1 እራይ ꬋዮደፐ ሄዘንꬆ ላይꬃን፥ ኡንደና አግናይ አꬍና መꬍና ጎዳይ ኤላሳ፥ “ባ፤ ካትያ አካባዉ ቤታ። ታን ሀ ቢታን እራ ቡክሳና” ያጌዳ። 2 ኤላስ አካባዉ ቤታናዉ ደንዲደ ቤዳ።

ሄ ዎደ ሳማርያን ዎልቃማ ኮሻይ ደኤ። 3 አካብ ባረ ጎለዉ አዎትያ ኦባድያ ጼሴዳ። ኦባድ መꬍና ጎዳ ምንሲደ አማንያ አሳ። 4 ኤልዛቤላ መꬍና ጎዳ ሱንꬃን ትምቢትያ ኦድያዋንታ ዎꬍስያ ዎደ፥ ኦባድ ኡንቱንቱፐ ጼታቱዋ አኪደ፥ እሻታሙዋ እሻታሙዋ ሻክ፥ ጎንጎሎቱዋ ግዶን ቆሲደ፥ ካꬃ ምዚደ ሃꬃካ ኡሺደ ዎꬄዳ።

5 አካብ ኦባድያ ጼሲደ፥ “ጋድያን ሳኣን ፑልቱ ደእያ ሳኣ ኡባነ ሻፋ ፑልቱዋ ኡባ ባ። ኦን ኤሪ፥ ኑን ማታ ደሚደ ፓራቱዋነ ባቁሎቱዋ ዎናን አሻናዌንቶነ” ያጌዳ። 6 ኡንቱንቱ ቢታ ሻክ ሻክ አክና፥ አካብ እት ኦግያ ኦይቂደ ባረካ ቤዳ፤ ቃይ ኦባደካ ሀራ ኦግያ ኦይቂደ ባረካ ቤዳ።

7 ኦባድይ ባረ ኦግያ ኦይቂደ ቢሽን፥ ኤላስ አናና ጋከቴዳ። ኦባድ ኤላሳ ኤሪደ ባረ ዴሙዋን ጉፋኒደ፥ “ታ ጎዳዉ ኤላሳ፥ ሀዌ ኔኔየ?” ያጌዳ።

8 ኤላስ አዉ፥ “ኤ ታና። ኔን ባደ፥ ‘ኤላስ ሀዋን ደኤ’ ያጋደ ነ ጎዳዉ ኦዳ” ያጌዳ።

9 ኦባድ ኤላሳዉ፥ “ታን ኔና አይ ናቂኔ ኔን ታና ነ ቆማ ሀይቆ ጋደ አካባ ኩሽያን አꬃ እምያዌ? 10 መꬍና ጎዳይ ነ ጾሳይ ኤሮ! ታ ጎዳይ ኔና ኮይሳናዉ ኪትቤና ደሪ ዎይ ካዉተꬅ ኡባካ ባዋ። ኡንቱንቱ፥ ‘ኤላስ ሀዋን ባዋ’ ያግያ ዎደ፥ ኔን ሄዋን ባይናዌ ቱማ ግድያዋ ኤራናዉ አካብ ደርያ ሞድያዋንታ ጫቂሴዳ። 11 ሀእ ኔን ታና፥ ባደ ነ ጎዳዉ፥ ‘ኤላስ ሀዋን ደኤ’ ያጋደ ኦዳ ያጋሳ። 12 ታን ኔና የጋደ ቦዋን፥ መꬍና ጎዳ አያናይ ኔና ደንꬂደ፥ ታን ኤረና ሳኣ አፋና። ታን አካባዉ ኦድና፥ እ ኔና ደማና ꬋዮፐ፥ ታና ዎꬋና። ታን ነ ቆማይ ናአተꬃደፐ ዶማደ መꬍና ጎዳዉ ያይያ አሳ። 13 ኤልዛቤላ መꬍና ጎዳ ሱንꬃን ትምቢትያ ኦድያዋንታ ዎꬍስያ ዎደ፥ ታን መꬍና ጎዳ ናባቱዋፐ ጼቱዋ አካደ፥ እሻታሙዋ እሻታሙዋ እት ጎንጎሉዋን ቆሳደ፥ ቁማ ምዛድነ ሃꬃካ ኡሻድ። ያትና፥ ሀ ታን ኦꬄዳባይ ነዉ ታ ጎዳዉ ኦደትቤኔየ? 14 ሀእ ቃይ ኔን ታና፥ ባደ ነ ጎዳዉ፥ ‘ኤላስ ሀዋን ደኤ’ ያጋደ ኦዳ ያጋሳ። ኦዶፐ እ ታና ዎꬋና” ያጌዳ።

15 ኤላስ አ፥ “ታን አዉ አዛዘትያ፥ ኡባፐ ዎልቃማ መꬍና ጎዳይ ኤሮ! ቱማ ታን ሀቼ አካባዉ ቤታና” ያጌዳ።

16 ኦባድ አካባና ጋከታናዉ ቤዳ፤ አካባዉ ኦዴዳ። አካብ ኤላሳና ጋከታናዉ ቤዳ። 17 አካብ ኤላሳ በኤዳ ዎደ፥ “እስራኤልያ ጋድያ አꬃ የግያዌ፥ ላ ሀዌ ኔኔ?” ያጌዳ።

18 ኤላስ አካባ፥ “እስራኤልያ ቢታ አꬅ የግያዌ ታና ግድከ። መꬍና ጎዳ አዛዙዋ አጊደ፥ ባኣላ ኤቃቶ ጎይኒደ፥ ቢታ አꬅ የግያዌ ኔናነ ነ አዉዋ ሶ አሳ። 19 ሀእ እስራኤልያ አሳ ኡባ ቃርመሎሳ ደርያ ታኮ ሺሻ፤ ቃይ ኤልዛቤል ማዳፐ ምያ ትምቢትያ ኦድያዋንታ ኡባ ኡንቱንቱና እትፐ ሄ ሳኣ ሺሻ። ሄዋንቱካ ባኣላ ሱንꬃን ትምቢትያ ኦድያ ኦይዱ ጼታነ እሻታማቱዋነ አሼር ሱንꬃን ትምቢትያ ኦድያ ኦይዱ ጼታቱዋ” ያጌዳ።

20 ሄዋ ድራዉ፥ አካብ ኪቲደ፥ እስራኤልያ አሳ ኡባነ ትምቢትያ ኦድያዋንታ ቃርመሎሳ ደርያ ሺሼዳ። 21 ኤላስ ሺቄዳ አሳኮ ቢደ፥ “አዉደ ጋካናዉ ላኡ ቆፋን ባንቴ? መꬍና ጎዳይ ጾሳ ግዶፐ፥ አ ካልተ፤ ግደናን ባኣላ ግዶፐ፥ እን አካ ካልተ” ያጌዳ። አሳይ አዉ ቃላነ ቃተናን ጮኡ ጌዳ።

22 ሄዋፐ ጉይያን ኤላስ አሳዉ ሀዋዳን ያጌዳ፤ “መꬍና ጎዳ ሱንꬃን ትምቢትያ ኦድያዋንቱፐ ታ ጻላላይ አታድ፤ ሽን ባኣላ ሱንꬃን ትምቢትያ ኦድያዋንቱ ኦይዱ ጼታነ እሻታማ። 23 አነ ኑዉ ላኡ ኮሩማ ቦራቱ እመትኖ። ሄ ኮሩማቱዋፐ እቱዋ ኡንቱንቱ ዶርኖ፤ ኮሩማ ሹኪደ ቃንጸሬꬅኖ፤ ያቲደ አሹዋ ምꬃ ቦላ ዎꬅኖ፤ ሽን ታማ ኤꬆፕኖ። ታንካ ላኤንꬆ ኮሩማ ጊግሳደ፥ ምꬃ ቦላ ዎꬃና፤ ታንካ ታማ ኤꬅከ። 24 ህንተንቱ ህንተንቱ ጾሳ ሱንꬃ ጼስተ፤ ታንካ መꬍና ጎዳ ሱንꬃ ጼሳና። ኮዪደ፥ ያርሹዋ ምያ ታማ ኪትያ ጾሳይ ጾሳ ግዶ” ያጌዳ።

አሳይ፥ “ሀዌ ሎኦ ቆፋ” ያጊደ ማዬዳ።

25 ሄዋ ድራዉ፥ ኤላስ ባኣላ ሱንꬃን ትምቢትያ ኦድያዋንታ፥ “ህንተንቱ ጮራ ግድያ ድራዉ፥ እት ኮሩማ ዶር አኪደ፥ ካሰቲደ ጊግስተ። ያቲደ ህንተንቱ ጾሳ ሱንꬃ ጼስተ፤ ሽን አን ታማ ኤꬆፕተ” ያጌዳ።

26 ኡንቱንቱ ባረንቶ እመቴዳ ኮሩማ አኪደ ጊግሴድኖ።

ዎንታፐ ሴታ ጋላስ ጋካናዉ፥ ባኣላ ሱንꬃ ጼሲደ፥ “ሀይ ባኣላ፥ ኑ ዎሳ ስሳ” ያጊደ ዎሴድኖ። ሽን ስሰትያ ኮሻይ ባዋ፤ እት አሳይነ ኮይቤና። ያትና፥ ባረንቱ ጊግሴዳ ያርሽያ ሳኣ ዩይ አꬊደ ዱሬድኖ።

27 ሳአይ ሴታ ጋላሳ ግድና፥ ኤላስ ኡንቱንቱ ቦላ፥ “ህንተንቱ ቃላ ꬎቁ ኦꬂደ ዎስተ! እ ጾሳ ግደኔ! ኦን ኤሪ፥ እ ቆፋን ሼኬደንቶ፥ ዎይ አዉ ኪታይ ዳሬደንቶ፥ ዎይ ሄራ ከሴደንቶ፥ ዎይ ገምእሼዳዋ ግዶፐ ደንꬃናዉ ኮሼ!” ያጊደ ቅሊጬዳ።

28 ያግና ባረንቱ ቃላ ꬎቁ ኦꬂደ ዎሴድኖ። ቃይ ካሰ ባረንቱ ጎይንያ ዎጋዳን ባረንቱ ቦላና ሱꬃይ ጎጋና ጋካናዉ ቶራንነ ማሻን ባረንታ ጫዴድኖ። 29 ያርሹዋ ሺሽያ ኦማርሳይ ጋካናዉ ኡንቱንቱ ሄዋዳን ሀኒደ፥ ትምቢትያ ኦዲኖ፤ ሽን ስሰትያ ኮሻይ ባዋ። ኡንቱንቱባ ሀይዚደ ዛሮ እምያባይ እቱነ ባዋ።

30 ያትና፥ ኤላስ አሳ ኡባዉ፥ “ሃ ታኮ ሺቅተ” ያጌዳ። አሳይ አኮ ሺቅና፥ መꬍና ጎዳዉ ያርሽያ ሳአይ ኮለት ክቼዳዋ ዛረꬂደ ግምቤዳ። 31 መꬍና ጎዳ ቃላይ ያቆባኮ ዪደ፥ “ነ ሱንꬃይ እስራኤልያ ግዳናዋ” ያጊደ ኦዴዳ ያቆባ ናና ዛራቱዋ ፓይዱዋዳን ኤላስ ታማነ ላኡ ሹቻቱዋ አኬዳ። ዶመꬃ 32:28፤ 35:10 32 መꬍና ጎዳ ሱንꬃዉ ሄ ሹቻቱዋን ያርሽያ ሳኣ ግምቤዳ። ታማነ ኦይዱ ባꬃ ሃꬃ ትግና አክያ ኦላ ያርሽያ ሳኣ ዩሹዋን ቦኬዳ።

33 ሄዋፐ ጉይያን ያርሽያ ሳኣ ቦላ ምꬃ ጊግስ ዎꬂደ፥ ኮሩማ አሹዋ አ ቆሙዋን ቆሙዋን ቃንጸረꬂደ፥ ምꬃ ቦላ ዎꬄዳ። አሳቱዋ፥ “ኦይዱ ባꬃቱዋን ሃꬃ ኩንꬂደ፥ ጹጋና ያርሹዋ ቦላነ ምꬃ ቦላ ጉስተ” ያጌዳ፤ ኡንቱንቱ ጉሴድኖ። 34 ያትና፥ ኤላስ አሳቱዋ፥ “ላኤንꬁዋካ ጉጅተ” ያጌዳ፤ ኡንቱንቱ ላኤንꬁዋ ጉጄድኖ።

ቃይካ ኤላስ አሳቱዋ፥ “ሄዘንꬁዋካ ጉጅተ” ያጌዳ፤ ሄዘንꬁዋካ ጉጄድኖ። 35 ሃꬃይ ያርሽያ ሳኣ ዩሹዋን ጎጊደ ኦላን ሃꬃይ ኩሜዳ።

36 ኦማርሳ ያርሹዋ ሺሽያ ዎዲ ጋክና፥ ትምቢትያ ኦድያ ኤላስ ያርሽያ ሳኣ ሺቂደ ሀዋዳን ያጊደ ዎሴዳ፤ “አቤት መꬍና ጎዳዉ፥ አብራሃማ ጾሳዉ፥ ይሳቃ ጾሳዉ፥ እስራኤልያ ጾሳዉ፥ ኔን እስራኤልያ ቢታን ጾሳ ግድያዌነ፥ ታንካ ነ ቆማ ግድያዌነ፥ ቃይ ታን ሀዋ ኡባ ነ ቃላን ኦꬅያዌ ሀቼ ኤረቶ። 37 አቤት መꬍና ጎዳዉ፥ ኮያ! ኔን መꬍና ጎዳይ ጾሳ ግድያዋነ ኔን ኡንቱንቱ ዎዛና ኔኮ ዛራደ ደእያዋ ሀ አሳቱ ኤራናዳን ኔን ታዉ ኮያ!” ያጌዳ።

38 መꬍና ጎዳ ታማይ ዎꬊደ፥ ጹግያ ያርሹዋ፥ ምꬃ፥ ሹቻነ ቢታ ሜዳ፤ ኦላ ግዶን ደእያ ሃꬃካ ላጬዳ። 39 አሳይ ኡባይ ሄዋ በኤዳ ዎደ፥ ባረንቱ ዴሙዋን ጉፋኒደ፥ “መꬍና ጎዳይ ጾሳ! መꬍና ጎዳ ጻላላይ ጾሳ!” ያጌድኖ።

40 ሄዋፐ ጉይያን ኤላስ ኡንቱንታ፥ “ባኣላ ሱንꬃን ትምቢትያ ኦድያዋንታ ኦይቂተ። ኡንቱንቱፐ እት አሳይነ ከስ አኪደ ቦፖ” ያጌዳ። ኡንቱንታ ኦይቄድኖ፤ ኤላስ ኡንቱንታ ቂሾና ሻፋ አፊደ ዎꬌዳ።

41 ኤላስ አካባ፥ “ከሳደ ባ፤ ማ ኡሻ። አያዉ ጎፐ፥ ዎልቃማ እራ ጉንꬃይ ስሰቴ” ያጌዳ። 42 ሄዋ ድራዉ፥ አካብ ማናዉነ ኡሻናዉ ቤዳ። ሽን ኤላስ ቃርመሎሳ ደርያ ጼራ ከሴዳ፤ ባረ ዴሙዋ ባረ ጉልባታቱ ግዶ ዱገ ገልሲደ ጉፋኔዳ። ያቆባ 5:18

43 ሄዋፐ ጉይያን ኤላስ ባረ ቆማ፥ “ባ፤ ፑደ ከሳደ አነ አባኮ ዛራደ ጼላ” ያጌዳ።

አ ቆማይ ብ ጼሊደ አዉ፥ “አያይነ ባዋ” ያጌዳ።

ኤላስ ባረ ቆማ ላፑን ካላ፥ “ቃይካ አነ ጼላ” ያጌዳ።

ቆማይ ላፑ ገደ ጼሌዳ። 44 ላፑን ገደ ጼላና፥ “በአ፥ አሳ ኩሽያ ኬሻ ሻሪ አባፐ ከሴዳ” ያጌዳ።

ኤላስ ባረ ቆማ፥ “ባ፤ አካባ፥ ‘እራይ ኔና ቡሳ ድገናዳን፥ ነ ፓራ ጋርያን ኡታደ፥ ዱገ ነ ሶ ዎꬋ’ ያጋ” ያጌዳ።

45 ጉꬃ ኬሻ ጋምእሽን፥ ሳሉ ሻርያን ꬉሜዳ፤ ጫርኩካ ጫርኬዳ፤ ዎልቃማ እራይካ ቡኬዳ። አካብ ፓራ ጋርያን ኡቲደ እዝራኤላ ካታማ ቤዳ። 46 መꬍና ጎዳ ዎልቃይ ኤላሳ ቦላ ዎꬌዳ፤ ኤላስ ካባ ሳቂያን ፑደ ስርቂደ፥ እዝራኤላ ካታማ ጋካናዉ አካባፐ ስንꬃቲደ ዎጼዳ።