1 ሀናና ናኣ ዬሁ ባጋና መꬍና ጎዳ ቃላይ ባእሻባ ሀዋዳን ያጊደ ዬዳ፤ 2 “ታን ኔና ባናፐ ደንꬃደ ታ አሳ እስራኤልያ ቦላ ካፑዋ ከሳድ፤ ሽን ኔን እዮርባማ ኦግያን ሀመታዳ። ቃይ ታ አሳ እስራኤልያ ናጋራ ኦስሳደ፥ ኡንቱንቱ ናጋራን ታና ሀንቀꬃዳ። 3 ሄዋ ድራዉ፥ በአ! ታን ባእሻነ አ ጎልያ አሳ ፕታና ሀናይ። ባእሻ፥ ታን ነ ጎልያ አሳ ናባጻ ናኣ እዮርባማ ጎልያ አሳዳን ኦꬃና። 4 ባእሻ ዛርያ ግዲደ፥ ካታማን ሀይቂያ ኦናነ ካናይ ማና፤ ቃይ ጋጻርያን ሀይቂያ ኦናነ ሳሉዋ ካፎቱ ማና” ያጌዳ።

5 ባእሽ ሀኔዳ ሀራባይ፥ እ ኦꬄዳባይነ አ ምኖተꬃ እስራኤልያ ካተቱ ታርክያ ማጻፋን ጻፈት ኡቴዳ። 6 ባእሽ ሀይቂደ ባረ ማይዛን ጋከቴዳ፤ ትርጻ ካታማን ሞገቴዳ። አ ናአይ ኤል አ ሳኣን ካተቴዳ። 7 መꬍና ጎዳይ ትምቢትያ ኦድያ ዬሁ ባጋና ባእሻ ቦላነ አ ሶ አሳ ቦላ ሄ ትምቢትያ ኦዴዳ ጋሱ ባእሽ ኦꬄዳ ናጋራ ድራሳነ እዮርባምነ አ ሶ አሳይ ኦꬄዳዋዳን፥ ኢታባ ኦꬂደ፥ መꬍና ጎዳ ሀንቀꬄዳ ድራሳ። ቃይ እ እዮርባማ ሶ አሳ ኡባ ዎꬍ ዉርሴዳ ድራሳ።

8 ይሁዳ ካቲ አሲ ካተቴዳ ላታማነ ኡሱፑንꬃ ላይꬃን ባእሻ ናአይ ኤል እስራኤላን ካተቴዳ። ትርጻ ካታማን እ ላኡ ላይꬃ ካተቴዳ። 9 ካትያ ኦላ ጋዳዋቱዋፐ እቱዋ ግዲደ፥ አ ፓራ ጋረቱዋፐ ባጋ አዛዝያ ዝምር ካትያ ቦላ ማቀቴዳ። ካቲ ኤል ሄ ዎደ ትርጻን ደእያ ካትያ ጎለዉ አዎትያ አርጻ ሶን ትርጻን ማꬆት ኡቴዳ። 10 ይሁዳ ካቲ አሲ ካተቴዳ ላታማነ ላፑንꬃ ላይꬃን ዝምር አርጻ ሶ ገሊደ ካትያ ዎꬍደ፤ አ ሳኣን ባረዉ ካተቴዳ።

11 ዝምር ካዉቲደ፥ ካዉተꬃ አራታን ኡቶሳናካ ባእሻ ሶ አሳ ኡባ ዎꬌዳ። ባእሻዉ ዳቦ ግዲና ላገꬃ ግዲና እት አቱማ አሳነ ፓጻ አሽቤና። 12 ትምቢትያ ኦድያ ዬሁ ባጋና መꬍና ጎዳይ ባእሻ ቦላ ሃሳዬዳ ቃላዳን ዝምር ባእሻ ሶ አሳ ኡባ ዎꬍ ꬋይሴዳ። 13 ሄዌ ሀኔዳዌ ባእሽነ አ ናአይ ኤል ባረንቱ ኤቃዉ ጎይኒደ፥ ኦꬄዳ ናጋራ ኡባ ጋሱዋንነ እስራኤልያ አሳ ኦስሴዳ ናጋራ ጋሱዋን፥ መꬍና ጎዳ፥ እስራኤልያ ጾሳ ሀንቀꬄዳ ድራሳ።

14 ኤል ሀኔዳ ሀራባይነ እ ኦꬄዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ።

15 ይሁዳ ካቲ አሲ ካተቴዳ ላታማነ ላፑንꬃ ላይꬃን ዝምር ትርጻን ላፑን ጋላሳ ጻላላ ካተቴዳ። ሄ ዎደ እስራኤልያ ኦላንቻቱ ግባቶና ጌተትያ ፕልስጼማ ካታማ ዶዲደ ኡቴድኖ። 16 ዶድ ኡቴዳ እስራኤላቱ ዝምር ካትያ ቦላ ማቀቲደ አ ዎꬌዳዋ ስሴዳ ዎደ፥ ኦላ ጋዳዋ ኦምራ ሄ ጋላስካ ሄ ሳኣን እስራኤልያ ካትያ ከሲደ ካተዬድኖ። 17 ኦምርነ አናና ደእያ እስራኤልያ አሳይ ኡባይ ግባቶና ካታማፐ ከሲደ ቢደ፥ ትርጻ ካታማ ዶዴድኖ። 18 ካታማይ ኦይቀትክቼዳዋ በኤዳ ዎደ፥ ዝምር ካትያ ጎልያ ግዶን ደእያ ጌሱዋ ገሊደ፥ ካትያ ጎለን ታማ ኦይꬄዳ፤ ያቲደ እካ ሀይቄዳ። 19 ሄዌ ሀኔዳዌ እዮርባም ኦꬄዳ ናጋራነ እስራኤልያ አሳ ኦስሴዳ ናጋራ ካሊደ፥ ዝምር መꬍና ጎዳ ስንꬃን ኢታባ ኦꬄዳ ድራሳ።

20 ዝምር ሀኔዳ ሀራባይነ እ ማቄዳ ማቁ እስራኤልያ ካተቱ ታርክያ ማጻፋን ጻፈት ኡቴዳ።

21 ሄ ዎደ እስራኤልያ አሳይ ላኡ ከሲደ ሻከቴዳ። አሳፐ ባጋይ ግናታ ናኣ ቲብና ካተያናዉ ኮይና፥ ባጋይ ቃይ ኦምራ ካተያናዉ ኮዬዳ። 22 ሽን ኦምራ ማድያ አሳይ ግናታ ናኣ ቲብና ማድያ አሳፐ ምኔዳ። ሄዋ ድራዉ፥ ቲብን ሀይቂና ኦምር ካተቴዳ።

23 ይሁዳ ካቲ አሳይ ካተቴዳ ሀታማነ እተንꬃ ላይꬃን ኦምር እስራኤልያ አሳ ቦላ ካተቴዳ። ታማነ ላኡ ላይꬃ ሞዴዳ፤ ሄዋፐ ኡሱፑን ላይꬃ ትርጻን ሞዴዳ። 24 ኦምር ሳማርያ ግያ ደርያ ሸሜራ ጌተትያ ብታንያፐ ኡሱፑን ሻአ ጻጋራ ብራን ሻሜዳ፤ እት ካታማ አን ኬጼዳ። ያቲደ ሄ ካታማ ካሰ ሄ ደርያ ጎዳ ሱንꬃን ሳማርያ ጊደ ሱንꬄዳ።

25 ሽን ኦምር መꬍና ጎዳ ስንꬃን ኢታባ ኦꬄዳ፤ እ ባረፐ ካሰ ደኤዳ ካተቱዋ ኡባቱዋፐካ አꬍያ ናጋራ ኦꬄዳ። 26 ናባጻ ናአይ እዮርባም ኦꬄዳ ናጋራነ እስራኤልያ አሳ ኦስሴዳ ናጋራ ኦምር ካሌዳ፤ ሄ ኤቃዉ ጎይንያ ሀኖታይ መꬍና ጎዳ እስራኤልያ ጾሳ ሀንቀꬄዳ።

27 ኦምር ሀኔዳ ሀራባይ፥ እ ኦꬄዳባይነ አ ምኖተꬃ እስራኤልያ ካተቱ ታርክያ ማጻፋን ጻፈት ኡቴዳ። 28 ኦምር ሀይቂደ ባረ ማይዛን ጋከቴዳ፤ ሳማርያ ካታማን ሞገቴዳ። አ ናአይ አካብ አ ኮታን ካተቴዳ።

29 ይሁዳ ካቲ አሳይ ካተቴዳ ሀታማነ ሆስፑንꬃ ላይꬃን ኦምራ ናአይ አካብ እስራኤላን ካተቴዳ፤ ኦምራ ናአይ አካብ ሳማርያ ካታማን እስራኤልያ ቦላ ላታማነ ላኡ ላይꬃ ካተቴዳ። 30 ኦምራ ናአይ አካብ ባረፐ ካሰ ዎደ ደኤዳ ካተቱዋ ኡባቱዋፐካ አꬍያ ኢታባ መꬍና ጎዳ ስንꬃን ኦꬄዳ። 31 ናባጻ ናአይ እዮርባም ኦꬄዳ ናጋራ ኦꬅያዋ ላፋባ ጊደ ቆፕያዋ ጻላላ ግደናን ሲዶናቱዋ ካትያ ኤትባኣላ ናቶ ኤልዛቤሎ ባረዉ ማቾ ኦꬅ አኪደ፥ ባኣላ ጌተትያ ኤቃዉ ኦꬃናዉነ ጎይናናዉ ዶሜዳ። 32 ሳማርያ ካታማን እ ኬጽሴዳ ባኣላ ኤቃ ጎለን ባኣላዉ ያርሽያ ሳኣ ኬጼዳ። 33 ቃይ አካብ አሼሮ ጌተትያ ጾሳት ምስልያ ኤሲደ፥ ባረፐ ካሰ ደኤዳ ካተቱዋ ኡባቱዋፐ አꬂደ መꬍና ጎዳ እስራኤልያ ጾሳ ሀንቀꬅያ ናጋራ ኦꬄዳ።

34 አካባ ካዉተꬃ ዎደ ቤቴለፐ ዬዳ ሂኤላ ጌተትያ እት ብታኒ ያርኮ ካታማ ዛረꬂደ ኬጼዳ። ነዊ ናኣ ኢያሱ ባጋና መꬍና ጎዳይ ኦዴዳዋዳን፥ ሂኤል ያርኮ ኬጻናዉ ባስያ ዎደ፥ አቢራማ ጌተትያ አ ባይራ ናአይ ሀይቄዳ፤ ቃይ ፐንግያ አꬅያ ዎደ ሳጉባ ጌተትያ አ ዉርሰꬃ ቴፋ ናአይ ሀይቄዳ። ኢያሳ 6:26