1 ጋላኣደን ትሽበ ግያ ሳፐ ዬዳ፥ ትምቢትያ ኦድያ ኤላሳ ጌተትያ እት ብታኒ ካትያ አካባ ሀዋዳን ያጌዳ፤ “ታን አዉ ኦꬅያ መꬍና ጎዳይ እስራኤልያ ጾሳይ ኤሮ! ሀ ስንꬃና ይያ ላይꬃቱዋን ታን ኦደናን ደእሽን፥ ሳኣን እራይ ቡከና ዎይ ከተርሳይ ቤተና” ያጌዳ። ያቆባ 5:17

2 ሄዋፐ ስሚደ መꬍና ጎዳ ቃላይ ትምቢትያ ኦድያ ኤላሳኮ ዪደ አ ሀዋዳን ያጌዳ፤ 3 “ሀዋፐ ደንዳደ አዋይ ዶልያ ባጋ ባ፤ ያን ዮርዳኖሳ ሻፋፐ አዋይ ዶልያ ባጋና ደእያ ካሪታ ሻፋ ማታን ቆሰታ። 4 ኔን ሄ ሻፋፐ ሃꬃ ኡሻና፤ ቁራቱ ኔና ሄ ሳኣን ቁማ ምዛናዳን ታን ኡንቱንታ አዛዛድ” ያጌዳ። 5 ኤላስ መꬍና ጎዳይ ጌዳዋ ኦꬄዳ፤ ዮርዳኖሳ ሻፋፐ አዋይ ዶልያ ባጋና ደእያ ካሪታ ሻፋ ቢደ፥ ያን ኡቴዳ። 6 ዎንታነ ኦማርስ ቁራቱ ኡክꬃነ አሹዋ ኤላሳዉ አሂኖ፤ ሃꬃካ ሻፋፐ ኡሼ። 7 ጋድያን እራይ ቡከና ድራዉ፥ ጉꬃ ዎድያፐ ጉይያን ሻፋይ መሌዳ።

8 ሄዋፐ ጉይያን መꬍና ጎዳ ቃላይ ኤላሳኮ ዪደ፥ አ ሀዋዳን ያጌዳ፤ 9 “ሀ ሳፐ ደንዳደ፥ ሲዶና ማታን ደእያ ስራፍታ ባ፤ ያን ደአሻ። እት አምኤ ምሽራታ ኔና ቁማ ምዛናዳን ታን አዛዛድ” ያጌዳ። ሉቃሳ 4:25-26

10 ኤላስ ደንዲደ ስራፍታ ቤዳ፤ እ ካታማ ፐንግያኮ ጋክያ ዎደ፥ እት አምኤ ምሽራታ ምꬃ ምጻዉ። ኤላስ ምሽራቶ ጼሲደ፥ “ሀያና፥ ታዉ ኡሻናዉ ሃꬃ ቡልያን አካ ያርኪ” ያጌዳ። 11 ምሽራታ ሃꬃ አሀናዉ ቢሽን እ ጼሲደ፥ “ሀያና ጉꬃ ባሶ ኡክꬃካ አካደ ያርኪ” ያጌዳ።

12 ምሽራታ አዉ፥ “መꬍና ጎዳይ ነ ጾሳይ ኤሮ! ታዉ ኡክꬃይ ባዋ። ታዉ ኦቱዋን እት ኩቻ ꬊሊነ ጻሩዋን ጉꬃ ዛይተ ጻላላይ ደኤ። ታን ሀዋ ዬዳዌ ጉꬃ ምꬃ ምጻደ፥ ሶ ስማደ፥ ህኖካ ታዉነ ታ ናአዉ እት ገደ ኡካናሳነ ሚደ ሀይቃናሳ” ያጋዱ።

13 ኤላስ ምሽራትዉ፥ “አየነ ባዋ፥ ያዮፓ፤ ባደ ኔና ጌዳዋዳን ኦꬃ። ሽን ካሰታደ ነ ꬍልያፐ ጉꬃ ኮምፑዋ ኮምፓደ ታዉ አካ ያ፤ ሄዋፐ ስማደ ነዉነ ነ ናአዉ ኮምፓ። 14 አያዉ ጎፐ፥ መꬍና ጎዳይ እስራኤልያ ጾሳይ፥ ‘ሳኣ ቦላን መꬍና ጎዳይ እራ ቡክሳና ጋካናዉ፥ ꬊሊ ኦቱዋፐ ዉረና፤ ዛይቲካ ጻሩዋፐ ዉረና’ ያጌ” ያጌዳ።

15 ሄዋ ድራዉ፥ ምሽራታ ባደ፥ ኤላስ ኦዴዳዋዳን ኦꬃዱ፤ ሄዋን ኤላስ፥ ምሽራታነ እ ሶ አሳይ ኡባ ጋላስ ቁማ ሜድኖ። 16 አያዉ ጎፐ፥ መꬍና ጎዳይ ኤላሳ ባጋና ኦዴዳ ቃላ ናጊደ፥ ኦቱዋፐ ꬊሊ ዉርቤናነ ጻሩዋፐ ዛይቲካ ዉርቤና።

17 ጉꬃ ዎድያፐ ጉይያን ሄ ጎልያ ጎዳት ናአይ ሀርጌዳ፤ ሀርጊ ጎብ ጎብ ቢና፥ ዉርሰꬃን ናአይ ሸምፑዋ ተኤቲደ ሀይቄዳ። 18 ያትና፥ ምሽራታ ኤላሳ፥ “ጾሳ አሳው፥ ኔን ታና ሞርክያባይ አያነ? ኔን ታ ናጋራ ሀሳይሳደ ታ ናኣ ዎꬋናዉ ያድ?” ያጋዱ።

19 ኤላስ እዞ፥ “ነ ናኣ ታዉ ሀማ” ያጌዳ። ናኣ እ ክዉዋፐ አኪደ፥ ፑደ ባረ ደእያ ፖቅያ አፊደ ባረ አርሳን ግስሴዳ። 20 ያቲደ መꬍና ጎዳዉ ሀዋዳን ያጊደ ዋሴዳ፤ “አቤት መꬍና ጎዳዉ፥ ታ ጾሳዉ፥ ቃይ ሀ ታን ደእያ ምሽራት አምአት ናኣ ዎꬋደ፥ እ ቦላካ መቱዋ አያይ?” ያጌዳ። 21 ሄዋፐ ስሚደ ናኣ ቦላ ሄዙ ገደ ዛቁሊደ፥ መꬍና ጎዳዉ ሀዋዳን ያጊደ ዋሴዳ፤ “አቤት መꬍና ጎዳዉ፥ ታ ጾሳዉ፥ ሀ ናኣ ሸምፑዋ ዛራ” ያጌዳ። 2 ካታ. 4:34-35

22 መꬍና ጎዳይ ኤላሳ ዋሱዋ ስሴዳ። ናኣ ሸምፑካ ስምና፥ ናአይ ፓጼዳ። 23 ኤላስ ናኣ አኪደ ፖቅያፐ ዱገ ዎꬌዳ፤ ናኣ አትዉ እሚደ ሀዋዳን ያጌዳ፤ “በአ፥ ነ ናአይ ፓጼዳ” ያጌዳ።

24 ሄዋፐ ጉይያን ምሽራታ ኤላሳ፥ “ኔን ጾሳ አሳ ግዴዳዋነ ነ ዶናፐ ኦደትያ መꬍና ጎዳ ቃላይ ቱማ ግዴዳዋ ታን ሀእ ኤራድ” ያጋዱ።