1 ሶሪነ እስራኤሊ ኦለተናን ሄዙ ላይꬃ ሳሮ ደኤድኖ። 2 ሄዛንꬆ ላይꬃን ይሁዳ ካቲ ዮሳፌጸ እስራኤልያ ካትያ በአናዉ ቤዳ። 3 እስራኤልያ ካቲ ባረ ቆማቶ፥ “ጋላኣደን ደእያ ራሞታ ካታማይ ኑዋ ግድያዋነ ኑን ሀኖ ጋꬃናዉ ሄ ካታማ ሶርያ ካትያፐ ዎꬅ አካናዉ አይነ ኦꬅቤናዋ ኤርክቴ?” ያጌዳ። 4 ቃይካ እ ዮሳፌጻ፥ “ጋላኣደን ደእያ ራሞታ ካታማ ኦላናዉ ታናና ባኒ?” ያጌዳ።

ዮሳፌጸ እስራኤልያ ካትያ፥ “ኤ፥ ኔን ኦላ ባናዉ ጊግያ ዎደ አዉደነ፥ ታን ጊጋና። ታ ኦላንቻቱ ነ ኦላንቻቱዋ ማላ፤ ታ ፓራቱካ ነ ፓራቱዋ ማላ” ያጌዳ። 5 ቃይካ ዮሳፌጸ እስራኤልያ ካትያ፥ “ግዶፐነ፥ ኔን ካሰታደ መꬍና ጎዳ ኦቻ” ያጌዳ።

6 እስራኤልያ ካቲ ትምቢትያ ኦድያ ኦይዱ ጼቱዋ አሳቱዋ እትፐ ሺሺደ፥ “ጋላኣደን ደእያ ራሞታ ካታማ ኦላናዉ ቦ ቦፖ?” ያጊደ ኡንቱንታ ኦቼዳ።

ኡንቱንቱ፥ “ባ፤ አያዉ ጎፐ፥ ጾሳይ ሄ ካታማ ካትያ ነ ኩሽያን አꬂደ እማና” ያጌድኖ።

7 ሽን ዮሳፌጸ፥ “ኑን መꬍና ጎዳ ኦቻናዉ ዳንዳይያ ትምቢትያ ኦድያ ሀራ አሳይ ሀዋን ባዌ?” ያጌዳ።

8 እስራኤልያ ካቲ ዮሳፌጻዉ ዛሪደ፥ “ኑን አ ባጋና መꬍና ጎዳ ኦቻናዉ ዳንዳይያ እት ሀራ ብታኒ ደኤ፤ እ ይምላ ናኣ ምካሳ። ሽን ታን አ እጻይ፤ አያዉ ጎፐ፥ እ ኡባ ዎደካ ታዋ ኢታባ ኦዴፐ አትና ሎኦባ ኦድ ኤረና” ያጌዳ።

ዮሳፌጸ እስራኤልያ ካትያ፥ “ካቲ ሄዋዳን ጎፖ!” ያጌዳ።

9 ሄዋፐ ጉይያን እስራኤልያ ካቲ ባረ ኦሳንቻቱዋፐ እቱዋ ጼሲደ፥ “ይምላ ናኣ ምካሳ ኤለካ አካደ ያ” ያጌዳ።

10 እስራኤልያ ካቲነ ይሁዳ ካቲ ዮሳፌጸ ባረንቱ ካዉተꬃ ማዩዋ ማዪደ፥ ሳማርያ ካታማ ገልያ ፐንግያ ማታን ደእያ ኡዱማን ባረንቱ ካዉተꬃ አራታን ኡቴድኖ፤ ትምቢትያ ኦድያ ኡባቱ ኡንቱንቱ ስንꬃን ትምቢትያ ኦዲኖ። 11 ኡንቱንቱፐ እቱ፥ ካናእና ናአይ ጽድቂ ብራታፐ ካጨቱዋ ጊግሲደ፥ አካባ፥ “መꬍና ጎዳይ ሀዋዳን ያጌ፤ ‘ሶረቱ ꬋያና ጋካናዉ ኔን ኡንቱንታ ሀ ካጨቱዋን ቃይጫና’ ያጌ” ያጌዳ። 12 ትምቢትያ ኦድያ ሀራ ኡባቱካ፥ “ጋላኣደን ደእያ ራሞታ ካታማ ባደ ኦላ፤ ኦላደካ ጾና። አያዉ ጎፐ፥ መꬍና ጎዳይ ሄ ካታማ ካትያ ኩሽያን አꬂደ እማና” ያጊደ ኦዴድኖ።

13 ሄዋፐ ጉይያን ምካሳ ጼሳናዉ ኪተት ቤዳ ብታኒ አ፥ “በአ፥ ትምቢትያ ኦድያ ኡባቱ እት ዶና ግዲደ፥ ‘ካቲ ሀ ኦላ ጾናና’ ያጊደ ኦዴድኖ። ሄዋ ድራዉ፥ ሀያና ነ ኦዱካ ኡንቱንቱፐ እቱዋ ማላ ግዶ፤ ኔንካ ሎኦባ ኦዳ” ያጌዳ።

14 ሽን ምካስ ሄ ብታንያ፥ “መꬍና ጎዳይ ኤሮ! መꬍና ጎዳይ ታዉ ኦድያዋ ታን ኦዳና” ያጌዳ።

15 ምካስ ካትያኮ ዬዳ ዎደ፥ ካቲ አ፥ “ምካሳ፥ ኑን ጋላኣደን ደእያ ራሞታ ካታማ ኦላናዉ ባኔየ ቦፓነ?” ያጊደ ኦቼዳ።

ምካስ ካትያ፥ “ባደ ኦላ፤ ኦላደካ ጾና። መꬍና ጎዳይ ሄ ካታማ ካትያ ኩሽያን አꬂደ እማና” ያጌዳ።

16 ካቲ አ፥ “ኔን መꬍና ጎዳ ሱንꬃን ቱሙዋፐ አትና ሀራባ ታዉ ኦደናዳን ታን ኔና አፑ ገደ ጫቀꬃናዉ ኮሺ?” ያጌዳ።

17 እ፥ “እስራኤልያ ኦላንቻቱ ኡባይ ሄንꬃንቻይ ባይና ዶርሳቱዋዳን ደርያን ላለቴዳዋንታ ታን በኣድ። መꬍና ጎዳይ ኡንቱንታ፥ ‘ሀዋንቶ ጎዳይ ባዋ። ኡንቱንቱ ኡባይካ ባረንቱ ሶ ባረንቱ ሶ ሳሮ ቢኖ’ ያጌ” ያጌዳ። ፓይ. 27:17፤ ማቶሳ 9:36፤ ማር. 6:34

18 እስራኤልያ ካቲ ዮሳፌጻ፥ “ ‘እ ታዋ ኢታባ ኦዴፐ አትና፥ ሎኦባ ኦድ ኤረና’ ጋደ፥ ታን ነዉ ኦዳበይክታ?” ያጌዳ።

19 ምካስ ጉጂደካ ሀዋዳን ያጌዳ፤ “ስም መꬍና ጎዳይ ግያዋ ስሳ! መꬍና ጎዳይ ባረ ካዉተꬃ አራታን ኡትና፥ ሳሉዋ ኦላንቻቱ ኡባይ አ ኡሸቻናነ ሀድርሳና ኤቄዳዋንታ ታን በኣድ። ኢሳ. 6:1፤ ኢዮባ 1:6 20 መꬍና ጎዳይ፥ አካበ ጋላኣደን ደእያ ራሞታ ካታማ ቢደ፥ ያን ሀይቃናዳን ባለꬃናዌ ኦኔ? ያጌዳ። እቱ ሀዋዳን ግያ ዎደ፥ ሀራይ ቃይ ሄዋዳን ጌዳ። 21 ሄዋፐ ጉይያን ኢታ አያናይ ከሲደ መꬍና ጎዳ ስንꬃን ኤቂደ፥ ‘ታን አ ባለꬃና’ ያጌዳ።

22 “መꬍና ጎዳይ አያና፥ ዋታ ባለꬃን? ያጌዳ።

“አያናይ፥ ‘ታን ከሳ ባደ፥ አዉ ትምቢትያ ኦድያዋንቱ ኡባቱዋ ዶናን ዎርዶትያ አያና ግዳና’ ያጌዳ።

“መꬍና ጎዳይ፥ ‘ኤ፥ ኔን አ ባለꬃና፤ ነዉ ሄዌ ሀናና። ባደ ባለꬃ’ ያጌዳ” ያጌዳ።

23 ምካስ ጉጂደካ፥ “ሄዋ ድራዉ፥ መꬍና ጎዳይ ነዉ ትምቢትያ ኦድያዋንቱ ሀዋንቱ ኡባቱዋ ዶናን ዎርዶትያ አያና ዎꬄዳ፤ አያዉ ጎፐ፥ መꬍና ጎዳይ ነ ቦላ ባሻ አሀናዉ ቃቼዳ” ያጌዳ።

24 ሄዋፐ ጉይያን ካናእና ናአይ ጽድቂ ሺቂደ፥ ምካሳ ሻይያ ባቂደ፥ “መꬍና ጎዳ አያናይ ታ ማታፐ ዋኒደ ነዉ ኦዳናዉ ቤዴ?” ያጌዳ።

25 ምካስ አ፥ “ኔን ቆሰታናዉ ቆልኦ ገልያ ጋላስ ሄዋ ደማና” ያጌዳ።

26 ሄዋፐ ጉይያን እስራኤልያ ካቲ ባረ ኦላንቻቱዋፐ እቱዋ አዛዚደ፥ “ምካሳ ኦይቃደ ካታማ ሞድያ አሞናዉነ ታ ናኣ ዮኣሻዉ አፋደ እማ። 27 ኡንቱንታ፥ ካቲ ህንተንታ፥ ‘ሀ ብታንያ ቃሾ ጎለን ቃቺደ ታን ሳሮ ስማና ጋካናዉ፥ ጉꬃ ኡክꬃፐነ ሃꬃፐ ሀራባ አያነ አዉ እሞፕተ’ ያጌ ያጋ” ያጌዳ።

28 ምካስ አ፥ “ቱሙ ኔን ሳሮ ስምያዋ ግዶፐ፥ መꬍና ጎዳይ ታናን ሃሳይቤና” ያጌዳ። ቃይካ ምካስ፥ “አሳዉ ኡባዉ፥ ታን ኦዴዳዋ አኬክተ” ያጌዳ።

29 ሄዋፐ ጉይያን እስራኤልያ ካቲነ ይሁዳ ካቲ ዮሳፌጸ ጋላኣደን ደእያ ራሞታ ካታማ ቤድኖ። 30 እስራኤልያ ካቲ ዮሳፌጻ፥ “ታን ማዩዋ ላማደ፥ ሀራ አሳ ማላታደ፥ ኦላዉ ገላና፤ ሽን ኔን ነ ካትያ ማዩዋ ማያ” ያጌዳ። እስራኤልያ ካቲ ማዩዋ ላሚደ፥ ሀራ አሳ ማላቲደ፥ ኦላዉ ገሌዳ።

31 ሶርያ ካቲ ባረ ፓራ ጋረቱዋ አዛዝያ ሀታማነ ላኡ አሳቱዋ፥ “ግታትና ጉጽና ሀራ አሳ ኦናናካ ኦለቶፕተ፤ እስራኤልያ ካትያ ጻላላና ኦለትተ” ያጊደ አዛዜዳ።

32 ፓራ ጋርያ አዛዝያዋንቱ ዮሳፌጻ በኤዳ ዎደ፥ “ቱማ ሀዌ እስራኤልያ ካትያ” ያጌድኖ። አናና ኦለታናዉ ስሜድኖ፤ ዮሳፌጸ ዋሴዳ። 33 ፓራ ጋረቱዋ አዛዝያዋንቱ እ እስራኤልያ ካትያ ግደናዋ በኢደ፥ አ የደርስያዋ አግ አጌድኖ።

34 እት ብታኒ ጮ ባረ ዎንዳፍያን ኦላንቻቱ ቦላ ዱኪደ፥ እስራኤልያ ካትያ ኦላ ማዩ ጋከትያ ሄራና ጫዴዳ። እስራኤልያ ካቲ ባረ ጋርያ ላግያ ብታንያ፥ “ጋርያ ጉየ ዛራደ፥ ታና ኦላ ግዱዋፐ ከሳ። አያዉ ጎፐ፥ ታን ኢታ ጫቻ ጫደታክቻድ” ያጌዳ። 35 ሄ ጋላስ ኦላይ ሱልያ ዎደ፥ እስራኤልያ ካቲ አካብ ባረ ፓራ ጋርያ ግዶን ዘምፒደ፥ ሶረቱዋ ስንꬃን ታኬዳ። አ ጫቻ ሱꬃይ ፓራ ጋርያ ግዶ ጉክና፥ ሄ ኦማርስካ እ ሀይቂ ባሼዳ።

36 አዋይ ዉላናዉ ማትሽና ኦላንቻቱ ግዶን፥ “አሳይ ኡባይ ባረ ካታማ ባረ ካታማ ቦ! አሳይ ኡባይ ባረ ጋድያ ባረ ጋድያ ቦ!” ያግያ አዛዙ ከሴዳ።

37 ሄዋፐ ጉይያን ኡንቱንቱ ካትያ ሳማርያ ካታማ አሂደ ያን ሞጌድኖ። 38 ሻርሙጻቱ ሜጨትያ፥ ዳጋት ኡቴዳ ሳማርያ ሃꬃን ኡንቱንቱ ጋርያ ሜጬድኖ። መꬍና ጎዳይ ካሰ ሃሳዬዳ ቃላዳንካ፥ አ ሱꬃ ካናቱ ላጬድኖ።

39 አካብ ሀኔዳ ሀራባይ፥ እ ኦꬄዳባይ ኡባይ፥ ዳንጋርሳ ዛልያን ካትያ ጎልያ እ ኬጼዳባይነ እ ግምቤዳ ካታማቱዋባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ። 40 አካብ ሀይቂደ ባረ ማይዛን ጋከቴዳ፤ አ ሳኣን አ ናአይ አካዝያስ ካተቴዳ።

41 እስራኤልያ ካቲ አካብ ካተቴዳ ኦይደንꬆ ላይꬃን አሳ ናአይ ዮሳፌጸ ይሁዳን ካተቴዳ። 42 እ ካተትያ ዎደ ላይꬃይ አዉ ሀታማነ እቼሻ፤ እ የሩሳላመን ላታማነ እቼሹ ላይꬃ ካተቴዳ። አ ዳያ ሺልሀ ናቶ አዙቦ ጌተታዉ። 43 ዮሳፌጸ ባረ አዉዋ አሳ ኦግያን ኡባን ሀመቴዳ፤ እ ሄ ኦግያፐ ሸርእ ግቤና፤ መꬍና ጎዳ ስንꬃን ሱረባ ኦꬄዳ። ግዶፐነ፥ ጎይንያ ꬎቃ ሳኣ ꬋይስቤና፤ አሳይ ሄ ግሹዋን ያርሹዋ ያርሽያዋነ እጻና ጩዋይያዋ አግቤና። 44 ዮሳፌጽካ እስራኤልያ ካትያና ስገቴዳ።

45 ዮሳፌጸ ሀኔዳ ሀራባይ፥ አ ምኖተꬃይነ እ ኦለቴዳ ኦላይ ይሁዳ ካተቱ ታርክያ ማጻፋን ጻፈት ኡቴዳ። 46 ጎይኖ ዎጋ ኦꬂደ አቱማዋንቱ አቱማዋንቱና ሻርሙጽያዋንታ፥ አ አዉ አሳይ ካተቴዳ ዎድያፐ አቴዳዉንታ ጋድያፐ ꬋይሴዳ።

47 ሄ ዎደ ኤዶማ ቢታን ካቲ ባዋ፤ ሄ ቢታ ሱንቴዳ ካፑ ሞዴዳ።

48 ኦፊራ ጋድያ ቢደ ዎራ አሀናዳን ዮሳፌጸ ዎልቃማ ማርካባቱዋ መꬌዳ፤ ሽን ሄ ማርካባቱ ኤጽዮን-ጋብራን መኤረቴድኖፐ አትና ኡባካ ብበይክኖ። 49 ሄ ዎደ አካባ ናአይ አካዝያስ ዮሳፌጻ፥ “ታ ቆማቱዋና ነ ቆማቱዋ እትፐ ማርካብያን ቢኖ” ያጌዳ፤ ሽን ዮሳፌጸ እጼዳ።

50 ዮሳፌጸ ሀይቂደ ባረ ማይዛን ጋከቴዳ። ባረ ማይዛ አዉዋ ዳዊታ ካታማን ሞገቴዳ። አ ሳኣን አ ናአይ ዮራመ ካተቴዳ።

51 ይሁዳ ካቲ ዮሳፌጸ ካተቴዳ ታማነ ላፑንꬃ ላይꬃን አካባ ናአይ አካዝያስ እስራኤልያ ቦላ ሳማርያን ካተቴዳ፤ እስራኤልያ ቦላ ላኡ ላይꬃ ካተቴዳ። 52 አካዝያስ መꬍና ጎዳ ስንꬃን ኢታባ ኦꬄዳ፤ ባረ አዉዋነ ባረ ዳይ ኦግያንነ እስራኤልያ አሳ ናጋራ ኦስሴዳ ናባጻ ናኣ እዮርባማ ኦግያን ሀመቴዳ። 53 አካዝያስ ባኣላዉ ኦꬄዳነ ጎይኔዳ። አ አዉ ካሰ ኦꬄዳዋዳን፥ መꬍና ጎዳ፥ እስራኤልያ ጾሳ እ ሀንቀꬄዳ።