይ የሩሳላመን ሄዙ ላይꬃ ካተቴዳ። አ ዳያ አበሰሎማ ናት ናቶ፤ እ ሱንꬃይ ማእኮ። 3 አፐ ካሰ አ አዉ ኦꬄዳ ናጋራቱዋ ኡባ ኦꬄዳ፤ አ ዎዛናይ አ አዉዋ አዉዋ አዉዋ ዳዊታ ዎዛናይ ፖሎ ግዴዳዋዳን መꬍና ጎዳዉ፥ ባረ ጾሳዉ ፖሎ ግድቤና። 4 ግዶፐነ፥ አፐ ጉይያን የሩሳላመን ካተታና ማላነ የሩሳላመ ሳሮተꬃ ናጋና ማላ፥ መꬍና ጎዳይ አ ጾሳይ ዳዊታ ድራዉ አቢያዉ እት አቱማ ናኣ እሜዳ። 1 ካታ. 11:36 5 ጾሳይ ሀዋ ኦꬄዳ ጋሶታይ፥ ዳዊተ መꬍና ጎዳ ስንꬃን ሱረባ ኦꬄዳ፤ ሂትያ ኦርዮና ቦላ ናጋራ ኦꬆንፐ አትና፥ ባረ ደኡዋ ላይꬃ ኡባን መꬍና ጎዳ አዛዞቱዋፐ እትባነ ናገናን አግቤና። 2 ሳሜላ 11:1-27 6 አቢይ ደኤዳ ላይꬃ ኡባን ሮብኣማ አሳናነ እዮርባማ አሳና ኦለቲደ ደኤድኖ።
7 አቢይ ሀኔዳ ሀራባይነ እ ኦꬄዳባይ ኡባይ ይሁዳ ካተቱ ታርክያ ማጻፋን ጻፈት ኡቴዳ። አቢይነ እዮርባም ኦለቲደ ደኤድኖ። 8 አቢይ ሀይቂደ ባረ ማይዛን ጋከቴዳ፤ እ ዳዊታ ካታማን ሞገቴዳ። አ ሳኣን አ ናአይ አሳይ ካተቴዳ።
ይሁዳ ካትያ አሳ
(2 ኦዱዋ 15:16—16:6)
9 እስራኤልያ ካቲ እዮርባም ካተቴዳ ላታማንꬆ ላይꬃን አሲ ይሁዳን ካተቴዳ። 10 አሲ የሩሳላመን ኦይታማነ እት ላይꬃ ካተቴዳ። አ አዉዋ ዳይ ሱንꬃይ ማእኮ፤ አ አበሰሎማ ናቶ። 11 አሲ ባረ ማይዛ አዉ ዳዊተ ኦꬄዳዋዳን፥ መꬍና ጎዳ ስንꬃን ሱረባ ኦꬄዳ። 12 ጎይኖ ዎጋ ኦꬂደ አቱማ አሲ ሻርሙጽያ አቱማ አሳቱዋ አሳይ ባረ ቢታፐ ꬋይሴዳ፤ አፐ ካሰ ደኤዳ ካተቱ መꬌዳ ኤቃ ምስለቱዋ ኡባ ꬎቆለረꬂደ ኦሌዳ። 13 አ አዉዋ ዳያ ማእካካ አሼሮ ግያ ጾሳትዉ ቱና ኤቃ ምስልያ መꬌዳ ድራዉ፥ ካትያ አቶ አ ጌተትያ ቦንቹዋፐ እዞ ድጌዳ። አሲ ሄ ኤቃ ምስልያ ቃንጸሬꬂደ፥ ቀድሮና ዛንጋራን ጹጌዳ። 14 አሲ ጎይንያ ꬎቃ ሳኣ ꬋይሰናን አጎፐነ፥ እ ባረ ደኤዳ ላይꬃ ኡባን መꬍና ጎዳዉ ዎዛናፐ አማነትያ አሳ ግዲደ ደኤዳ። 15 እነ አ አዉ ጾሳዉ ዱማይ ዎꬄዳ ብራ፥ ዎርቃነ ሀራ ሚሻቱዋ አሂደ፥ ጾሳ ጌሻ ጎልያ ግዶን ዎꬄዳ።
16 ይሁዳ ካቲ አስነ እስራኤልያ ካቲ ባእሽ፥ ባረንቱ ካተቴዳ ላይꬃ ኡባን ኦለቴድኖ። 17 እስራኤልያ ካቲ ባእሽ ይሁዳ ቦላ ዎራጄዳ፤ ማዪደ ይሁዳ ካትያ አሳ ቢታፐ ኦንነ ገለናዳንነ ከሰናዳን ተአናዉ ራማ ካታማ ዩሹዋ ምንሲደ ግምቤዳ።
18 ሄዋ ጋሱዋን ካቲ አሳይ መꬍና ጎዳ ጌሻ ጎልያንነ ባረ ካትያ ጎለን አቴዳ ዎርቃነ ብራ ኡባ ከሲደ፥ ባረ ኦሳንቻቱ ኩሽያን ዎꬄዳ። ሄዝያና ናኣ ናኣ፥ ጻብርሞና ናአዉ፥ ዳማስቆ ካታማን ደእያ ሶርያ ካትያ በንሀዳዳዉ፥ እሞታ ኦꬂደ የዲደ ሀዋዳን ያጌዳ፦ 19 “ካሰ ታ አዉዋናነ ነ አቡና ጫቀቴዳዋዳን፥ አነ ታናናነ ኔናና ጫቀቶይተ። በአ፥ ሀዋ ብራነ ዎርቃ ታን ነዉ እሞታ እማናዉ የዳድ። እስራኤልያ ካቲ ባእሽ ባረ ኦላንቻቱዋ ታ ጋድያፐ ከሳና ማላ፥ ኔን ካሰ አናና ጫቀቴዳ ጫቁዋ ኮላ” ያጌዳ።
20 በንሀዳድ ካቲ አሲ ጌዳዋ ማዪደ፥ ባረ ኦላ ጋዳዎቱዋ እስራኤልያ ካታማቱዋ ኦላናዉ የዴዳ። ኡንቱንቱ አይኖ፥ ዳናነ አቤል-ቤትማእካ ጌተትያ ካታማቱዋ፥ ጋሊላ አባ ማታን ደእያ ቢታ፥ ንፍታሌማ ቢታናካ ጉጂደ ኡባ ጾኔድኖ። 21 ካቲ ባእሽ ሄዋ ስሲደ፥ ራማ ካታማ ግምቢያዋ አጊደ፥ ትርጻ ካታማ ቤዳ።
22 ሄዋፐ ጉይያን ካቲ አሲ ይሁዳን ደእያ አሳ ኡባ አዛዚና እቱነ አተናን ደንዲደ፥ ባእሽ ካሰ ያን ጎኤትያ ሹቻነ ምꬃ ራማፐ ኬዜድኖ። ካቲ አሲ ምጽጳነ ቢንያማ ቢታን ደእያ ገባአ አን ምንሲደ ግምቤዳ።
23 አሲ ሀኔዳ ሀራባይ፥ አ ምኖተꬃ ኡባይ፥ እ ኦꬄዳባይ ኡባይነ እ ኬጼዳ ካታማቱ ይሁዳ ካተቱ ታርክያ ማጻፋን ጻፈት ኡቴድኖ። ሽን እ ጭሜዳ ዎደ ገድያ ሳከቴዳ። 24 አሲ ሀይቂደ፥ ባረ ማይዛን ጋከቴዳ፤ ባረ ማይዛ አዉዋ ዳዊታ ካታማን ሞገቴዳ። አ ናአይ ዮሳፌጸ አ ሳኣን ካተቴዳ።
እስራኤልያ ካትያ ናዳባ
25 ይሁዳ ካቲ አሲ ካተቴዳ ላኤንꬆ ላይꬅ እዮርባማ ናአይ ናዳበ እስራኤላን ካተቴዳ፤ እ እስራኤልያ ቢታን ላኡ ላይꬃ ካተቴዳ። 26 ናዳበ ካሰ ባረ አዉዋ ኦግያነ እስራኤልያ አሳ እ ኦስሴዳ አ ናጋራ ኦግያን ሀመቲደ፥ መꬍና ጎዳ ስንꬃን ኢታባ ኦꬄዳ።
27 ይሳኮራ ዛርያ ግዴዳ አኪያ ናአይ ባእሽ ናዳባ ቦላ ማቀቴዳ። ሄ ዎደ ናዳብነ አ ኦላንቻቱ ፕልስጼማን ደእያ ግባቶና ካታማ ዶዲደ ደኢኖ። 28 ይሁዳ ካቲ አሲ ካተቴዳ ሄዘንꬆ ላይꬃን ባእሽ ናዳባ ዎꬍደ፤ አ ሳኣን እ ባረዉ ካተቴዳ። 29 ባእሽ ካዉተꬃ ዶሞ ሳናካ እዮርባማ ሶ አሳ ኡባ ዎꬍ ዉርሴዳ፤ መꬍና ጎዳይ ሴሎፐ ዬዳ ባረ ቆማ ትምቢትያ ኦድያ አኪያ ባጋና ኦዴዳዋዳንካ እዮርባማ ጎልያ አሳይ ኡባይ ሀይቂ ዉሬዳ። 1 ካታ. 14:10 30 ሄዌ ሀኔዳዌ እዮርባም ባረ ሁጲያዉ ኦꬄዳ ናጋራ ድራሳ፥ እስራኤልያ አሳ እ ኦስሴዳ ናጋራ ድራሳነ መꬍና ጎዳ እስራኤልያ ጾሳ ሀንቀꬄዳ ድራሳ።
31 ናዳበ ሀኔዳ ሀራባይነ እ ኦꬄዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ። 32 ይሁዳ ካትያ አስነ እስራኤልያ ካትያ ባእሽ ባረንቱ ካዉተꬃ ላይꬃ ኡባን ኦለቲደ ደኤድኖ።
እስራኤልያ ካትያ ባእሻ
33 ይሁዳ ካቲ አሲ ካተቴዳ ሄዘንꬆ ላይꬃን አኪያ ናአይ ባእሽ እስራኤልያ አሳ ኡባ ቦላ ካተቴዳ፤ እ ትርጻ ካታማን ላታማነ ኦይዱ ላይꬃ ካተቴዳ። 34 እዮርባም እስራኤልያ አሳ ኦስሴዳ ናጋራ ኦꬂደነ አ ኦግያን ሀመቲደ፥ ባእሽ መꬍና ጎዳ ስንꬃን ኢታባ ኦꬄዳ።