1 ኤላስ ኦꬄዳዋ ኡባነ ባኣላ ሱንꬃን ትምቢትያ ኦድያዋንታ ኡባ ማሻን እ ዎት ዎꬌደንቶ አካብ ኤልዛቤልዉ ኦዴዳ። 2 ኤልዛቤላ፥ “ኔን ሄ ትምቢትያ ኦድያዋንታ ኦꬄዳዋዳን፥ ዎንት ሀኖደ ታን ኔና ኦꬃና ꬋዮፐ፥ ጾሳቱ ታና ዎꬋና” ያጋደ ኤላሳዉ ኪታዱ።

3 ኤላስ ባረ ሸምፖ ያዪደ፥ ይሁዳ ቢታን ደእያ በርሳበሀ ዬዳ። ባረ ቆማ ሄዋን የጊደ፥ 4 ባረካ እት ጋላሳ ኦግያ ዎራን ሀመቴዳ። ቢደ እት ሳንካራ ኩዋን ኡቲደ፥ “አቤት መꬍና ጎዳዉ፥ ታዉ ግዳናዋ፤ ታን ታ ማይዛ አዎቱዋፐ ኬክከ። ታ ሸምፑዋ አካ” ያጊደ ሀይቃናዉ ዎሴዳ። ዮሃ. 4:3

5 ሄዋፐ ጉይያን ሳንካራ ኩዋን ዛቁሊደ ገምእሼዳ፤ እት ኪታንቻይ አ ቦቺደ፥ “ደንዳደ ማ” ያጌዳ። 6 እ ጼልያ ዎደ፥ ሆኦ ሹቻ ምሹዋን ኡከቴዳ ኮምፖ ኡክꬃይነ ኦቱዋ ሃꬃይ አ ሁጲሳን ደእያዋ በኤዳ። ሚደ ኡሼዳነ፤ ያቲደ ጉየ ግሴዳ። 7 መꬍና ጎዳ ኪታንቻይ ላኤንꬁዋ ዪደ ኤላሳ ቦቺደ፥ “ኔን ባና ኦጊ ዳሮ አዱሳ ግድያ ድራዉ፥ ደንዳደ ማ” ያጌዳ።

8 ኤላስ ደንዲደ ሜዳነ ኡሼዳነ። ሄ እ ሜዳ ቁማ ዎልቃን ጾሳ ደርያ ሲና ጋካናዉ፥ ኦይታሙ ጋላሳነ ኦይታሙ ቃማ ሀመቴዳ። 9 ሄ ሳኣን ደእያ ጎንጎሉዋ ግዶ ገሊደ አቄዳ።

መꬍና ጎዳይ አ፥ “ኤላሳ፤ ሀዋን አይ ኦꬃይ?” ያጌዳ።

10 ኤላስ፥ “ኡባፐ ዎልቃማ መꬍና ጎዳዉ ጾሳዉ ታን ዳሮፐ ምሸታድ። አያዉ ጎፐ፥ እስራኤልያ አሳይ ኔናና ጫቀቴዳ ጫቁዋ መንꬄዳ፤ ነዉ ያርሽያ ሳኣካ ክንቼዳ፤ ነ ሱንꬃን ትምቢትያ ኦድያዋንታካ ማሻን ዎꬌዳ። ያትና፥ ታን ታረካ አታድ፤ ሀእ ኡንቱንቱ ታ ሸምፑዋካ አካናዉ ኮይኖ” ያጌዳ። ሮመ 11:3

11 መꬍና ጎዳይ አ፥ “ሄዋፐ ከሳ ባደ፥ ደርያ ሁጲያን ታ ስንꬃን ኤአ” ያጌዳ። ኤላስ ኤቂደእሽን መꬍና ጎዳይ አ ማታና አꬌዳ። ሄ ዎደ ምኖ ዎልቃማ ጫርኩ ደርያ ጳልቀሬꬄዳ፤ ዛላቱዋካ ክንቼሬꬄዳ፤ ሽን መꬍና ጎዳይ ሄ ጫርኩዋ ግዶን ባዋ። ጫርኩዋፐ ስምና ቢታይ ቃጼዳ፤ ሽን መꬍና ጎዳይ ሄ ቢታ ጋጻንካ ባዋ። 12 ቢታ ጋጻፐ ስምና ታማይ ከሴዳ፤ ሽን መꬍና ጎዳይ ታማ ግዱዋን ባዋ። ታማፐ ስምና ሳሱከꬃይ ስሰቴዳ። 13 ኤላስ ሄ ሳሱከꬃ ስሴዳ ዎደ፥ ባረ ዴሙዋ ካባን ካሜዳ። ያቲደ ካረ ከሲደ ጎንጎሉዋ ፐንግያን ኤቄዳ።

ኤላሳኮ ኮሻይ ዪደ፥ “ኤላሳ፥ ሀዋን አይ ኦꬃይ?” ያጌዳ።

14 ኤላስ፥ “ኡባፐ ዎልቃማ መꬍና ጎዳ ጾሳዉ ታን ዳሮፐ ምሸታድ። አያዉ ጎፐ፥ እስራኤልያ አሳይ ኔናና ጫቀቴዳ ጫቁዋ አꬌዳ፤ ነዉ ያርሽያ ሳካ ክንቼዳ፤ ነ ሱንꬃን ትምቢትያ ኦድያዋንታካ ማሻን ዎꬌዳ። ያትና፥ ታን ታረካ አታድ፤ ሀእ ኡንቱንቱ ታ ሸምፑዋካ አካናዉ ኮይኖ” ያጌዳ።

15 መꬍና ጎዳይ ኤላሳ፥ “ኔን ዬዳ ሳኣና ስማደ፥ ዳማስቆ ባዙዋ ባ። ያ ጋካደ፥ ሀዛኤል ሶርያ ቦላ ካተታናዳን ኦካ። 2 ካታ. 8:7-13 16 ቃይ ንምሻ ናአይ ዬሁ እስራኤልያ ቦላ ካተታናዳን ኦካ። ነ ሳኣን ትምቢትያ ኦዳናዳን አቤል ማሆላፐ ዬዳ ሻፋጻ ናኣ ኤልሳአ ኦካ። 2 ካታ. 9:1-6 17 ሀዛኤላ ማሻፐ ከስ አክያ ኡባ ዬሁ ዎꬋና፤ ቃይ ዬሁ ማሻፐ ከስ አክያ ኡባ ኤልሳእ ዎꬋና። 18 ባኣላዉ ጉልባትቤና ዎይ ባረንቱ ዶናን ባኣላ ኤቃ የርቤና ላፑን ሻአ አሳ ታን እስራኤልያን ታዉ አሻና” ያጌዳ። ሮመ 11:4

19 ኤላስ ሄ ሳፐ ደንድ ቢደ፥ ሻፋጻ ናአይ ኤልሳእ ታማነ ላኡ ዋꬃ ቦራን ጋድያ ጎሽያዋ ደሜዳ፤ ታማነ ላኤንꬃ ዋꬃ ኤልሳእ ባረ ሁጲያዉ ኦይቂደ ጎሼ። ኤላስ አ ማታና አꬊደ፥ ባረ ካባ አ ማይዜዳ። 20 ኤልሳእ ቦራቱዋ የግ አግ፥ ኤላሳ ጌዱዋ ዎጺደ፥ “ታን ታ አዉዋነ ታ ዳዮ ሳሩዋን ጋደ፥ የራ አካደ፥ ሄዋፐ ስማደ፥ ኔና ካላና” ያጌዳ።

ኤላስ ኤልሳአ፥ “ባ። ታን ነዉ አይ ኦꬃድታ?” ያጌዳ።

21 ሄዋ ድራዉ፥ ኤልሳእ አጊደ ጉየ ስሚደ ዋꬃ ቦራቱዋ ሹኬዳ፤ ቦራ ሚሻ ጳልቂ ኤꬂደ አሹዋ ዶይሴዳ፤ አሹዋ አꬅና አሳይ ሜዳ። ሄዋፐ ጉይያን ደንድ ቢደ፥ ኤላሳዉ ኦꬄዳ።