1 አካብ ሀይቄዳዋፐ ጉይያን፥ ሞኣበ ቢታ አሳይ እስራኤልያ ቦላ ደንዴዳ።

2 ሄ ዎደ ካቲ አካዝያስ ሳማርያ ካታማን ቦላ ፖቅያ ባራንዳፐ ኩንዲደ ደሸቴዳ። ሄዋ ድራዉ አሳቱዋ፥ “ቢተ፤ ታን ሀ ደሸꬃፐ ፓጻነንቶ፥ አጋነንቶ፥ ኤቅሮና ካታማ ጾሳ ብኤል-ዘቡላ አነ ታዉ ኦችተ” ያጊደ ኪቴዳ።

3 ሽን መꬍና ጎዳ ኪታንቻይ ትስቢያ ኤላሳ ሀዋዳን ያጌዳ፤ “ባ፤ ፑደ ባደ፥ ሳማርያ ካቲ ኪቴዳ አሳቱዋና ጋከታ። ኡንቱንታ፥ ‘ህንተ ኤቅሮና ካታማ ጾሳ ብኤል-ዘቡላ ኦቻናዉ ቤዳዌ፥ እስራኤልያን ጾሳይ ꬋይኔየ?’ ያጋ። 4 ሄዋ ድራዉ፥ መꬍና ጎዳይ ሀዋዳን ያጌ፤ ‘ካትያዉ፥ ኔን ሀይቃናፐ አትና፥ ሀ ግሴዳ ግሱዋፐ ደንዳካ’ ያጌ” ያጌዳ። ኤላስ ቢደ፥ ኡንቱንቶ ኦዴዳ።

5 ኪቴዳ አሳቱ ካትያኮ ጉየ ስምና፥ እ ኡንቱንታ፥ “አያዉ ስሜድቴ?” ያጊደ ኦቼዳ።

6 ሽን ኡንቱንቱ አዉ ሀዋዳን ያጊደ ዛሬድኖ፥ “እት ብታኒ ኑናና ጋከታናዉ ዪደ፥ ህንተና ኪቴዳ ካትያኮ ስሚደ ቢተ።” አዉ ሀዋዳን ያግተ “መꬍና ጎዳይ ኔና፥ ‘ኤቅሮና ጾሳ ብኤል-ዘቡላ ኦሽሳናዉ ኔን አሳ ኪትያዌ፥ እስራኤልያን ጾስ ꬋይኔየ? ሄዋ ድራዉ፥ ኔን ሀይቃናፐ አትና፥ ሀ ግሴዳ ግሱዋፐ ደንዳካ ያጌ’ ያግተ ያጌዳ” ያጌድኖ።

7 ካቲ ኡንቱንታ፥ “ህንተንቱና ጋከታናዉ ዪደ፥ ሀ የዉዋ ህንተንቶ ኦዴዳ ብታኒ አይ ማላ አሴ?” ያጊደ ኦቼዳ።

8 ኡንቱንቱ፥ “መህያ እስክያን ዳደቴዳ ካባ ማዪደ፥ ባረ ጼሳን ዳፉዋ ዳንጬ” ያጊደ ዛሬድኖ። ማቶሳ 3:4፤ ማር. 1:6

እ፥ “ሄዌ ትስቢያ ኤላሳ” ያጌዳ።

9 ሄዋፐ ጉይያን፥ ካቲ እሻታሙዋ ካፑዋ አ እሻታሙ ኦላንቻቱዋና ኪቴዳ። ካፑ ደርያ ሁጲያን ኡቴዳ ኤላሳኮ ፑደ ከሲደ፥ “ጾሳ አሳዉ፥ ካቲ ኔና፥ ‘ዱገ ዎꬋ’ ያጌ” ያጌዳ።

10 ሽን ኤላስ እሻታሙዋ ካፖ፥ “ታን ጾሳ አሳ ግዶፐ፥ ታማይ ሳሉዋፐ ዎꬊደ፥ ኔናነ ነ እሻታማቱዋነ ሞ” ያጊደ ዛሬዳ። ታማይ ሳሉዋፐ ዎꬊደ፥ እሻታሙዋ ካፑዋነ አ እሻታማቱዋነ ሜዳ። ሉቃሳ 9:54

11 ቃይ ካቲ ሀራ እሻታሙ ኦላንቻቱዋና ሀራ እሻታሙዋ ካፑዋ ኤላሳኮ ኪቴዳ። እሻታሙዋ ካፑ ኤላሳ፥ “ጾሳ አሳዉ፥ ካቲ ኔና፥ ኤለካ ዱገ ዎꬋ ያጌ” ያጌዳ።

12 ኤላስ አዉ፥ “ታን ጾሳ አሳ ግዶፐ፥ ታማይ ሳሉዋፐ ዎꬊደ፥ ኔናነ ነ እሻታማቱዋነ ሞ” ያጌዳ። ጾሳ ታማይ ሳሉዋፐ ዎꬊደ፥ እሻታሙዋ ካፑዋነ አ እሻታማቱዋነ ሜዳ።

13 ቃይካ ካቲ እሻታሙ ኦላንቻቱዋና ሀራ ሄዘንꬆ እሻታሙዋ ካፑዋ ኪቴዳ። እሻታሙዋ ካፑ ፑደ ከሲደ፥ ኤላሳ ስንꬃን ጉልባቲደ፥ “ጾሳ አሳዉ፥ ሀያና፥ ታናነ ታናና ደእያ ሀ እሻታሙ አሳቱዋ ማራ! ኑ ሸምፑዋካ ሀይቁዋፐ አሻ! 14 ታማይ ሳሉዋፐ ዎꬊደ፥ ካሰ እሻታማቱዋ ካፑዋ አሳነ ኡንቱንታ እሻታማቱዋ ኡባነ ሜዳ። ሽን ሀእ ታና ማራ!” ያጊደ ዎሴዳ።

15 መꬍና ጎዳ ኪታንቻይ ኤላሳዉ፥ “ያዮፓ! አናና ዱገ ዎꬋ” ያጌዳ።

ኤላስ ደንዲደ፥ አናና ዱገ ዎꬌዳ። 16 እ ካትያዉ፥ “መꬍና ጎዳይ ኔና ሀዋዳን ያጌ፤ ‘ነዉ ኦቻናዉ እስራኤልያን ጾስ ꬋይኔ፥ ኔን ኤቅሮና ጾሳ ብኤል-ዘቡላ ኦቻናዉ አሳ ኪቴዳዌ? ኔን ሀዋ ኦꬄዳ ድራዉ፥ ሀይቃና! ነ ግሴዳ ግሱዋፐካ ደንዳካ’ ያጌ” ያጌዳ።

17 ኤላስ ሃሳዬዳ መꬍና ጎዳ ቃላዳንካ አካዝያስ ሀይቄዳ፤ አካዝያሳዉ አቱማ ናእ ባይና ድራዉ፥ አ እሻይ ዮራመ አ ኮታን ካተቴዳ፤ ሄዌ ሀኔዳዌ ዮሳፌጻ ናአይ ዮራመ ይሁዳን ካዉቴዳ ላኤንꬆ ላይꬃና። 18 አካዝያስ ሀኔዳ ሀራባይነ እ ኦꬄዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ።